Read Sayula Popoluca San Marcos 1 Bible Online

San Marcos 1 - Sayula Popoluca bible

San Marcos 1

¹Yename ichu̱chi i-oyway noticia Jesucristu, Dios iway.

²Ayé profeta Isaías ija'y yename: Marauga, tʉnajyu'tp tu'c i-anuncia̱támpay mam mijchat intsʉ̱nga, mit je' i-oyagáj to̱u mam inas̈wa'n el Señor.

³Tu'c jayau inʉmdacyo'yp mam igatsʉ̱na nepʉn: “Oyájca tu'c to̱u ni'c mimp el Señor, acyács̈ca imvidajat pa is̈pʉctsougawa'n je'.”

⁴Juan nʉ'gutem mam igatsʉ̱na nepʉn, mit inʉmdacyo'y, inʉm ni'c itp ti nas̈cuyaguiwa'n nama̱lway to̱u mit cʉs̈wa'n naninʉ'gutéjmʉ pa we'n Dios nas̈chi'jtáj nu'pʉjʉn mal nawatway.

⁵Mit nu'pʉjʉn jeme tsʉ̱ngaway Judeajway na̱s̈ mit we'ney nu'pʉjʉn jeme tsʉ̱ngaway Jerusalén coygau mam itsʉ̱na Juan, mit cʉs̈ iguinʉ'gutemgau mʉjnʉ'ni'c Jordán, mit inʉmgajau Dios nu'pʉjʉn mal iwatcaway.

⁶Mit Juan icom tu'c jamuc watic mit camellupʉjc, mit imuyo'y tu'c pa̱gas̈-acpa̱s̈aj ipi̱nicni'c, mit icay pa̱tas̈ mit cuyjucchi̱n.

⁷Mit inʉmdacyo'y, inʉm: —Mimp tʉnmugus̈á̱m jeme más ijtʉpay poder que ʉ̱. Tʉs̈camerecia̱tp tʉnico'uda̱jcʉwa'n mam je' pa tʉs̈quejawa'n icʉ'acbulin.

⁸Ʉ̱ tʉnʉ'gutemgʉs̈ mit nʉ', po je' is̈moygáj Espíritu Santu.

⁹Wejpu'n Jesús ipichijn nʉ'jcopac Nazaret Galileajway na̱s̈, mit nʉcs̈ mam Juan mit cʉs̈ iguinʉ'gutem mʉjnʉ'ni'c Jordán.

¹⁰Mit cʉs̈ ipichijn Jesús nʉ'jugum, i-is̈ jaran ni'c tsajp awa̱ts, mit Espíritu Santu manac mam je' as̈am tu'c paloma.

¹¹Mit Dios cots tsajpni'c, inʉm: —Mi̱j ayé tʉ̱wáy jeme tʉwano'cpay, mi̱ is̈acji'jcap tʉnjo̱jt.

¹²Mit cʉs̈ Espíritu Santu imunʉcs̈ Jesús pa mam igatsʉ̱na nepʉn.

¹³Mit jem itsʉ̱naj cuarenta s̈ʉjwat mam igatsʉ̱na nepʉn mit iguitenta̱t Awayagatsna', mit tsʉ̱nau mit aníma̱jtat ma̱jlatway, mit mingau ángejlat pa iguimajyigáj.

¹⁴Cʉs̈ Juan iguicuytʉjcómgaj, Jesús coy Galilea mit inʉmdacyo'y tu'c oyway noticia ni'c Dios manda̱táj.

¹⁵Inʉm: —Coyway tiempu mit tomo'ganu pa imanda̱twa'n Dios. Cuyáguiga inma̱lway to̱jwat mit cupʉ́jca ayé oyway noticia.

¹⁶Mit iyo'jy Jesús laguna-auni'c Galilea, i-is̈ ni'c Simón mit i-ajch Andrés ica'tscau itsamajcat nʉ'jugum ni'c je'jat ma̱cpajyat.

¹⁷Mit Jesús inʉmgʉs̈au: —Natspoguigac. Inma̱jcapate acs̈, po jinap tʉ-actuche'ngʉs̈áj jayajwat ma tʉs̈cupʉjcac.

¹⁸Cʉs̈ iguimáraugaj we'n, iyajcau jaran itsamajcat mit inatspoguigau Jesús.

¹⁹Mit Jesús iyo'jy jas̈ʉ̱n jʉpm, i-is̈cʉs̈ Jacobo, Zebedeo iway, mit Juan Jacobo imajtsʉc, mit inapcapate itsamajcat i-ajni'jcat.

²⁰Mit Jesús iya̱s̈cʉs̈ Jacobo mit Juan. Mit cʉs̈ iguimáraugaj we'n, iyajcau ite̱jtat Zebedeo ajni'c mit iyos̈watpajyat, mit inatspoguigau Jesús.

²¹Mit coygau Capernaum. Cʉs̈ en tu'c po'cs̈ans̈ʉjw Jesús tʉgʉy mam i-adora̱tca judíujat mit i-ajque's̈cʉs̈au.

²²Mit nigu-épigʉjʉu mit i-ama̱s̈an ni'c je' ajque's̈ as̈am tu'c jayau manda̱tpay mit caje' as̈am i-ajque's̈capay ley.

²³Mit mam i-adora̱tca judíujat it tu'c jayau jeme ijtʉway demo̱nyu, mit je' ya̱s̈,

²⁴inʉm: —¿Ti inwamp mit ʉjtsat, Jesús Nazaretway? ¿Mimín pa is̈cʉs̈cáj? Ʉ̱ tʉ-is̈cap mi̱. Mi̱j ayé Dios is̈cupi̱way, mit je' is̈ajyu't.

²⁵Mit Jesús iche'cta̱c, inʉm: —¡Camcotswit, pichin mam je'!

²⁶Mit cʉs̈ ayé demo̱nyu i-actupʉc s̈e'm ayé jayau, mit ya̱s̈ mʉgʉc, mit pichin jaran.

²⁷Cʉs̈ nu'pʉjʉn nigu-épigʉjʉu mit ni-ucyo'tcʉjʉu, inʉmgau: —¿Ti iwatp ayʉ̱́j jayau? ¿Ti namay ama̱s̈an i-ajque's̈pay? As̈am tu'c jayau manda̱tpay iguimanda̱tcʉs̈ hasta demo̱nyujat, mit iguijayaumaygap.

²⁸Mit nu'pʉjʉn jeme tsʉ̱ngaway Galilea imaraugau lo que iwatway Jesús.

²⁹Mit ipichijn mam i-adora̱tca judíujat, Jesús, Jacobo mit Juan nʉs̈cau itʉcmat Simón mit Andrés.

³⁰Mit Simón imʉ't-ájchway cʉmnap che's̈ni'c ni'c ijtʉp tu'c jʉjn mʉgʉcway. Mit inʉmgajau Jesús ni'c je' tu'nij.

³¹Mit iguicutomij, iyajcau icʉ' ayé tu'nijway mit i-ajca's̈ʉ'c, mit iguiyac jaran ayé jʉjn, mit ayé ajchwaywáy i-atendia̱tcʉs̈atu.

³²Mit icutsu'ij, itʉ́gʉynuj s̈ʉwáy, imumingau mam itsʉ̱na Jesús nu'pʉjʉn tu'nijatway mit jeme itcʉjʉway demo̱nyujat.

³³Mit nu'pʉjʉn nʉ'jcopac jayau nigutomigʉjʉu tʉc-auni'c mam itsʉ̱na Jesús.

³⁴Mit Jesús i-ac-oytangʉs̈ mayo'c tu'nijatway, mit i-acpichingʉs̈au mayo'c demo̱nyujat, mit igamoygʉs̈u laj ayé demo̱nyujat ma cotsca ni'c i-is̈capcau ni'c je' ayé Cristu i-ajyu'tway Dios.

³⁵Ica's̈ʉ'jc Jesús jopoytsu'mnaj, pichin mit nʉcs̈ mam igatsʉ̱na nepʉn, mit jem i-ora̱jt.

³⁶Mit Simón mit jeme tsʉ̱ngaway mit je' nʉs̈cau iguiche'nga Jesús.

³⁷Mit iguipá̱tcaj, inʉmgajau: —Nu'pʉjʉn jayajwat is̈che'ngap.

³⁸Mit Jesús inʉmgʉs̈au: —Janga nʉ'jcopacwájat yajyʉ'jnatway pa tʉs̈nʉmdacyo'ywa'ney jem. Jemni'c tʉmijn.

³⁹Mit Jesús ituyo'y nu'pʉjʉn Galilea, inʉmdacyo'y jʉmba'tu mam i-adora̱tca judíujat, mit i-acpichingʉs̈ demo̱nyujat.

⁴⁰Mit iguicutomiu tu'c jayau ijtʉpay lla̱gas, mit nicos̈atenda̱jcʉu ita'ná̱m Jesús, mit iyo'jtau, inʉm: —Te inwamp, oyap is̈ac-oytamp.

⁴¹Mit Jesú's i-ayo̱wis̈ je', iyajcau icʉ', mit inʉjmau: —Tʉnwamp, mi-oytanáj.

⁴²Mit cʉs̈ iguitajyau jaran ayé lla̱gas, mit oytan ayé jayau.

⁴³Mit Jesús i-acnʉcs̈ jaran ayé jayau mit imanda̱t mʉgʉc, inajau:

⁴⁴—Camnʉjma nepʉn neti, po nʉs̈ actu-e'p judíujat ipa̱nijat ni'c mi-oytanway, mit yac ayé ofrenda lo que imanda̱tway Moisés pa jayajwat ma jawiga ni'c mi-oytanway.

⁴⁵Po ipichijn ayé jayau, chu̱chiu iguinʉmdacyo'y mit i-actujawigʉs̈ ti iguijatway. Jemni'c Jesús caja-oyawu itʉgʉy nejʉmay nʉ'jcopac ni'c i-is̈capcau jaran, po je' yo'y pe'ta̱m mam igatsʉ̱na nepʉn, po nu'pʉjʉn jayajwat mingau iguiche'ngap.