Read Sayula Popoluca San Marcos 8 Bible Online

San Marcos 8 - Sayula Popoluca bible

San Marcos 8

¹En ayé s̈ʉjwat ni-apʉcmujcʉjʉu may jayau, mit ca-itcʉjʉwu ti icaygámpay. Cʉs̈ Jesús iya̱s̈cʉs̈ ipʉctampajyat mit inʉmgʉs̈au:

²—Tʉnayo̱wis̈cʉs̈p ayʉ̱́j jayajwat ni'c ijtʉnup tu̱gup s̈ʉjw itsʉ̱nga yam mit ʉ̱, mit ca-itcʉjʉp ti icaygámpay.

³Mit te tʉnacnʉs̈cʉs̈p pa itʉcmat sin cay, desmaya̱tcáj to̱uni'c, ni'c una̱c yagatso'c imíngaj.

⁴Igui-ucyo'tcau ipʉctampajyat: —¿Nat nas̈ajcaygʉs̈wa'n ayʉ̱́j jayajwat? ni'c yam ca-itp tʉjcat mam nas̈pa̱tcawa'n cayan.

⁵Jesús i-ucyo'tcʉs̈: —¿Pʉjʉn ma̱s̈anʉ̱n is̈aguépca? Iguipo'ngau: —Siete.

⁶Mit imanda̱tcʉs̈ ayé jayajwat ma nitsʉ̱nda̱jcʉjʉ na̱s̈ni'c. Iguipʉjcʉs̈ ayé siete ma̱s̈anʉ̱nwájat, inʉjmau Dios ni'ctiyu̱s̈, igui-emgada̱jc, imoygʉs̈ ipʉctampajyat pa ma yajcaja ayé jayajwat. Mit iyajcajau ayé ma̱s̈anʉ̱nwájat.

⁷Mit itcʉjʉwey una̱c acs̈wájat, mit ibendiciona̱t mit imanda̱tcʉs̈ ma yajcaja-ey acs̈wájat ayé jayajwat.

⁸Mit caybʉ'ngau mit cu̱s̈cʉjʉu. Mit i-apiumujcau siete ca'c ma̱s̈anʉ̱ncutucwájat jeme icaytangaway.

⁹Mit it como cuatro mil jayajwat jeme caygaway. Mit Jesús i-acnʉs̈cʉs̈nuw ayé jayajwat.

¹⁰Mit itʉgʉjy en tu'c aj mit ipʉctampajyat, nʉs̈cau pa Dalmanutajway na̱s̈.

¹¹Imíngaj mam Jesús fariseujat, chu̱chigau discutia̱tpay mit Jesús pa iguiproba̱tcawa'n, mit iyo'tcajau ma ajque's̈ tu'c seña mʉjway tsajpni'c pa iguijawigawa'n te Dios igui-ajyu't.

¹²Mit Jesús s̈ajtogojyʉu, inʉm: —¿Tini'c iguiyo'tca jinapay jayajwat tu'c seña. Iyacs̈ta'cway tʉnʉmgʉs̈ap ni'c tʉnga-ajque's̈áj nejʉmay seña pa jinapay jayajwat.

¹³Iguicuyaguigʉs̈, tʉgʉywatu en tu'c aj mit nʉcs̈ pa tuganʉ-ájw.

¹⁴Mit ipʉctampajyat inijawiyo'tcau iguimumingawa'n ma̱s̈anʉ̱n. Mit tu'gu ma̱s̈anʉ̱nwáy i-ítcʉjʉj ajni'c.

¹⁵Mit Jesús inʉmgʉs̈au: —Márauga, nicuidá̱tcʉjʉ mit fariseujat ilevadura mit we'ney Herodes ilevadura.

¹⁶Mit ipʉctampajyat ni-ucyo'tcʉjʉu, inʉmgau: —Nas̈nʉmgajap we'n ni'c nagamumingawu ma̱s̈anʉ̱n.

¹⁷Iguijawij Jesús ni'c we'n ipensá̱tcaj, inʉmgʉs̈au: —¿Tini'c is̈nʉmga ni'c ingamumingawu ma̱s̈anʉ̱n? ¿Inganijawigap ayé milagru tʉnwatway? ¿Ingani-entendia̱tcap neti?

¹⁸Inaguepcap inwijnat po miga-e'pcap. Inaguepcap inta̱tsʉjcat po migamaraugap. ¿Inganijawigap lo que tʉnwatway?

¹⁹Cuandu tʉs̈-emgada̱jcʉs̈ ayé cinco ma̱s̈anʉ̱nwájat pa cinco mil jayajwat, ¿pʉjʉn ca'c patsic mit ma̱s̈anʉ̱ncutucwájat is̈apiumújcanuj? Ipo'ngau: —Doce ca'cna'jat.

²⁰Mit cuandu tʉs̈-emgada̱jcʉs̈ ayé siete ma̱s̈anʉ̱nwájat pa cuatro mil jayajwat, ¿pʉjʉn ca'c patsic mit ma̱s̈anʉ̱ncutucwájat is̈apiumújcanuj? Je'jat ipo'ngau: —Siete ca'cna'jat.

²¹Mit Jesús inʉmgʉs̈au: —¿Ingani-entendia̱tcap ayé milagru tʉnwatway?

²²Icóygaj Betsaida, imumingajau tu'c winch mit iyo'tcajau Jesús ma yajca icʉ' ayé winch pa ma e'pta'c.

²³Cʉs̈ igui-actajn icʉ'ni'c winchna', imupichin pa nʉ'jcopac-auni'c mit iyajcau tsujnʉ' iwini'c. Iguiyájcaj icʉ'jat iyucuinm je', i-ucyo't te i-e'pnup tanti.

²⁴Mit i-e'jp, inʉm: —Tʉn-e'pcʉs̈p jayajwat as̈am cuywájat po yo'ygap.

²⁵Cʉs̈ iyajcawatu icʉ'jat iwini'c, mit i-ac-e'pta̱c jaran, mit oytan iwijnat, mit i-is̈ oy nu'pʉjʉn cosa yagatsway.

²⁶Mit Jesús i-acnʉcs̈nuw itʉcm, inʉm: —Nes̈ʉ̱n camtʉgʉywit nʉ'jcopacni'c, ne camnʉjma nepʉn jem.

²⁷Mit pichingau jem Jesús mit ipʉctampajyat pa inʉs̈cawa'n en ayé nʉ'jcopacwájat tsʉ̱ngapay tom Cesarea de Filipo. Po to̱uni'c Jesús i-ucyo'tcʉs̈ ipʉctampajyat, inʉm: —¿Ti inʉmgap jayajwat ni'c tʉpʉn ʉ̱?

²⁸Iguipo'ngau: —Inʉmgap ni'c mi̱ mi Juan nʉ'gutempayna'. Mit una̱c inʉmgap ni'c mi̱ mi profeta Elías. Mit ja-una̱c inʉmgap ni'c mi̱ mi tu'c profeta.

²⁹Mit Jesús i-ucyo'tcʉs̈: —¿Mijchat te, ti inyʉmgap tʉpʉn ʉ̱? Pedro iguipo'n: —Mi̱ miCristu jeme Dios i-ajyu'tway.

³⁰Mit Jesús imanda̱tcʉs̈ mʉgʉc maganʉmgaja nepʉn ni'c je' ayé Cristu i-ajyu'tway Dios.

³¹Mit Jesús chu̱chiu igui-ajque's̈cʉs̈a, inʉm: —Ʉ̱ jeme tʉjatway jayau itp ti tʉs̈tunas̈wa'n mayo'c, mit tʉs̈capʉctsougáj na'waywájat, judíujat imʉjpa̱nijat, mit jeme i-ajque's̈capay ley. Mit tʉs̈ac-ago'jcʉjʉ̱́j, po i-ijtʉwa'n tu̱gup s̈ʉjw, tʉjutucta'gáj.

³²Mit oyo'gu iguinʉmgʉ́s̈aj ayé cosajat. Mit cʉs̈ Pedro iya̱s̈pichin Jesús jatu'c laj mit chu̱chiu iguiche'c Jesús.

³³Po Jesús i-e'jpitujc, mit igui-is̈cʉs̈ ipʉctampajyat, iche'cta̱c Pedro, inʉjmau: —¡Niju'jpʉ de ʉ̱ ni'c inmuyo'yp Awayagatsna'! Ni'c ingajawip ti iwampay Dios. Más inwatp cuenta iwangapay jayajwat.

³⁴Mit Jesús iguiya̱s̈cʉs̈ jayajwat mit ipʉctampajyat, inʉmgʉs̈au: —Pʉmba'tu iwa'námpay tʉs̈natspoguiyáj ma nijawiyo't jeme je'yu iwa'námpay, mit ma tsʉ̱na dispuestu iguitunas̈wa'n, mit we'n oyáj tʉs̈natpoguip.

³⁵Ni'c pʉmba'tu jeme iwa'námpay iguiguarda̱twa'n ivida pa je'yu, i-actogoyáj. Po pʉmba'tu jeme i-actsʉ̱námpay ivida por togoyic ni'c tʉs̈wamp mit iwampey tʉn-oyway noticia, je' iguarda̱táj pa tu'c vida cacʉs̈ámpay.

³⁶Ni'c ¿pa ti oy te tu'c jayau i-aguep nu'pʉjʉn itpay en ayʉ̱́j mundu mit i-actogoyp ivida?

³⁷Ni'c te tu'c jayau i-actogoyp ivida, ¿nat iguijuybichinwa'natu?

³⁸En ayʉ̱́j tiempu jayajwat icuyaguigap Dios mit iwatcap mal. Po pʉmba'tu jeme tʉs̈tuwinchu̱gámpay ʉ̱ mit lo que tʉnyʉmpay, we'ney ʉ̱ jeme tʉjatway jayau tʉntuwinchu̱gámpey je' cuandu tʉmi'nwa'n oymanac as̈am tʉnte̱t Dios, mit tʉmi'náj mit Dios i-ángejlat.