Read Sayula Popoluca San Lucas 18 Bible Online

San Lucas 18 - Sayula Popoluca bible

San Lucas 18

¹Mit Jesús itumuquips̈cʉs̈au tu'c cuentu, i-ajque's̈cʉs̈au ni'c ma ora̱tí̱jca mit magadesmaya̱tca.

²Inʉm: —It tu'c juez en tu'c nʉ'jcopac, mit je' igapʉ̱tu Dios ne igawatu cuenta jayajwat.

³Mit itey en ayé nʉ'jcopac tu'c to's̈ay cu-o'c, mit je' miní̱c mam itsʉ̱na juezna' mit inʉjmau: Cowa'nac mit tʉnmutsuguin.

⁴Mit mayo'c tiempu ayé juez igawatu cuenta, po inʉm je'yu: “Tʉngapʉ̱tp Dios ne tʉngawatp cuenta jayajwat,

⁵po majawe'naj, tʉncowa'náj ayʉ̱́j cu-o'cwáy ni'c tʉs̈jomi-í̱cp mit oyap tʉs̈ajcʉs̈ap tʉnjo̱jt.”

⁶Mit inʉm el Señor: —Márauga ti inʉmway ayé juez málway.

⁷Mit como Dios oyo'c, ¿is̈jawiga je' igacowangʉs̈áj icupiugʉs̈way jeme iguiyo'tcajapay tsu'm mit s̈ʉ̱m? ¿Is̈jawiga jegáj pa iguipo'ngʉs̈wa'n?

⁸Tʉnʉmgʉs̈ap ni'c icowangʉs̈áj jaran. Po ʉ̱ jeme tʉjatway jayau cuandu tʉmi'nwa'n, ¿is̈jawiga tʉmpa'táj ni'c jayajwat en ayʉ̱́j mundu icupʉjcap Dios?

⁹Mit Jesús itumuquips̈ tu'c cuentu pa na-is̈cápca jayajwat ni-oyninʉmgʉjʉpay mit imalninʉmgapay japu̱jtat. Inʉm yename:

¹⁰—Mechc jayajwat nʉs̈í̱jcap ora̱tpay templuni'c, tu'c jayau fariseu mit tu'c ique'chumpay impuestujat.

¹¹Mit ayé fariseu tena i-ora̱jt mit inʉm yename: “Dios, tʉnʉjmap ni'ctiyu̱s̈ ni'c ʉ̱ tʉgaje' as̈am japu̱jtat jeme chajyo'ygapay, nu'mpajyat, iwatcapay mal, ne tʉgaje' mal as̈am ayʉ̱́j ique'chumpay demás.

¹²Tʉ-ayuná-tp mechpac tu'c s̈ama̱na, mit tʉnyaguí̱cp pa Dios tu'c parte de nu'pʉjʉn tʉnactsʉ̱napay.”

¹³Po ayé que'chumpay tenau anu̱s̈cʉtʉm mit je' nipas̈ʉp mʉgʉc ipechuni'c mit ne igawamp iyuc-e'pwa'n pa tsajpni'c. Mit inʉm: “Dios, ayo̱wis̈ac ni'c ʉ̱ tʉma̱lo'c.”

¹⁴Tʉnʉmgʉs̈ap ni'c ayé que'chumpay más perdona̱tic inʉ́cs̈nuj itʉcm que fariseuna'. Ni'c jeme ni-oyninʉjmʉpay en ayʉ̱́j vida imalninʉmgáj, mit pʉn niwajtʉpay menus i-oyninʉmgáj.

¹⁵Mit imumingajau Jesús ya̱wájat pa ma yajcʉs̈a icʉ'jat. Mit igui-ís̈caj we'n ipʉctampajyat, igamoygawu laj ma nas̈ca.

¹⁶Po Jesús iya̱s̈cʉs̈ ayé ya̱wájat, mit inʉm: —Moyga laj ya̱wájat ma minga mam ʉ̱ mit camatujca, ni'c jayajwat jeme jatcámpay as̈am ayʉ̱́j ya̱wájat, je'jat iguimanda̱tcáj Dios.

¹⁷Iyacs̈ta'cway tʉnʉmgʉs̈ap ni'c jeme igacupʉcpay as̈am tu'c ya̱wáy ni'c Dios manda̱táj, catʉgʉyáj mam je' imanda̱t.

¹⁸Mit tu'c jayau manda̱tpay i-ucyo't Jesús: —Amayipay oyway, ¿ti tʉnwatáj pa tʉs̈aguepwa'n vida jeme cacʉs̈ámpay?

¹⁹Jesús iguinʉjmau: —¿Tini'c ʉ̱ is̈najap Amayipay oyway? Solo itp tu'c jeme oyway, mit ayé Dios.

²⁰Injawip lo que imanda̱tpay Dios: “Migachajyo'yáj, miga-ago'gáj, miganu'máj, ingawe̱twajtáj nepʉn, in-oyninʉmáj inte̱t mit inma̱m.”

²¹Mit ayé manda̱tpayna' inʉm: —Nu'pʉjʉn ayé tʉnguarda̱tway desde tʉyauya̱waymijn.

²²Iguimarajw Jesús, inʉjmau: —Jatu'c cosajyu is̈togoyp. To'cpʉ'n nu'pʉjʉn inaguepay mit moygʉs̈ pro̱wijwájat, mit mitsʉ̱náj oy tsajpni'c ni'c ayé as̈am tu'c riqueza más oyway, mit cʉs̈wa'n mi'n pa is̈natspoguiyáj.

²³Iguimarajw we'n, tu'no'c ijo̱jt ni'c je' ricujo'c.

²⁴Igui-is̈ Jesús ni'c tristejo'c itajn, inʉm: —¡Majo'c pa itʉgʉygawa'n mam imanda̱t Dios jeme itcʉjʉpay may tumi̱n!

²⁵Ni'c más fácil tu'c camellu inas̈wa'n agu̱s̈acʉtwayni'c que tu'c ricu itʉgʉywa'n en ayé lugar mam imanda̱t Dios.

²⁶Mit jeme iguimaraugaway, inʉmgau: —¿Pʉmpaj oyáj inisalvá̱jtʉ?

²⁷Jesús inʉmgʉs̈au: —Jayajwat ca-oyap inisalvá̱tcʉjʉ je'jatu, po Dios oyap iguiwat nu'pʉjʉn cosa.

²⁸Mit Pedro inʉjmau Jesús: —Marau, ʉjtsat tʉncuyaguigaway nu'pʉjʉn tʉnaguepcapay mit tʉnatspoguigap mi̱.

²⁹Mit Jesús inʉmgʉs̈au: —Iyacs̈ta'cway tʉnʉmgʉs̈ap ni'c jeme iyagámpay itʉjc, ite̱t, i-ajchat, ito's̈ay, iwajyat ni'c más iwamp itʉgʉywa'n mam imanda̱t Dios,

³⁰je' ipʉctsowáj más en ayʉ̱́j tiempu, mit en ayé tiempu mi'námpay ipʉctsowáj vida jeme cacʉs̈ámpay.

³¹Mit Jesús imunʉs̈cʉs̈ ayé doce ipʉctampajyat aparte mit inʉmgʉs̈au: —Márauga, nanʉs̈cap pa Jerusalén mit cumplia̱táj nu'pʉjʉn ija'ygaway profetajat ti tʉs̈jatámpay ʉ̱ jeme tʉjatway jayau.

³²Mit tʉs̈yajcáj icʉ'jugujmat pe'ta̱majyat, tʉs̈burla̱tcáj, tʉs̈apes̈cáj mit tʉs̈cutsujcu'tcáj.

³³Mit cʉs̈wa'n tʉs̈raunipʉ'ngáj, tʉs̈ago'jcáj po tʉjutucta'gáj imutu̱gupay s̈ʉjw.

³⁴Po igajawigawu ti ayé inʉmway, ni'c Dios igamoygʉs̈u laj ma jawiga.

³⁵Cuandu Jesús icojy tom nʉ'jcopac Jericó, tu'c winch tsʉ̱nau to̱u-auni'c pa iguiyo'twa'n limosna.

³⁶Mit iguimarajw ni'c nas̈p ayé jayaujuc, i-ucyo't ti ayé.

³⁷Mit inʉmgajau ni'c nas̈p Jesús Nazaretway.

³⁸Mit je' imucots mʉgʉc, inʉm: —¡Jesús, mipichin David ifamiliani'c pa is̈salva̱tcáj, ayo̱wis̈ac ʉ̱!

³⁹Mit jeme nʉs̈capay jʉpm iguiche'cta̱jcau pa ma tis̈to'p, po je' imucots más mʉgʉc, inʉm: —Mi̱ David ifamiliani'cway, ¡ayo̱wis̈ac ʉ̱!

⁴⁰Mit Jesús tentan mit manda̱t ma muminga ayé winch, mit icojy mam je', i-ucyo't:

⁴¹—¿Ti inwamp tʉwajtawa'n? Mit je' inʉm: —Señor, tʉnwamp tʉ-e'pta'cwa'n.

⁴²Mit Jesús inʉjmau: —Mi-oytanáj ni'c ʉ̱ is̈cupʉcp.

⁴³Mit e'pta̱c jaran, mit inatspoguiu mit i-oyninʉm Dios. Mit igui-ís̈caj nu'pʉjʉn jayajwat, i-oyninʉmgau Dios.