Read Sayula Popoluca San Marcos 4 Bible Online

San Marcos 4 - Sayula Popoluca bible

San Marcos 4

¹Mit Jesús chu̱chiwatu ajque's̈pay laguna-auni'c, mit coy jem mayo'c jayau. Mit Jesús tʉgʉy en tu'c aj mit nitsʉ̱nda̱jcʉu jem, po ayé jayaujuc tan na̱s̈ni'c laguna-auni'c.

²Mit i-ajque's̈cʉs̈au mayo'c cosajat mit itumuquips̈cʉs̈au cuentujat, mit i-ajque's̈cʉs̈au wename:

³—Márauga. Tu'c ni̱payna' nʉcs̈ iguini'p trigu.

⁴Mit mam iguis̈ics̈ ayé semilla, una̱c ca'ugau to̱u-auni'c, mit mingau jonwájat, icaygau.

⁵Mit una̱c semilla ca'ugau tsa-awa'tsam mam iga-ijt may na̱s̈, mit s̈u̱mgau jaran ni'c cajucu itʉgʉygaj.

⁶Mit ipichijn s̈ʉjw, toygau ayé ma̱tawájat mit cutʉ̱tsigau ni'c caticchictʉgʉyu.

⁷Mit una̱c ca'ugau apit-awa'tsam. Iye'jcaj apitna'jat, igamoygawu laj pa iye'jcawa'n ayé ma̱tawájat.

⁸Mit japu̱t semilla ca'ugau mam i-oyi na̱s̈, mit s̈u̱mgau mit ye'jcau mit tʉmwatcau. Una̱c semilla iyajcau hasta treinta semilla, ja-una̱c iyajcau hasta sesenta, mit ja-una̱c iyajcau hasta cien.

⁹Mit Jesús inʉm: —Jeme ijtʉpay ita̱tsʉc pa iguitumarawa'n, ma marau lo que tʉnyʉmpay.

¹⁰Mit cuandu itángaj je'jatu, igui-ucyo'tcau ayé doce pʉctampajyat mit japu̱jtat jeme tsʉ̱ngaway tom: —¿Ti inʉmo'jcʉp ayʉ̱́j cuentu?

¹¹Jesús ipo'ngʉs̈: —Dios is̈actujawigap jeme tsʉ̱naway cuyu'tsic nat imanda̱twa'n, po japu̱t jayajwat tʉnmucotscʉs̈p mit cuentujat,

¹²pa ma e'pca po magajawiga ti i-e'pcapay, mit pa ma marauga po maga-entendia̱tca ti imaraugapay. Iguijatcap we'n pa magapitujca mam Dios, ne magaperdona̱tcaja ayé mal iwatcaway.

¹³Mit Jesús inʉmgʉs̈au: —Te inga-entendia̱tcap ayʉ̱́j cuentu, ¿natpaj is̈-entendia̱tcawa'n japu̱t cuentujat?

¹⁴Tʉ-actujawigʉs̈áj ti inʉmo'jcʉpay ni̱payna' icuentu. Jeme is̈ics̈pay semilla ayé as̈am jeme i-ajque's̈apay Dios ipalabra.

¹⁵Ayé semilla jeme ca'way to̱u-auni'c, ayé as̈am una̱c jayajwat. Je'jat imaraugajap Dios ipalabra, po mimp jaran Awayagatsna' mit iguichi'tcajap jeme Dios igui-actujawigapay.

¹⁶Mit ja-una̱c jayajwat as̈am ayé semilla jeme ca'ugaway tsa-awa'tsam. Je'jat imaraugajap Dios ipalabra mit ipʉctsougau oy mit igui-acji'jcajap ijo̱jtat,

¹⁷po je'jat as̈am ma̱tawájat ca-itcʉjʉpay ticchic, ni'c cacupʉjcap jec. Mit i-itwa'n pʉ̱tna̱s̈ mit iguipo'ctangáj jayajwat ni'c ipʉctsougajap Dios ipalabra, icuyaguigap jaran.

¹⁸Mit ja-una̱c jayajwat as̈am ayé semilla jeme ca'ugaway apit-awa'tsam, ni'c je'jat imaraugajap Dios ipalabra,

¹⁹po ipensa̱tí̱jcap ti iwatcámpay en ayʉ̱́j tiempu, niwe̱tcʉjʉp mit itumi̱jnat, mit iwangap japu̱t cosajat, mit ca-oyap iguimutanga mʉgʉc Dios ipalabra.

²⁰Mit ja-una̱c jayajwat imaraugajap Dios ipalabra, mit ipʉctsougap mit yos̈watcap más pa Dios. Je'jat as̈am ayé semilla jeme ca'ugaway mam i-oyi na̱s̈. Mit we'ney je'jat as̈am ayé semilla ni'c una̱c iyajcau treinta, una̱c iyajcau sesenta, mit ja-una̱c iyajcau cien.

²¹Mit Jesús inʉmgʉs̈awey: —¿Is̈jawiga namumimp tu'c ta'cs̈an pa nas̈yacwa'n ca'cpa'tm o che's̈pa'tm? Más oy nas̈yacwa'n ta'cs̈anyagani'c.

²²Ca-oyap nas̈cuyu'ts neti ni'c nu'pʉjʉn cuque's̈áj. Te nacutucp tanti, itp ti icuque's̈wa'n.

²³Te tu'c jayau ijtʉp ita̱tsʉc pa iguitumarawa'n, ma marau lo que tʉnyʉmpay.

²⁴Mit inʉmgʉs̈au: —Watca cuenta lo que inmaraugapay, ni'c ayé quips̈an intuquips̈pay, ayé is̈tuquips̈cámpey, mit mijchat mimaraugapay Dios is̈moygáj más.

²⁵Ipʉctsowáj más jeme ijtʉnupay, Mit jeme ijtʉpay s̈ʉ̱n, ichi'tpʉ'ngajanúj nu'pʉjʉn ijtʉpay.

²⁶Mit Jesús i-ampiugʉs̈au jatu'c cuentu pa ma jawiga ni'c Dios ipalabra ye'gáj, inʉm: —Yename imanda̱t Dios, as̈am te tu'c jayau ini̱ptacyo'yp semillawájat na̱s̈ni'c.

²⁷Mit je' ma̱p tsu'm mit jutucp s̈ʉ̱m, mit s̈u̱mgap mit ye'jcap ayé semillawájat, mit je' igajawip nat iye'c.

²⁸Po na̱s̈ je'yu i-acs̈u̱jmʉ'cp ayé mo̱jcuywáy, cʉs̈wa'n pichimp icoc, mit pichimp imo̱jc.

²⁹Mit cuandu itʉ'tswa'n ayé mo̱jc, ayé jayau ichicp, ni'c coyway chigans̈ʉjw.

³⁰Mit Jesús i-actujawigʉs̈ nat imanda̱twa'n Dios. Itumuquips̈cʉs̈au tu'c cuentu pa ma jawiga ni'c Dios ijayajwat mayigáj. Inʉm Jesús: —Tʉ-actujawigʉs̈áj nat imanda̱t Dios.

³¹Ayé as̈am tu'c mostaza-semilla, ni'c cuandu nas̈ni'p na̱s̈ni'c, ayé más titigo'c de nu'pʉjʉn semillajat jeme itpay na̱s̈ni'c,

³²po nas̈ni'pwa'n, ye'cp, mit jatp más mʉj que nu'pʉjʉn ma'tswájat, mit s̈u̱mp majat i-awecna'jat hasta jonwájat oyap is̈ʉupo'cs̈ca i-amu̱jʉcni'c.

³³Mit yename Jesús igui-ajque's̈cʉ́s̈aj Dios ipalabra. Itumuquips̈ cuentujat as̈am i-oya igui-entendia̱tca.

³⁴Mit inʉmgʉs̈au mit puru cuentu, po ipʉctampajyat itu'gujmatu i-actujawigʉs̈ nu'pʉjʉn cuentujat.

³⁵Icutsu'jítij en ayé s̈ʉjw, Jesús inʉmgʉs̈au: —Janga tuganʉ-ájw.

³⁶Mit igui-acnʉ́s̈caj ayé jayaujuc, imunʉs̈cau Jesús as̈am itsʉ̱na ajni'c, mit iguimunʉs̈cawey japu̱t ajwájat.

³⁷Mit min mʉgʉc tu'c s̈e'mtu̱ mit mayo'ganu nʉ' itʉgʉjy ajni'c hasta patscunas̈nupate.

³⁸Mit Jesús ma̱p ajmugus̈á̱m mit tu'c nach, mit i-acjutujcau mit inʉmgajau: —Amayipay, ¿ingawatp cuenta ni'c natogoygáj?

³⁹Mit ijutujc, inʉjmau s̈e'mna' ma tentan, mit imucots lagunana', inajau: —Nicalmá̱jtʉ, camjaya̱s̈wit. Mit s̈e'm tentan mit cajas̈uju.

⁴⁰Mit i-ucyo'tcʉs̈: —¿Tini'c impʉ̱tca? ¿Migacupʉjcap?

⁴¹Cʉs̈ pʉ̱jtʉgʉygau mit ni-ucyo'tcʉjʉu: —¿Pʉna jayau ayʉ̱́j, ni'c iguijayaumaygap hasta s̈e'm mit laguna?