Read Sayula Popoluca San Lucas 19 Bible Online

San Lucas 19 - Sayula Popoluca bible

San Lucas 19

¹Itʉgʉjy Jesús nʉ'jcopac Jericó, je' nas̈tucpate.

²Mit jem itsʉ̱naj tu'c jayau inʉ'jyway Zaqueo mit je' jefe de nu'pʉjʉn ique'chumgapay impuestu, mit ricujo'c.

³Mit iwan igui-e'pwa'n pʉn ayé Jesús, po ca-oyawu igui-e'p ni'c mayo'c jayau, mit je' tsapa-o'c.

⁴Mit je' pujʉ'c pa jʉpm mit itucu't tu'c sicómoro-cujy pa igui-e'pwa'n, ni'c Jesús it ti inas̈wa'n cuy-á̱m.

⁵Icojy Jesús en ayé lugar, yuc-e'p mit i-is̈ Zaque, inajau: —Zaqueo, manac jaran ni'c jinap itp ti tʉtanwa'n intʉcm.

⁶Mit je' manac jaran mit ipʉctso̱u oymanac.

⁷Igui-ís̈caj we'n, nu'pʉjʉn inʉmgau ni'c Jesús tʉgʉy pa itanwa'n mit tu'c jayau iwatpay mal.

⁸Mit cʉs̈ Zaqueo nitenda̱jcʉu mit inajau el Señor: —Marau, Señor, tʉnmoygʉs̈áj pro̱wijat es̈pu̱t tʉnaguepay mit te tʉnchi'jtau tambʉn tanti, tʉnacpitujcáj cuatro tantu más.

⁹Jesús inʉm: —Jinap nisalva̱jtʉp ayʉ̱́j jayau mit nu'pʉjʉn itʉcm tsʉ̱ngapay ni'c je' pichiney Abraham ifamiliani'c.

¹⁰Ni'c ʉ̱ jeme tʉjatway jayau tʉmín pa tʉs̈che'nwa'n mit pa tʉs̈salva̱twa'n jeme togoyicway.

¹¹Mit ayé jayajwat iguimáraugaj we'n, Jesús itumuquips̈cʉs̈ tu'c cuentu ni'c tomo'ganu Jerusalén, mit je'jat inʉmgapayta ni'c Dios que's̈ta'gáj jaran pa imanda̱twa'n.

¹²Inʉm Jesús: —It tu'c mʉjayau, mit je' nʉcs̈ pa tu'c na̱s̈ yagatsway pa ijatwa'n rey, mit cʉs̈wa'n pitucnú̱jatu.

¹³Mit iya̱s̈ diez imozojat mit imoygʉs̈ icʉjtúmi̱jnat, mit inʉmgʉs̈au: “Tuyos̈wátca ayʉ̱́j tumi̱n hasta tʉmi'nwa'n.”

¹⁴Po ayé nʉ'jcopac jayajwat i-angau ayé mʉjayau mit i-ajyu'tcau jayajwat ma nʉmga: “Tʉngawangap tʉs̈manda̱tcáj ayé mʉjayau.”

¹⁵Mit cʉs̈ ijajt rey, ayé jayau pitucnuwatu, mit iya̱s̈cʉs̈ ayé mozojat jeme imoygʉs̈way tumi̱n. Je' iwan iguijawiwa'n pʉjʉn igui-actsʉ̱́nga cada mozo mit ayé tumi̱n.

¹⁶Mit min primerwayna', iguinʉjmau: “Señor, intumi̱n tʉntu-actsʉ̱nau diez veces más.”

¹⁷Mit ayé rey inʉjmau: “Oyo'gu is̈wajt, mi̱ mi tu'c mozo oyway ni'c s̈ʉ̱nu is̈aguejp mit intuwat oy, mit mi̱ micumplia̱tp. Jinap inmanda̱táj diez nʉ'jcopajcat.”

¹⁸Imijn jatu'c, iguinajau: “Señor, intumi̱n tʉntu-actsʉ̱nau cinco veces más.”

¹⁹Mit ayé rey inajawey ayé mozo: “Inmanda̱táj cinco nʉ'jcopajcat.”

²⁰Imijn jatu'c, iguinajau: “Señor, yam is̈aguep intumi̱n, tʉmpit pa̱yuni'c,

²¹ni'c tʉpʉ̱tp mi̱ ni'c mi̱ as̈am tu'c jayau manda̱tpay mʉgʉc. Migayos̈watp incamni'c po incosecha̱tp, mit impʉctso̱p ayé cosecha po ingani̱pu mi̱.”

²²Mit inʉjmau: “Mi̱ mi tu'c mozo ma̱lway. Tʉtujuzga̱táj lo que is̈nʉjmapay. Injawip ni'c tʉjayau manda̱tpay mʉgʉc, mit tʉncosecha̱tp lo que tʉngani̱pay.

²³Más oyate is̈cayajc tʉntumi̱n bancuni'c pa tʉpitucwa'n, tʉmpʉctso̱pate tʉntumi̱n mit tʉnactsʉ̱nájate más.”

²⁴Mit inʉmgʉs̈au jeme tsʉ̱ngaway jem: “Chi'tcaja ayé tumi̱n mit moyga jeme i-actsʉ̱naway diez veces más.”

²⁵Mit iguinʉmgajau: “Po Señor, je' ijtʉnup diez veces más.”

²⁶Tʉnʉmgʉs̈ap ni'c jeme ijtʉpay, imoygáj más. Po jeme ca-ijtʉpay may, ichi'tcajáj nu'pʉjʉn ijtʉpay.

²⁷Po tʉnmutsuguijnat jeme igawangapay tʉs̈manda̱tcʉs̈wa'n, muminga yam mit ago'jca tʉnwiná̱m.

²⁸Iguinʉjm we'n, Jesús siguia̱t pa Jerusalén.

²⁹Mit icojy tom Betfagé mit Betania, mit tomo'c jem itsʉ̱na ayé copac inʉ'jyway los Olivos, i-ajyu't mechc ipʉctampajyat,

³⁰mit inʉmgʉs̈au: —Nʉs̈ca en ayé nʉ'jcopac mit intʉgʉygawa'n jem impa̱tcáj tu'c burruwáy cujupiyic mit nepʉn iganitucu'tp ayé burruwáy. Quéjca mit muminga yam.

³¹Mit te tambʉn is̈-ucyo'tcap: ¿Tini'c is̈quéjca ayé burruwáy? impo'ngáj yename: Ni'c el Señor inesita̱tp.

³²Mit nʉs̈cau jeme i-ajyu'tcʉs̈way mit ipa̱tcau burruwáy as̈am iguinʉmgajau.

³³Mit iquejcapnajate, ijaycat iguinʉmgajau: —¿Tini'c is̈quéjca ayé burruwáy?

³⁴Mit je'jat ipo'ngau: —Ni'c el Señor inesita̱tp.

³⁵Mit imumingau ayé burruwáy mam Jesús, mit iguiyájcajaj ijamujcat, i-ajcu'tcau Jesús burruyucuinm.

³⁶Mit mam inʉcs̈ Jesús, itsapcau ijamujcat to̱uni'c.

³⁷Mit icóygaj tom mam imanactá̱jca en ayé copac los Olivos, nu'pʉjʉn ayé pʉctampajyat ji'cta̱jcau ijo̱jtat mit chu̱chiu mʉgʉc igui-oyninʉ́mga Dios ni'c i-is̈cau mayo'c milagrujat.

³⁸Inʉmgau: —¡Oyninʉmic ayé rey jeme igui-ajyu'tway el Señor, mit Dios tsajpni'cway caja-awa'n mit ijayajwat! ¡Na-oyninʉ́mga may!

³⁹Mit una̱c fariseujat jeme tsʉ̱ngaway jayau-awa'tsam inʉmgajau Jesús: —Amayipay, che'cta̱jcʉs̈ impʉctampajyat ma tis̈to'pca.

⁴⁰Mit je' ipo'ngʉs̈: —Tʉnʉmgʉs̈ap ni'c te ayʉ̱́jat tis̈to'pcap, oyáj iya̱s̈ca tsa'na'jat.

⁴¹Mit icojy Jesús tom ayé nʉ'jcopac, mit igui-is̈, je' inijʉygʉs̈ ayé jayajwat tsʉ̱ngaway Jerusalén.

⁴²Inʉm: —¡Pi jawiga-ate ni'c jinap icojy ayé s̈ʉjw pa intsʉ̱ngawa'n oy mit Dios! Po jinap ca-oyáj is̈-entendia̱tca.

⁴³Ni'c is̈mingajáj s̈ʉjwat cuandu inmutsuguijnat is̈atujcáj mit is̈apitucje̱jcáj mit jʉmgapa'tu ca-oyáj impo'jca.

⁴⁴Mit is̈vencia̱tcáj mit i-ago'jcáj nu'pʉjʉn injayajwat, mit catanáj netu'c tsa' ʉ'picway, ni'c ingapʉctsougawu cuandu Dios is̈visita̱tcau.

⁴⁵Mit itʉgʉjy Jesús templuni'c, chu̱chiu igui-acpichingʉs̈ nu'pʉjʉn jeme to'jcapay mit jeme juygapay templuni'c.

⁴⁶Inʉmgʉs̈au: —Ja'yic itsʉ̱na Dios ilibruni'c: “Tʉntʉjc nʉmic pa tu'c lugar mam na-ora̱tcawa'n”, po mijchat impʉjcap as̈am nu'mpajyat itʉjcat.

⁴⁷Mit Jesús ajque's̈ cada s̈ʉjw templuni'c, po judíujat imʉjpa̱nijat, jeme i-ajque's̈capay ley mit mʉjayajwat nʉ'jcopacni'jcatway iwangau igui-ago'jcawa'n Jesús.

⁴⁸Po ca-oyawu iguiwátcaja neti ni'c nu'pʉjʉn nʉ'jcopac jayajwat iwano'jcau iguimaraugawa'n lo que i-ajque's̈pay.