Read Sayula Popoluca San Marcos 12 Bible Online

San Marcos 12 - Sayula Popoluca bible

San Marcos 12

¹Mit cʉs̈ Jesús chu̱chiu iguitumuquips̈cʉs̈ cuentujat, inʉm: —Tu'c jayau ini̱p tu'c uvajuc, mit i-acerca̱t mit cujy, itáj tu'c cʉt pa uvacoman, mit iwatey tu'c cuyche's̈ yucmay pa iguicuida̱tcawa'n ayé uvajuc, mit itumuyajcʉs̈ una̱c yos̈watpajyat, mit je' nʉcs̈ yagats.

²Icojy itiempu pa iguitujcawa'n ayé uva, ayé jayau i-ajyu't tu'c mozo pa mam itsʉ̱nga iyos̈watpajyat pa iguimunʉs̈cajawa'n je' iparte.

³Po ayé yos̈watpajyat igui-actángaj ayé mozo, imoyta̱jcau mit i-acpitujcau sin neti.

⁴Mit ayé jayau i-ajyu't jatu'c mozo, po ayʉ̱́jway ipojcajau mit tsa', i-ajcopacjotcau mit i-apes̈ta̱jcau.

⁵Mit ayé jayau i-ajyu't jatu'c mozo mit ayʉ̱́jway i-ago'jcau. Mit wename iguiwátcaj mit nu'pʉjʉn jeme i-ajyu'tcʉs̈way, una̱c ipojniguitaugau, mit ja-una̱c i-ago'jcau.

⁶’Mit je' ijtʉu iway jeme iwano'cway, mit por últimu i-ajyu'tcʉs̈awey, inʉm: “Irespeta̱tcáj tʉnwáy.”

⁷Po ayé yos̈watpajyat inʉmgau je'jatu: “Ayʉ̱́j ayé imutanámpay nu'pʉjʉn. Ja' na-ago'jca mit nu'pʉjʉn lo que ijtʉpay tanáj pa naje'jat.”

⁸Igui-actángaj, je' i-ago'jcau mit icucachigau pe'ta̱m de ayé uvajuc.

⁹Mit cʉs̈ Jesús i-ucyo'tcʉs̈: —¿Ti iwatáj ijayc ayé uvajuc? Mi'náj mit icʉs̈pʉ'náj ayé yos̈watpajyat, mit imo'áj ayé uvajuc pa jatu'jcat.

¹⁰’¿Inganicotscap Dios ilibruni'c mam itsʉ̱na ja'yic? Ayé tsa' jeme igawangaway tʉcwatpayna'jat, ayʉ̱́j ayé iyajcámpay esquinani'c pa itsʉmwa'n más.

¹¹Ni'c el Señor iwat ayé, mit ayé nas̈acnigu-épigʉjʉp.

¹²Mit ja-iche'ngajau ilaj pa igui-actangawa'n ni'c ijawigau ni'c je'jat iguitu-ampiugau mit ayé cuentu, po ipʉ̱tcau ayé jayaujuc. Mit je'yu icuyaguigau, mit nʉs̈cau.

¹³I-ajyu'tcau mam Jesús una̱c fariseujat mit Herodes ijayajwat pa igui-ajca'ugawa'n mit lo que inʉmámpay.

¹⁴Mit imíngaj, inʉmgajau: —Amayipay, tʉnjawigap ni'c inyʉmp lo que iyacs̈ta'cway, mit ingapʉ̱tp nepʉn, po niwe'nu is̈-e'pcʉs̈ nu'pʉjʉn jayajwat, mit yacs̈ic is̈ajque's̈a Dios ito̱u. ¿Oy nas̈mo'wa'n tumi̱n impuestu rey César o ca-oy? ¿Natso̱jcáj o nagatso̱jcáj?

¹⁵Po Jesús ijawiu ni'c pensa̱tcap mal, mit inʉmgʉs̈au: —¿Tini'c is̈proba̱tcap? Mumíngajac tu'c tumi̱n pa tʉs̈-e'pwa'n.

¹⁶Cʉs̈ iguimumíngajaj, Jesús i-ucyo'tcʉs̈: —¿Pʉn ayé iretratu mit inʉ'jy jeme tsʉ̱napay ja'yic tumi̱ni'c? Iguipo'ngau: —César ayé.

¹⁷Jesús inʉmgʉs̈au: —Moyga César lo que César ije'way, mit moyga Dios lo que Dios ije'way. Mit nigu-épigʉjʉu ni'c we'n ipo'jn.

¹⁸Cʉs̈ mingau mam je' una̱c saduceujat jeme inʉmgapay ni'c cajutucta̱jcáj á̱nimajat, mit i-ucyo'tcau Jesús, inʉmgau:

¹⁹—Amayipay, Moisés ija'y yename pa ʉjtsat nas̈watcawa'n: te tu'c jayau o'cp i-ajch mit te iyacp ito's̈ay po igayacp iway, ayé jayau ma nicʉ'pa̱jtʉ mit i-ajch ito's̈ay pa ma ijtʉ iway por i-ajch magacʉs̈ ayé familia.

²⁰It siete muta̱cjéwajyat. Mit jeme más ajchcopacway nicʉ'pa̱jtʉu, mit cʉs̈ o'c mit igayagu iway.

²¹Mit imajtsʉc jeme iguinatspoguipay ipʉgatu ayé to's̈ay, mit i-o'jc, igayagu-ey iway. Mit we'ney iguijat terceruway.

²²Mit inisietejatij ipʉjcau is̈ta'c ayé to's̈ay, o'cpʉ'ngau mit igawatcajawu iway ayé to's̈ay. Mit cʉs̈ o'guey ayé to's̈ay.

²³Ijutucta̱jcawa'n nu'pʉjʉn á̱nimajat, ¿pʉn de ayé sietejatway ipʉgáj ayé to's̈ay? ni'c inisietejatij ito's̈ayjatcau.

²⁴Jesús inʉmgʉs̈au: —¿Ingajawigap nat itsʉ̱na ja'yic Dios ilibruni'c ne ingajawigap ni'c Dios ijtʉp maj? Jemni'c ca-oyap impensá̱tca.

²⁵Cuandu ijutucta̱jcawa'n nu'pʉjʉn á̱nimajat, canicʉ'pa̱tcʉjʉ̱́j ne igawatcáj cʉ'pa't, po tsʉ̱ngáj as̈am ángejlat tsajpni'cway.

²⁶Ingajawigap ni'c jutucta̱jcáj nu'pʉjʉn á̱nimajat ni'c ingani-entendia̱tcap Moisés ilibru, nat iguimucots Dios zarza-awa'tsam, inajau: “Ʉ̱j ayé tʉs̈Dios Abraham, mit tʉs̈Dios Isaac mit tʉs̈Dios Jacob.”

²⁷Dios iga-e'pcʉs̈p ayé jayajwat as̈am o'guijcatway. Je' Dios pa jeme tsʉ̱ngapnajway. Nes̈ʉ̱n ca-oyap impensá̱tca.

²⁸Coy mam Jesús tu'c jayau i-ajque's̈pay ley. Iguimarajw nat icótscaj mit iguijawij ni'c oyo'gu iguipo'ngʉs̈ Jesús, i-ucyo't: —¿Jʉmay ayé mandamientu más primeruway de nu'pʉjʉn?

²⁹Ipo'n Jesús: —Ayʉ̱́j ayé mandamientu más primeruway: “Márauga mijchat miIsraejlatway: El Señor ayé naDiosat, mit el Señor tu'gujyu ayé.

³⁰Mit inwa'náj el Señor inDios mit nu'pʉjʉn injo̱jt, mit nu'pʉjʉn imvida, mit nu'pʉjʉn intupensa̱tpay, mit nu'pʉjʉn inmaj.” Ayʉ̱́j ayé mandamientu más primeruway.

³¹Mit segunduway ayʉ̱́j ayé: “Inwa'náj inmupro̱wije̱way as̈am mi̱ inyiwajnʉ.” Ca-itp jatu'c mandamientu más mʉjway que ayʉ̱́jat.

³²Iguinʉjmau ayé jayau: —Amayipay, oyo'gu impo'jn. Iyacs̈ta'cway lo que inyʉmpay ni'c Dios tu'gujyu ayé, mit ca-itp jatu'c as̈amay je'.

³³Mit nas̈wa'nwa'n Dios mit nu'pʉjʉn najo̱jt, mit nu'pʉjʉn natupensa̱tpay, mit nu'pʉjʉn navida, mit nu'pʉjʉn namaj, mit nas̈wa'nwa'n namupro̱wije̱way as̈am naniwajnʉ, ayʉ̱́jat ayé más oyway que nas̈no'cwa'n tu'c aníma̱t pa Dios, o que nu'pʉjʉn nacojtsapay Dios.

³⁴Jesús iguimarajw ni'c oyo'gu ipo'jn, inʉjmau: —Tomo'c intsʉ̱na pa Dios is̈manda̱táj. Mit nu'pʉjʉn pʉ̱tcau igui-ucyo'tcawa'n.

³⁵Igui-ajque's̈cʉ́s̈aj Jesús templuni'c, inʉm: —¿Tini'c jeme i-ajque's̈capay ley iguinʉmga ni'c Cristu ayé David iway?

³⁶Ni'c Espíritu Santu i-actunʉm David: El Señor inʉjmau tʉnSeñor: “Tsʉ́na tʉn-oyimaycʉ'ni'c, hasta tʉs̈vencia̱twa'n nu'pʉjʉn inmutsuguijnat.”

³⁷Te nije'yu David inʉjmau ni'c Cristu ayé iSeñor jeme iguimanda̱tpay, ¿natpaj iguiwayjatwa'n? Mit mayo'c jayajwat iwangau iguimaraugawa'n Jesús.

³⁸Jesús i-ajque's̈cʉs̈au: —Mijchat nicuidá̱tcʉjʉ mit ayé jayajwat i-ajque's̈capay ley, ni'c iwangap iguimuyo'ygawa'n yagatsjamuc, mit iwangap jayajwat ma iguisaluda̱tcac plazani'c mit may respetu,

³⁹mit iwano'jcap pa̱ngujat más ojyatway mam i-adora̱tca judíujat, mit iwangap lugajrat más ojyatway mam iguiwatca cayna̱s̈.

⁴⁰Ayʉ̱́jat ichi'tcajap cu-o'cwájat itʉjcat, mit jego'cp i-orá̱tca pa jayajwat magajawiga ni'c we̱tpajyat. Ayʉ̱́jat Dios igui-actunas̈cáj más.

⁴¹Jesús nitsʉ̱nda̱jcʉu templuni'c tom mam i-it tu'c cas̈u̱n itucomgapay tumi̱n, mit i-is̈cʉs̈ jayajwat nat iguicómgaj itumi̱jnat cas̈u̱ni'c. Mit mayo'c ricujat icomgau may.

⁴²Mit miney tu'c cu-o'cwáy pro̱wijway, mit icom mechc tumi̱nwájat de cobre jeme valia̱tway tu'c centavu.

⁴³Iguiya̱s̈cʉs̈ Jesús ipʉctampajyat, inʉmgʉs̈au: —Iyacs̈ta'cway tʉnʉmgʉs̈ap ni'c ayʉ̱j cu-o'cwáy pro̱wijway icom más que nu'pʉjʉn jeme icomgapay cas̈u̱ni'c.

⁴⁴Ni'c nu'pʉjʉn icomgau jeme igui-atangajaway, po ayʉ̱́jway, majapro̱wi-aj, icombʉ'n nu'pʉjʉn jeme ijtʉway, nu'pʉjʉn jeme itucayámpay.