Read Sayula Popoluca San Marcos 2 Bible Online

San Marcos 2 - Sayula Popoluca bible

San Marcos 2

¹I-íjtʉj s̈ʉjwat, coywatu Jesús Capernaum, mit ijawigau ni'c tsʉ̱nap tujugum.

²Mit cʉs̈ nigutomigʉjʉu mayo'c jayajwat hasta catʉgʉygap tʉc-auni'c, mit i-ajque's̈cʉs̈au Dios ipalabra.

³Mit mingawey mactas̈p jayajwat, mit itsʉmdacmingau tu'c paralíticu ito'cni'c.

⁴Po ca-oyawu iguimutʉ́gʉyga mam itsʉ̱na Jesús ni'c mayo'c jayau. Jemni'c iguidesteja̱tca tu'c parte tʉjcopacni'c, mit itʉydʉgʉygau ayé paralíticu mit nu'pʉjʉn ito'c, mit iyajcau mam Jesús itsʉ̱na.

⁵Igui-is̈ ni'c cupʉjcap, Jesús inajau ayé paralíticu: —Hijo, perdona̱tic itsʉ̱na nu'pʉjʉn mal inwatway.

⁶Po tsʉ̱ngau jem una̱c jayajwat i-ajque's̈capay ley, mit ipensa̱tcau ijo̱tni'jcat,

⁷inʉmgau: “¿Tini'c we'n icots ayʉ̱́j jayau? Itucotsp Dios. ¿Pʉn oyap iguiperdona̱t ayé mal iwatcaway jayajwat? Solo Dios oyap.”

⁸Po Jesús ijawiu jaran ni'c we'n ipensa̱tca ijo̱tni'jcat, inʉmgʉs̈au: —¿Tini'c impensa̱tca we'n injo̱tni'jcat?

⁹¿Jʉmay más fácil tʉs̈nʉjmawa'n ayʉ̱́j paralíticu: “Perdona̱tic itsʉ̱na nu'pʉjʉn mal inwatway”, o tʉs̈nʉjmawa'n: “Ca's̈ʉ'c, pʉc into'c mit yo'y”?

¹⁰Po tʉ-actujawigʉs̈áj ni'c ʉ̱ jeme tʉjatway jayau tʉnaguep derechu en ayʉ̱́j mundu pa tʉs̈perdona̱twa'n ayé mal iwatcaway jayajwat. Mit cʉs̈ inajau ayé paralíticu:

¹¹—Mi̱ tʉnajap: Ca's̈ʉ'c, pʉc into'c, mit nʉs̈ intʉcm.

¹²Mit cʉs̈ ayé paralíticu ca's̈ʉ'c jaran mit ipʉc ito'c, mit pichin mam igui-e'pca nu'pʉjʉjnat. Jemni'c nu'pʉjʉn nigu-épigʉjʉu mit i-oyninʉmgau Dios, inʉmgau: —Nunca tʉngani-e'pcap tu'c milagru as̈am ayʉ̱́jway.

¹³Mit Jesús coywatu laguna-auni'c mit nu'pʉjʉn jayajwat mimbʉ'ngau mam je', mit i-ajque's̈cʉs̈au.

¹⁴Mit inas̈, i-is̈ ni'c Leví, Alfeo iway, tsʉ̱nap pa̱nguni'c mam iguique'chumga tumi̱n impuestu, mit inajau: —Natspoguiyac. Mit ica's̈ʉ'jc Leví, inatspoguiu.

¹⁵Mit Jesús cay tʉc Leví, mit mayo'c que'chumpajyat mit maljayajwat tsʉ̱ngawey me̱s̈ani'c mit Jesús mit ipʉctampajyat, ni'c mayo'c jayajwat iguinatspoguigau.

¹⁶Mit fariseujat mit jeme i-ajque's̈capay ley i-is̈cau ni'c Jesús imucaygʉs̈ que'chumpajyat mit maljayajwat, mit inʉmgajau ipʉctampajyat: —¿Tini'c iguimucaygʉs̈ mit iguimu-u̱jcʉs̈ jeme ique'chumgapay demás mit maljayajwat?

¹⁷Iguimarajw we'n Jesús, inʉmgʉs̈au: —Jeme tsʉ̱ngapay oy iganesita̱tcap doctor, po jeme tu'nijatway, inesita̱tcap doctor. Tʉgaminu tʉs̈che'ngʉs̈ jayajwat ni-oyninʉmgʉjʉpay, po tʉmín tʉs̈che'ngʉs̈ maljayajwat ma cuyaguiga ima̱lway to̱jwat.

¹⁸Mit Juan ipʉctampajyat mit fariseujat ayuna̱tcap. Mit coygau una̱c jayajwat mam Jesús mit i-ucyo'tcau: —¿Tini'c Juan ipʉctampajyat mit fariseu ipʉctampajyat ayuna̱tcap, mit impʉctampajyat ca-ayuna̱tcap?

¹⁹Mit Jesús inʉmgʉs̈au: —¿Is̈jawiga oyap i-ayuna̱tca jeme coygapay cʉ'pa'tni'c mientras ayé novio tsʉ̱nap mit je'jat? Te ayé novio tsʉ̱napnaj mit je'jat, ca-oyap i-ayuna̱tca.

²⁰Po itáj s̈ʉjw cuandu ayé novio igajatsʉ̱nawa'n mit je'jat. Wejpu'n ayuna̱tcájama.

²¹’Jesús inʉmgʉs̈au mechc ejemplujat pa ma jawiga ni'c magamotca ampay creencia mit ayé nam ama̱s̈an i-ajque's̈way Jesús, inʉm: Nepʉn igatunap nam jamuc tu'c ampay jamuc, ni'c te iwatp we'n, ayé nap namayway ina̱tpichimp ampay jamucna' mit más mʉj ijotwa'n.

²²Mit nepʉn igacomp nam vinu ampay pa̱gas̈-acbolsani'c, ni'c te iwatp we'n, timamp ayé vinu mit i-acpʉjtugáj ayé ampay bolsa mit cumuchicada'gáj ayé vinu mit togoyáj ayé bolsa. Po más oy nacom nam vinu nam pa̱gas̈-acbolsani'c.

²³En tu'c po'cs̈ans̈ʉjw Jesús nas̈ trigujugum, mit ipʉctampajyat chu̱chigau iguiwis̈ca trigu.

²⁴Mit fariseujat inʉmgajau Jesús: —E'pnaj, ¿tini'c iguiwatca impʉctampajyat jeme ca-oyway nas̈watwa'n po'cs̈ans̈ʉuni'c?

²⁵Po je' ipo'ngʉs̈: —¿Inganicotscap Dios ilibruni'c lo que iwatway David cuandu iga-íjtʉj ti icayámpay? Je' cayo'jcʉu mit we'ney jeme imuyo'ygʉs̈way.

²⁶Mit je' tʉgʉy Dios itempluni'c cuandu Abiatar judíujat imʉjpa̱nijat, mit David icay ayé ma̱s̈anʉ̱n bendiciona̱ticway jeme ca-oyway nas̈caywa'n, solo yaguic pa judíujat ipa̱nijat. Mit imoygʉs̈ jeme imuyo'ygʉs̈way.

²⁷Jesús inʉmgʉs̈awey: —Dios iwat ayé po'cs̈ans̈ʉjw pa jayajwat ma tsʉ̱nga oy. Dios igawatu jayajwat solo pa iguiguarda̱tcawa'n ayé po'cs̈ans̈ʉjw.

²⁸Jemni'c ʉ̱ jeme tʉjatway jayau tʉnactamp ayé po'cs̈ans̈ʉjw.