Read Sayula Popoluca San Lucas 2 Bible Online

San Lucas 2 - Sayula Popoluca bible

San Lucas 2

¹En ayé s̈ʉjwat Augusto César manda̱t pa nu'pʉjʉn jayajwat ma nija'ygu'tcʉjʉ.

²Primeru nija'ygu'tcʉjʉu cuandu itsʉ̱naj Cirenio gobernador Siriajway na̱s̈.

³Mit nu'pʉjʉn nʉs̈cau nija'ygu'jtʉpay inʉ'jcopacni'jcat.

⁴Mit José pichin en ayé nʉ'jcopac Nazaret Galileajway na̱s̈ pa inʉcs̈wa'n nʉ'jcopac Belén Judeajway na̱s̈ mam i-ijt David, ni'c José pichin David ifamiliani'c.

⁵Mit José nʉcs̈ nija'ygu'jtʉpay mit María jeme imunicʉ'pa̱jtʉ́mpay, mit María wáyajanu itsʉ̱na.

⁶Mit cuandu jem itsʉ̱ngaj, María iguicojyau s̈ʉjw pa ita'cwa'n.

⁷Mit ita̱c iprimer-wáy, icupitmo'n mit jamuc, mit icʉmda̱c mam igui-actsʉ̱́nga aníma̱jtat ni'c ca-itu laj pa je'jat mʉjtujugum.

⁸Mit en ayé na̱s̈ it borregu-cuida̱tpajyat mit i-ama̱gap i-aníma̱jtat.

⁹Mit cʉs̈ el Señor Dios i-ángel iguique's̈ta̱jcajau, mit Dios iluz iguicuta'cs̈ta̱jcau, mit je'jat ni-apʉ̱tigʉjʉu.

¹⁰Mit ayé ángel iguinʉmgajau: —Campʉ̱tcawit ni'c tʉmumingʉs̈ap tu'c namay noticia pa nu'pʉjʉn jayajwat ma ji'jca ijo̱jtat.

¹¹Ni'c jinap i-ijt David inʉ'jcopacni'c tu'c jeme is̈salva̱tcámpay, mit ayé Cristu el Señor jeme i-ajyu'tway Dios pa is̈manda̱tcáj.

¹²Pa pi jawiga ni'c iyacs̈way tʉnʉmgʉs̈apay, impa̱tcáj qui'chwáy cupitmo'nic mit jamuc, mit cʉmnap mam igui-actsʉ̱́nga aníma̱jtat.

¹³Mit de repente mit ayé ángel que's̈ta̱jcau más ángejlat tsajpni'jcatway, mit i-oyninʉmgau Dios mit inʉmgau yename:

¹⁴¡Namʉjninʉ́mga Dios yucmay! mit yam na̱s̈ni'c nepʉn magatsuguinwat, mit jayajwat ma niwangʉjʉ.

¹⁵Ipítujcanuj ayé ángejlat pa tsajpni'c, ayé borregu-cuida̱tpajyat inʉmgau je'jatu: —Jaga Belén na-e'pca lo que jatway, mit na-e'pcáj lo que el Señor nas̈actujawigaway.

¹⁶Mit je'jat nʉs̈cau junju'n mit ipa̱tcau María mit José, mit qui'chwáy cʉmnap mam igui-actsʉ̱́nga aníma̱jtat.

¹⁷Mit igui-ís̈caj, i-actujawigau nu'pʉjʉn lo que ángejlat iguinʉmgajaway, ni'c itnup ayé qui'chwáy.

¹⁸Mit nu'pʉjʉn imaraugaway nigu-épigʉjʉu ni'c we'n iguinʉ́mgaj borregu-cuida̱tpajyat.

¹⁹Po María iguarda̱t nu'pʉjʉn ayʉ̱́j cosajat ijo̱tni'c.

²⁰Mit borregu-cuida̱tpajyat pitujcanuw mit imʉjninʉmgau mit i-oyninʉmgau Dios ni'c imaraugau mit i-is̈cau nu'pʉjʉn ayé cosajat as̈am ayé ángel iguinʉmgajau.

²¹Mit i-íjtʉj ocho s̈ʉjwat, imarca̱tcau ayé qui'chwáy as̈am judíujat iguiwátcaj mit iyajcajau inʉ'jy Jesús ni'c we'n iguinʉjm Dios i-ángel ma yajcaja inʉ'jy antes iguitajnau ima̱m ijo̱jtugum.

²²Mit icumplia̱tcau ayé s̈ʉjwat pa iniprepara̱jtʉwa'n María as̈am iguinʉjm Moisés iley, mit cʉs̈ imunʉs̈cau Jesús pa Jerusalén pa iguipresenta̱tcajawa'n el Señor.

²³Iwatcau we'n ni'c ja'yic itsʉ̱na el Señor ileyni'c: “Nu'pʉjʉn qui'chwáy ijtʉ'gámpay, ayé el Señor ije'.”

²⁴Mit inʉm el Señor ileyni'c ni'c ma yajcaja pa ofrenda mechc esquibú o mechc palomawájat. Mit we'n iguiwajt María.

²⁵Mit it Jerusalén tu'c jayau inʉ'jyway Simeón, mit ayé tu'c jayau yacs̈icway mit i-adora̱t Dios, mit je' i-atsʉ̱nap hasta Dios iguisalva̱tcʉs̈wa'n Israejlatway. Mit Espíritu Santu tsʉ̱nau mit je'.

²⁶Mit je' igui-actujawiu Espíritu Santu ni'c ca-o'gáj hasta tega-e'p ayé Cristu jeme el Señor i-ajyu'támpay.

²⁷Mit Espíritu Santu iguinʉjmau ma nʉcs̈ templuni'c. Mit wejpu'n José mit María imunʉs̈cau ayé qui'chwáy Jesús pa templuni'c pa iguiwatcajawa'n as̈am iguinʉm ayé ley.

²⁸Mit Simeón ime't ayé qui'chwáy, mit i-oyninʉm Dios, inʉm:

²⁹Señor, tʉservia̱jtaway mi̱. Jinap tʉnganʉmp neti tʉ-o'cwa'n ni'c incumplia̱t lo que is̈prometia̱jtaway.

³⁰Ni'c jinap tʉn-is̈way jeme tʉs̈salva̱tcámpay.

³¹Mi̱ inajyu't je' pa iguisalva̱tcʉs̈wa'n nu'pʉjʉn jayajwat.

³²Mi̱ inactu-entendia̱tcʉs̈áj jeme caje'jatway judíujat, mit inactujawigʉs̈áj ni'c mi̱ in-oyninʉmgʉs̈ injayajwat Israejlatway.

³³Mit José mit María nigu-épigʉjʉu ni'c Simeón inʉm nat ijatwa'n ayé qui'chwáy.

³⁴Mit Simeón ibendiciona̱tcʉs̈, mit inajau María: —Marau, Dios i-ajyu't ayʉ̱́j inway, mit Israejlatway itáj jeme itunas̈cámpay por je', mit itáj jeme tsʉ̱ngámpay oy por je'. Mit Dios i-actujawigʉs̈áj jayajwat ni'c i-ajyu't iway, po majawe'naj imalninʉmgáj.

³⁵Mit wejpu'n najawigáj ti ipensa̱tcapay anu'mu nu'pʉjʉn jayajwat. Mit mi̱ tu'náj may injo̱jt.

³⁶Mit jeméy itsʉ̱naj tu'c ajchwaywáy inʉ'jyway Ana mit ite̱t inʉ'jy Fanuel, mit je' pichin Aser ifamiliani'c. Mit Ana ajchwayo'ganu, mit oyau iguinʉm ti jatámpay. Je' tsʉ̱nau mit ina'u siete s̈iwitu,

³⁷mit ochenta y cuatro s̈iwit icu-o'ctsʉ̱naj. Mit capichinu templuni'c, mit iservia̱jtau Dios tsu'm mit s̈ʉ̱m ni'c oratí̱c mit ayuna̱t.

³⁸En ayé nije'yu hora coy Ana mit inʉjmau Dios ni'ctiyu̱s̈, mit inʉmgʉs̈au nu'pʉjʉn jeme tsʉ̱ngaway jem nat ijatwa'n ayé qui'chwáy. Mit ayé jayajwat i-atsʉ̱ngapate hasta Dios iguilibra̱tcʉs̈wa'n jeme tsʉ̱ngapay Jerusalén.

³⁹Cʉs̈ iguiwátcaj nu'pʉjʉn inʉmway el Señor iley, pitujcanuw pa Galileajway na̱s̈ mam itsʉ̱na inʉ'jcopac Nazaret.

⁴⁰Mit qui'chwáy ye'c mit ipʉc maj icuerpu mit i-is̈cap may, mit Dios iguimoy favor.

⁴¹José mit María cada s̈iwit inʉ́s̈caj Jerusalén pa iguitsougawa'n ma̱s̈ʉjw pascua.

⁴²Mit i-íjtʉj Jesús doce s̈iwit, nʉs̈pʉ'ngau pa Jerusalén as̈am iguiwatí̱jcaj en ayé ma̱s̈ʉjw.

⁴³Icʉs̈ ayé ma̱s̈ʉjw, José mit María pitujcau, po ayé qui'chwáy Jesús tan Jerusalén, mit igajawigawu je'jat.

⁴⁴Mit inʉmgapayta ni'c je' mimp jayau-awa'tsam, mit yo'ygau najs̈ʉjw, po cʉs̈ ijache'ngau je' mam iminga imutʉcmay je̱wajyat mit icumpajlat.

⁴⁵Po como igapa̱tcawu, pitujcau pa Jerusalén iguiche'nga.

⁴⁶Mit imutu̱gupay s̈ʉjw ipa̱tcau Jesús templuni'c, tsʉ̱nap mit ayé i-ajque's̈capay ley, mit je' imaraugʉs̈p mit iwatcʉs̈au preguntajat.

⁴⁷Mit nu'pʉjʉn iguimaraugapay, nigu-épigʉjʉu ni'c je' i-is̈capo'cp mit oyo'gu iguipo'ngʉs̈.

⁴⁸Cuandu José mit María igui-ís̈caj, nigu-épigʉjʉu, mit ima̱m iguinʉjmau: —Tʉnwáy, ¿tini'c is̈watcau we'n? Ʉ̱ mit inte̱t tʉche'ngau hasta tu'ngap tʉnjo̱jtat.

⁴⁹Mit Jesús inʉmgʉs̈au: —¿Tini'c is̈che'ngap? ¿Ingajawigap ni'c itp ti tʉs̈wajtawa'n lo que iwampay tʉnte̱t Dios?

⁵⁰Po je'jat igajawigawu ti iguinʉmgajaway.

⁵¹Mit nʉcs̈ mit je'jat pa Nazaret, mit ijayaumaygʉs̈. Mit ima̱m iguarda̱t nu'pʉjʉn ayé cosajat ijo̱tni'c.

⁵²Mit Jesús siguia̱t igui-is̈cap más, mit yucye'c, mit Dios más iguimoy favor mit jayajwat igui-oyninʉmgawey.