Read Sayula Popoluca San Marcos 11 Bible Online

San Marcos 11 - Sayula Popoluca bible

San Marcos 11

¹Icóygaj tom ayé nʉ'jcopajcat Jerusalén, Betfagé mit Betania mam i-it ayé copac los Olivos, Jesús i-ajyu't mechc ipʉctampajyat,

²inʉmgʉs̈au: —Nʉ́s̈ca en ayé nʉ'jcopac yajyʉ'nway laj, mit intʉgʉygawa'n jem, impa̱tcáj jaran tu'c burruwáy cujupiyic, mit nepʉn iganitucu'tp ayé burruwáy. Quéjca mit mumínga.

³Mit te tambʉn is̈nʉmgajap: ¿Tini'c is̈quéjca? inyʉmgajáj ni'c el Señor inesita̱tp ayé burruwáy, po i-acpitucnú̱jatu jaran.

⁴Cʉs̈ nʉs̈cau, mit ipa̱tcau calleni'c tu'c burruwáy cujupiyic tʉc-auni'c, mit iquejcau.

⁵Mit una̱c jayajwat jeme tsʉ̱ngaway jem iguinʉmgajau: —¿Tini'c is̈quéjca ayé burruwáy?

⁶Mit je'jat inʉmgajau lo que iguinʉmgajaway Jesús, mit imoygau laj ma munʉs̈ca.

⁷Mit imumingau burruwáy mam Jesús, mit i-ajcu'tcajau jamuc iyucuinm, mit Jesús itucu't ayé burru.

⁸Mit mayo'c itsapcau jamuc to̱uni'c mit ja-una̱c ipus̈cau cuy-awecwájat mit is̈ics̈cau to̱uni'c.

⁹Mit ya̱s̈cau jeme nʉs̈capay jʉpm mit jeme mingapay mugus̈á̱m, inʉmgau: —¡Hosanna! ¡Na-oyninʉ́mga ayʉ̱́j jeme igui-ajyu'tway el Señor!

¹⁰¡Na-oyninʉ́mga Dios ni'c mi'náj ayé tiempu cuandu imanda̱twa'n as̈am imanda̱jt David nate̱jtat ámbanuway! ¡Na-oyninʉ́mga Dios yucmay!

¹¹Icojy Jesús Jerusalén, je' nʉcs̈ templuni'c. Igui-is̈cʉs̈ nu'pʉjʉn cosajat jem, imupichingʉs̈ ayé doce ipʉctampajyat pa nʉ'jcopac Betania ni'c tsu'jito'ganu.

¹²Mit icus̈ʉwij jatu'c s̈ʉjw, ipíchingaj Betania, Jesús cayo'jcʉu.

¹³Mit i-is̈ yagatsu tu'c higueracujy jeme ijtʉway i-ajyat, mit oy igui-e'p te ipa̱jtáj itʉjm. Icojy jem, igapa̱jtawu neti. Ijtʉu puru i-ajy, ni'c canije' tiempu pa itʉmwatwa'n.

¹⁴Mit imucots ayé higueracujy, inʉjmau: —Nepʉn pi is̈cajato'jac nunca intʉjm. Mit imaraugau ipʉctampajyat lo que inʉmway.

¹⁵Coygau Jerusalén. Itʉgʉjy Jesús templuni'c, chu̱chiu igui-acpichingʉs̈ jeme to'jcapay mit juygapay templuni'c. Mit i-acchi'tpitujcʉs̈au tumi̱ntigatspajyat ime̱s̈ajat, mit we'ney palomato'cpayna'jat ipa̱ngujat,

¹⁶mit igayagu laj nepʉn iguimunas̈tujcawa'n tanti templuni'c.

¹⁷Mit i-ajque's̈cʉs̈au, inʉm: —Ja'yic itsʉ̱na Dios ilibruni'c: “Tʉntʉjc nʉmic pa tu'c lugar mam na-ora̱tcawa'n nanu'pʉjʉjnat.” Po mijchat intigatscau ayʉ̱́j tʉjc, mit impʉjcap as̈am nu'mpajyat itʉjcat.

¹⁸Mit imaraugau jeme i-ajque's̈capay ley mit judíujat, mit iche'ngajau ilaj pa igui-ago'jcawa'n Jesús, ni'c ipʉ̱tcau ni'c nu'pʉjʉn jayajwat nigu-épigʉjʉp mit i-ama̱s̈an.

¹⁹Po icutsu'ij, Jesús pichin en ayé nʉ'jcopac.

²⁰Inás̈caj jopoyít, i-is̈cau ni'c tʉ̱tsway ayé higueracujy hasta iticchicni'c.

²¹Mit iguinijáwij Pedro, inʉjmau Jesús: —Amayipay, e'pnaj, tʉ̱tsway ayé higueracujy jeme inmaldiciona̱tway.

²²Ipo'ngʉs̈ Jesús: —Cupʉ́jca mʉgʉc Dios.

²³Iyacs̈ta'cway tʉnʉmgʉs̈ap ni'c pʉmba'tu jeme inʉjmámpay ayʉ̱́j copac: “Niju'jpʉ mit nica'tstʉ́gʉjyʉ lama̱tjugum”, mit te igaduda̱tp ijo̱tni'c po icupʉcp ni'c jatáj lo que inʉmpay, wenamé ijatwa'n.

²⁴Jemni'c tʉnʉmgʉs̈a: In-ora̱tcawa'n, cupʉ́jca ni'c impʉctsougáj nu'pʉjʉn lo que inyo'tcajapay Dios, mit is̈mingajáj.

²⁵Cuandu in-ora̱tcawa'n, te inaguepcap inmutsuguijnat perdoná̱tca, pa we'n inte̱jtat tsajpni'cway is̈perdona̱tcajámpey ayé mal inwatcaway.

²⁶Ni'c te mijchat migaperdona̱tcap, we'ney inte̱jtat tsajpni'cway is̈caperdona̱tcajámpey inma̱jlat inwatcaway.

²⁷Pitujcawatu pa Jerusalén. Mit iyo'jy Jesús templuni'c, mingau mam je' judíujat imʉjpa̱nijat, jeme i-ajque's̈capay ley mit na'waywájat.

²⁸Inʉmgajau: —¿Pʉn is̈manda̱t pa is̈ajque's̈wa'n we'n? mit ¿pʉn is̈moyp laj pa is̈watwa'n ayʉ̱́j cosajat?

²⁹Jesús ipo'ngʉs̈: —Tʉwatcʉs̈ámpey tu'c pregunta mit te is̈po'ngap, tʉnʉmgʉs̈ámpey pʉn tʉs̈manda̱t pa tʉs̈watwa'n ayʉ̱́j cosajat.

³⁰¿Pʉn iguimanda̱t Juan pa inʉ'gutemwa'n, Dios tsajpni'cway o jayajwat? Po'ngac.

³¹Mit je'jat ni-ucyo'tcʉjʉu yename: —Te nanʉmgap ni'c iguimanda̱t Dios tsajpni'cway, nas̈nʉmgajáj: “¿Tini'cpaj is̈cacupʉ́jcaj je'?”

³²Mit te nanʉmgap ni'c iguimanda̱tcau jayajwat, napʉ̱tcap ayé jayaujuc, ni'c nu'pʉjʉn je'jat icupʉjcap ni'c Juan tu'c profeta iyacs̈ta'cway.

³³Ipo'ngau Jesús: —Tʉngajawigap. Mit inʉmgʉs̈au Jesús: —Ʉ̱ Tʉganʉmgʉs̈ámpey pʉn tʉs̈manda̱t pa tʉs̈watwa'n ayʉ̱́j cosajat.