Read Sayula Popoluca San Mateo 25 Bible Online

San Mateo 25 - Sayula Popoluca bible

San Mateo 25

¹’Mit tʉntumuquips̈áj nat imanda̱twa'n Dios. Ayé as̈am diez quis̈ajyat jeme imunʉs̈caway igascándi̱jlat pa iguipa̱jtsougawa'n noviona' jeme nicʉ'pa̱jtʉ́mpay.

²Mit cinco ayé quis̈ajyat pensa̱tcau oy, mit jacinco quis̈ajyat capensa̱tcawu oy.

³Ni'c ayé quis̈ajyat jeme capensa̱tcaway oy imunʉs̈cau igascándi̱jlat, po igamunʉs̈cawu may gas.

⁴Po ayé quis̈ajyat jeme pensa̱tcaway oy imunʉs̈cau igascándi̱jlat, mit imunʉs̈cawey gas ilime̱tani'jcat.

⁵Mit jego'c pa icojawa'n ayé novio, mit ayé quis̈ajyat ma̱gutotscau mit cʉs̈ ma̱gau.

⁶Mit pu̱jtsu'm imaraugau ni'c ya̱s̈cap, inʉmgau: “¡Yam imi'n noviona'! ¡Nʉs̈ pa̱jtsóuga!”

⁷Mit cʉs̈ ca's̈ʉ'jcau nu'pʉjʉn ayé quis̈ajyat, mit i-oyajcau igascándi̱jlat.

⁸Mit ayé quis̈ajyat jeme capensa̱tcaway oy inʉmgajau ayé quis̈ajyat jeme pensa̱tcaway oy: “Moygac s̈ʉ̱n gas ni'c pi'chcanup tʉngascándi̱jlat.”

⁹Po ayé quis̈ajyat jeme pensa̱tcaway oy iguipo'ngau: “Tʉnje'jat igapa'támpey pa ʉjtsat. Mejor nʉ́s̈ca mam iguito'jca mit júyga gas pa mijchat.”

¹⁰Mit ijanʉ́s̈caj iguijúyga, coy noviona', mit ayé cinco quis̈ajyat prepará̱tijcatway tʉgʉygau mit je' mam iguiwatca cʉ'pa't. Mit i-atucta̱jcau ayé tʉc-ájw.

¹¹Cʉs̈ mingawatu jacinco quis̈ajyat, mit inʉmgau: “¡Señor, Señor, awa̱tscajac tʉc-ájw!”

¹²Po je' ipo'ngʉs̈: “Iyacs̈ta'cway tʉnʉmgʉs̈ap, tʉga-is̈capcʉs̈p.”

¹³Mit Jesús inʉm: —Jemni'c tsʉ̱́nga prepara̱tic ni'c ingajawigap ti s̈ʉjw ne ti hora tʉmi'nwa'n ʉ̱ jeme tʉjatway jayau.

¹⁴’Mit tʉnʉmgʉs̈áj nat imanda̱twa'n Dios. Ayé as̈am tu'c jayau jeme nʉcs̈way yagats, mit iya̱s̈cʉs̈ imozojat, mit imoygʉs̈ itumi̱n pa ma tuyos̈watca.

¹⁵’Tu'c imozo imoy cinco mil pesu, mit jatu'c imoy dos mil pesu, mit jatu'c imoy mil pesu. Imoygʉs̈ cada mozo pʉjʉn i-oyawa'n iguituyos̈watca, mit cʉs̈ nʉcs̈ yagats.

¹⁶Mit ayé mozo jeme ipʉctso̱way cinco mil pesu nʉcs̈ mit ituyos̈wat ayé tumi̱n, mit itu-actsʉ̱nau jacinco mil pesu.

¹⁷We'ney ayé mozo jeme ipʉctso̱way dos mil pesu itu-actsʉ̱nau jados mil pesu.

¹⁸Po ayé mozo jeme ipʉctso̱way mil pesu, nʉcs̈ mit itáj tu'c cʉt na̱s̈ni'c mit icuyu'jtsau ijayc itumi̱n.

¹⁹’I-íjtʉj may tiempu, min ijaycat ayé mozojat, mit i-acpichingʉs̈au icuentajat.

²⁰Mit icojy ayé mozo ipʉctso̱way cinco mil pesu, imumin jacinco mil pesu, mit inʉm: “Señor, ʉ̱ is̈tumuyac cinco mil pesu. Yam is̈aguep, mit tʉntu-actsʉ̱nau jacinco mil pesu.”

²¹Mit iguinajau ijayc: “Oyo'gu is̈wajt. Mi̱ mi tu'c mozo oyway mit micumplia̱tp. Intuwat oy s̈ʉ̱nu tʉtumuyacway, jinap tʉtumuyagáj más may. Jinap ji'gámpey injo̱jt mit ʉ̱.”

²²Icojyey ayé mozo jeme ipʉctso̱way dos mil pesu, inʉm: “Señor, ʉ̱ is̈tumuyac dos mil pesu. Yam is̈aguep, mit tʉntu-actsʉ̱nau jados mil pesu.”

²³Iguinajau ijayc: “Oyo'gu is̈wajt. Mi̱ mi tu'c mozo oyway mit micumplia̱tp. Intuwat oy s̈ʉ̱nu tʉtumuyacway. Jinap tʉtumuyagáj más may. Jinap ji'gámpey injo̱jt mit ʉ̱.”

²⁴Po icojy ayé mozo jeme ipʉctso̱way mil pesu, inʉm: “Señor, tʉ-is̈cap mi̱ as̈am tu'c jayau manda̱tpay mʉgʉc. Migayos̈watp incamni'c po incosecha̱tp, mit impʉctso̱p ayé cosecha po ingani̱pu mi̱.

²⁵Jemni'c tʉpʉ̱jt, mit oy tʉs̈cuyu'ts inmil pesu na̱s̈cʉtʉm. Yam is̈aguep lo que inje'way.”

²⁶Iguipo'n ijayc: “¡Mi̱ mi tu'c mozo ma̱lway mit micandʉ'n! Injawip ni'c tʉncosecha̱tp lo que tʉngani̱pay.

²⁷Jemni'c oyate is̈cayajc tʉntumi̱n bancuni'c, mit tʉmi'nwa'n tʉmpʉctso̱pate lo que tʉnje'way, mit tʉnactsʉ̱nájate más.”

²⁸Mit inʉmgʉs̈au jeme tsʉ̱ngaway jem: “Chi'tcaja ayé mil pesu mit moyga ayé mozo jeme ijtʉpay diez mil pesu.

²⁹Ni'c jeme ijtʉpay, imoygáj japu̱t mit ijtʉ̱́j más. Mit jeme ca-ijtʉpay may, ichi'tcajáj nu'pʉjʉn ijtʉpay.”

³⁰Inʉm Jesús: —Ayé mozo jeme caservia̱tpay ica'tspichingáj chitimicni'c pe'ta̱m. Jem jayajwat ijʉygawa'n mit iguitunas̈cawa'n mʉgʉc.

³¹’Ʉ̱ jeme tʉjatway jayau tʉmi'náj oymanac mit nu'pʉjʉn tʉn-ángejlat, mit wejpu'n tʉnitsʉ̱nda̱jcʉ̱́j tʉntrononi'c oymanacway.

³²Mit tʉnapʉcmujcʉs̈áj nu'pʉjʉn jayajwat na̱s̈ni'cway mam ʉ̱ tʉtsʉ̱nawa'n, mit tʉnaparta̱tcʉs̈áj ayé jayajwat as̈am tu'c borregucuida̱tpayna', ni'c je' i-aparta̱tp borregujat tu'c laj mit chibujat jatu'c laj.

³³Ni'c borregujat as̈am oyjayajwat mit tʉnyajcʉs̈áj tʉn-oyimaylajni'c, mit chibujat as̈am maljayajwat mit tʉnyajcʉs̈áj tʉn-anajyimaylajni'c.

³⁴Wejpu'n ʉ̱ tʉtsʉ̱náj as̈am rey mit tʉnyʉmgʉs̈áj a é oyjayajwat jeme tsʉ̱ngapay tʉn-oyimaylajni'c: “Yam minga ni'c is̈-oyninʉmgap tʉnte̱t Dios, mit je' is̈pʉctsougáj mam imanda̱twa'n, ni'c ayé lugar oyaguic pa mijchat desde ichu̱chij ayʉ̱́j mundu, mit je' is̈-e'pcáj as̈am is̈wajyat.

³⁵Ni'c tʉcayo'jcʉu mit is̈moygau cayan. Tʉnʉ-u̱go'jcʉu mit is̈moygau nʉ'. Tʉyo'y jaynʉ'jcopacni'c mit is̈pʉctsougau oymanac.

³⁶Tʉnga-aguepu jamuc mit is̈moygau jamuc. Tʉtu'jnʉu mit is̈tʉcyo'ygau. Tʉtsʉ̱nau cuytujugum mit oy is̈-e'pcap mam tʉtsʉ̱́naj.”

³⁷Mit cʉs̈wa'n jeme iwatcaway oy tʉs̈po'ngáj: “Señor, ¿mu̱tij tʉ-ís̈caj ni'c micayo'jcʉu mit tʉmoygau cayan? mit ¿mu̱tij inyʉ-u̱go'jcʉj mit tʉmoygau nʉ'?

³⁸Mit ¿mu̱tij tʉ-ís̈caj ni'c miyo'y jaynʉ'jcopacni'c mit tʉpʉctsougau oymanac? mit ¿mu̱tij is̈ca-aguejp jamuc mit tʉmoygau jamuc?

³⁹Mit ¿mu̱tij tʉ-ís̈caj mitu'nij mit mitsʉ̱nap cuytujugum, mit oy tʉ-e'pca mam intsʉ̱naj?”

⁴⁰Mit ʉ̱ tʉmpo'ngʉs̈áj: “Iyacs̈ta'cway tʉnʉmgʉs̈ap ni'c as̈am is̈wátcajaj oy tu'c ayʉ̱́j tʉnhermanujat más titicway, casi ʉ̱j ayé is̈watcajaway oy.”

⁴¹’Mit cʉs̈wa'n tʉnyʉmgʉs̈ámpey ayé maljayajwat jeme tsʉ̱ngapay tʉn-anajyimaylajni'c: “Niju'pcʉjʉ mam ʉ̱ ni'c mimaldicioná̱tijcat. Tʉ́gʉyga en ayé jʉjn capi'chpay nunca, mit ayé oyaguic pa Awayagatsna' mit we'ney pa i-ángejlat ma̱jlatway.

⁴²Ni'c tʉcayo'jcʉu mit is̈camoygawu cayan. Tʉnʉ-u̱go'jcʉu mit is̈camoygawu nʉ'.

⁴³Tʉyo'y jaynʉ'jcopacni'c mit is̈capʉctsougawu. Tʉnga-aguepu jamuc mit is̈camoygawu jamuc. Tʉtu'jnʉu mit tʉtsʉ̱nau cuytujugum mit ca-oyu is̈-e'pcap.”

⁴⁴Mit cʉs̈wa'n tʉs̈po'ngámpey: “Señor, ¿mu̱tij tʉ-ís̈caj ni'c micayo'jcʉu, minʉ-u̱go'jcʉu, miyo'y jaynʉ'jcopacni'c, inga-aguepu jamuc, mitu'jnʉu, mitsʉ̱nau cuytujugum, mit tʉgamajyigawu?”

⁴⁵Mit cʉs̈wa'n tʉmpo'ngʉs̈áj: Iyacs̈ta'cway tʉnʉmgʉs̈ap ni'c as̈am is̈cawátcajaj oy tu'c ayʉ̱́j tʉnhermanujat más titicway, casi ʉ̱j ayé is̈cawatcajaway oy.

⁴⁶Mit ayʉ̱́jat iwatcaway mal nʉs̈cáj pa iguitunas̈cawa'n pa siempre. Mit jeme iwatcaway oy nʉs̈cáj mam i-it vida jeme cacʉs̈ámpay.