Read Sayula Popoluca San Marcos 3 Bible Online

San Marcos 3 - Sayula Popoluca bible

San Marcos 3

¹Jesús tʉgʉywatu mam judíujat i-adora̱tca, mit tsʉ̱nau jem tu'c jayau jeme o'guicway icʉ'.

²Mit i-espia̱tcau Jesús te i-ac-oytanáj po'cs̈ans̈ʉuni'c, ni'c iwangau igui-acusa̱tcawa'n.

³Mit Jesús inʉjmau ayé jayau jeme o'guicway icʉ': —Ca's̈ʉ'c mit tena es̈pu̱tum.

⁴Mit Jesús i-ucyo'tcʉs̈: —¿Oy nas̈watwa'n oy po'cs̈ans̈ʉuni'c o nas̈watwa'n mal? ¿Oy nas̈salva̱twa'n vida o nas̈ago'cwa'n? Po je'jat iganʉmgawu neti.

⁵Mit igui-is̈cʉs̈ nu'pʉjʉn, je' awa'niu mit tu'n ijo̱jt ni'c copacmʉgʉgo'jcat ayé jayajwat. Mit cʉs̈ Jesús inajau ayé jayau: —Acyacs̈ incʉ'. Mit i-acyacs̈, mit oytan jaran icʉ'.

⁶Mit ipíchingaj fariseujat, ni-acochigʉjʉu mit Herodes ijayau contra Jesús pa igui-ago'jcawa'n.

⁷Po Jesús nʉcs̈ laguna-auni'c mit ipʉctampajyat, mit iguinatspoguigau may jayajwat Galileajway, mit Judeajway,

⁸Jerusalénway, Idumeajway mit tuganʉ-ájway Jordán, mit jeme tsʉ̱ngaway Tiro mit Sidón, mayo'c imíngaj mam Jesús ni'c imaraugau lo que iwatway.

⁹Mit Jesús inʉmgʉs̈au ipʉctampajyat ma oyajca tu'c aj pa je' pa ma iguigacutsʉmigac jayaujucna'.

¹⁰Ni'c i-ac-oytangʉs̈ mayo'c. Jemni'c nu'pʉjʉn jeme tu'nijatway itunijas̈cu'tcʉjʉu pa iguitsʉjcawa'n.

¹¹Mit igui-ís̈caj demo̱nyujat, nicos̈atenda̱jcʉjʉu iwiná̱m Jesús mit ya̱s̈cau, inʉmgau: —Mi̱j ayé Dios is̈wáy.

¹²Mit Jesús imanda̱tcʉs̈ mʉgʉc maganʉmgaja nepʉn ni'c je' Dios iway.

¹³Mit cʉs̈ Jesús cu't copac-awa'tsam mit iya̱s̈cʉs̈ jeme icupiugʉs̈way, mit nʉs̈cau mam je'.

¹⁴Mit icupiugʉs̈ doce jayajwat pa ma yo'yga mit je', pa igui-ajyu'tcʉs̈wa'n nʉmdacyo'ypay,

¹⁵mit pa ma itcʉjʉ poder pa igui-ac-oytangawa'n tu'nijatway mit pa igui-acpichingawa'n demo̱nyujat.

¹⁶Icupiugʉs̈ ayʉ̱́j doce jayajwat: Simón jeme inʉ'jywayey Pedro,

¹⁷mit Jacobo Zebedeo iway, mit Juan Jacobo imajtsʉc, mit inʉ'jymoygʉs̈ Boanerges, ayé inʉmo'jcʉp ni'c je'jat as̈am ániway ni'c itcʉjʉp maj.

¹⁸Mit Andrés, Felipe, Bartolomé, Mateo, Tomás, Jacobo Alfeo iway, Tadeo, mit Simón inʉmgajapay cananista,

¹⁹mit Judas Iscariote jeme ito'ctʉgʉyway Jesús. Mit nʉs̈cau itʉcmat.

²⁰Mit ni-apʉcmujcʉjʉwatu tu'c jayaujuc hasta Jesús mit ipʉctampajyat ca-itcʉjʉwu tiempu pa icaygawa'n.

²¹Iguimáraugaj we'n ije̱wajyat, mingau pa iguimunʉs̈canuwa'n, ni'c inʉmgau ni'c je' pituc as̈am loco.

²²Mit jeme i-ajque's̈capay ley mingau de Jerusalén, mit itucotscau Jesús, inʉmgau: —Ayʉ̱́j jayau igui-actamp Beelzebú, mit mʉjway demo̱nyu iguimoyp poder pa igui-acpichingʉs̈wa'n demo̱nyujat.

²³Mit Jesús iguiya̱s̈cʉs̈, itumuquips̈cʉs̈au tu'c cuentu, inʉm: —¿Nat Awayagatsna' ini-acpichijnʉwa'n je'yu?

²⁴Te jayajwat en tu'c na̱s̈ tsuguinwatí̱jcap, je'jatu nicʉs̈cʉjʉ̱́j.

²⁵Mit te en tu'c tʉjc tsuguinwatí̱jcapey, ca-oyáj itsʉ̱nga jec.

²⁶Mit te Awayagatsna' tsuguinwatp je'yu, mit te imuni-ago'jcʉs̈ʉp jeme imanda̱tcʉs̈pay, caja-oyáj imanda̱t, togoynújama.

²⁷’Nepʉn ca-oyap itʉgʉy itujugum majaguepayna' pa iguinu'jmawa'n lo que ijtʉpay, solo te icutsumda̱jcʉ'cp majaguepayna', mit we'n oyap iguinu'jma lo que ijtʉpay je' itujugum.

²⁸’Iyacs̈ta'cway tʉnʉmgʉs̈ap ni'c Dios oyáj iguiperdona̱tcʉs̈ nu'pʉjʉn jayajwat jeme iwatcapay mal mit nu'pʉjʉn itucotscapay Dios.

²⁹Po ayé jayau jeme itucotsámpay Espíritu Santu, Dios nunca igajaperdona̱táj, po tanáj culpa̱tic pa siempre ni'c iwat ayé mal.

³⁰Jesús inʉmgʉs̈au we'n ni'c iguinʉmgajau ni'c ijtʉp tu'c demo̱nyu.

³¹Jesús ima̱m mit imajtsʉcwájat coygau mam je' itsʉ̱na mit tangau pe'ta̱m, mit i-ajque's̈cajau Jesús.

³²Mit apitucje̱guic itsʉ̱na mit tu'c jayaujuc, mit inʉmgajau: —Marau, is̈che'ngap pe'ta̱m inma̱m mit inmajtsʉcwájat.

³³Mit Jesús ipo'ngʉs̈: —¿Pʉn ayé tʉn-e'pay as̈am tʉnma̱m mit tʉnmajtsʉcwájat?

³⁴Mit igui-is̈cʉs̈ nu'pʉjʉn jeme tsʉ̱ngaway apitucje̱guic, inʉm: —Ayʉ̱́j tʉn-e'pcʉs̈p as̈am tʉnma̱m mit tʉnmajtsʉcwájat.

³⁵Ni'c pʉmba'tu jeme iwatpay lo que iwampay Dios, ayé tʉn-e'p as̈am tʉnmajtsʉcwájat mit tʉnma̱m.