Read Sayula Popoluca San Marcos 5 Bible Online

San Marcos 5 - Sayula Popoluca bible

San Marcos 5

¹Coygau tugalaguna-ájw Gadarajway na̱s̈.

²Ipichijn Jesús ajni'c, iguipichijnau tu'c jayau campu santu, mit ayé jayau ijtʉu demo̱nyu.

³Ayé jayau tsʉ̱nau campu santu, mit nepʉn ca-oyawu iguicutsumda'c mit cadenajat.

⁴Ni'c mayo'c viaje iguicutsumdá̱jcaj mit tʉps̈ mit cadenajat, po i-actujcada̱jcʉs̈p cadenajat mit tʉps̈na'jat we'ney i-actujcada̱jcʉs̈p, mit nepʉn ca-oyawu iguidomina̱tp.

⁵Mit tsu'm mit s̈ʉ̱m iya̱s̈tacyo'jy campu santu mit copac-awa'tsajmat, mit je'yu nipus̈ʉu mit tsa'.

⁶Mit igui-is̈ Jesús yagatsu, pujʉ'c mam je' mit nicos̈atenda̱jcʉu iwiná̱m.

⁷Mit ya̱s̈ mʉgʉc, inajau: —¿Ti inwamp mit ʉ̱, Jesús Dios yucmay iway? Tʉyo'jtap Ios inʉ'jyni'c pi is̈ca-actunas̈ac.

⁸Inʉm we'n ni'c Jesús inajau ayé demo̱nyu: —Pichin mam ayé jayau.

⁹Mit Jesús i-ucyo't: —¿Nat inyʉ'jy? Mit iguipo'n: —Tʉnʉ'jy Legión, ayé inʉmo'jcʉp ni'c ʉjtsat tʉmayo'jcat.

¹⁰Mit iyo'jtau favor ma iguiga-acpichingac de ayé na̱s̈.

¹¹Mit tu'c mayway i̱chimjuc cayche'ngapate jem copac-auni'c.

¹²Mit iguiyo'tcajau favor ayé demo̱nyujat, inʉmgau: —Acnʉs̈cac mam itsʉ̱nga i̱chimna'jat pa tʉs̈tutʉgʉygawa'n ijo̱jtugujmat.

¹³Mit Jesús imoygʉs̈ laj. Cʉs̈ demo̱nyujat ipíchingaj mam ayé jayau, itutʉgʉygau i̱chimna'jat. Mit it jem como dos mil í̱chijmat, mit ayé i̱chimjucna' pujʉ'cmanajcau copac-auni'c mit pumdʉgʉygau lagunani'c, mit jem inʉ-o'jcaj.

¹⁴Cʉs̈ po'jcau i̱chim-ajcaypayna'jat mit i-ajque's̈tacyo'ygau nʉ'jcopacni'c mit nu'pʉjʉn laj. Mit min ayé jayaujuc pa igui-e'pcawa'n lo que iguijatcaway.

¹⁵Mit icóygaj mam Jesús, i-is̈cau ayé jayau jeme ijtʉway mayo'c demo̱nyujat ni'c tsʉ̱nanup mit icomnup ijamuc, mit cajaloco. Mit ni-apʉ̱tigʉjʉu jayauna'jat.

¹⁶Mit jeme i-is̈caway, i-ampiugau lo que iguijatway ayé jayau jeme ijtʉway mayo'c demo̱nyujat, mit lo que iguijatcaway i̱chimna'jat.

¹⁷Mit chu̱chigau iguinʉ́mgaja Jesús ni'c ma pichin je'jat ina̱s̈ni'jcat.

¹⁸Itʉgʉjy Jesús ajni'c, ayé jayau jeme ijtʉway demo̱nyujat iyo'jtau favor ma tan mit je'.

¹⁹Po Jesús igamoyu laj, inʉjmau: —Nʉs̈ intʉcm mit ampiugʉ́s̈a intʉcmayna̱s̈atway ni'c mayo'c cosa oyway is̈wajtaway el Señor, mit nat is̈-ayo̱wis̈ je'.

²⁰Cʉs̈ nʉcs̈ mit chu̱chiu iguinʉmdacyo'y en ayé nʉ'jcopajcat inʉ'jyatway Decápolis ni'c mayo'c cosa ojyatway iguiwajtau Jesús. Mit nu'pʉjʉn jayajwat nigu-épigʉjʉu.

²¹Itujc Jesús tuganʉ-ájw ajni'c, nigutomigʉjʉu mam je' mayo'c jayau, mit je' tsʉ̱nau laguna-auni'c.

²²Mit coy tu'c jayau encarga̱ticway mam i-adora̱tca judíujat, inʉ'jy Jairo. Mit igui-is̈ Jesús, nicos̈atenda̱jcʉu ita'ná̱m.

²³Mit iyo'jtau tu'c favor mʉjway, inʉjmau: —O'go'jcʉnup tʉnto'chwáy. Nʉs̈ mit yajca incʉ'jat iyucuinm je' pa ma oytan, mit we'n ca-o'gáj.

²⁴Mit Jesús nʉcs̈ mit je'. Mit iguinatspoguiu may jayau hasta i-actsʉ'cs̈ta̱jcau je'.

²⁵Mit itey tu'c to's̈aywáy jeme ijtʉnupay doce s̈iwit iguitunas̈ mit nipinméj,

²⁶mit itunas̈o'c ni'c mayo'ganu iguiyu̱guigapay, mit igasta̱tpʉ'n nu'pʉjʉn jeme ijtʉway mit ca-oytanu, po más imʉgʉcta'c.

²⁷Iguimarajw lo que iwatpay Jesús, inatspoguiu imugus̈á̱m jayau-awa'tsam mit itsʉjcau Jesús ijamuc.

²⁸Ni'c ipensa̱t: “Te tʉntsʉjcapu ijamuc, tʉ-oytanáj jaran.”

²⁹Mit iguitentajnau jaran ayé nipinméj, mit ijawiu icuerpuni'c ni'c oytanway ayé jeme igui-actu'nijtsʉ̱naway.

³⁰Mit ijawiu jaran Jesús ni'c iguipichijnau poder, i-e'jpitujc jayau-awa'tsam, i-ucyo'tcʉs̈: —¿Pʉn tʉs̈tsʉjcau tʉnjamuc?

³¹Iguipo'ngau ipʉctampajyat: —In-e'p ni'c ayʉ̱́j jayaujuc is̈actsʉ'cs̈ta̱jcap. ¿Tini'c is̈nʉm: “Pʉn tʉs̈tsʉc?”

³²Mit i-is̈cʉs̈ nu'pʉjʉn pa igui-e'pwa'n pʉn iguitsʉc.

³³Mit ayé to's̈ay pʉ̱to'c mit yarat ni'c ijawiu lo que iguijatway. Min mam Jesús mit nicos̈atenda̱jcʉu iwiná̱m mit inajau nu'pʉjʉn lo que iguijatway.

³⁴Cʉs̈ Jesús inʉjmau: —Hija, mi-oytanway ni'c ʉ̱ is̈cupʉcp. Nʉs̈, Dios pi is̈munʉs̈ac, mitsʉ̱náj oy.

³⁵Mit cotspnajate, coygau jaran ayé jayajwat jeme tsʉ̱ngapay tʉc ayé jayau encarga̱ticway, mit inʉmgajau: —O'cnuway into'chwáy. ¿Pa chan is̈molesta̱t Amayipay?

³⁶Po Jesús iguimarajw lo que inʉmgapay, inajau ayé jayau encarga̱ticway: —Campʉ̱twit, cupʉ́gagu ʉ̱.

³⁷Mit Jesús imunʉcs̈ Pedro, Jacobo, mit Juan Jacobo imajtsʉc, po igawanu ma iguinatspoguiyac nepʉn.

³⁸Icóygaj itʉcm ayé jayau encarga̱ticway, i-is̈ ni'c cotscada̱jcap mit jeme jʉygapay mit ya̱s̈capay.

³⁹Itʉgʉyda̱jc je', inʉmgʉs̈au: —¿Tini'c incotscadá̱jca mit injʉ́yga? Ayé to'chwáy ca-o'guic, ma̱pujyu.

⁴⁰Mit itus̈i̱jcau je'. Po igui-acpichingʉs̈ nu'pʉjʉn, i-actʉgʉygʉs̈ ayé to'chwáy ite̱t mit ima̱m mit jeme imuyo'ygʉs̈pay, mit tʉgʉy mam imo'ncapna ayé to'chwáy.

⁴¹Igui-actájnaj to'chwáy icʉ', inʉjmau: —Talita cumi. (Ayʉ̱́j inʉmo'jcʉp: To'chwáy, mi̱ tʉnʉjmap, ca's̈ʉ'c.)

⁴²Mit ca's̈ʉ'c jaran ayé to'chwáy mit yo'y jaran ni'c ijtʉnuw doce s̈iwit. Mit nu'pʉjʉn jayajwat nigu-épigʉjʉu mayo'c.

⁴³Cʉs̈ Jesús imanda̱tcʉs̈ mʉgʉc maga-actujawiga nepʉn, mit inʉm ni'c ma moyga ma cay ayé to'chwáy.