Read Sayula Popoluca San Mateo 28 Bible Online

San Mateo 28 - Sayula Popoluca bible

San Mateo 28

¹Inas̈ ayé po'cs̈ans̈ʉjw mit icus̈ʉwij iprimers̈ʉjw s̈ama̱na, nʉs̈cau María Magdalajway mit jatu'cway María pa igui-e'pcawa'n ayé á̱nimacʉt.

²Mit nas̈ʉ'c tu'c us̈ mʉgʉcway, ni'c el Señor i-ángel manac tsajpni'c. Mit icojy, i-acchi'tpituc ayé tsa' mit nitsʉ̱nda̱jcʉu tsa'yucuinm.

³Je' que's̈ oymanac as̈am tu'c ániway iquijan, mit ijamuc po'p as̈am nieve.

⁴Mit cuida̱tpayna'jat ipʉ̱tcau ayé ángel hasta yaratcau, mit tangau as̈am o'guijcatway.

⁵Mit cʉs̈ ayé ángel inʉmgʉs̈au ayé to's̈ajyat: —Campʉ̱tcawit, tʉnjawip ni'c inche'ngap Jesús jeme iyajcaway cunu̱s̈ni'c.

⁶Je' cajapʉn yam, jutucta̱cway as̈am iguinʉjm. Yam minga, e'pca ayé lugar mam iguiyájcaj je'.

⁷Nʉ́s̈ca jaran, nʉ́mgaja ipʉctampajyat ni'c je' jutucta̱cway mam itsʉ̱nga á̱nimajat, mit je' nʉs̈ʉ'gáj Galilea mit jem is̈-e'pcawa'n. Jemé-ate tʉnʉmgʉs̈ámpay.

⁸Mit cʉs̈ ayé to's̈ajyat pichingau jaran mam i-it ayé á̱nimacʉt, mit pʉ̱tcau po majawe'naj ji'c ijo̱jtat. Mit pujʉ'jcau pa iguinʉmgajawa'n Jesús ipʉctampajyat ayé oyway noticia.

⁹Mit meru-ate inʉ́s̈caj, Jesús ipichinda̱jcʉs̈au mit isaluda̱tcʉs̈. Mit je'jat nigutomigʉjʉu mam je' mit i-actangajau ita'jnat pa igui-adora̱tcawa'n.

¹⁰Mit cʉs̈ Jesús inʉmgʉs̈au: —Campʉ̱tcawit. Nʉ́s̈ca ajque's̈caja tʉnhermanujat pa ma nʉs̈ca Galilea, mit jem tʉs̈-e'pcáj.

¹¹Mit ayé to's̈ajyat meru-ate inʉ́s̈caj, una̱c ayé cuida̱tpajyat nʉs̈cau nʉ'jcopacni'c mit i-ajque's̈cajau judíujat imʉjpa̱nijat nu'pʉjʉn jeme jatway.

¹²Mit ni-apʉcmujcʉjʉu mit na'waywájat, mit ini-acóchigʉjʉj, imoygau may tumi̱n ayé soldajat.

¹³Mit inʉmgajau ayé soldajat: —Nʉmga ni'c mingau tsu'm ipʉctampajyat, mit meru-ate inmá̱gaj inu'mgajau Jesús icuerpu.

¹⁴Mit te imarap gobernadorna', ʉjtsat tʉcotsmajyigáj pi is̈cajatcac neti.

¹⁵Mit ayé soldajat iguipʉ́jcaj ayé tumi̱n, iwatcau as̈am iguinʉmgajau. Mit hasta jinap judíujat icupʉjcap lo que soldajat inʉmgaway.

¹⁶Mit cʉs̈ ayé once pʉctampajyat nʉs̈cau Galilea en tu'c copac mam iguinʉmgajau Jesús.

¹⁷Mit igui-ís̈caj Jesús, i-adora̱tcau, po cʉjtu'c duda̱tcau.

¹⁸Mit Jesús nigutomijyʉu mam je'jat mit inʉmgʉs̈au: —Dios tʉs̈moyway nu'pʉjʉn poder itpay tsajpni'c mit na̱s̈ni'c.

¹⁹Jinap nʉ́s̈ca mit che'nga jayajwat en nu'pʉjʉn mundu pa ma jatca tʉmpʉctampajyat. Mit nʉ'gutémga inʉ'jyni'jcat Dios Nate̱jat, iway Jesucristu, mit Espíritu Santu.

²⁰Mit ajque's̈caja ma jayaumayga nu'pʉjʉn tʉmanda̱tcʉs̈way mijchat, mit tʉtsʉ̱náj mit mijchat nu'pʉjʉn s̈ʉjwat hasta icʉs̈wa'n ayʉ̱́j mundu. Amén.