Read Sayula Popoluca San Lucas 20 Bible Online

San Lucas 20 - Sayula Popoluca bible

San Lucas 20

¹En tu'c s̈ʉjw Jesús i-ajque's̈cʉs̈au nʉ'jcopac jayajwat templuni'c mit inʉmgʉs̈au ayé oyway noticia. Mit coygau judíujat imʉjpa̱nijat mit jeme i-ajque's̈capay ley mit na'waywájat,

²mit inʉmgajau Jesús: —Nʉmgajac, ¿pʉn is̈manda̱t pi wat ayʉ̱́j cosajat? mit ¿pʉn is̈moyp laj is̈watwa'n we'n?

³Mit Jesús ipo'ngʉs̈: —Ʉ̱ tʉwatcʉs̈ámpey tu'c pregunta.

⁴Nʉmgajac pʉn iguimanda̱t Juan pa inʉ'gutemwa'n, ¿Dios tsajpni'cway o jayajwat?

⁵Cʉs̈ je'jat ni-ucyo'tcʉjʉu mit inʉmgau: —Te nanʉmgap ni'c iguimanda̱t Dios tsajpni'cway, nas̈nʉmgajáj ¿Tini'cpaj is̈cacupʉ́jca?

⁶Mit te nanʉmgap ni'c iguimanda̱tcau jayajwat, nu'pʉjʉn nʉ'jcopac jayajwat nas̈pojcajáj mit tsa', ni'c je'jat inʉmgap ni'c Juan tu'c profeta i-ajyu'tway Dios.

⁷Mit ipo'ngau ni'c igajawigap pʉn iguimanda̱tp pa inʉ'gutemwa'n.

⁸Mit Jesús inʉmgʉs̈au: —Ʉ̱ tʉganʉmgʉs̈ámpey pʉn tʉs̈manda̱t pa tʉs̈watwa'n ayʉ̱́j cosajat.

⁹Mit Jesús chu̱chiu iguimucotscʉs̈ nʉ'jcopac jayajwat mit itumuquips̈ tu'c cuentu: —Tu'c jayau ini̱p tu'c uvajuc mit itumuyajcʉs̈ yos̈watpajyat mit je' nʉcs̈ yagats mit jego'c.

¹⁰Mit icojy itiempu pa iguicosecha̱tcawa'n ayé uva, i-ajyu't tu'c mozo mam itsʉ̱nga ayé yos̈watpajyat pa iguimunʉs̈cajawa'n je' iparte. Po ayé yos̈watpajyat imoyta̱jcau mit i-acpitujcau sin neti.

¹¹Mit ayé jayau i-ajyu't jatu'c mozo, mit ayé we'ney imoyta̱jcau mit i-apes̈ta̱jcau, mit i-acpitujcau sin neti.

¹²Mit i-ajyu't imutu̱gupay mozo, mit ayʉ̱́jway igolpia̱tcau mit i-acpichingau uvajugum.

¹³’Mit ayé uvajuc ijayc inʉm: “¿Ti tʉnwatáj? Tʉnajyu'táj tʉnwáy jeme tʉnwampay. Tʉs̈jawi cuandu igui-e'pcawa'n je', irespeta̱tcáj.”

¹⁴Po igui-ís̈caj ayé yos̈watpajyat, inʉmgau je'jatu: “Ayʉ̱́j ayé imutanámpay nu'pʉjʉn. Jaga na-ago'jca mit ʉjtsat napʉjcajáj lo que imutanámpay.”

¹⁵Mit i-acpichingau uvajugum mit i-ago'jcau. ’¿Tipaj iwatáj ayé uvajuc ijayc mit ayé yos̈watpajyat?

¹⁶Je' mi'náj mit i-ago'jcʉs̈áj ayé yos̈watpajyat mit i-uvajuc itumuyajcʉs̈áj jatu'jcat. We'n iguinʉjm Jesús. Cuandu ayé jayajwat iguimáraugaj we'n, inʉmgau: —¡Ne Dios magawa'n!

¹⁷Po Jesús i-is̈cʉs̈ mit inʉm: —¿Is̈jawiga ti inʉmo'jcʉp ayé tsʉ̱napay ja'yic Dios ilibruni'c? Ayé tsa' igawangaway tʉcwatpayna'jat, ayʉ̱́j ayé iyajcámpay esquinani'c pa itsʉmwa'n más.

¹⁸’Mit jeme ca'wámpay tsa' iyucuinm, totscada'gáj, mit jeme iguituca'wámpay ayé tsa', iguipichcada'gáj. Wename-ey iguijatcáj jeme tʉs̈cacupʉjcapay. Dios ijuzga̱tcʉs̈áj mʉgʉc.

¹⁹Mit judíujat imʉjpa̱nijat mit jeme i-ajque's̈capay ley ja-iche'ngajau ilaj pa igui-actangawa'n Jesús en ayé hora, ni'c ijawigau ni'c je'jat iguitu-ampiugau mit ayé cuentu, po ipʉ̱tcau nʉ'jcopac jayajwat.

²⁰Mit i-espia̱tcau, mit i-ajyu'tcau espia̱tpajyat ma niwatcʉjʉ oyjayajwat pa igui-ajca'ugawa'n Jesús mit lo que inʉmpay, mit cʉs̈wa'n iyajcáj icʉ'jugum gobernador.

²¹Mit i-ucyo'tcau Jesús: —Amayipay, tʉnjawigap ni'c inyʉmp lo que iyacs̈ta'cway mit inajque's̈p iyacs̈ta'cway mit niwe'nu is̈-e'pcʉs̈ jayajwat, mit yacs̈ic is̈ajque's̈a Dios ito̱u.

²²¿Is̈jawi oy nas̈mo'wa'n rey César tumi̱n impuestu o ca-oy?

²³Po Jesús ijawiu ni'c mañosojat, mit inʉmgʉs̈au: —¿Tini'c is̈proba̱tcap?

²⁴Actu-e'pcac tu'c tumi̱n. ¿Pʉn ayé iretratu mit inʉ'jy tsʉ̱napay ja'yic tumi̱ni'c? Mit iguipo'ngau: —Ayé rey César.

²⁵Cʉs̈ inʉmgʉs̈au: —Moyga César lo que César ije'way, mit moyga Dios lo que Dios ije'way.

²⁶Mit ca-oyawu igui-ajca'uga Jesús mit lo que inʉmpay mam iguimárauga jayajwat, po nigu-épigʉjʉu ni'c oyo'gu ipo'jn, mit nepʉn cajacotsu.

²⁷Coygau mam Jesús una̱c saduceujat, mit je'jat igacupʉjcap ni'c jutucta̱jcáj á̱nimajat, mit i-ucyo'tcau,

²⁸Amayipay, Moisés ija'y yename pa ʉjtsat nas̈watcawa'n: —Te tu'c jayau o'cp i-ajch mit te iyacp ito's̈ay po igayacp iway, ayé jayau ma nicʉ'pá̱jtʉ mit ayé to's̈ay pa ma it ya̱wájat por i-ajch magacʉs̈ ayé familia.

²⁹Mit it siete muta̱cje̱wajyat, mit jeme más ajchcópacway ipʉc ito's̈ay, mit cʉs̈ o'c, mit igayagu iway.

³⁰Mit je' iyac ito's̈ay mit ipʉgatu imajtsʉc jeme iguinatspoguipay, mit o'guey mit igayagu iway.

³¹Mit ipʉcwey tercerway mit we'ney inisietejatij ipʉjcau is̈ta'c ayé to's̈ay, o'cpʉ'ngau mit igayajcawu iwajyat.

³²Mit cʉs̈ o'guey ayé to's̈ay.

³³Ijutucta̱jcawa'n nu'pʉjʉn á̱nimajat, ¿pʉn de ayé sieteway ipʉgáj ayé to's̈ay? ni'c inisietejatij ito's̈ayjátcau.

³⁴Jesús ipo'ngʉs̈: —Jinapay jayajwat nicʉ'pa̱tcʉjʉp mit i-acnicʉ'pa̱tcʉjʉp iquis̈ajyat,

³⁵po jeme tsʉ̱ngapay pa inʉs̈cawa'n tsajpni'c cuandu ijutucta̱jcawa'n á̱nimajat, canicʉ'pa̱tcʉjʉ̱́j ne igawatcáj cʉ'pa't.

³⁶Je'jat caja-o'jcáj po tsʉ̱ngáj as̈am Dios i-ángejlat, mit je'jat Dios iwajyat ni'c je' igui-acjutucta̱jcau.

³⁷Po najawigap ni'c jutucta̱jcáj á̱nimajat ni'c we'n igui-ajque's̈ Moisés ilibruni'c cuandu Dios iguimucots zarza-awa'tsam, mit inʉm ni'c el Señor ayé iDios Abraham, iDios Isaac, mit iDios Jacob.

³⁸Dios iga-e'pcʉs̈p ayé jayajwat as̈am o'guijcatway. Je' Dios pa jeme tsʉ̱ngapnajway. Je' niwe'nu igui-e'pcʉs̈ o'guijcatway mit tsʉ̱ngapnajway.

³⁹Mit iguinʉmgajau una̱c i-ajque's̈capay ley: —Amayipay, oyo'gu impo'jn.

⁴⁰Mit pʉ̱tcau igui-ucyo'tcawa'n más.

⁴¹Mit Jesús i-ucyo'tcʉs̈: —¿Tini'c iguinʉ́mga ni'c Cristu ayé David iway?

⁴²Ni'c nije'yu David inʉm ilibruni'c los Salmos: El Señor inʉjmau tʉnSeñor: “Tsʉ̱́na tʉn-oyimaycʉ'ni'c,

⁴³hasta tʉs̈vencia̱twa'n nu'pʉjʉn inmutsuguijnat.”

⁴⁴Te David inʉjmau ni'c Cristu ayé iSeñor jeme iguimanda̱tpay, ¿natpaj iguiwayjatwa'n?

⁴⁵Mit Jesús inʉmgʉs̈au ipʉctampajyat mam nu'pʉjʉn jayajwat iguimáraugaj, inʉm:

⁴⁶—Nicuidá̱tcʉjʉ mit jeme i-ajque's̈capay ley. Je'jat iwangap iguimuyo'ygawa'n yagatsjamuc, mit iwangap jayajwat ma iguisaluda̱tcac plazani'c mit may respetu, mit iwangap pangujat más ojyatway mam i-adora̱tca judíujat, mit iwangap lugajrat más ojyatway mam iguiwátca cayna̱s̈.

⁴⁷Mit ichi'tcajap cu-o'cwájat itʉjcat mit jego'cp i-orá̱tca maganimojyʉ cuenta nepʉn ni'c we̱tpajyat. Jemni'c Dios igui-actunas̈cáj más.