Read Sayula Popoluca San Lucas 12 Bible Online

San Lucas 12 - Sayula Popoluca bible

San Lucas 12

¹Mit ni-apʉcmujcʉjʉu tu'c jayaujuc mayway hasta nitsʉmadá̱jcʉjʉu, mit Jesús chu̱chiu primeru iguinʉmgʉ́s̈a ipʉctampajyat: —Nicuidá̱tcʉjʉ mit ayé fariseujat ni'c niwatcʉjʉp oyjayajwat, po lo que i-ajque's̈capay ayé puru we̱t mit ijimp jayajwat. Ayé as̈am levadura igui-actimam harina-cʉ't.

²Ni'c ca-itp neti cuyu'tsicway ni'c cuque's̈áj nu'pʉjʉn, mit najawigáj nu'pʉjʉn itpay cuyu'tsic.

³Jemni'c nu'pʉjʉn inyʉmgaway intu'gujmatu, nu'pʉjʉn ijawigáj. Mit nu'pʉjʉn inyʉmgaway anu'mu intujugujmat, inʉmdacyo'ygáj mam iguimárauga nu'pʉjʉn jayajwat.

⁴’Amigujat, tʉnʉmgʉs̈ap: Campʉ̱tca jeme i-ago'jcámpay incuerpujat ni'c cʉs̈wa'n is̈cajawatcajap neti.

⁵Po tʉnʉmgʉs̈áj pʉn impʉ̱tcámpay. Pi pʉ̱tca ayé jeme oyapay is̈chi'tcajap imvidajat mit después oyámpey is̈comgáj jʉngʉtʉm. Ʉ̱ tʉnʉmgʉs̈ap pi pʉ̱tca ayé.

⁶’Oyap nas̈to'c cinco jonwájat por mechc centavu, po Dios icuida̱tcʉs̈pey jonwájat.

⁷Dios ijawip pʉjʉn cuajypʉjc is̈aguépca incopacni'jcat. Jemni'c campʉ̱tca ni'c mijchat más mivalia̱tcap que jonwájat.

⁸’Tʉnʉmgʉs̈ap ni'c pʉmba'tu inʉmpay ni'c tʉs̈-is̈cap mam iguimárauga jayajwat, we'ney ʉ̱ jeme tʉjatway jayau tʉnyʉmáj ni'c tʉnis̈cap je' mam iguimárauga Dios i-ángejlat.

⁹Po jeme inʉmámpay ni'c tʉs̈ca-is̈cap mam iguimárauga jayajwat, ʉ̱ tʉnyʉmámpey ni'c tʉnga-is̈cap je' mam iguimárauga Dios i-ángejlat.

¹⁰’Mit jeme tʉs̈tucotsámpay ʉ̱ jeme tʉjatway jayau, ayé oyáj itsʉ̱na perdona̱tic. Po jeme itucotsámpay Espíritu Santu, ca-oyáj itsʉ̱na perdona̱tic.

¹¹’Mit cuandu is̈munʉs̈cáj mam judíujat i-adora̱tca, mit mam juezat mit mam autoridajat, campensá̱tca nat impo'ngawa'n, ne ti inyʉmgámpay.

¹²Ni'c Espíritu Santu is̈actujawigáj ti inyʉmgámpay en ayé hora.

¹³Mit tu'c jayau tsʉ̱naway jayau-awa'tsam inajau Jesús: —Amayipay, nʉjma tʉnje̱way pa tʉmayapʉ́jca tʉnya̱s̈at jeme tʉs̈toca̱tcapay.

¹⁴Po Jesús ipo'n: —Hombre, ¿pʉn ʉ̱ tʉs̈yac pa juez pa tʉpartia̱tcʉs̈awa'n inaguepcapay?

¹⁵Mit inʉmgʉs̈awey: —Nicuidá̱tcʉjʉ mit nu'pʉjʉn cosa inwano'jcapay, ni'c tu'c jayau ivida caje' pa iguiwano'cwa'n nu'pʉjʉn lo que i-aguepay.

¹⁶Mit Jesús itumuquips̈cʉs̈au tu'c cuentu, inʉm: —Tu'c jayau ricu ijtʉu ina̱s̈, mit iguiyaguí̱jcap may cosecha.

¹⁷Mit ayé ricu pensa̱t ijo̱tni'c, mit inʉm: “¿Ti tʉnwatáj? ni'c tʉnga-aguep mam tʉs̈apʉcmucwa'n tʉncosecha.”

¹⁸Mit inʉm: “Ayʉ̱́j tʉnwatáj. Tʉnactogoyda'gáj mam tʉs̈yac tʉncosecha, mit tʉnwatáj más majatway, mit jem tʉs̈comwa'n nu'pʉjʉn tʉncosecha mit nu'pʉjʉn lo que tʉnaguepay.

¹⁹Mit je' pensa̱t ijo̱tni'c mit inʉm: Tʉnaguep mayo'c cosajat apʉcmuguic pa may s̈iwit. Tʉpo'cs̈áj, tʉcayáj, tʉ-u'gáj, mit ji'gáj tʉnjo̱jt.”

²⁰Po Dios iguinʉjmau: “Mitonto, ayʉ̱́j tsu' mi-o'gáj ¿mit pa pʉn itanwa'n lo que inaguepay?”

²¹Mit wename iguijatáj jeme jinap ijtʉpay may tumi̱n pa je'yu, mit je' pro̱wij mam igui-e'p Dios.

²²Mit Jesús inʉmgʉs̈au ipʉctampajyat: —Ʉ̱ tʉnʉmgʉs̈ap campensa̱tí̱jca pa imvidajat ti incaygámpay, ne campensa̱tca pa jamuc ti incomgámpay.

²³Como Dios nas̈moygap vida, ayé más valia̱tp, mit je' nas̈moygámpey nacaygámpay mit nacomgámpay.

²⁴E'pca jonwájat ni'c cani̱pcap ne cachijcap, ne ca-itcʉjʉp mam iguiguarda̱tcawa'n cayan, po Dios i-ajcaygʉs̈p. Mijchat más mivalia̱tcap que jonwájat.

²⁵Mit te pensa̱to'cp tu'c jayau, ¿is̈jawiga oyáj iye'c mediu metru más iyucmi?

²⁶Te ca-oyap is̈wátca tu'c cosa te mipensa̱to'jcap, ¿tini'c impensa̱tí̱jca pa japu̱t cosajat is̈aguepcawa'n?

²⁷’E'pca ayé liriupijicwájat nat iye'jca mit cayos̈watcap ne igapi'tcap jamuc, po tʉnʉmgʉs̈ap ni'c ne rey Salomón mit nu'pʉjʉn i-oymanagui ca-oyawu itsʉ̱na cutigatsic as̈am ayé pijicwájat.

²⁸Mit te Dios icuida̱tp ma'tswájat cuyjugumay mit jatu'c s̈ʉjw nacomgapatu jʉngʉtʉm, ¿is̈jawiga Dios is̈cacuida̱tcáj más mijchat? Mijchat migacupʉjcap may.

²⁹Jemni'c pi is̈catu'ngac ti incaygámpay ne ti in-u̱jcámpay, ne campensa̱tí̱jca.

³⁰Ni'c jayajwat ayʉ̱́j mundujway iche'ngap nu'pʉjʉn ayé cosajat, po Dios Nate̱jat ijawip ni'c inyesita̱tcap nu'pʉjʉn ayé cosajat.

³¹Más oy pi che'nga pa is̈manda̱tcáj Dios, mit nu'pʉjʉn ayé cosajat inaguepcáj nu'tsic.

³²’Mijchat as̈am tu'c titic borregujuc, po campʉ̱tcawit ni'c Dios Nate̱jat iwamp is̈manda̱tcáj.

³³To'jca lo que inaguepcapay mit moyga jeme nesita̱tijcatway. Muyo'yga tumi̱ncomajnat jeme cajotcámpay, ayé inʉmo'jcʉp pi apʉcmújca riqueza yucm tsajpni'c jeme catogoyámpay, mam igatʉgʉywa'n nu'mpay, ne mam wech iguigacayáj.

³⁴Jeme iwangapay may tumi̱n yam na̱s̈ni'c, ayé iguijo̱tju'pcap, mit jeme iwangapay itsʉ̱ngawa'n oy tsajpni'c, solo pensa̱tcáj pa tsajpni'c.

³⁵’Tsʉ̱́nga prepara̱tic mit ma tsʉ̱nga no'ctsowic inta'cs̈ajnat pa intsʉ̱ngawa'n prepara̱tic.

³⁶Pi tsʉ̱nga as̈am mozojat jeme i-atsʉ̱ngapay ijaycat imi'nwa'n cʉ'pa'tni'c, pa we'n imi'nwa'n iguipas̈ tʉc-ajw, inawa̱tscajáj jaran.

³⁷Tsʉ̱ngáj oy ayé mozojat te ijaycat iguipa̱tcap nijutujcat cuandu imi'nwa'n. Iyacs̈ta'cway tʉnʉmgʉs̈ap ni'c je' niprepara̱jtʉ̱́j mit inʉmgʉs̈áj ma tsʉ̱nga me̱s̈ani'c, mit je' iservia̱tcʉs̈áj.

³⁸Tsʉ̱ngáj oy ayé mozojat te iguipa̱tcap nijutujcat pu̱jtsu'm o jopoytsu'mnaj.

³⁹Pi jawiga ayʉ̱́j, ni'c tu'c jayau tʉ́jcajway ma jawiate ti hora imi'nwa'n tu'c nu'mpay, je' cuida̱tájate mit igamo'ájate laj ma iguitʉctʉgʉyac.

⁴⁰Mijchat we'ney pi tsʉ̱nga prepara̱tic ni'c ʉ̱ jeme tʉjatway jayau tʉmi'náj de repente.

⁴¹Mit Pedro iguinajau: —Señor, ¿is̈tumuquips̈cap ayʉ̱́j cuentu pa ʉjtsatu o pa nu'pʉjʉn jayajwat?

⁴²Mit el Señor inajau: —Tʉ-actujawigʉs̈áj tu'c mozo cumplia̱tpay mit jeme i-is̈capay. Ijayc iguitumuyac ifamiliajat ayé mozo, mit je' imoygʉs̈ icayan en ayé hora itucaygámpay.

⁴³Oyninʉmic ayé mozo te we'n iguiwat cuandu imi'nwa'n ijayc.

⁴⁴Iyacs̈ta'cway tʉnʉmgʉs̈ap ni'c ayé tʉ́jcajway itumuyagáj ayé mozo nu'pʉjʉn ijtʉpay.

⁴⁵Po te ayé mozo inʉmp ijo̱tni'c: Tʉnjayc jego'gámnaj pa imi'nwa'n. Je' chu̱chip iguimoyta̱jcʉs̈ imumozoje̱wajyat, mit cayp, u̱cp mit hasta u̱ctupʉcp.

⁴⁶Te iwatp we'n ayé mozo, mi'náj ijayc en tu'c s̈ʉjw igatsʉ̱nawa'n prepara̱tic mit en tu'c hora iguigajawiwa'n, mit icastiga̱táj mʉgʉc mit i-actutso'gáj ayé mozo as̈am jeme cacumplia̱tcapay.

⁴⁷’Te tu'c mozo ijawip ti iwampay ijayc po catsʉ̱nap prepara̱tic, ne cajayaumayp, iraunipʉ'ngáj mʉgʉc.

⁴⁸Po ayé mozo igajawipay, te iwatp mal, itp ti iguiraugajawa'n, po caje' mʉgʉc. Ni'c jeme natumuyacpay may, nayo'jtigajtsáj may, mit jeme namoypay más may, nas̈moytigatsnúmpey más may.

⁴⁹’Tʉmín pa tʉs̈comwa'n jʉjn nu'pʉjʉn mundu, mit tʉnwampate ma tinin jaran.

⁵⁰Itp ti tʉs̈tunas̈wa'n, mit jinap tu'no'cp tʉnjo̱jt hasta icumplia̱twa'n ayé s̈ʉjw cuandu tʉs̈tunas̈wa'n.

⁵¹Campensa̱tca ni'c tʉmín solo pa tʉs̈yacwa'n paz en ayʉ̱́j mundu. Po como tʉmín, itáj lucha ni'c catsʉ̱ngáj de acuerdu jeme tʉs̈cupʉjcapay mit jeme tʉs̈cacupʉjcapay.

⁵²Jemni'c jinap pa jʉpm cinco jayajwat en tu'c familia ni-ago'jcʉjʉ̱́j, tres tsʉ̱ngáj contra dos, mit dos contra tres.

⁵³Tu'c jayau imutsuguinwatáj iway, mit tu'c jayau imutsuguinwatáj ite̱t. Tu'c to's̈ay imutsuguinwatáj iwaymá̱m, mit tu'c to's̈ay imutsuguinwatáj ima̱m, mit tu'c to's̈ay imutsuguinwatáj ijays̈e'p, mit tu'c jays̈e'p imutsuguinwatáj is̈ac.

⁵⁴Jesús inʉmgʉs̈awey ayé jayajwat: —Is̈-e'pcawa'n ni'c cu'tp wintuc mam itʉ́gʉynu s̈ʉjw, inyʉmgap jaran ni'c mi'náj tu̱, mit we'n ijat.

⁵⁵Mit is̈ujwa'n jʉns̈e'm, inyʉmgap ni'c itáj powic, mit we'n ijat.

⁵⁶Mijchatu miniwe̱tcʉjʉp ni'c oyap is̈ajcotstújca ti i-anuncia̱tpay tsajp mit na̱s̈, po ca-oyap is̈jawiga ti inʉmo'jcʉp lo que tʉnwatpay ʉ̱ jinapay tiempu.

⁵⁷’¿Mit tini'c ca-oyap is̈jawiga mijchatu ti ayé lo que iyacs̈ta'cway?

⁵⁸Amigujátca jeme is̈cotsnas̈capay mientras minʉs̈cap mit je' yos̈tujugum. Te inga-amigujátcap inmutsuguijnat, is̈yajcáj icʉ'jugum juezna', mit juezna' is̈yajcáj icʉ'jugum ayé comandante, mit je' is̈comgáj cuytujugum.

⁵⁹Tʉnʉmgʉs̈ap ni'c migapichingáj jem hasta te ingatso̱jcap pʉjʉnu is̈yo'tcajáj.