Read Sayula Popoluca San Mateo 9 Bible Online

San Mateo 9 - Sayula Popoluca bible

San Mateo 9

¹Itʉgʉjy Jesús ajni'c mit ipʉctampajyat, pitujcau pa tugalaguna-ájw mit mingau Jesús inʉ'jcopacni'c.

²Mit imumingajau tu'c paralíticu, ayé jeme cumʉgʉguipay, mit je' cʉmnap ito'cni'c, mit igui-is̈ Jesús ni'c cupʉjcap, inajau ayé paralíticu: —Hijo, ma ji'c injo̱jt ni'c perdona̱tic itsʉ̱na nu'pʉjʉn mal inwatway.

³Mit jem itsʉ̱ngaj una̱c i-ajque's̈capay ley, inʉmgau je'jatu: “Ayʉ̱́j jayau itucotsp Dios.”

⁴Po Jesús ijawiu nat ipensá̱tca, inʉmgʉs̈au: —¿Tini'c is̈pensá̱tca mal injo̱tni'jcat?

⁵¿Jʉmay más fácil tʉs̈nʉjmawa'n ayʉ̱́j jayau: “Perdona̱tic itsʉ̱na nu'pʉjʉn mal inwatway”, o tʉs̈nʉjmawa'n: “Ca's̈ʉ'c mit yo'y”?

⁶Po tʉ-actujawigʉs̈áj ni'c ʉ̱ jeme tʉjatway jayau tʉnaguep derechu en ayʉ̱́j mundu pa tʉs̈perdona̱twa'n ayé mal iwatcaway jayajwat. Mit cʉs̈ inajau ayé paralíticu: —Ca's̈ʉ'c, pʉc into'c mit nʉs̈ intʉcm.

⁷Mit cʉs̈ je' ca's̈ʉ'c jaran mit nʉcs̈nuw pa itʉcm.

⁸Mit ayé jayaujuc igui-ís̈caj lo que jatway, nigu-épigʉjʉu mit i-oyninʉmgau Dios ni'c je' imoy poder tu'c jayau ma wat milagrujat.

⁹Ipichijn jem Jesús, i-is̈ tu'c jayau inʉ'jyway Mateo. Je' tsʉ̱nau mam iguique'chúmga tumi̱n impuestu. Mit Jesús inajau: —Natspoguiyac. Mit je' ca's̈ʉ'c, inatspoguiu.

¹⁰Mit después Jesús tsʉ̱nau me̱s̈ani'c tʉc Mateo mit mingau may que'chumpajyat mit maljayajwat, mit tsʉ̱ngawey tuwitic me̱s̈ani'c mit Jesús mit ipʉctampajyat.

¹¹Mit igui-ís̈caj we'n fariseujat, inʉmgajau Jesús ipʉctampajyat: —¿Tini'c in-amayipajyat iguimucaygʉs̈ jeme ique'chumgapay demás mit maljayajwat?

¹²Iguimarajw we'n Jesús, inʉmgʉs̈au ayé fariseujat: —Jeme catsʉ̱ngapay tu'nij iganesita̱tcap doctor, po jeme tu'nijatway inesita̱tcap doctor.

¹³Nʉ́s̈ca mit pʉctánga ti inʉmpay Dios ilibruni'c mam iguinʉm: “Más tʉnwamp jayajwat ma ayo̱wis̈ca imupro̱wije̱wajyat mit caje' tʉs̈ago'jcajáj aníma̱jtat pa ʉ̱.” Inʉm Jesús: —Tʉgaminu tʉs̈che'ngʉs̈ jayajwat ni-oyninʉmgʉjʉpay, tʉmín tʉs̈che'ngʉs̈ maljayajwat ma cuyaguiga ima̱lway to̱jwat.

¹⁴Mit Juan ipʉctampajyat mingau mam itsʉ̱na Jesús mit inʉmgajau: —¿Tini'c ʉjtsat mit fariseujat tʉ-ayuna̱tí̱jcap po impʉctampajyat ca-ayuna̱tcap?

¹⁵Mit Jesús inʉmgʉs̈au: —¿Is̈jawiga oyap itsʉ̱nga triste jeme coygapay cʉ'pa'tni'c mientras ayé novio tsʉ̱nap mit je'jat? Po itáj s̈ʉjw cuandu novio igajatsʉ̱nawa'n mit je'jat. Wejpu'n ayuna̱tcájama.

¹⁶’Jesús inʉmgʉs̈au mechc ejemplujat pa ma jawiga ni'c magamotca ampay creencia mit ayé nam ama̱s̈an i-ajque's̈way Jesús, inʉm: Nepʉn igatunap nam jamuc tu'c ampay jamuc, ni'c ayé nap ina̱tpichimp ampaywayna' mit más mʉj ijotwa'n.

¹⁷Ne nagacomp nam vinu ampay pa̱gas̈-acbolsani'c. Te nawatp we'n, timamp ayé vinu mit i-acpʉjtugáj ayé ampay bolsa mit cumuchicada'gáj ayé vinu mit togoyáj ayé bolsa. Po nam vinu nacomp nam pa̱gas̈-acbolsani'c mit oyap nas̈guarda̱t inimechquij.

¹⁸Jesús imucotscʉs̈pnajate wename, coy tu'c jayau encarga̱ticway mam judíujat, mit nicos̈atenda̱jcʉu ita'ná̱m Jesús, mit inajau: —Cʉs̈o'cpnaj i-o'c tʉnto'chwáy, po te mi̱ minʉs̈p mit inyajcap incʉ', jutucta'gáj.

¹⁹Mit ica's̈ʉ'jc Jesús mit ipʉctampajyat, nʉs̈cau mit je'.

²⁰Mit miney imugus̈á̱m tu'c to's̈ay jeme tu'nijtsʉ̱naway doce s̈iwitanu mit nipinméj, mit itsʉjcau Jesús ijamuc-au-á̱m.

²¹Ni'c ayé to's̈ay ipensa̱t: “Te tʉntsʉjcapu ijamuc, tʉ-oytanáj.”

²²Mit Jesús i-e'jpitujc, i-is̈ mit inajau: —Hija, ma ji'c injo̱jt, mi-oytanway ni'c ʉ̱ is̈cupʉcp. Mit oytan jaran ayé to's̈ay.

²³Icojy Jesús itʉcm ayé encarga̱ticway, i-is̈cʉs̈ ayé s̈u̱s̈payna'jat mit jeme bullawatcapay.

²⁴Jesús inʉmgʉs̈au: —Píchinga ni'c ayé to'chwáy ca-o'guic, ma̱pujyu. Mit ayé jayaujuc iguitus̈i̱jcau.

²⁵Mit igui-acpichingʉs̈ ayé jayaujuc, je' tʉgʉy mit i-actajnau icʉ' ayé to'chwáy, mit ca's̈ʉ'c jaran.

²⁶Mit jʉmgapa'tu en ayé na̱s̈ inʉmdacyo'ygau lo que iwatway Jesús.

²⁷Ipichijn Jesús, mechc winchat iguinatspoguigau mit ya̱s̈cau, inʉmgau: —Mi̱ mipichin David ifamiliani'c pa is̈salva̱tcáj, ayo̱wis̈cac.

²⁸Mit icojy en tu'c tʉjc mam itsʉ̱na, coygau mam je' ayé winchat, mit Jesús inʉmgʉs̈au: —¿Incupʉjcap ni'c oyap tʉ-ac-oytangʉs̈? Mit iguinʉmgajau: —Jo̱, Señor.

²⁹Cʉs̈ itsʉjcʉs̈au iwijnat, inʉm: —As̈am incupʉ́jca, wename-ey tʉwatcʉ́s̈a.

³⁰Mit e'pta̱jcau jaran. Mit Jesús imucotscʉs̈ mʉgʉc maga-actujawiga nepʉn.

³¹Po je'jat ipíchingaj, inʉmdacyo'ygau jʉmgapa'tu en ayé na̱s̈ lo que iguiwatcajaway Jesús.

³²Ipíchingaj ayé winchat, imumingajau tu'c u̱m ijtʉpay demo̱nyu.

³³Mit igui-acpíchijnaj ayé demo̱nyu, cotsta̱c jaran ayé u̱m. Mit nigu-épigʉjʉu ayé jayaujuc, inʉmgau: —Nunca nagani-e'pcap tu'c cosa as̈amay ayʉ̱́j Israelway na̱s̈.

³⁴Po inʉmgau fariseujat: Je' i-acpichingʉs̈p demo̱nyujat ni'c iguimoyp poder ayé jeme imanda̱tpay demo̱nyujat.

³⁵Mit Jesús ituyo'y nu'pʉjʉn ciudajat mit nu'pʉjʉn nʉ'jcopajcat. Mit i-ajque's̈ mam judíujat i-adora̱tca mit inʉmdacyo'y ayé oyway noticia ni'c Dios manda̱táj, mit i-ac-oytan nu'pʉjʉn jayajwat jeme tsʉ̱ngaway tu'nij en ayé nʉ'jcopajcat.

³⁶Igui-is̈ ayé jayaujuc, i-ayo̱wis̈cʉs̈ ni'c yo'ygap as̈am togoyijcat mit s̈is̈cada'guijcat as̈am borregujat ca-itcʉjʉpay aquepmucpay.

³⁷Cʉs̈ Jesús inʉmgʉs̈au ipʉctampajyat: —E'pca ayé jayaujuc as̈am tu'c cosecha na-ajca's̈ʉ'gámpay, po camajyatu jeme nas̈majyigámpay pa nas̈actugupʉjcawa'n.

³⁸Jemni'c yo'tcaja Dios ma ajyu'tcʉs̈ yos̈watpajyat pa ma ajca's̈ʉ'jcaja icosecha, ni'c je' ayé i-actampay ayé cosecha.