Read Sayula Popoluca San Mateo 4 Bible Online

San Mateo 4 - Sayula Popoluca bible

San Mateo 4

¹Cʉs̈ Espíritu Santu imunʉcs̈ Jesús pa mam igatsʉ̱na nepʉn, pa iguitenta̱táj Awayagatsna'.

²Mit je' ayuna̱t tsu'm mit s̈ʉ̱m pa cuarenta s̈ʉjwat mit cʉs̈ je' cayo'jcʉu.

³Cʉs̈ iguicutomiu tenta̱tpayna' mit iguinʉjmau: —Te mi̱ is̈wáy Dios, nʉmgʉ́s̈a ayʉ̱́j tsa'jat ma jatca ma̱s̈anʉ̱n.

⁴Mit Jesús ipo'n: —Ja'yic itsʉ̱na Dios ilibruni'c ni'c caje' solo mit cayanu natsʉ̱nawa'n po natsʉ̱napey mit nu'pʉjʉn inʉmpay Dios.

⁵Cʉs̈ Awayagatsna' iguimunʉcs̈ pa ayé mʉjway nʉ'jcopac Jerusalén mit iyac Jesús yucm templuyucuinm.

⁶Mit iguinʉjmau: —Te mi̱ is̈wáy Dios, nica'tsmánajcʉ na̱s̈ni'c, ni'c ja'yic itsʉ̱na Dios ilibruni'c: Dios i-ajyu'táj i-ángejlat pi is̈cuida̱tcac Mit is̈ajca's̈ʉ'jcáj oymanac, pa pigacunepi tsa'ni'c.

⁷Jesús inʉjmau: —Ja'yiguey itsʉ̱na: “Ingatenta̱táj el Señor inDios.”

⁸Mit cʉs̈ Awayagatsna' iguimunʉcs̈ pa tu'c copac yucmay mit i-actu-is̈pʉ'n nu'pʉjʉn laj imanda̱tcapay jayajwat, mit i-actu-is̈pʉ'n nu'pʉjʉn cosa oymanacway.

⁹Cʉs̈ iguinʉjmau: —Tʉmoygʉs̈áj nu'pʉjʉn ayʉ̱́j te is̈cos̈atenajyap mit is̈adora̱tp.

¹⁰Cʉs̈ Jesús inʉjmau: —Niju'jpʉ Awayagats ni'c ja'yic itsʉ̱na Dios ilibruni'c: “Inadora̱táj el Señor inDios mit je'yu inwajtáj nu'pʉjʉn iwa'námpay.”

¹¹Cʉs̈ Awayagatsna' icupo'c Jesús pa tu'c tiempu, mit cʉs̈ mingau ángejlat mit iguimajyigau.

¹²Mit iguimárajw Jesús ni'c Juan cuytʉjcomic, je' nʉcs̈ pa Galileajway na̱s̈.

¹³Mit je' pichin Nazaret, mit nʉcs̈ pa itanwa'n Capernaum tu'c nʉ'jcopac laguna-auni'cway, ayé ina̱s̈at Zabulón mit Neftalí.

¹⁴Jat we'n pa ma cumplia̱t lo que inʉmway ayé profeta Isaías, inʉm:

¹⁵Ayé na̱s̈at Zabulón mit Neftalí ayé tsʉ̱ngap laguna-auni'c tuganʉ-ájw Jordán, ayé Galileajway na̱s̈ mam itsʉ̱nga jeme caje'jatway judíujat.

¹⁶Ayé jayajwat tsʉ̱ngapate chitimicni'c po i-is̈cau tu'c mʉjway luz, mit je'jat tsʉ̱ngapate pa i-o'jcawa'n, po ta'cs̈ta̱c tu'c luz pa je'jat pa ma jawiga ni'c itcʉjʉ̱́j vida cacʉs̈ámpay.

¹⁷Wejpu'n Jesús chu̱chiu nʉmdacyo'ypay, inʉm: —Cuyáguiga inma̱lway to̱jwat ni'c tomo'ganu pa imanda̱twa'n Dios.

¹⁸Iyo'jy Jesús laguna-auni'c Galilea i-is̈ mechc jayajwat, tu'c Simón inʉ'jywayey Pedro, mit i-ajch Andrés. Je'jat ica'tscau itsamajcat lagunani'c, ni'c je'jat ma̱cpajyat.

¹⁹Mit je' inʉmgʉs̈au: —Natspoguigac. As̈am is̈ma̱jca acs̈, wename-ey tʉ-actuche'ngʉs̈wa'n jayajwat pa ma tʉs̈cupʉjcac.

²⁰Mit je'jat iyajcau jaran itsamajcat mit inatspoguigau je'.

²¹Iyo'jy jas̈ʉ̱n jʉpm, i-is̈ jamechc jayajwat, Jacobo mit imajtsʉc Juan, Zebedeo iwajyat. Je'jat tsʉ̱ngau ajugum mit ite̱jtat Zebedeo, inapcapate itsamajcat, mit Jesús iya̱s̈cʉs̈.

²²Mit iyajcau jaran ayé aj mit ite̱jtat, mit inatspoguigau Jesús.

²³Mit Jesús ituyo'y nu'pʉjʉn laj Galileajway na̱s̈ mit i-ajque's̈ mam i-adora̱tca judíujat, mit inʉmdacyo'y ayé oyway noticia ni'c Dios manda̱táj, mit i-ac-oytan nu'pʉjʉn jayajwat jeme tsʉ̱ngaway tu'nij.

²⁴Mit nu'pʉjʉn jayajwat tsʉ̱ngaway Siriajway na̱s̈ imaraugau lo que iwatway Jesús mit imumingajau nu'pʉjʉn tu'nijatway. Je'jat itunas̈cau mit may enfermedajat mit pʉjcʉjʉu. Itcʉjʉu demo̱nyujat, it trastorná̱tijcatway mit cumʉgʉguipay, mit je' i-ac-oytangʉs̈.

²⁵Mit may jayajwat iguinatspoguigau, Galileajatway, Decápolisatway, Jerusaléjnatway, Judeajatway mit jeme tsʉ̱ngaway tuganʉ-ájw Jordán.