Read Sayula Popoluca San Lucas 16 Bible Online

San Lucas 16 - Sayula Popoluca bible

San Lucas 16

¹Mit Jesús inʉmgʉs̈awey ipʉctampajyat: —It tu'c jayau ricu mit ijtʉu tu'c imozo iconfia̱jtaway. Mit ayé mozo i-acusa̱tcau mit ijayc ni'c iguimalgasta̱jtap itumi̱n.

²Mit iya̱s̈ imozo mit inʉjmau: “¿Tini'c tʉs̈nʉmgajap ni'c inwatp mal? Is̈-entrega̱jtáj cuenta pʉjʉn is̈aguep tʉtumuyacway, ni'c migajasiguia̱táj mit ayé yos̈.”

³Cʉs̈ ayé mozo inʉm je'yu: “¿Ti tʉnwatáj? ni'c tʉnjayc tʉs̈chi'jtap tʉnyos̈. Ca-oyap tʉyos̈wat tajani'c, mit te tʉyo'jche'mp, tʉwinchu̱gáj.

⁴Po tʉnjawinup ti tʉnwatáj pa tʉs̈pʉctsougáj jayajwat itʉcmat cuandu tʉs̈chi'tcajáj tʉnyos̈.”

⁵Mit iya̱s̈cʉs̈ cada jayau ipʉ́jquijatway ijayc, mit primeruwayna' inʉjmau: “¿Pʉjʉn is̈pʉjqui tʉnjayc?”

⁶Mit iguipo'n: “Tʉmpʉjqui cien barril aceite.” Mit inʉjmau: “Ʉjʉ incuenta. Nitsʉ̱ndá̱jcʉ mit ja'y jaran jatu'c cuenta ma nʉm ni'c cincuenta impʉjqui.”

⁷Cʉs̈ inajau jatu'c jayau: “¿Mi̱j te, pʉjʉn is̈pʉjqui?” Mit iguipo'n: “Tʉmpʉjqui cien medida trigu.” Mit inʉjmau: “Ʉjʉ incuenta. Ja'y jatu'c cuenta ma nʉm ni'c ochenta impʉjqui.”

⁸Mit ayé ricu nimojyʉu cuenta ni'c astutu ayé mozo pa iguiwatwa'n mal. Mit jeme cacupʉjcapay más astutujat que jeme yo'ygapay mit Dios, ni'c cupʉcpajyat oy ma jatca astutu pa iguiwatcawa'n oy.

⁹’Mit tʉnʉmgʉs̈ap: Ocupá̱tca maja ma̱ltumi̱naj pa is̈tumajyigawa'n pro̱wijat, mit we'n je'jat is̈-amigujatcáj. Mit in-o'jcawa'n, is̈pʉctsougáj tsajpni'c mam ingatogoygawa'n nunca.

¹⁰’Jeme cumplia̱tpay pa iguiwatwa'n tu'c cosa ma̱s menusway, cumplia̱támpey pa iguiwatwa'n tu'c asuntu mʉjway. Mit we'ney jeme iwatpay mal en tu'c asuntu menusway, iwatámpey mal en tu'c asuntu mʉjway.

¹¹Po te ingacumplia̱tcap mit ayé tumi̱n majamá̱laj, ¿pʉn confia̱táj mit mijchat te ingawatcap oy mit lo que Dios is̈moygaway?

¹²Mit te ingacumplia̱tcap is̈cuida̱tcawa'n jayje', ¿nat is̈moygáj premiu pa inje'jat?

¹³’Nejʉmay mozo ca-oyap i-ijtʉ mechc ijaycat, ni'c tu'c i-anáj mit jatu'c iwa'náj, o tu'c i-oyninʉmáj mit jatu'c imalninʉmáj. Ca-oyap is̈serviá̱tcaja Dios te más inwangap intumi̱jnat.

¹⁴Mit fariseujat iwano'jcau tumi̱n mit iguimáraugaj lo que inʉmway Jesús, itus̈i̱jcau.

¹⁵Mit Jesús inʉmgʉs̈au: —Mijchat mini-oyninʉmgʉjʉp mam jayajwat is̈-e'pcap, po Dios is̈-is̈capcajap injo̱jtat. Dios capensa̱tp as̈am jayajwat. Ni'c lo que jayajwat i-oyninʉmgapay, Dios imalninʉmp.

¹⁶’Antes imijn Juan nʉ'gutempay, itnajate Moisés iley mit lo que ija'ygaway profetajat. Po jinap tʉnyʉmdacyo'ygap ni'c Dios manda̱táj, mit nu'pʉjʉn jayajwat ni-obliga̱tcʉjʉp pa itʉgʉygawa'n jem.

¹⁷’Más fácil icʉs̈wa'n tsajp mit na̱s̈, po ayé ley catogoyáj nes̈ʉ̱n, ne tu'c parte más menusway igachi'tcajáj.

¹⁸’Pʉmba'tu icuyaguiyámpay ito's̈ay mit te ipʉcp jatu'c, ayé jayau chajyo'yp. Mit pʉn ipʉgámpay tu'c to's̈ay cuyáguiyicway, ayé jayau chajyo'ypey.

¹⁹’It tu'c jayau ricu, mit nigutigatsí̱jcʉp cada s̈ʉjw mit puru jamuc ojyatway, mit iwatí̱c puru ma̱s̈ʉjw majatway.

²⁰Mit itey tu'c jayau yo'jche'mpay inʉ'jy Lázaro, mit cʉmnau ricuna' itʉc-auni'c, mit je' ijtʉu may lla̱gas.

²¹Mit je' iwano'c iguicaywa'n ayé ma̱s̈anʉ̱nco's̈wájat ca'ugapay ricuna' ime̱s̈ani'c, mit mingau tacna'jat mit iguicule'pscajau illa̱gas.

²²Mit cʉs̈ o'c ayé yo'jche'mpay, mit ángejlat iguimunʉs̈cau pa tu'c lugar oymanacway mam itsʉ̱na Abraham. Mit cʉs̈ o'guey ayé ricuna' mit oy iguiní̱pca.

²³Mit ricuna' nʉcs̈ jatu'c laj mam itsʉ̱nga á̱nimajat ma̱jlatway, mit mayo'c iguitunas̈. Mit iyuc-e'jp, i-is̈ yagats Abraham mit Lázaro jemey itsʉ̱na.

²⁴Mit imucots mʉgʉc, inʉm: “Padre Abraham, ayo̱wis̈ac. Acmi'n Lázaro ma acs̈o'c icʉ'jʉjp mit nʉ' mit ma tʉs̈acs̈o'jcac tʉn-ajw ni'c ʉ̱ yam tʉntunas̈p mit ayʉ̱́j jʉjn.”

²⁵Po Abraham iguinʉjmau: “Hijo, pi nijawi ni'c cuandu intsʉ̱naj impʉctso̱u puru cosa ojyatway mit Lázaro ipʉctso̱u puru cosa ma̱lway, po jinap je' yam tsʉ̱nap oy mit mi̱ intunas̈áj jem.

²⁶Mit caje' aye'yu, ni'c itp tu'c cʉt mʉjway es̈pu̱tum mam tʉtsʉ̱nga ʉjtsat, mit jeme iwa'námpay inʉs̈wa'n mam mijchat ca-oyáj inas̈, ne jem tsʉ̱napay ca̱oyáj imi'n pa yam.”

²⁷Mit cʉs̈ ricuna' inʉm: “Padre Abraham, tʉyo'jtap pi ajyu't Lázaro tʉnte̱t itʉcm,

²⁸ni'c tʉnaguep cinco tʉnje̱wayna'jat. Tʉnwamp ma mucotscʉs̈ magaminga-éy je'jat yam mam ʉ̱ tʉs̈tunas̈.”

²⁹Po Abraham iguinʉjmau: “I-aguepcap lo que ija'ygaway Moisés mit profetajat, ma marauga ayé.”

³⁰Po ricuna' inʉm: “Ca̱j, Padre Abraham, te nʉs̈p mam je'jat tu'c o'guicway, icuyaguigáj ima̱lway to̱jwat.”

³¹Po Abraham iguinʉjmau: “Te igamaraugap Moisés ne profetajat, igacupʉjcámpey maja ijutucta'cwa'naj tu'c o'guicway.”