Read Sayula Popoluca San Lucas 15 Bible Online

San Lucas 15 - Sayula Popoluca bible

San Lucas 15

¹Nigutomigʉjʉu mam Jesús nu'pʉjʉn que'chumpajyat mit maljayajwat pa iguimaraugawa'n.

²Mit fariseujat mit jeme i-ajque's̈capay ley itucotscau anu'mu, inʉmgau: —Ayʉ̱́j jayau ipʉctsougʉs̈p maljayajwat mit imucaygʉs̈p.

³Po Jesús itumuquips̈cʉs̈ tu'c cuentu, inʉm:

⁴—Te tu'c jayau mam mijchat ijtʉp cien borregu mit i-actogoyp tu'c, ¿is̈jawiga igayagáj noventa y nueve mam igatsʉ̱na nepʉn, mit nʉs̈p iguiche'n hasta mam iguipa'twa'n jeme togoyway?

⁵Mit iguipa'twa'n ayé borregu, imunʉs̈p iquejcopacni'c pa itʉcm mit ji'cp ijo̱jt.

⁶Icojawa'n itʉcm, i-imvita̱tcʉs̈p i-amigujat mit ivecinujat, mit inʉmgʉs̈ap: “Ma ji'jca injo̱jtat jinap mit ʉ̱ ni'c tʉmpa̱tway tʉmborregu jeme togoyicway.”

⁷Tʉnʉmgʉs̈ap ni'c wename itáj más gozo mit Dios tsajpni'c cuandu tu'c jayau iguicuyagui ima̱lway to̱u que por ayé noventa y nueve jeme yo'ygapay yacs̈ic jeme icuyaguigaway ima̱lway to̱jwat.

⁸’Mit te tu'c to's̈ay ijtʉp diez tumi̱nwájat mit te i-actogoyp tu'c, ¿is̈jawiga igano'ctsowáj ta'cs̈an mit ipe'táj itʉjc mit iche'náj oymanac hasta iguipa'twa'n?

⁹Mit iguipa'twa'n ayé tumi̱n, i-imvita̱tcʉs̈p i-amigajat mit ivecinajat, mit inʉmgʉs̈ap: “Ma ji'jca injo̱jtat mit ʉ̱, ni'c tʉmpa̱tway tʉntumi̱n tʉnactogoyway.”

¹⁰Tʉnʉmgʉs̈ap ni'c wename itáj más gozo mam Dios i-ángejlat te tu'c maljayau icuyaguip ima̱lway to̱u.

¹¹Inʉmwey Jesús: —Tu'c jayau ijtʉu mechc iwayna'jat.

¹²Mit jeme más majtsʉcway inʉjmau ite̱t: “Papá, mo'ac tʉmparte jeme tʉs̈toca̱tpay de ayé inaguepay.” Mit ayé jayau imoygʉs̈ ipartejat.

¹³Mit ca-ijtʉwu may tiempu, ayé ya̱wayna' i-apʉcmuc nu'pʉjʉn ayé tumi̱n mit nʉcs̈ pa tu'c na̱s̈ más yagatsway. Mit icojy jem, tigapa'tu ituwatcada̱c ayé imoygaway.

¹⁴Mit iguigasta̱jt nu'pʉjʉn, min tu'c yu' mʉgʉcway en ayé na̱s̈ mam itsʉ̱naj, mit iguitogoy mayo'c cosajat.

¹⁵Cʉs̈ je' nʉcs̈ mit icutomiu tu'c jayau jeme tsʉ̱naway en ayé na̱s̈ pa iguiyo'jtawa'n yos̈. Mit igui-acnʉcs̈ mam i-ijtʉ i-aníma̱jtat pa igui-ajcaygʉs̈wa'n í̱chijmat.

¹⁶Mit iwan iguicaywa'n ayé ta'tsʉjcat jeme í̱chijmat icaygapay, po nepʉn iguiga-ayo̱wis̈u.

¹⁷Mit cʉs̈ je' chu̱chiu pensa̱tpay: “Ayé yos̈watpajyat tsʉ̱ngapay tʉnte̱t itʉcm itcʉjʉp may cayan mit yam ʉ̱ tʉntunas̈p sin cay.

¹⁸Mejor tʉca's̈ʉ'gáj mit tʉpitugáj mam tʉnte̱t mit tʉnyʉjmáj: Papá, tʉnwatway mal mam Dios tʉs̈-e'p, mit mi̱ tʉwajtawey mal.

¹⁹Tʉs̈cajamerecia̱tp is̈wayjatáj, po aguépaguey as̈am tu'c inyos̈watpajyat.”

²⁰Mit cʉs̈ ca's̈ʉ'c mit pituc mam itsʉ̱na ite̱t. Mit cʉs̈ yagatso'cnajate imi'n, ite̱t igui-is̈, i-ayo̱wis̈. Mit cʉs̈ nʉs̈ pujʉ'c iguipa̱jtso̱p, mit imoy tu'c ame'tamuc mit imoy tu'c s̈u'c.

²¹Po cʉs̈ inʉjmau ite̱t: “Papá, tʉnwatway mal mam Dios tʉs̈-e'p, mit mi̱ tʉwajtawey mal. Tʉs̈cajamerecia̱tp ʉ̱ is̈wayjatáj.”

²²Po cʉs̈ ite̱t inʉmgʉs̈au iyos̈watpayna'jat: “Mumínga jaran tu'c jamuc más oyway mit cutígatsca. Moyga-éy icʉ'cum mit ita'ncʉ'ac.

²³Mit mumínga ayé becerru jeme tʉnacye'cpʉcway, mit ago'jca. Nacaygáj mit nawatcáj ma̱s̈ʉjw,

²⁴ni'c ayʉ̱́j tʉnwáy o'guigate itsʉ̱na po jutucta̱c, mit togoyigate itsʉ̱na mit que's̈ta̱c.” Mit chu̱chiu iguitsouga ayé ma̱s̈ʉjw.

²⁵’Mit cʉs̈ iway ajchcópacway camni'gate itsʉ̱na, mit cuandu minupate tom itʉcm, imarau ni'c itp itʉcm tu'c s̈u's̈na̱s̈, mit i-is̈ ni'c echcap.

²⁶Cʉs̈ iya̱s̈ tu'c imozojat mit i-ucyo't ti ma̱s̈ʉjw itsougap.

²⁷Mit je' iguinʉjmau: “Minway inmajtsʉc mit como neti iguigajatu, inte̱t inʉm ni'c tʉ-ago'jca ayé becerru i-acye'cpʉcway.”

²⁸Mit cʉs̈ je' awa'niu mit igawanu tʉgʉy. Cʉs̈ ite̱t ipichijn, inajau ma tʉgʉy.

²⁹Mit ipo'n ite̱t: “Ʉ̱ mayo'gap tiempu tʉmuyos̈wat mit tʉnjayaumayp nu'pʉjʉn inyʉmpay, mit nunca is̈canimoyp tu'c chibu pa tʉs̈tsowa'n tu'c ma̱s̈ʉjw mit tʉn-amigujat.

³⁰Po cuandu imijn ayʉ̱́j inway, inago'jcau jaran ayé becerru inacye'cpʉcway, mit je' cʉs̈ iguimalgasta̱t intumi̱n mit malto's̈ajyat.”

³¹Po cʉs̈ ite̱t iguinʉjmau: Mi̱ siempre mitsʉ̱nap mit ʉ̱ mit nu'pʉjʉn tʉnaguepay mi̱ inje'.

³²Po jinap oy natsóuga ayʉ̱́j ma̱s̈ʉjw ni'c ayʉ̱́j inmajtsʉc o'guigate itsʉ̱na mit jutucta̱c, togoyigate itsʉ̱na mit que's̈ta̱c.