Read Sayula Popoluca San Lucas 14 Bible Online

San Lucas 14 - Sayula Popoluca bible

San Lucas 14

¹En tu'c po'cs̈ans̈ʉjw Jesús nʉcs̈ caypay tʉc tu'c jefe, mit ayé jefe tu'c fariseu. Mit fariseujat i-espia̱tcau Jesús.

²Mit tu'c jayau qui̱s̈cada̱cpay min mam itsʉ̱na Jesús.

³Mit Jesús imucotscʉs̈ jeme i-ajque's̈capay ley mit fariseujat, inʉm: —¿Oy na-ac-oytanwa'n po'cs̈ans̈ʉuni'c?

⁴Po je'jat iganʉmgawu neti Mit Jesús igui-actajn ayé jayau, i-ac-oytan mit i-acnʉcs̈.

⁵Mit Jesús inʉmgʉs̈au: —¿Is̈jawiga mijchat te tu'c burru o tu'c buey cʉmdʉgʉyp en tu'c nʉ'cʉt po'cs̈ans̈ʉuni'c, inga-acpichingáj jaran?

⁶Mit ca-oyawu iguipo'ngap.

⁷Mit Jesús i-is̈ nat iguicupíuga pa̱ngu ojyatway pa itsʉ̱ngawa'n me̱s̈ani'c, mit itumuquips̈cʉs̈au tu'c cuentu jeme tsʉ̱ngaway imvita̱tic, inʉmgʉs̈au:

⁸—Cuandu is̈-imvita̱táj tambʉn pa tu'c cʉ'pa't, camtsʉ̱na oyway panguni'c magami'n tu'c mʉjayau jeme imvita̱ticwayey.

⁹Mit jeme is̈-imvita̱tcaway mimechcat mi'náj mit is̈nʉjmáj: “Mo' laj ayʉ̱́j jayau.” Mit miwinchu̱cta'gáj is̈che'nwa'n tu'c pangu más últimuway.

¹⁰Po cuandu is̈-imvita̱tcáj, nʉs̈ mit tsʉ̱na en ayé pangu más últimuway, mit we'n, imi'nwa'n jeme is̈-imvita̱tway is̈nʉjmáj mi̱: “Amigu, tsʉ̱́na en tu'c pangu más oyway.” Mit wejpu'n nu'pʉjʉn jeme tsʉ̱ngapay me̱s̈ani'c i-e'pcáj ni'c mi-oyninʉmic.

¹¹Ni'c pʉmba'tu jeme nimʉjninʉjmʉpay, Dios iguimalninʉmáj. Mit pʉmba'tu canimʉjninʉjmʉpay, Dios igui-oyninʉmáj.

¹²Mit Jesús inʉjmau ayé jayau jeme igui-imvita̱tway: —Cuandu is̈watwa'n tu'c cayna̱s̈, cam-imvita̱tcʉs̈ in-amigujat, ne inje̱wajyat, ne injes̈queje̱wajyat, ne imvecinujat ricujatway, ni'c je'jat is̈-imvita̱tcámpey mit is̈actsoutujcajáj.

¹³Po cuandu is̈watwa'n cayna̱s̈, imvita̱tcʉs̈ pro̱wijat, cʉ'túguijcatway, cu̱s̈ujat mit winchat.

¹⁴Mit mitsʉ̱náj oyninʉmic ni'c je'jat ca-oyáj is̈actsoutújcajap, po Dios is̈tso'gáj cuandu ijutucta̱jcawa'n jeme iwatcaway iyacs̈ta'cway.

¹⁵Iguimarajw we'n tu'c jeme tsʉ̱napay me̱s̈ani'c mit je', inʉjmau Jesús: —Tsʉ̱nap oy jeme cayámpay mam imanda̱t Dios.

¹⁶Mit Jesús iguinʉjmau: —Tu'c jayau iwat tu'c mʉjway cayna̱s̈ mit i-imvita̱t mayo'c jayajwat.

¹⁷Mit icojy hora pa ayé cayna̱s̈, i-ajyu't imozo ma nʉmgʉs̈a imvita̱tijcatway: “Nʉ́s̈ca ni'c oyaguiganu nu'pʉjʉn.”

¹⁸Mit nu'pʉjʉn chu̱chiu iguinʉ́mga ni'c ca-oyáj inʉ́s̈ca. Primeruway inʉm: “Tʉnjuy tu'c na̱s̈ mit itp ti tʉnʉs̈wa'n tʉs̈-e'p. Tʉyo'jtap pi is̈dispensa̱tac.”

¹⁹Mit jatu'cway inʉm: “Tʉnjuy cinco par buey mit nʉs̈áj tʉs̈-e'p te oypichingáj. Tʉyo'jtap pi is̈dispensa̱tac.”

²⁰Mit jatu'c jayau inʉm: “Cʉs̈o'cpnaj tʉnicʉ'pá̱jtʉ mit jemni'c ca-oyáj tʉnʉs̈.”

²¹Ipitujc ayé mozo, i-actujawiu ijayc. Mit ayé jayau tʉ́jcajway awa'niu mit inʉjmau imozo: “Nʉs̈ jaran plazani'c mit calleni'c en ayʉ̱́j nʉ'jcopac mit mumingʉs̈ yam pro̱wijat, cʉ'túguijcatway, cu̱s̈ujat mit winchat.”

²²Mit iguinʉjmawatu ayé mozo: “Señor, tʉnwatway as̈am is̈manda̱t, mit itpnaj más laj.”

²³Mit ayé jayau inʉjmau imozo: “Nʉs̈ to̱uni'jcat pa mam itsʉ̱nga pe'ta̱majyat mit obliga̱tcʉs̈ ma tʉgʉyga pa ma pats tʉntʉjc.

²⁴Tʉnʉmgʉs̈ap ni'c netu'c ayé imvita̱tijcatway cacayáj en ayé cayna̱s̈ tʉnwatpay.”

²⁵Mit mayo'c jayajwat nʉs̈cau mit Jesús, mit i-e'jpitujc, inʉmgʉs̈au:

²⁶—Te tu'c jayau iwamp imi'nwa'n mit ʉ̱, po te más iwamp ite̱t, ima̱m, ito's̈ay, iwaywájat, imajtsʉcwájat, mit te más iwamp ivida, ayé jayau ca-oyáj ijat tʉmpʉctampay.

²⁷Tu'c jayau ma tsʉ̱na dispuestu pa iguitunas̈wa'n mit pa tʉs̈natspoguiyáj. Te igawatp we'n, ca-oyáj ijat tʉmpʉctampay.

²⁸Ni'c te tu'c jayau mam mijchat iwamp iguiwatwa'n tu'c mʉjway tʉjc, ¿is̈jawiga igapensa̱jtʉ'gáj pa iguicalcula̱twa'n gastu, te iguicojyáj itumi̱n pa icʉs̈wa'n jaran?

²⁹Te igawatp we'n, iwajtámpu ibase po ca-oyáj iguicʉs̈ nu'pʉjʉn. Mit cʉs̈wa'n nu'pʉjʉn jayajwat igui-e'pcámpay iguitus̈i̱jcáj.

³⁰Inʉmgáj: “Ayʉ̱́j jayau ichu̱chiwu po ca-oyawu iguicʉs̈.”

³¹O te tu'c rey nʉs̈p pa iguimutsuguinwatwa'n jatu'c rey, ¿is̈jawiga igapensa̱jtʉ'gáj te oyáj iguivencia̱t mit diez mil jayajwat te jatu'cway rey imumimp veinte mil?

³²Mit te i-e'p ni'c ca-oyáj iguivencia̱t, cuandu yagatsnaj itsʉ̱na imutsuguin, i-ajyu'táj una̱c jayajwat ma yo'tca paz.

³³Jemni'c te tu'c jayau mam mijchat igayacp nu'pʉjʉn ijtʉpay, ca-oyáj ijat tʉmpʉctampay.

³⁴’Oyo'c ayé ca̱n, po te ayé ca̱n cajapa'c, ¿nat i-o'mwa'n as̈am ca̱n?

³⁵Caservia̱tp ne pa nas̈yacwa'n na̱s̈ni'c ne pa abono. Solo oy pa nas̈cucachiwa'n. Jeme ijtʉpay ita̱tsʉc pa iguitumarawa'n, ma marau lo que tʉnyʉmpay.