Read Sayula Popoluca San Mateo 7 Bible Online

San Mateo 7 - Sayula Popoluca bible

San Mateo 7

¹’Cammalninʉmga nepʉn pa pi is̈camalninʉmgaguey.

²Ni'c as̈am is̈malninʉ́mga tambʉn, we'ney is̈malninʉmgáj. Mit ayé quips̈an intuquips̈capay, nije'yu is̈tuquips̈cámpey.

³¿Tini'c is̈malninʉm inmupro̱wije̱way? Je' ijtʉp tu'c mal jeme caje'way mʉj, mit ayé as̈am tu'c pu̱tsputswáy iwini'c, po mi̱ inaguep tu'c mal más mʉjway mit ayé as̈am tu'c mʉjway cujy inwini'c.

⁴Mi̱ ca-oyap is̈nʉ́jma inmupro̱wije̱way: “Mo'ac laj pa tʉchi'jtawa'n ayé pu̱tsputswáy inaguepay mi̱ inwini'c.” Ca-oyap is̈nʉ́jma we'n ni'c mi̱ inaguepey tu'c cujy inwini'c.

⁵¡Mi̱jyu miniwe̱jtʉp! Chi'jtʉ'c ayé cujy inaguepay mi̱ inwini'c, mit cʉs̈wa'n in-e'páj oy pa ichi'jtawa'n ayé pu̱tsputswáy ijtʉpay inmupro̱wije̱way iwini'c.

⁶’Cammoyga tacna'jat cosa limpiuway ni'c oyap i-awa'niga mit cʉs̈wa'n is̈pʉctʉgʉygáj mijchat, ne camcucachiga cosa tsowajway mam i-it í̱chijmat, ni'c oyap iguitute'ní̱jca. Ayé inʉmo'jcʉp ni'c nagajómiga may veces jayajwat iwati̱jcapay mal.

⁷’Yo'tcaja Dios mit is̈moygáj. Che'nga cosa oyway mit Dios is̈actupa̱tcáj. Mucótsca Dios mit je' is̈po'ngáj.

⁸Ni'c nu'pʉjʉn jeme iyo'tpay, ipʉctsowáj. Mit jeme iche'mpay cosa oyway, ipa'táj. Mit jeme imucotspay Dios, iguipo'náj.

⁹’¿O pʉna jayau mam mijchat te iguiyo'jtap iway ma̱s̈anʉ̱n, imo'áj tu'c tsa'?

¹⁰¿O te iguiyo'jtap acs̈, is̈jawiga imo'áj tu'c tsanay?

¹¹Mijchat maja mima̱lo'jcataj, injatcap is̈moyga regalu ojyatway inwaywájat, mit como Dios Nate̱jat tsajpni'cway más oyo'c, je' imoygʉs̈áj cosa ojyatway pa nu'pʉjʉn jeme iguiyo'tcajapay.

¹²’Te mijchat inwangap is̈watcajáj oy nu'pʉjʉn jayajwat, we'ney wátcaja oy je'jat. Ni'c we'n iguinʉm Moisés iley mit we'ney profetajat.

¹³’Pʉjca ayé to̱u jeme ca-awa'tsicway mʉj, ni'c itp jatu'c to̱u awa'tsigo'cway mit que's̈p ni'c oymanago'c po ayé nʉs̈p mam itógoyga jayajwat, mit mayo'c jeme nʉs̈capay en ayé to̱u.

¹⁴Mit ca-awa'tsic mʉj mit mʉgʉgo'c ayé to̱u jeme nas̈acnʉs̈capay pa mam i-it vida cacʉs̈ámpay, mit camajyatu jeme nʉs̈capay jem.

¹⁵’Nicuidá̱tcʉjʉ mit we̱tpayna'jat jeme inʉmgapay ni'c i-ajque's̈cajap Dios ipalabra. Je'jat coygap mam mijchat mit niwatcʉjʉp humilde as̈am borregujat, po je'jat as̈am pa̱ju jeme cayo'jcʉjʉpay.

¹⁶Mijchat inis̈capcáj as̈amu je'jat iguiwatca. ¿Is̈jawiga intujcáj uvajat apit-awa'tsam, o intujcáj higujat jʉnque'u-awa'tsam?

¹⁷Cada oyway cujy iyacp oyway fruta, po tu'c ma̱lway cujy iyacp ma̱lway fruta.

¹⁸Tu'c oyway cujy ca-oyap iguiyac ma̱lway fruta, ne tu'c ma̱lway cujy ca-oyap iguiyac oyway fruta.

¹⁹Cada cujy igayacpay oyway fruta ipus̈pichingáj mit icomgáj jʉngʉtʉm.

²⁰Jemni'c inis̈capcáj jayajwat iwatcapay oy mit iwatcapay mal, as̈am nas̈-is̈cápca ayé cujy iyacpay oyway fruta mit iyacpay ma̱lway fruta.

²¹’Mayo'c jayajwat tʉs̈nʉ'jutcap “¡Señor, Señor!,” po caje' nu'pʉjʉn tʉgʉygáj mam imanda̱t Dios, solo tʉgʉygáj jem ayé jeme iwatcapay lo que iwampay tʉnte̱t Dios jeme tsʉ̱napay tsajpni'c.

²²En ayé s̈ʉjw ijuzga̱twa'n Dios may jayajwat tʉs̈nʉmgajáj: “Señor, Señor, tʉnyʉmdacyo'ygau inyʉ'jyni'c, tʉnacpichingajau demo̱nyujat ayé jayajwat, mit tʉnwatcau mayo'c milagrujat inyʉ'jyni'c.”

²³Po ʉ̱ tʉnyʉmgʉs̈áj: Nunca tʉga-is̈capcʉs̈u mijchat. Píchinga mam ʉ̱ mijchat inwatcaway mal.

²⁴’Mit nu'pʉjʉn imarapay lo que ʉ̱ tʉnyʉmpay mit ijayaumayp, ayé jayau tʉntumuquips̈áj as̈am tu'c jayau pensa̱tpay oy, je' iwat itʉjc bien tsʉ̱nda'guic mam i-it puru tsa'po̱t.

²⁵Mit min tu̱, mit comtupats mʉjnʉ', mit s̈uj s̈e'm mʉgʉc mam itsʉ̱na ayé tʉjc, po caca'wu ni'c bien ni'pic itsʉ̱na tsa'po̱tni'c.

²⁶Mit nu'pʉjʉn imarapay lo que tʉnyʉmpay mit igajayaumayp, ayé jayau tʉntumuquips̈áj as̈am tu'c jayau tontoway, je' iwat itʉjc po'yyucuinm.

²⁷Mit min tu̱, mit comtupats mʉjnʉ', mit s̈uj s̈e'm mʉgʉc mam itsʉ̱na ayé tʉjc, mit ca'u, mit bien pas̈cada'guic itajn ayé tʉjc.

²⁸’Mit cʉs̈ iguinʉjm we'n Jesús, ayé jayaujuc nigu-épigʉjʉu ni'c oymanac nu'pʉjʉn i-ajque's̈way.

²⁹Ni'c je' i-ajque's̈cʉs̈au as̈am tu'c jayau i-is̈capay nu'pʉjʉn lo que inʉmpay, mit caje' as̈am ayé i-ajque's̈capay ley.