Read Sayula Popoluca San Lucas 17 Bible Online

San Lucas 17 - Sayula Popoluca bible

San Lucas 17

¹Jesús inʉmgʉs̈au ipʉctampajyat: —Itp ti i-itwa'n ayé mal iyo'tpay najo̱jt, po ¡pro̱wij de ayé jayau jeme nas̈actuwampay mal!

²Más oy nacutsúmijya tu'c mʉjway pa̱wan iyo'cni'c mit naca'tstʉgʉy lama̱tjugum, ni'c más mal igui-actuwatwa'n mal tu'c ayʉ̱́j jayawájat jeme tʉs̈cupʉjcapay.

³Nicuidá̱tcʉjʉ mijchatu. Te inhermanu is̈wajtap mal, che'cta'c. Po te is̈yo'jtap perdón, perdona̱t.

⁴Mit te is̈wajtap mal siete veces en tu'c s̈ʉjw, mit te siete veces pitucpatu pa is̈yo'jtap perdón, oy pi perdona̱t.

⁵Mit ayé pʉctampajyat inʉmgajau el Señor: —Majyigac pa tʉcupʉ́jca más.

⁶Mit el Señor inʉmgʉs̈au: —Te micupʉjcap s̈ʉ̱ntiticna, ayé as̈am tu'c titic mostaza-semilla ijat mʉj, mit oyáj is̈nʉ́mgaja ayʉ̱́j sicómoro-cujy: “Niwís̈ʉ mit niní̱jpʉ lama̱tni'c”, mit is̈jayaumaygáj.

⁷’Te tu'c jayau mam mijchat ijtʉp tu'c imozo mit i-acyos̈watp araduni'c o i-acborregucuida̱tp, cuandu ipitucnuwa'n yos̈ni'c ¿is̈jawiga ayé jayau inʉjmáj: “Nas̈ jaran me̱s̈ani'c”?

⁸Mejor inʉjmáj: “Wajtac pa tʉ-u̱cma'wa'n. Niprepará̱jtʉ mit je'jpac pa tʉ-u̱cma'wa'n mit tʉcʉs̈wa'n, mi-u̱cmá̱pama mi̱.”

⁹¿Is̈jawiga inʉjmáj imozo ni'ctiyu̱s̈ ni'c iwat as̈am iguimanda̱tp? Tʉs̈jawi ni'c ca̱j.

¹⁰We'ney mijchat. Cuandu is̈watcawa'n nu'pʉjʉn is̈manda̱tcaway Dios, nʉmga: “Tʉgacumplia̱tcap oy pa mozo ni'c tʉnwatcap jeme nʉmicwayu tʉwátca.”

¹¹Inʉjcs̈ Jesús to̱uni'c pa Jerusalén, nas̈ mam initsójwʉ Samaria mit Galilea.

¹²Mit icojy en tu'c nʉ'jcopacwáy, imunipa̱jtʉu diez jayajwat jeme itcʉjʉway may lla̱gas, mit je'jat tenagau yagatsu ni'c ca-oy iguicutomigawa'n nepʉn.

¹³Mit je'jat cotscau mʉgʉc, inʉmgau: —¡Jesús, Amayipay, ayo̱wis̈cac!

¹⁴Mit Jesús igui-is̈cʉs̈, inʉmgʉs̈au: —Nʉs̈ actu-e'pca judíujat ipa̱nijat ni'c mi-oytangau. Mit nʉs̈capnajate, oytangau jaran.

¹⁵Mit tu'c jayau igui-is̈ ni'c oytanway, pituc mam itsʉ̱na Jesús, mit i-oyninʉm mʉgʉc Dios,

¹⁶mit nicos̈atenda̱jcʉu ita'ná̱m Jesús, mit inʉjmau ni'ctiyu̱s̈. Mit ayé jayau Samariajway.

¹⁷Mit Jesús inʉm: —¿Caje' diez jayajwat jeme oytangaway? ¿Jʉm itsʉ̱nga janueve?

¹⁸¿Is̈jawiga solo ayʉ̱́j pe'ta̱mayna' pituc pa igui-oyninʉmwa'n Dios?

¹⁹Mit inʉjmau: —Ca's̈ʉ'c mit nʉs̈, mi-oytanway ni'c ʉ̱ is̈cupʉc.

²⁰Mit fariseujat i-ucyo'tcau Jesús jutim imanda̱twa'n Dios yam. Mit Jesús ipo'ngʉs̈: —Nepʉn ca-oyáj iguijawi cuandu imanda̱twa'n Dios.

²¹Ne ca-oyáj iguinʉ́mga: “E'pca yam” o “e'pca yajyʉ'n”, ni'c jinap Dios manda̱tnup mam mijchat intsʉ̱nga, po ca-oyap is̈-e'pca.

²²Mit Jesús inʉmgʉs̈au ipʉctampajyat: —Itáj s̈ʉjwat cuandu inwangáj tʉmi'n ʉ̱ jeme tʉjatway jayau, mit ca-oyáj is̈-e'pcap.

²³Mit jayajwat is̈nʉmgajáj: “E'pca, yam itsʉ̱na Cristu”, o “e'pca yajyʉ'n itsʉ̱na.” Mijchat camnʉs̈ca ne camnatspoguiga je'jat.

²⁴Ni'c as̈am ániway iquijan desde mam ipichin s̈ʉjw hasta mam itʉgʉynu, wename-ey ijatwa'n en ayé s̈ʉjw tʉmi'nwa'n ʉ̱ jeme tʉjatway jayau, ni'c nu'pʉjʉn jayajwat i-e'pcáj tʉmi'nwa'n.

²⁵Po itp ti tʉs̈tunas̈ʉ'cwa'n yam ni'c jinapay jayajwat tʉs̈capʉctsougáj ne tʉs̈ca-e'po'jcʉjʉp.

²⁶’Ni'c as̈am ayé tiempu itsʉ̱naj Noé, wename-ey ijatwa'n en ayé s̈ʉjw tʉmi'nwa'n ʉ̱ jeme tʉjatway jayau.

²⁷Je'jat caygau, u̱jcau, nicʉ'pa̱tcʉjʉu mit i-acnicʉ'pa̱tcʉjʉu iquis̈ajyat hasta ayé s̈ʉjw itʉgʉjy Noé barcuni'c, mit patscunas̈ ayʉ̱́j mundu mit nʉ', mit o'cpʉ'ngau nu'pʉjʉn ayé maljayajwat.

²⁸Mit we'ney ijajt cuandu itsʉ̱naj Lot. Ayé maljayajwat caygau mit u̱jcau, juygau mit to'jcau, ni̱pcau mit tʉcwatcau.

²⁹Po ayé s̈ʉjw ipichijn Lot nʉ'jcopac Sodoma, min tsajpni'c jʉjn mit azufre, mit nu'pʉjʉn tangaway togoybʉ'ngau.

³⁰Wename-ey ijatwa'n en ayé s̈ʉjw tʉque's̈ta'cwa'n ʉ̱ jeme tʉjatway jayau.

³¹’En ayé s̈ʉjw tu'c jayau jeme tsʉ̱napay tʉcyucuinm ma po'c jaran, maga-acpichin neti ijtʉpay tujugum, mit jeme tsʉ̱napay camni'c magapituc itʉcm.

³²Nijáwiga ti iguijatway Lot ito's̈ay.

³³Nu'pʉjʉn jeme iwampay iguisalva̱twa'n ivida i-actogoyáj, mit pʉmba'tu jeme i-actsʉ̱námpay ivida por togoyic, je' iguarda̱táj pa tu'c vida cacʉs̈ámpay.

³⁴’Tʉnʉmgʉs̈ap ni'c en ayé tsu' mechc tsʉ̱ngáj en tu'c che's̈. Tu'c imunʉs̈cáj mit tu'c iyajcáj.

³⁵Mechc to's̈ajyat jʉtscáj pa̱wani'c. Tu'c imunʉs̈cáj mit tu'c iyajcáj.

³⁶Mechc jayajwat tsʉ̱ngáj camni'c. Tu'c imunʉs̈cáj mit tu'c iyajcáj.

³⁷Mit igui-ucyo'tcau: —¿Jʉm ijatwa'n we'n, Señor? Mit Jesús inʉmgʉs̈au: —Mam itsʉ̱nawa'n tu'c á̱nima, jemey ica'ugawa'n nu'pna'jat. Mit we'ney mam itsʉ̱nga maljayajwat, jem ayé icastiga̱twa'n Dios.