Read Sayula Popoluca San Lucas 1 Bible Online

San Lucas 1 - Sayula Popoluca bible

San Lucas 1

¹Mayo'c jayajwat iwangau iguija'ygawa'n nu'tsic tu'c historia nat iyo'jy Jesús, pa najawiga ayé cosajat jeme jatway mam ʉjtsat tʉtsʉ̱nga.

²Mit we'n tʉs̈actujawigau jeme imuyo'ygaway Jesús, mit jeme tsʉ̱ngaway encarga̱tic pa igui-ajque's̈cawa'n ayé oyway noticia.

³Mit tʉnestudia̱t oymanac nu'pʉjʉn cosajat desde ichu̱chij ayʉ̱́j historia, mit ʉ̱ we'ney tʉs̈jawi oy tʉʉja'jyawa'n mi̱ nu'pʉjʉn jeme jatway, oh Teófilo mi̱ mirespeta̱ticway.

⁴Tʉnja'y nu'pʉjʉn pa pi jawi ni'c iyacs̈ta'cway nu'pʉjʉn is̈ajque's̈cajaway mi̱.

⁵Cuandu Herodes itsʉ̱naj rey Judeajway na̱s̈, it tu'c jayau judíujat ipa̱nijat inʉ'jyway Zacarías, mit je' tsʉ̱nau mit ayé grupu inʉmgajapay Abías. Mit ito's̈ay inʉ'jy Elisabet, mit je' pichin Aarón ifamiliani'c.

⁶Mit is̈ta'c yo'ygau yacs̈ic mam igui-e'p Dios, mit caculpá̱tijcat ni'c ijayaumaygau nu'pʉjʉn cosa imanda̱tway el Señor.

⁷Mit ca-itcʉjʉwu iwajyat ni'c Elisabet nunca igawatu iway, mit itcʉjʉnup mayo'c s̈iwit.

⁸Mit tu'c s̈ʉjw iguitoca̱tcau Zacarías mit icumpajlat pa iguiservia̱tcajawa'n Dios templutujugum as̈am iguiwátcaj judíujat ipa̱nijat.

⁹Mit ayé pa̱nijat itcʉjʉu tu'c costumbre. Je'jat i-i̱jcajau suerte ma pichin pʉn i-acwi's̈ámpay po̱m templutujugum as̈am iguiwátcaj judíujat, mit iguitoca̱t Zacarías pa itʉgʉywa'n el Señor itempluni'c.

¹⁰Mit nu'pʉjʉn jayaujuc ora̱tcau pe'ta̱m en ayé hora cuandu meru Zacarías igui-acwi's̈ po̱m.

¹¹Mit iguique's̈ta̱jcau el Señor i-ángel, mit ayé ángel tenau i-oyim ayé lugar mam igui-acwi's̈ po̱m.

¹²Igui-is̈ Zacarías ayé ángel, ni-apʉ̱tijyʉu jaran.

¹³Po ayé ángel iguinʉjmau: Zacarías, campʉ̱twit ni'c Dios imaraway lo que inyo'jtaway. Jinap into's̈ay Elisabet ijtʉ̱́j tu'c iway, mit inyajcáj inʉ'jy Juan.

¹⁴Mit ji'gáj injo̱jt may, mit mayo'c jayajwat ji'jcámpey ijo̱jtat i-itwa'n ayé ya̱wáy.

¹⁵Mit inway iguimʉjninʉmáj Dios, mit iga-u'gáj vinu ne jeme nas̈acmu̱jcʉpay, mit Espíritu Santu tsʉ̱náj ijo̱tni'c desde i-itwa'n.

¹⁶Mit je' i-actuyajcʉs̈áj Israejlatway ima̱lway to̱jwat, mit icupʉjcáj el Señor Dios.

¹⁷Mit Juan nas̈ʉ'gáj mit i-oyagáj to̱u pa imi'nwa'n el Señor, mit ijtʉ̱́j Espíritu Santu mit poder as̈am i-íjtʉj ámbanu ayé profeta Elías, mit jayajwat i-actuwangʉs̈áj iwajyat, mit jeme cajayaumaygapay i-actupʉctangʉs̈áj ma jayaumayga Dios, pa we'n jayajwat tsʉ̱ngáj prepara̱tic cuandu imi'nwa'n el Señor.

¹⁸Mit Zacarías inʉjmau ayé ángel: ¿Nat tʉs̈jawiwa'n ni'c iyacs̈ta'cway lo que inyʉmpay? ni'c tʉna'wayo'ganu mit tʉnto'xay ajchwayo'ganu.

¹⁹Mit iguipo'n ayé ángel: Ʉ̱ tʉGabriel, mit tʉnservia̱jtap Dios mam je' itsʉ̱na. Mit je' tʉs̈ajyu't pa tʉmucotswa'n mit pa tʉnʉjmawa'n ayʉ̱́j oyway noticia.

²⁰Mit jinap micu-u̱miyáj mit ca-oyáj incots hasta ayé s̈ʉjw i-itwa'n inway, ni'c ingacupʉgu lo que tʉnʉjmaway, mit ayé cumplia̱táj hasta icojawa'n itiempu.

²¹Mit ayé jayajwat i-atsʉ̱ngau Zacarías, mit nigu-épigʉjʉu ni'c jego'c templutujugum.

²²Mit ipichijn, ca-oyawu iguimucotscʉs̈, mit nimoygʉjʉu cuenta ni'c i-is̈ tu'c visión templutujugum. Mit Zacarías imucotscʉs̈ mit seña, mit u̱m itajn.

²³Mit iguicʉs̈ itiempu pa iguiserviá̱jtaj Dios, je' nʉcs̈nuw itʉcm.

²⁴Mit cʉs̈ en ayé s̈ʉjwat ito's̈ay Elisabet iguitajnau iway, mit je' tan itʉcm pa cinco meses.

²⁵Mit inʉm: “El Señor oyo'gu tʉs̈wajtau. Jat we'n pa tʉs̈cajatucotscáj jayajwat.”

²⁶Icʉs̈ seis meses, Dios i-ajyu't ayé ángel Gabriel en tu'c nʉ'jcopac inʉ'jyway Nazaret Galileajway na̱s̈.

²⁷Ayé ángel oy igui-e'p tu'c quis̈ay jeme nicʉ'pa̱jtʉ́mpay mit tu'c jayau inʉ'jyway José, mit je' pichin David ifamiliani'c. Mit ayé quis̈ay inʉ'jy María.

²⁸Mit ayé ángel tʉgʉy mam je' itsʉ̱na mit inʉjmau: —¡Min tʉsaluda̱t ni'c Dios is̈moy favor! El Señor tsʉ̱nap mit mi̱ ni'c Dios is̈bendiciona̱t más que japu̱t to's̈ajyat.

²⁹Po cuandu María igui-is̈ ayé ángel, nigu-épijyʉu ni'c we'n iguinʉjmau, mit ipensa̱t tini'c iguisaluda̱t we'n.

³⁰Mit cʉs̈ ayé ángel iguinʉjmau: —María, campʉ̱twit ni'c Dios is̈moy favor.

³¹Miwaya-iyáj mit inaguepáj tu'c inway, mit inyajcáj inʉ'jy JESUS.

³²Je' tsʉ̱náj mʉjninʉmic mit inʉmgáj ni'c je' Dios yucmay iway. Mit el Señor Dios imo'áj ma manda̱t as̈am imanda̱jt ámbanu rey David, mit je' nate̱jtat ámbanuway.

³³Mit we'n imanda̱tcʉs̈áj Israelway jayajwat pa nu'pʉjʉn tiempu, mit je' manda̱táj pa siempre.

³⁴Mit María i-ucyo't ayé ángel: —¿Nat ijatwa'n we'n? ni'c tʉnganipʉcp tʉnya'u.

³⁵Iguipo'n ayé ángel: —Espíritu Santu is̈mijnáj, mit Dios yucmay jeme ijtʉpay nu'pʉjʉn poder tsʉ̱náj mit mi̱. Jemni'c ayé qui'chwáy inaguepámpay Dios iguicupi̱u, mit inʉmgáj ni'c je' Dios iway.

³⁶Marau. We'ney intsʉ' Elisabet iguitajnawey tu'c iway, mit je' ajchwayo'ganu, mit ijtʉnup seis meses itsʉ̱na wayaj, mit inʉmgau ni'c nunca ca-ijtʉwu iway.

³⁷Ni'c Dios oyap iguiwat nu'pʉjʉn.

³⁸Mit María inʉm: —Ʉ̱ tʉnservia̱jtap el Señor. Dios ma wat mit ʉ̱ as̈am is̈nʉjmap. Mit cʉs̈ ayé ángel pichin mam María itsʉ̱na.

³⁹En ayé s̈ʉjwat pichin María mit nʉcs̈ pe'bet en tu'c nʉ'jcopac itpay copac-awa'tsam Judeajway na̱s̈.

⁴⁰Mit je' tʉgʉy tʉc Zacarías mit isaluda̱t Elisabet.

⁴¹Mit cuandu Elisabet iguisaluda̱t María, tsugut jaran iway itinchayni'c, mit Elisabet iguimijnau Espíritu Santu.

⁴²Mit Elisabet imucots mʉgʉc María: —Mi̱ Dios is̈bendiciona̱t más que nu'pʉjʉn to's̈ajyat, mit bendiciona̱tiguey itsʉ̱na inway jeme itámpay.

⁴³Ʉ̱ tʉs̈camerecia̱tp is̈tʉcyo'yáj, ni'c inway jeme itámpay, ayé tʉnSeñor jeme nas̈manda̱tcámpay.

⁴⁴Ni'c cuandu is̈saluda̱t, tsugut jaran tʉnwáy tʉntinchayni'c ni'c ji'c ijo̱jt.

⁴⁵Mi̱ mitsʉ̱náj oy ni'c micupʉc, ni'c cumplia̱táj lo que inʉmway el Señor.

⁴⁶Mit María inʉm: Tʉnmʉjninʉmp el Señor mit nu'pʉjʉn tʉnjo̱jt,

⁴⁷mit ji'cp tʉnjo̱jt mit Dios, ni'c je' ayé tʉs̈salva̱tway.

⁴⁸Ni'c Dios tʉs̈cayagu menus maja tʉpro̱wiaj. Ʉ̱ je' tʉnservia̱jtap. Mit jinap pa jʉpm nu'pʉjʉn jayajwat tʉs̈-oyninʉmgáj ʉ̱.

⁴⁹Ni'c Dios jeme ijtʉpay poder tʉs̈wajtau mʉjway cosajat. Je' limpiu itsʉ̱na.

⁵⁰Je' siempre i-ayo̱wis̈cʉs̈áj nu'pʉjʉn iguipʉ̱tcapay.

⁵¹Dios iwat cosa majatway mit ipoder, mit ivencia̱tcʉs̈ jeme nimʉjninʉmgʉjʉpay.

⁵²Oyap iguichi'tcʉs̈a ipoder jeme manda̱tcapay, mit iyajcʉs̈áj oy jeme canimʉjninʉmgʉjʉpay.

⁵³Imoygʉs̈p cosa oyway jeme je' iguiche'ngapay, mit igamoygʉs̈p neti jeme igawangapay iguiche'ngáj.

⁵⁴Imajyigʉs̈ ijayajwat Israejlatway, mit siempre inijawigʉs̈p ijayajwat mit i-ayo̱wis̈cʉs̈p,

⁵⁵as̈am iguiprometia̱tcʉ́s̈aj nate̱jtat ámbanuway, mit we'ney Abraham mit nu'pʉjʉn jeme pichingaway je ifamiliani'c.

⁵⁶Mit María tan mit Elisabet como tres meses, mit cʉs̈ pitucnuw itʉcm.

⁵⁷Mit Elisabet iguicojyau s̈ʉjw pa ita'cwa'n, mit ita̱c iway.

⁵⁸Ivecinujat mit ifamiliajat imaraugau ni'c Dios iwajtau oy Elisabet, mit ji'jcau ijo̱jtat mit je'.

⁵⁹I-íjtʉj ocho s̈ʉjwat, min iguimarcá̱tcaja iway as̈am judíujat iguiwátcaj, mit iwangau iguiyajcajawa'n inʉ'jy Zacarías as̈amu ite̱t.

⁶⁰Po ima̱m iguinʉmgajau ni'c ca̱j. Iyajcajáj inʉ'jy Juan.

⁶¹Mit inʉmgajau: —¿Tini'c? Ca-itp netu'c infamiliajat inʉ'jyway we'n.

⁶²Mit i-ucyo'tcajau ite̱t mit seña nat iguiyajcawa'n inʉ'jy.

⁶³Je' iguiyo'tcajau tu'c tsacwáy pa iguituja'jyawa'n inʉ'jy, mit ija'y ni'c ayé qui'chwáy inʉ'jy Juan. Mit nu'pʉjʉn nigu-épigʉjʉu.

⁶⁴Mit cʉs̈ Zacarías cotsta̱c jaran, mit i-oyninʉm Dios.

⁶⁵Mit nu'pʉjʉn ivecinujat pʉ̱jtʉgʉygau, mit nu'pʉjʉn tsʉ̱ngapay copac-awa'tsajmat Judeajway na̱s̈ i-ampiugau nu'pʉjʉn jeme jatway.

⁶⁶Mit nu'pʉjʉn imaraugaway ayʉ̱́j noticia ipensa̱tcau ijo̱tni'jcat mit inʉmgau: —¿Nata'p ijatwa'n ayʉ̱́j qui'chwáy? Ni'c el Señor iguibendiciona̱t may.

⁶⁷Mit Espíritu Santu tsʉ̱nau mʉgʉc ijo̱tni'c Zacarías, Juan ite̱t, mit inʉm lo que jatámpay.

⁶⁸Oyninʉmic el Señor, Israejlatway iDiosat, ni'c min nas̈salva̱tcap.

⁶⁹Mit nas̈acmingajau tu'c jeme nas̈salva̱tcámpay mit ijtʉpay may poder, mit je' pichin David ifamiliani'c, mit David iservia̱jtau Dios.

⁷⁰We'n iguiprometia̱jt desde ámbanu, mit i-actunʉmgʉs̈ ayé profetajat icupiugʉs̈way ni'c nas̈salva̱tcáj.

⁷¹Nas̈salva̱tcáj namutsuguijnat icʉ'jugujmat mit nu'pʉjʉn nas̈-ángapay,

⁷²mit i-ayo̱wis̈cʉs̈ nate̱jtat ámbanuway as̈am iguinʉjm, mit iganijawiyo'táj ayé oyway acuerdu iwatway.

⁷³Ayʉ̱́j ayé promesa Dios ijura̱jtaway nate̱jtat Abraham.

⁷⁴Inʉm ni'c nas̈libra̱tcáj namutsuguijnat icʉ'jugum pa nas̈servia̱tcajawa'n je', mit we'n nagajapʉ̱tcáj.

⁷⁵Nayo'yga limpiu mit nawátca oy mam nas̈-e'pcap Dios nu'pʉjʉn s̈ʉjw natutsʉ̱ngámpay yam.

⁷⁶Mit mi̱ qui'chwáy, mitanáj profeta pa Dios yucmay, ni'c minʉs̈áj jʉpm mit inyʉmgʉs̈áj jayajwat ma niprepara̱tcʉjʉ pa iguipʉctsougawa'n el Señor cuandu imi'nwa'n.

⁷⁷Mit inactujawigʉs̈áj ni'c Dios isalva̱táj ijayajwat, mit iperdona̱tcʉs̈áj nu'pʉjʉn mal iwatcaway.

⁷⁸Dios i-ayo̱wis̈o'cp ijayajwat ni'c je' nas̈acmingajáj desde tsajpni'c tu'c jeme nas̈salva̱tcámpay, mit jatáj as̈am tu'c s̈ʉjw oymanacway.

⁷⁹Mit i-actu-e'pcʉs̈áj tu'c luz jeme tsʉ̱ngapay chitimicni'c mit jeme tsʉ̱ngapay en peligru pa i-o'jcawa'n, mit nas̈munʉs̈cáj mam i-it paz.

⁸⁰Mit ayé qui'chwáy ye'c mit ipʉc maj icuerpu, mit tsʉ̱nau mam iga-it tʉjcat hasta ayé s̈ʉjw iguique's̈ta̱jcʉ́s̈aj Israelway jayajwat.