Read Sayula Popoluca San Marcos 13 Bible Online

San Marcos 13 - Sayula Popoluca bible

San Marcos 13

¹Ipichíjn Jesús templuni'c, iguinʉjmau tu'c ipʉctampay: —Amayipay, ¡e'pnaj, que oymanac ayé tsa'jat templuni'cway! ¡Qué oymanac ayé templu mit tʉjcat itpay jem!

²Po Jesús inʉjmau: —¿Inyijatp ayé majatway tʉjcat? Po itp ti iyʉnʉnmanajcawa'n ayé tʉjcat, mit catanáj netu'c tsa' ʉ'pic.

³Nitsʉ̱nda̱jcʉu Jesús en ayé copac los Olivos mam na-e'pnʉs̈ mam i-it ayé templu, mit igui-ucyo'tcau aparte Pedro, Jacobo, Juan mit Andrés, inʉmgau:

⁴—Nʉmgajac, ¿jutim ijatwa'n ayʉ̱́j cosajat jeme is̈nʉmgajaway? ¿Mit ti tʉn-e'pcáj pa tʉs̈jawigawa'n ni'c tom pa icumplia̱tcawa'n?

⁵Jesús inʉmgʉs̈au: —Nicuidá̱tcʉjʉ pi is̈cawe̱jta̱jcac nepʉn.

⁶Ni'c mingáj mayo'c we̱tpajyat mit i-ataynʉmgáj ni'c je'jat Cristu, mit iwe̱jta̱jcáj mayo'c jayajwat.

⁷’Mit inmaraugáj ni'c itp tsuguin mit is̈nʉmgajáj ni'c itámnaj más tsuguin, po campʉ̱tcawit, ni'c itp ti ijatwa'n wename, po canije' tiempu pa icʉs̈pʉ'nwa'n nu'pʉjʉn.

⁸Ni'c jayajwat en tu'c na̱s̈ imutsuguinwatcáj jayajwat jatu'c na̱s̈atway, mit tsuguinwatcáj rejyat. Mit nas̈áj us̈ mʉgʉcway jʉmgapa'tu, mit itáj yu' mit pʉ̱tna̱s̈. Mit ijatwa'n wename, ayé ni'c chu̱chipnaj iguitunas̈ca jayajwat.

⁹’Nicuidá̱tcʉjʉ mijchat ni'c is̈yajcáj icʉ'jugujmat judíujat ijefejat, mit is̈raunipʉ'ngáj mam i-adora̱tca judíujat, mit je'jat is̈munʉs̈cáj pa mam itsʉ̱nga gobernadojrat mit mam reyna'jat ni'c ʉ̱ is̈wangap, mit we'n oyáj is̈nʉ́mgaja lo que incupʉjcapay.

¹⁰Antes icʉs̈pʉ'nwa'n nu'pʉjʉn, itp ti nas̈nʉmdacyo'jyʉ'cwa'n Jesucristu i-oyway noticia pa nu'pʉjʉn jayajwat.

¹¹Po cuandu is̈munʉs̈cáj pa autoridajat icʉ'jugujmat, campensa̱tca ti inyʉmgámpay, po inyʉmgáj lo que Dios is̈moygámpay en ayé hora, ni'c caje' mijchatu micotscáj, po is̈ajcotscáj Espíritu Santu.

¹²Mit tu'c jayau i-ac-ago'jcʉ̱́j imajtsʉc, mit jatu'c jayau i-ac-ago'jcʉ̱́j iway, mit ya̱wayna'jat imutsuguinwatcáj ite̱jtat mit i-ac-ago'jcʉjʉ̱́j.

¹³Mit nu'pʉjʉn is̈-angáj mijchat ni'c is̈cupʉjcap ʉ̱, po jeme imajmo'ámpay hasta icʉs̈pʉ'nwa'n nu'pʉjʉn jeme jatámpay, ayé nisalva̱jtʉ̱́j.

¹⁴’Po in-e'pcáj jeme i-actogoyda̱jcapay sin winchu̱jc cosa oyway, mit ayé tsʉ̱náj en ayé templu i-oyninʉmway Dios. We'n iguinʉjm ayé profeta Daniel mit jeme icotspay ayʉ̱́j noc, ma entendia̱t. Wejpu'n jeme tsʉ̱ngapay Judeajway na̱s̈ ma po'jca pa copac-awa'tsam.

¹⁵Mit jeme tsʉ̱napay tʉcyucuinm ma po'c jaran, magatʉgʉywit itujugum pa igui-acpichinwa'n tanti.

¹⁶Mit jeme tsʉ̱napay camni'c, magapitucwit pa iguipʉcwa'n ima'n.

¹⁷¡Pro̱wij de ayé to's̈ajyat jeme wáyajatway, mit jeme way-acye'jcapay en ayé s̈ʉjwat!

¹⁸Orá̱tcaja Dios maga-it payic cuandu impo'jcawa'n.

¹⁹En ayé s̈ʉjwat itáj pʉ̱tna̱s̈, ni'c desde Dios iguiwajt ayʉ̱́j mundu hasta jinap, nunca cani-itp pʉ̱tna̱s̈ as̈am ayʉ̱́jway, ne caja-itáj nunca wename.

²⁰Mit ma jegate ayé s̈ʉjwat pa iguitunas̈cawa'n, nepʉnate catsʉ̱náj salva̱tic. Po Dios iga-acjegáj ayé s̈ʉjwat ni'c iwangʉs̈p jeme icupiugʉs̈way.

²¹’Mit wejpu'n te tambʉn is̈nʉmgajap: “¡E'pca, yam itsʉ̱na Cristu!” o te is̈nʉmgajap: “¡E'pca, jem itsʉ̱na!”, camcupʉjcawit.

²²Ni'c mingáj we̱tpajyat, inʉmgáj ni'c je'jat Cristu, mit inʉmgámpey ni'c Dios igui-ajyu'tcau, mit iwatcáj majatway milagrujat mit is̈acnigu-epigʉjʉ̱́j, mit te oyap iwe̱jta̱jcájate hasta jeme Dios icupiugʉs̈way.

²³Po mijchat nicuidá̱tcʉjʉ. Tʉnʉmgʉs̈away nu'pʉjʉn antes ijatwa'n.

²⁴’Po en ayé s̈ʉjwat, icʉs̈wa'n ayé pʉ̱tna̱s̈, s̈ʉwáy cuchitimiyáj, mit po'wáy cajata'cs̈áj.

²⁵Mit ma̱tswájat ca'ugáj tsajpni'c, mit nu'pʉjʉn cosa ijtʉpay poder tsajpni'c s̈is̈cada'gáj.

²⁶Mit wejpu'n tʉs̈-e'pcáj ʉ̱ jeme tʉjatway jayau, ni'c tʉmi'náj wintucjugum mit mayo'c poder, mit oymanac tʉmi'nwa'n.

²⁷Mit wejpu'n tʉnajyu'tcʉs̈áj tʉn-ángejlat mit i-apʉcmujcáj nu'pʉjʉn tʉncupiugʉs̈way jʉmgapa'tu mam itsʉ̱nga en ayʉ̱́j mundu.

²⁸’Tʉntumuquips̈áj tu'c higueracujy pa pi jawiga. I-ayawiwa'n i-awec mit ipichinwa'n iyau-ajy, injawigap ni'c tominup s̈ʉutim.

²⁹Wename-ey cuandu is̈-e'pcawa'n ni'c jatnup lo que tʉnyʉmpay, injawigáj ni'c tomo'ganu pa icʉs̈pʉ'nwa'n nu'pʉjʉn.

³⁰Iyacs̈ta'cway tʉnʉmgʉs̈ap ni'c jinapay jayajwat cani-o'jcáj hasta ijatwa'n nu'pʉjʉn tʉnyʉmway.

³¹Cʉs̈áj tsajp mit na̱s̈, po tanáj pa siempre lo que tʉnyʉmpay.

³²’Nepʉn igajawip ti s̈ʉjw ne ti hora icʉs̈pʉ'nwa'n nu'pʉjʉn, ne ángejlat tsajpni'cway igajawigapey, ne Dios iway. Solo tʉnte̱t Dios ijawip.

³³’Nicuidá̱tcʉjʉ, tsʉ̱́nga prepara̱tic mit orá̱tca, ni'c ingajawigap jutim icojawa'n ayé tiempu.

³⁴Mit ayʉ̱́j jatáj as̈am tu'c jayau jeme nʉcs̈way yagats, iyac itʉjc, mit itumuyajcʉs̈ iyos̈watpajyat, mit cada jayau itumuyac iyos̈, mit imanda̱t ayé tʉcmutampayna' ma cuida̱t.

³⁵We'ney mijchat, pi tsʉ̱nga prepara̱tic, ni'c ingajawigap jutim imi'nwa'n tʉcna' ijayc, te icutsu'iwa'n, o te pu̱jtsu'm, o te i-ʉwa'n ca̱yuna' jopoytsu'mnaj, o te jopoyít.

³⁶Magami'n jaran, is̈cupa̱tigáj mima̱gap.

³⁷Mit lo que tʉnʉmgʉs̈apay mijchat, tʉnyʉmgʉs̈apey nu'pʉjʉjnat: Tsʉ̱́nga prepara̱tic.