Read Sayula Popoluca San Mateo 3 Bible Online

San Mateo 3 - Sayula Popoluca bible

San Mateo 3

¹Inas̈ una̱c s̈iwijtat Juan nʉ'gutempayna' coy Judeajway na̱s̈ en tu'c lugar mam igatsʉ̱na nepʉn, mit inʉmdacyo'y,

²inʉm: —Cuyáguiga inma̱lway to̱jwat ni'c tomo'ganu pa imanda̱twa'n Dios. We'n iguinʉjm Juan.

³Cuandu icojts profeta Isaías, je' inʉm ni'c mi'náj Juan, mit inʉm yename: “Tu'c jayau inʉmdacyo'yp mam igatsʉ̱na nepʉn: Oyájca tu'c to̱u ni'c mimp el Señor, acyács̈ca imvidajat pa is̈pʉctsougawa'n je'.”

⁴Mit Juan icom tu'c jamuc watic mit camellupʉjc, mit imuyo'y tu'c pa̱gas̈-acpa̱s̈aj ipi̱nicni'c, mit icay pa̱tas̈ mit cuyjucchi̱n.

⁵Mit nʉs̈cau pa mam je' itsʉ̱na Jerusaléjnatway, nu'pʉjʉn Judeajatway mit nu'pʉjʉn tsʉ̱ngapay en ayé na̱s̈ mam i-it ayé mʉjnʉ' Jordán.

⁶Mit je' inʉ'gutemgʉs̈ mʉjnʉ'ni'c Jordán, mit inʉmgajau Dios nu'pʉjʉn mal iwatcaway.

⁷Po igui-is̈ ni'c mingap mayo'c fariseujat mit saduceujat pa mam inʉ'gutém, je' inʉmgʉs̈au: —Mijchat as̈am mitsanajyat ni'c mipo'jcap jaran cuandu is̈jawiga ni'c Dios is̈castiga̱tcáj. ¿Pʉn is̈acpo'jcau?

⁸Yo'yga yacs̈ic pa jayajwat ma e'pca ni'c incuyaguigaway inma̱lway to̱jwat.

⁹Camnʉmga ni'c más mivalia̱tcap ni'c mipichingau Abraham ifamiliani'c. Tʉnʉmgʉs̈ap ni'c Dios oyap iguipʉjcʉs̈ ayʉ̱́j tsa'jat pa iguituwatcʉs̈awa'n Abraham iwajyat.

¹⁰Mit jinap listu itsʉ̱na tu'c hacha pa iguitupus̈pichingawa'n cujyat hasta cʉtʉm, mit ipus̈pichingáj cujyat igayacpay oyway fruta, mit ica'tstʉgʉygáj jʉngʉ́tʉm. We'n is̈jatcáj mijchat te siguia̱tp is̈watca mal.

¹¹Ʉ̱ tʉnʉ'gutemgʉs̈áj mit nʉ' pa jayajwat ma jawiga ni'c incuyaguigaway inma̱lway to̱jwat, po jeme mimpay tʉnmugus̈á̱m, je' más ijtʉp poder que ʉ̱, mit tʉs̈camerecia̱tp tʉs̈quejawa'n icʉ'ac. Je' is̈moygáj Espíritu Santu as̈am jʉjn.

¹²Je' ijtʉp icʉ'ni'c ayé yeman itugus̈ujpay trigu mit i-aparta̱táj jeme limpiuway mit icomáj ayé trigu mam iguiguarda̱t, po pu̱tsputsna' ino'gáj mit tu'c jʉjn jeme cajapi'chámpay nunca.

¹³Cʉs̈ Jesús pichin Galilea mit nʉcs̈ pa mʉjnʉ' Jordán mam itsʉ̱na Juan. Je' min pa iguinʉ'gutemáj.

¹⁴Mit Juan igawampate, mit inʉjmau Jesús: —Mi̱ itp ti is̈nʉ'gutemáj ʉ̱, mit ¿mi̱ mimimp pa tʉnʉ'gutemwa'n?

¹⁵Po Jesús ipo'n: —We'n itp ti ijatwa'n, ni'c we'n nawatcáj nu'pʉjʉn lo que Dios iwampay. Cʉs̈ iguinʉ'gutem.

¹⁶Cʉs̈ ininʉ'gutéjmʉj Jesús, pichinuw jaran nʉ'ni'c. Mit tsajp awa̱ts mit i-is̈au Dios i-Espíritu manacp as̈am tu'c paloma mit tan iyucuinm.

¹⁷Mit Dios cots tsajpni'c, inʉm: —Ayʉ̱́j ayé tʉnwáy tʉnwampay, mit je' tʉs̈acji'jcap tʉnjo̱jt.