Read Sayula Popoluca San Marcos 14 Bible Online

San Marcos 14 - Sayula Popoluca bible

San Marcos 14

¹Togoypnajate mechc s̈ʉjw pa iguitsougawa'n ma̱s̈ʉjw pascua cuandu iguicayga ma̱s̈anʉ̱n sin levadura, judíujat imʉjpa̱nijat mit jeme i-ajque's̈capay ley iche'ngajau ilaj nat iguiwe̱twatcajawa'n Jesús, mit i-actangáj pa igui-ago'jcawa'n.

²Mit inʉmgau: —Mejor nagawátca neti ma̱s̈ʉuni'c magaya̱s̈cada̱jca nʉ'jcopac jayajwat.

³Mit Jesús tsʉ̱nau nʉ'jcopac Betania tʉc Simón jeme ijtʉway lla̱gas. Itsʉ̱́naj me̱s̈ani'c, tu'c to's̈aywáy imumin tu'c s̈a̱nu jeme ijtʉway japuru oyway perfume inʉ'jyway nardo, mit ayé tsowo'gaj. Igui-acmo'jt ayé s̈a̱nu, itemgu'jtau icopacni'c Jesús.

⁴Mit it una̱c jeme awa'nigaway mit inʉmgau je'jatu: —¿Pa chan igui-actogojy ayé perfume?

⁵Ni'c oyapate nas̈to'jca ayé perfume por más de tres mil pesos pa nas̈moygawa'n pro̱wijwájat. Mit itucotscau ayé to's̈ay.

⁶Po inʉm Jesús: —Camnʉmgaja neti. ¿Tini'c is̈che'jca ayé to's̈ay? Tʉs̈wajtau tu'c cosa oyway.

⁷Ni'c siempre pro̱wijwájat tsʉ̱ngáj mit mijchat, mit is̈wangawa'nu, oyap is̈wátcaja cosa oyway pa je'jat, po ʉ̱ tʉgatsʉ̱náj nu'pʉjʉn tiempu yam mit mijchat.

⁸Ayʉ̱́j to'xay iwat as̈am i-oya. Tʉs̈yajcau perfume jaran tʉncuerpuni'c antes tʉs̈ni̱pcáj á̱nimacʉtni'c.

⁹Iyacs̈ta'cway tʉnʉmgʉs̈ap ni'c jʉmgapa'tu mam iguinʉmdacyo'ygawa'n ayé oyway noticia en nu'pʉjʉn mundu, i-ampiugáj lo que iwatway ayʉ̱́j to's̈ay, pa we'n inijawigáj je'.

¹⁰Mit Judas Iscariote, tu'c de ayé doce pʉctampajyat, nʉcs̈ mam judíujat imʉjpa̱nijat pa iguiyacwa'n Jesús icʉ'jugujmat.

¹¹Iguimáraugaj we'n, ji'cta̱c ijo̱jtat, mit icotscajau tumi̱n. Mit Judas iche'jnau tu'c oyway tiempu pa iguiyacwa'n Jesús icʉ'jugujmat.

¹²Ayé primer s̈ʉjw cuandu iguicaygawa'n ma̱s̈anʉ̱n sin levadura, mit cuandu igui-ago'jcawa'n tu'c borreguwáy pa iguitsougawa'n ayé pascua, Jesús ipʉctampajyat iguinʉmgajau: —¿Jʉm is̈wa'n tʉ-oyajcajawa'n pa incaywa'n en ayé ma̱s̈ʉjw pascua?

¹³Mit Jesús i-ajyu'tcʉs̈ mechc ipʉctampajyat mit inʉmgʉs̈au: —Nʉ́s̈ca nʉ'jcopacni'c mit inmunipa̱tcʉjʉ̱́j tu'c jayau jeme imunʉs̈pay tu'c majc nʉ'. Natspóguiga je'.

¹⁴Mit mam itʉgʉywa'n, nʉmgaja ayé tʉjcajway: “Inʉmp Amayipay: ¿Jʉm i-it ayé cuartu mam tʉs̈tsowa'n ayé ma̱s̈ʉjw pascua mit tʉmpʉctampajyat?”

¹⁵Mit je' is̈actu-e'pcáj tu'c mʉjway cuartu yucmay pisuni'c, mit oyaguiganu. Prepará̱tca jem pa ʉjtsat.

¹⁶Ipíchingaj ipʉctampajyat, coygau en ayé nʉ'jcopac mit ipa̱tcau as̈am iguinʉmgajau. Mit iprepara̱tcau pa i-u̱cma̱gawa'n en ayé ma̱s̈ʉjw pascua.

¹⁷Icutsu'ij, Jesús min mit ayé doce pʉctampajyat.

¹⁸Itsʉ̱́ngaj je'jat me̱s̈ani'c mam icáygaj, Jesús inʉmgʉs̈au: —Iyacs̈ta'cway tʉnʉmgʉs̈ap ni'c nu'pʉjʉn mijchat tʉmucaygʉs̈pay, itáj tu'c jeme tʉs̈to'ctʉgʉyámpay.

¹⁹Cʉs̈ tu'ngau jaran ijo̱jtat mit cʉjtu'c cʉjtu'c i-ucyo'tcau: —¿Ʉ̱j ayé? Mit jatu'c inʉmey: —¿Ʉ̱j ayé?

²⁰Jesús ipo'ngʉs̈: —Tʉs̈to'ctʉgʉyáj tu'c de mijchat midocejat, mit je' i-acs̈o'cp ima̱s̈anʉ̱n mit ʉ̱ puna̱tuni'c.

²¹Iyacs̈ta'cway ʉ̱ jeme tʉjatway jayau tʉs̈jatáj as̈am itsʉ̱na ja'yic Dios ilibruni'c, po ¡pro̱wij de ayé jayau jeme tʉs̈to'ctʉgʉyámpay ʉ̱ jeme tʉjatway jayau! Más oy maga-ítate ayé jayau.

²²Mit mam icayga-ate, Jesús ipʉc ma̱s̈anʉ̱n mit ibendiciona̱t, i-emgada̱c mit imoygʉs̈ je'jat, inʉmgʉs̈au: —Pʉctsóuga, ayʉ̱́j as̈am tʉncuerpu.

²³Iguipʉjc tu'c vasu, iguinʉ́jmaj Dios ni'ctiyu̱s̈, imoygʉs̈ je'jat, mit itu-u̱jcau nu'pʉjʉn.

²⁴Mit inʉmgʉs̈au: —Ayʉ̱́j as̈am tʉnyipin pa ma it tu'c nam acuerdu, mit tʉnyipin pujʉ'gáj pa mayo'c jayajwat ma tsʉ̱nga perdona̱tic.

²⁵Iyacs̈ta'cway tʉnʉmgʉs̈ap ni'c tʉngaja-u'gáj vinu mit mijchat hasta ayé s̈ʉjw cuandu natsʉ̱ngawa'n tuwitic en ayé lugar mam imanda̱t Dios.

²⁶Cʉs̈ igui-ʉ́ugaj tu'c himnu, pichingau pa ayé copac los Olivos.

²⁷Mit Jesús inʉmgʉs̈au: —En ayʉ̱́j tsu' is̈cuyaguigáj nu'pʉjʉn mijchat, ni'c ja'yic itsʉ̱na Dios ilibruni'c: “Tʉnago'gáj aquepmucpayna' mit nu'pʉjʉn borregujat cunʉs̈icada̱jcáj.”

²⁸Po cʉs̈wa'n tʉjutucta'cwa'n, tʉnʉs̈ʉ'gáj Galilea.

²⁹Pedro iguinʉjmau: —Maja is̈cuyaguigámpaj nu'pʉjʉjnat, pó ʉ tʉgacuyaguiyáj.

³⁰Jesús inʉjmau: —Iyacs̈ta'cway tʉnʉjmap ni'c jinapay tsu' antes i-ʉwa'n mechc viaje ca̱yuna', tu̱gup viaje is̈nʉmwa'n ni'c ʉ̱ is̈ca-is̈cap.

³¹Po Pedro inʉjmau más mʉgʉc: —Maja tʉ-o'cwa'naj mit mi̱, tʉnganʉmáj ni'c tʉga-is̈cap mi̱. Mit we'n iguinʉ́mgaj nu'pʉjʉn pʉctampajyat.

³²Coygau en tu'c lugar inʉ'jyway Getsemaní, mit Jesús inʉmgʉs̈au ipʉctampajyat: —Tsʉ̱́nga yam mientras tʉ-ora̱tp.

³³Mit imunʉs̈cʉs̈ Pedro, Jacobo mit Juan. Mit Jesús triste inijáwijyʉj mit tu'n ijo̱jt.

³⁴Inʉmgʉs̈au: —Tu'no'cp tʉnjo̱jt hasta tʉs̈jawi oyap tʉ-o'c. Tánga yam mit tsʉ̱́nga prepara̱tic.

³⁵Inʉjcs̈ s̈ʉ̱n jʉpm, nijas̈manajcʉu na̱s̈ni'c, mit i-ora̱jtau Dios, te oyap, ma iguinas̈ac ayé prueba iguijatámpay.

³⁶Inʉjmau: —Padre, mi̱ oyap is̈wat nu'pʉjʉn cosa. Majyiyac pa tʉgatunas̈ ayʉ̱́j prueba tʉs̈mijnapay, po tʉnwamp tʉs̈watwa'n lo que mi̱ inwampay.

³⁷Ipitujc Jesús mam itsʉ̱nga ayé pʉctampajyat, icupa̱tigʉs̈ ni'c ma̱gap. Mit inʉjmau Pedro: —Simón, ¿mima̱p? ¿Cani-oyap intsʉ̱na nijutuc tu'c horajyu?

³⁸Tsʉ̱́nga nijutuc mit orá̱tca pi is̈catenta̱tcac. Iyacs̈ta'cway nawamp nas̈watwa'n oy, po nacuerpu nas̈camajyip.

³⁹Inʉjcs̈atu, i-ora̱jtau Dios, inʉjmau ni-as̈amu.

⁴⁰Ipitujc, icupa̱tigʉs̈atu ma̱gap ni'c ma-o'jcʉjʉu mʉgʉc. Mit ca-oyawu iguipo'nga neti.

⁴¹Ipitujc imutu̱gupay viaje, inʉmgʉs̈au: —Má̱gama mit po'cs̈ca. Oyuma, coyway hora. E'pca, ʉ̱ jeme tʉjatway jayau tʉs̈yajcájama maljayajwat icʉ'jugujmat.

⁴²Ca's̈ʉ'jca mit janga. E'pca, nigutomijyʉp jeme tʉs̈to'ctʉgʉyámpay.

⁴³Jesús imucotscʉs̈pnajate, coyta̱c jaran Judas, tu'c de ayé doce pʉctampajyat, mit imuyo'y tu'c jayaujuc jeme imuyo'ygapay i-espadajat mit icujyat. Mit ayʉ̱́jat igui-ajyu'tcau judíujat imʉjpa̱nijat, jeme i-ajque's̈capay ley mit na'waywájat.

⁴⁴Mit Judas jeme ito'ctʉgʉyway Jesús, inʉmgʉs̈au nat igui-is̈capcawa'n, inʉm: —Jeme tʉns̈u'gámpay, jemé ayé. Actánga mit munʉ́s̈ca pa magapo'c.

⁴⁵Imijn Judas, nigutomijyʉu jaran mam Jesús, inʉjmau: —Amayipay. Mit is̈u'c.

⁴⁶Mit cʉs̈ i-actangau Jesús, mit imunʉs̈cau.

⁴⁷Mit tu'c jeme tsʉ̱naway mit Jesús, iguichi'jt i-espada, ipus̈au mʉjpa̱nijna' imozo, mit ipus̈tujcau ita̱tsʉc.

⁴⁸Mit Jesús inʉmgʉs̈au: —¿Tini'c mimp is̈actangap mit espada mit cujyat as̈am is̈actánga tu'c nu'mpay?

⁴⁹Cada s̈ʉjw tʉtsʉ̱́naj templuni'c mit mijchat, tʉ-ajque's̈cʉs̈au, mit ʉ̱ is̈ca-actangawu, po jat we'n pa ma cumplia̱t jeme tsʉ̱napay ja'yic Dios ilibruni'c.

⁵⁰Cʉs̈ nu'pʉjʉn ipʉctampajyat iguicuyaguigau mit po'cpʉ'ngau.

⁵¹Mit tu'c ya̱wayna' iguinatspoguiu cupitmo'nic mit tu'c sábana icuerpuni'c, mit je' i-actangawey.

⁵²Po je' iguiyajc ayé sábana, po'c sin jamuc.

⁵³Mit imunʉs̈cau Jesús mam itsʉ̱na meru judíujat imʉjpa̱nijat, mit ni-apʉcmujcʉjʉu nu'pʉjʉn judíujat imʉjpa̱nijat, na'waywájat mit jeme i-ajque's̈capay ley.

⁵⁴Mit Pedro inatspoguiu Jesús yagatsu hasta mʉjpa̱nijna' ipe'tni'c, mit nitsʉ̱nda̱jcʉu mit cuida̱tpajyat, mit s̈am jʉn-á̱m.

⁵⁵Mit judíujat imʉjpa̱nijat mit nu'pʉjʉn judíujat ijefejat iche'ngau pʉn inʉmámpay mal contra Jesús pa igui-ac-ago'jcʉjʉwa'n, po igapa̱tcawu nepʉn.

⁵⁶Mit mayo'c iguiwe̱twatcajaway je', po iganʉmgawu ni-as̈amu.

⁵⁷Mit una̱c nitenda̱jcʉjʉu mit iwe̱twatcajau Jesús, inʉmgau:

⁵⁸—Tʉnmaraugau iguinʉjm: “Tʉnacyʉnʉnmanagáj ayʉ̱́j templu jeme jayajwat iwatcaway, mit en tu̱gup s̈ʉjw tʉnajca's̈ʉ'gáj jatu'c templu jeme jayajwat igawatcaway.”

⁵⁹Po majawe'naj ayé we̱tpajyat ca-oyawu iguinʉmga ni-as̈amu.

⁶⁰Mit initendá̱jcʉj meru mʉjpa̱nijna' mam je'jat, i-ucyo't Jesús: —¿Ingapo'mp neti? ¿Ti inʉmgap ayʉ́j jayajwat contra mi̱?

⁶¹Po Jesús iganʉmu neti ne capo'nu. Mit mʉjpa̱nijna' i-ucyo'twatu: —¿Mi̱ miCristu? ¿Mi̱j ayé Dios is̈wáy jeme más mʉjninʉmicway?

⁶²Mit Jesús ipo'n: —Ʉ̱j ayé, mit is̈-e'pcáj ʉ̱ jeme tʉjatway jayau tʉtsʉ̱nawa'n Dios i-oyimaycʉ'ni'c jeme ijtʉpay nu'pʉjʉn poder, mit is̈-e'pcáj tʉmi'nwa'n wintucjugum.

⁶³Mit mʉjpa̱nijna' i-acna̱t ijamuc ni'c awa'n, inʉm: —¿Pa chan más nas̈wánga testigujat.

⁶⁴Inmaraugaway ni'c itucotsp Dios. ¿Nat is̈ca'ugajau? Mit nu'pʉjʉn inʉmgau ni'c Jesús culpa̱tic mit ma o'c.

⁶⁵Mit una̱c chu̱chigau iguicutsujcu'tca Jesús, iwin-atujcau, imoyta̱jcau, mit inʉmgajau: —Nʉmgajac, ¿pʉn is̈moyp? Mit ayé cuida̱tpajyat imoygau golpejat.

⁶⁶Itsʉ̱́naj Pedro pe'tni'c, min mʉjpa̱nijna' icocinera.

⁶⁷Igui-is̈ Pedro ni'c s̈amp, iguicu-e'pca̱jt, inʉjmau: —Mi̱ mitsʉ̱nawey mit Jesús Nazaretway.

⁶⁸Po Pedro inajau ni'c ca̱j, inʉm: —Tʉngajawip ne tʉnga-entendia̱tp ti inyʉmpay. Mit ipichijn pe'ta̱m, ʉ̱u ca̱yuna'.

⁶⁹Mit cocineramá̱m igui-ís̈atu, inʉmgʉs̈au jeme tsʉ̱ngaway jem: —Ayʉ̱́j jayau tsʉ̱nawey mit je'jat.

⁷⁰Po inʉmatu ni'c ca̱j. I-íjtʉj ratu, jeme tsʉ̱ngaway jem inʉmgajawatu Pedro: —Iyacs̈ta'cway mitsʉ̱nau mit je'jat ni'c mi̱ miGalileajway mit micotsp as̈am je'jat.

⁷¹Po Pedro chu̱chiu iguinʉm: —Ma tʉs̈castiga̱tac Dios te tʉnganʉmp iyacs̈ta'cway, mit ijura̱t: Tʉnga-is̈cap ayé jayau inyʉmgapay.

⁷²Mit ʉ̱u jaran ca̱yuna' imumechpacway viaje. Mit inijawiu Pedro lo que Jesús iguinʉjmaway: “Antes i-ʉwa'n mechc viaje ca̱yuna', tu̱gup viaje is̈nʉmwa'n ni'c is̈ca-is̈cap ʉ̱.” Mit iguipensa̱jt wename, chu̱chiu jʉypay.