Read Sayula Popoluca San Marcos 16 Bible Online

San Marcos 16 - Sayula Popoluca bible

San Marcos 16

¹Inas̈ ayé po'cs̈ans̈ʉjw, María Magdalajway, María Jacobo ima̱m, mit Salomé, ijuygau perfume pa'cs̈u'cpay pa inʉs̈cawa'n iguijátscaja Jesús icuerpu.

²Mit jopoyito'gu, iprimer s̈ʉjw s̈ama̱na, ipichijn s̈ʉwáy, nʉs̈cau mam i-it ayé á̱nimacʉt.

³Mit inʉmgau je'jatu: ¿Pʉn nas̈acpogolgajáj tsa'na' á̱nimacʉt-auni'cway?

⁴I-e'pnʉ́s̈caj, i-is̈cau ni'c ayé tsa' jeme mʉjo'cway, chi'tiganu itsʉ̱na.

⁵Itʉ́gʉygaj á̱nimacʉtni'c, i-is̈cau tu'c ya̱wayna' ni'c tsʉ̱nap i-oyimaylajni'c, mit je' cutigatsic mit tu'c yagatsway jamuc po'pway. Mit je'jat nigu-épigʉjʉu mayo'c.

⁶Po je' inʉmgʉs̈au: Camnigu-épigʉjʉ, inche'ngap Jesús Nazaretway jeme iyajcaway cunu̱s̈ni'c. Je' jutucta̱cway. Capʉn yam. E'pca ayé lugar mam iguiyájcaj.

⁷Po nʉs̈ nʉmgaja ipʉctampajyat mit Pedro ni'c Jesús cojyʉ'gáj Galilea, mit jem is̈-e'pcawa'n as̈am je' is̈nʉmgajau.

⁸Ipíchingaj, icupo'jcau ayé á̱nimacʉtna', mit yaratcau mit ni-apʉ̱tigʉjʉu. Mit iganʉmgajawu nepʉn neti ni'c pʉ̱tcau.

⁹Ijutucta̱jc Jesús jopoyito'gu iprimer s̈ʉjw s̈ama̱na, ique's̈ta̱jcʉ'jcau María Magdalajway jeme i-acpichijnaway siete demo̱nyujat.

¹⁰Inʉjcs̈ María, i-actujawigʉs̈ jeme tsʉ̱ngaway mit Jesús, mit je'jat tu'ngapnaj ijo̱jtat mit jʉygap.

¹¹Po je'jat iguimáraugaj ni'c Jesús jutucta̱cway, mit iguimáraugaj ni'c María i-is̈way, je'jat igacupʉjcawu.

¹²I-íjtʉj más ratu, cuandu mechc ipʉctampajyat iyo'ydacnʉ́s̈caj to̱uni'c, Jesús ipichinda̱jcʉs̈au en jatu'c forma.

¹³Ayʉ̱́jat nʉs̈cau mit i-actujawigau japu̱jtat, po igacupʉjcawu-ey.

¹⁴Mit más tsu'jít Jesús ipichinda̱jcʉs̈au ayé once ipʉctampajyat mam itsʉ̱nga me̱s̈ani'c, mit iche'cta̱jcʉs̈ ni'c igacupʉjcap mit copacmʉgʉjcat. Iwat we'n Jesús ni'c igacupʉjcawu jeme igui-is̈caway je' jutucta'guic.

¹⁵Mit inʉmgʉs̈au: Nʉ́s̈ca nu'pʉjʉn mundu, nʉmdacyo'yga ayé oyway noticia pa nu'pʉjʉn jayajwat.

¹⁶Pʉmba'tu jeme icupʉgámpay mit jeme ninʉ'gutejmʉ́mpay, nisalva̱jtʉ̱́j. Po pʉmba'tu jeme igacupʉgámpay, togoyáj.

¹⁷Mit jeme tʉs̈cupʉjcapay i-actu-e'pcáj ayʉ̱́j milagrujat: tʉnyʉ'jyni'c i-acpichingáj demo̱nyujat, mit cotscáj nam-auni'jcat.

¹⁸I-actangáj tsanajyat icʉ'ni'jcat, mit te i-u̱jcap tu'c venenu jeme nas̈ago'cpay, iguigawatcajáj neti. Iyajcajáj icʉ'jat iyucuinmat tu'nijatway mit oytangáj.

¹⁹Iguimucotscʉs̈ el Señor Jesús, Dios iguimunʉcs̈ pa tsajpni'c, mit nitsʉ̱nda̱jcʉu Dios i-oyimaycʉ'ni'c.

²⁰Ipíchingaj je'jat, inʉmdacyo'ygau jʉmba'tu. El Señor imajyigʉs̈ je'jat, mit iwat milagrujat pa jayajwat ma jawga ni'c iyacs̈ta'cway lo que inʉmdacyo'ygapay ayé pʉctampajyat. Yam icʉs̈.