Read Sayula Popoluca San Mateo 26 Bible Online

San Mateo 26 - Sayula Popoluca bible

San Mateo 26

¹Mit cʉs̈ Jesús igui-ajque's̈cʉ́s̈aj we'n, inʉmgʉs̈au ipʉctampajyat:

²—Injawigap ni'c togoyp mechc s̈ʉjw pa nas̈tsougawa'n ma̱s̈ʉjw pascua, mit ʉ̱ jeme tʉjatway jayau tʉs̈-entrega̱tcáj pa tʉs̈yajcáj cunu̱s̈ni'c.

³Mit wejpu'n judíujat imʉjpa̱nijat, i-ajque's̈capay ley mit na'waywájat nʉ'jcopacni'cway ni-apʉcmujcʉjʉu itʉcm ayé mʉjpa̱nij inʉ'jyway Caifás.

⁴Mit ni-acochigʉjʉu nat iguiwe̱twatcajawa'n Jesús, mit i-actangáj pa igui-ago'jcawa'n.

⁵Po inʉmgau: —Nagawátca neti ma̱s̈ʉuni'c magaya̱s̈cada̱jca nʉ'jcopac jayajwat.

⁶Mit Jesús tsʉ̱nau nʉ'jcopac Betania tʉc Simón jeme ijtʉway lla̱gas.

⁷Mit iguicutomiu tu'c to's̈ay, mit imuyo'y tu'c s̈a̱nu patsic mit perfume tsówajway. Je' itemgu'jtau Jesús icopacni'c mam itsʉ̱na me̱s̈ani'c.

⁸Igui-ís̈caj we'n, awa'nigau ayé pʉctampajyat, mit inʉmgau: —¿Pa ti igui-actogojy ayé perfume?

⁹Ni'c oyapate nas̈to'jca tsowaj pa nas̈moygawa'n pro̱wijwájat ayé tumi̱n.

¹⁰Iguimarajw we'n Jesús, inʉmgʉs̈au: —¿Tini'c is̈che'jca ayé to's̈ay? ni'c tʉs̈wajtau tu'c cosa oyway.

¹¹Ni'c siempre pro̱wijat tsʉ̱ngáj mit mijchat, po ʉ̱ tʉgatsʉ̱náj nu'pʉjʉn tiempu yam mit mijchat.

¹²Ni'c tʉs̈temgu'jtau ayʉ̱́j perfume tʉncuerpuni'c. Ayé iwat pa tʉs̈-oyagáj antes tʉs̈ni̱pcáj á̱nimacʉtni'c.

¹³Iyacs̈ta'cway tʉnʉmgʉs̈ap ni'c jʉmgapa'tu mam iguinʉmdacyo'ygawa'n ayʉ́j oyway noticia, inʉmgámpey lo que iwatway ayʉ̱́j to's̈ay, pa we'n inijawigáj je'.

¹⁴Mit cʉs̈ tu'c de ayé doce pʉctampajyat inʉ'jyway Judas Iscariote nʉcs̈ mam itsʉ̱nga judíujat imʉjpa̱nijat,

¹⁵mit inʉmgʉs̈au: —¿Ti is̈moygáj te tʉ-entrega̱tcʉs̈ap Jesús incʉ'jugujmat? Mit cʉs̈ je'jat iguitso̱jcajau treinta tumi̱n de plata.

¹⁶Mit desde ayé hora iche'n tu'c oyway tiempu pa igui-entrega̱twa'n Jesús ayé jayajwat icʉ'jugujmat.

¹⁷Coy primers̈ʉjw de ayé ma̱s̈ʉjw itucaygapay ma̱s̈anʉ̱n sin levadura. Mingau ipʉctampajyat mam Jesús, mit i-ucyo'tcau: —¿Jʉm is̈wa'n tʉ-oyajcajawa'n pa incaywa'n en ayé ma̱s̈ʉjw pascua?

¹⁸Mit Jesús inʉmgʉs̈au: —Nʉ́s̈ca nʉ'jcopacni'c mam itsʉ̱na tu'c jayau, mit nʉ́mgaja: “Inʉmp Amayipay: Intujugum tʉntsowáj ma̱s̈ʉjw pascua mit tʉmpʉctampajyat, ni'c tomo'ganu pa tʉnʉs̈nuwa'n.”

¹⁹Mit ayé pʉctampajyat iwatcau as̈am Jesús iguinʉmgajau, mit iprepara̱tcau pa iguitsowa'n ayé ma̱s̈ʉjw pascua.

²⁰Icutsu'ij, Jesús nitsʉ̱nda̱jcʉu me̱s̈ani'c mit ayé doce pʉctampajyat.

²¹Mit meru-ate icáyga, Jesús inʉm: —Iyacs̈ta'cway tʉnʉmgʉs̈ap ni'c itp tu'c de mijchat jeme tʉs̈to'ctʉgʉyámpay.

²²Mit tu'no'jcau ijo̱jtat, mit cʉjtu'c cʉjtu'c i-ucyo'tcau: —¿Ʉ̱j ayé, Señor?

²³Mit cʉs̈ Jesús ipo'ngʉs̈: —Jeme icompay icʉ' mit ʉ̱ puna̱tuni'c, jemé ayé tʉs̈to'ctʉgʉyámpay.

²⁴Iyacs̈ta'cway ʉ̱ jeme tʉjatway jayau tʉs̈jatáj as̈am itsʉ̱na ja'yic Dios ilibruni'c. Po ¡pro̱wij de ayé jayau jeme tʉs̈to'ctʉgʉyámpay ʉ̱ jeme tʉjatway jayau! Más oy maga-itate ayé jayau.

²⁵Cʉs̈ Judas jeme iguito'ctʉgʉyámpay cotsta̱c, inʉm: —Amayipay, ¿ʉ̱j ayé? Jesús ipo'n. Iyacs̈ta'cway lo que inyʉmpay.

²⁶Mit meru-ate icáyga, Jesús ipʉc ma̱s̈anʉ̱n, mit cʉs̈ iguibendiciona̱jt, i-emgada̱c, mit imoygʉs̈ ipʉctampajyat, inʉm: —Ʉjʉga, cáyga, ni'c ayʉ̱́j as̈am tʉncuerpu.

²⁷Mit iguipʉjc tu'c vasu, inʉjmau Dios ni'ctiyu̱s̈, mit imoygʉs̈, inʉm: —Tu-ú̱jca minu'pʉjʉjnat.

²⁸Ni'c ayʉ̱́j as̈am tʉnyipin pa ma it tu'c nam acuerdu, mit tʉnyipin pujʉ'gáj pa jayajwat ma tsʉ̱nga perdona̱tic nu'pʉjʉn mal iwatcaway.

²⁹Mit tʉnʉmgʉs̈ap ni'c jinap pa jʉpm tʉngaja-u'gáj vinu mit mijchat hasta ayé s̈ʉjw cuandu natsʉ̱ngawa'n tuwitic mam imanda̱t tʉnte̱t Dios.

³⁰Mit cʉs̈ igui-ʉ́ugaj tu'c himnu, pichingau pa ayé copac los Olivos.

³¹Mit cʉs̈ Jesús inʉmgʉs̈au: —Jinapay tsu' ʉ̱ is̈cuyaguigáj minu'pʉjʉjnat ni'c ja'yic itsʉ̱na Dios ilibruni'c: “Tʉnago'gáj borregucuida̱tpayna' mit cunʉs̈icada̱jcáj borregujat curra̱tni'cway.”

³²Mit cʉs̈wa'n tʉjutucta'cwa'n, tʉnʉs̈ʉ'gáj Galilea.

³³Mit Pedro iguinajau: —Maja is̈cuyaguigámpaj nu'pʉjʉjnat, po ʉ̱ nunca tʉgacuyaguiyáj.

³⁴Jesús inʉjmau: —Iyacs̈ta'cway tʉnʉjmap ni'c jinapay tsu' antes i-ʉwa'n ca̱yuna', tu̱gup viaje is̈nʉmwa'n ni'c ʉ̱ is̈ca-is̈cap.

³⁵Pedro iguinajau: —Maja tʉ-o'cwa'naj mit mi̱, tʉnganʉmáj ni'c tʉga-is̈cap. Mit we'ney iguinʉ́mgaj nu'pʉjʉn pʉctampajyat.

³⁶Mit cʉs̈ Jesús coy mit ipʉctampajyat en tu'c lugar inʉ'jyway Getsemaní, mit inʉmgʉs̈au: —Tsʉ̱́nga yam mientras tʉnʉs̈p yajyʉ'n ora̱tpay.

³⁷Mit imunʉs̈cʉs̈ Pedro mit mechc iwajyat Zebedeo. Mit je' tu'n jaran ijo̱jt mit pensa̱to'c.

³⁸Mit cʉs̈ Jesús inʉmgʉs̈au: —Tu'no'cp tʉnjo̱jt. Tʉs̈jawi hasta oyap tʉ-o'c. Tánga yam, mit tsʉ̱́nga nijutuc mit ʉ̱.

³⁹Inʉjcs̈ s̈ʉ̱n pa jʉpm, nijas̈manajcʉu na̱s̈ni'c mit i-ora̱jtau Dios, inʉm: —Padre, te oyap, majyiyac pa tʉgatunas̈ ayʉ̱́j prueba tʉs̈mijnapay. Po caje' as̈am ʉ̱ tʉs̈wa'n, wat as̈am mi̱ is̈wa'n.

⁴⁰Mit cʉs̈ ipitujc mam itsʉ̱nga ipʉctampajyat, icupa̱tigʉs̈ ni'c ma̱gap, mit inajau Pedro: —¿Cani-oyap intsʉ̱nga nijutuc mit ʉ̱ pa tu'c horajyu?

⁴¹Tsʉ̱́nga nijutuc mit orá̱tca pi is̈catenta̱tcac nepʉn. Iyacs̈ta'cway nawamp nas̈watwa'n oy, po nacuerpu nas̈camajyip.

⁴²Mit nʉcs̈atu mit i-ora̱jtau Dios imumechcway viaje, inʉm: —Padre, te itp ti tʉs̈tunas̈wa'n ayʉ̱́j prueba tʉs̈mijnapay, wat as̈am mi̱ is̈wa'n.

⁴³Imijnatu, icupa̱tigʉs̈ ni'c ma̱gapatu, ni'c ma-o'jcʉjʉp mʉgʉc.

⁴⁴Mit iguiyajcʉs̈, nʉcs̈atu mit ora̱t imutu̱gupay viaje, mit inʉjmau Dios ni-as̈amu.

⁴⁵Mit cʉs̈ pitucwatu mam ipʉctampajyat, inʉmgʉs̈au: —Ma̱gama mit po'cs̈ca. E'pca ni'c coynup hora mit ʉ̱ jeme tʉjatway jayau tʉs̈yajcájama maljayajwat icʉ'jugujmat.

⁴⁶Ca's̈ʉ'jca mit janga. E'pca ni'c tomo'ganu imi'n jeme tʉs̈-entrega̱támpay.

⁴⁷Imucotscʉs̈pnajate Jesús, coy jaran Judas, tu'c de ayé doce pʉctampajyat, mit imuyo'y may jayajwat jeme imuyo'ygaway espadajat mit cujyat. Ayʉ̱́j jayajwat igui-ajyu'tcau judíujat imʉjpa̱nijat mit na'waywájat nʉ'jcopacni'cway.

⁴⁸Mit Judas jeme ito'ctʉgʉyway Jesús, inʉmgʉs̈au nat igui-is̈capcawa'n je', inʉm: —Jeme tʉns̈u'gámpay, jemé ayé. Actánga.

⁴⁹Mit nigutomijyʉu jaran mam Jesús, inájau: Amayipay, mi̱ tʉsaluda̱tp. Mit is̈u'c.

⁵⁰Mit Jesús inajau: —Amigu, ¿tini'c inmijn? Cʉs̈ ayé jayajwat nigutomigʉjʉu mit i-actangau Jesús.

⁵¹Po tu'c pʉctampay jeme tsʉ̱naway mit Jesús, igui-actajn i-espada, ichi't mit ipus̈au mʉjpa̱nijna' imozo, mit ipus̈tujcau ita̱tsʉc.

⁵²Mit Jesús inajau: —Com in-espada i-acni'c. Ni'c nu'pʉjʉn i-actangapay espada, espada itu-o'jcáj.

⁵³Pi jawi ni'c oyap tʉs̈yo'jta jaran tʉnte̱t Dios, mit je' oyap tʉs̈ajyu'jtap más de ochenta mil ángejlat pa iguicʉs̈bʉ'nwa'n ayʉ̱́j jayajwat.

⁵⁴Po te tʉnwatp we'n, ¿nat icumplia̱twa'n jeme tsʉ̱napay ja'yic Dios ilibruni'c ni'c it ti tʉs̈jatáj wename?

⁵⁵Mit cʉs̈ Jesús inʉmgʉs̈au ayé jayajwat: —¿Mimp is̈actangap mit espadajat mit cujyat as̈am is̈actánga tu'c nu'mpay? Cada s̈ʉjw tʉtsʉ̱́naj mit mijchat tʉ-ajque's̈cʉs̈au templuni'c mit ʉ̱ is̈ca-actangawu.

⁵⁶Po tʉs̈jatp we'n pa ma cumplia̱t jeme ija'ygaway profetajat Dios ilibruni'c. Mit cʉs̈ nu'pʉjʉn ipʉctampajyat iguicuyaguigau mit po'cpʉ'ngau.

⁵⁷Ayé jayajwat jeme i-actangaway Jesús, imunʉs̈cau pa mam itsʉ̱na judíujat imʉjpa̱nij inʉ'jyway Caifás, mit jem itsʉ̱ngaj apʉcmúguijcat i-ajque's̈capay ley mit na'waywájat.

⁵⁸Po Pedro iguinatspoguiu yagatsu hasta mʉjpa̱nijna' ipe'tni'c. Mit itʉgʉjy, je' nitsʉ̱nda̱jcʉu mit cuida̱tpayna'jat pa igui-e'pwa'n lo que jatámpay.

⁵⁹Mit judíujat imʉjpa̱nijat, na'waywájat mit nu'pʉjʉn judíujat ijefejat iche'ngau pʉn iwe̱twajtámpay Jesús pa i-oyawa'n igui-ac-ago'jcʉjʉ.

⁶⁰Po igapa̱tcawu nepʉn, mit jamingau may we̱tpay testigujat. Mit cʉs̈ mingau jamechc we̱tpay testigujat,

⁶¹mit inʉmgau: —Ayʉ̱́j jayau inʉm: “Oyap tʉs̈actogoyda'c Dios itemplu mit imutu̱gupay s̈ʉjw tʉntenda̱cpatu.”

⁶²Mit cʉs̈ nitenda̱jcʉu mʉjpa̱nijna' mit inajau Jesús: —¿Migapo'mp nes̈ʉ̱n? ¿Tini'c ayʉ̱́jat is̈acusa̱tcap?

⁶³Po Jesús igapo'nu neti. Mit mʉjpa̱nij iguinajau: —Tʉmanda̱tp pi jura̱t ni'c inyʉmáj lo que iyacs̈ta'cway, mit mijura̱táj mam igui-e'p Dios jeme tsʉ̱napay pa siempre. Nʉmgajac te mi̱j ayé Cristu Dios is̈wáy.

⁶⁴Jesús inajau: —Ʉ̱j ayé. Iyacs̈ta'cway lo que inyʉmpay. Mit tʉnʉjmap ni'c jinap pa jʉpm is̈-e'pcáj ʉ̱ jeme tʉjatway jayau, ni'c ʉ̱ tʉtsʉ̱náj i-oyimaycʉ'ni'c Dios jeme ijtʉpay nu'pʉjʉn poder, mit in-e'pcámpey tʉmi'nwa'n tsajpni'c.

⁶⁵Mit cʉs̈ mʉjpa̱nijna' i-acna̱t ijamuc ni'c awa'n, mit inʉm: —¡Itucotsway Dios! ¿Pa ti nas̈wánga más testigujat? Inmaraugaway ni'c itucotsp Dios.

⁶⁶¿Nat is̈jawiga? ¿Ti nawatcáj mit ayʉ̱́j jayau? Mit ipo'ngau ni'c Jesús culpa̱tic mit ma o'c.

⁶⁷Mit icutsujcu'tcau Jesús iwindugʉtni'c mit imoyta̱jcau, mit japu̱jtat i-apatsmujcau je'.

⁶⁸Inʉmgau: —Te mi̱ miCristu, acotstujcajac pʉn is̈moyta̱c.

⁶⁹Mit Pedro tsʉ̱nau pe'tni'c, mit nigutomijyʉu tu'c cocinera mit inajau: —Mi̱ mitsʉ̱nawey mit Jesús Galileajway.

⁷⁰Po Pedro inʉm ni'c ca̱j mam nu'pʉjʉjnat itsʉ̱nga, inʉm: —Tʉngajawip ti inyʉmpay.

⁷¹Mit Pedro nʉcs̈ pa tʉc-auni'c, mit jem igui-is̈ je' jatu'c cocinera, mit cocineramá̱m inʉmgʉs̈au jeme tsʉ̱ngaway jem: —Ayʉ̱́j jayau tsʉ̱nawey mit Jesús Nazaretway.

⁷²Po je' inʉmwatu ni'c ca̱j, mit jura̱t: —Tʉnga-is̈cap ayé jayau.

⁷³I-íjtʉj ratu, nigutomigʉjʉu ayé jeme tsʉ̱ngaway jem, mit inʉmgajau Pedro: —Iyacs̈ta'cway inmunipʉjcʉs̈ʉwey je'jat ni'c micotsp as̈am Galileajwayna'jat, mit incótsʉjna' is̈ajcuque's̈p.

⁷⁴Mit je' chu̱chiu iguinʉm: —Ma tʉs̈castiga̱tac Dios te caje' iyacs̈ta'cway lo que tʉnyʉmpay. Tʉnga-is̈cap ayé jayau. Mit ʉ̱u jaran ca̱yuna'.

⁷⁵Mit cʉs̈ Pedro inijawiu lo que Jesús iguinʉjmaway: “Antes i-ʉwa'n ca̱yuna', tu̱gup viaje is̈nʉmwa'n ni'c is̈ca-is̈cap.” Mit Pedro ipichijn pe'ta̱m, jʉy mʉgʉc.