Read Sayula Popoluca San Lucas 21 Bible Online

San Lucas 21 - Sayula Popoluca bible

San Lucas 21

¹Iyuc-e'jp Jesús, i-is̈ ni'c ricujat icomgap itumi̱jnat cas̈u̱ni'c mam iguiyájca ofrendapa Dios.

²Mit i-is̈ey tu'c cu-o'cwáy pro̱wijway, mit icom mechc tumi̱nwájat.

³Mit Jesús inʉm: —Iyacs̈ta'cway tʉnʉmgʉs̈ap ni'c ayʉ̱́j cu-o'cwáy icom más may que nu'pʉjʉn jayajwat, mit je' pro̱wijo'c.

⁴Ni'c nu'pʉjʉn ayé jayajwat imoygau Dios jeme igui-atangajaway, po ayʉ̱́j cu-o'cwáy majapró̱wi-aj, icombʉ'n nu'pʉjʉn jeme itucayámpay.

⁵Mit una̱c jayajwat inʉmgau ni'c oymanac ayé templu ni'c adorna̱tic mit tsa' oymanajcatway mit nu'pʉjʉn ayé cosajat iyajcaway pa ofrenda.

⁶Inʉm Jesús: —Jinap in-e'pcap nu'pʉjʉn ayé cosajat, po itáj s̈ʉjw i-actogoyda̱jcáj nu'pʉjʉn ayé, mit catanáj netu'c tsa' ʉ'picway.

⁷Mit i-ucyo'tcau: —Amayipay, ¿jutim ijatwa'n ayʉ̱́j cosajat? ¿mit ti tʉn-e'pcáj pa tʉs̈jawigawa'n ni'c jatáj ayʉ̱́j cosajat?

⁸Inʉm Jesús: —Nicuidá̱tcʉjʉ pi is̈cawe̱jta̱jcac nepʉn, ni'c mingáj mayo'c we̱tpajyat mit i-ataynʉmgáj ni'c je'jat Cristu, mit inʉmgámpey: “Tomo'ganu pa icʉs̈wa'n mundu.” Po camnatspóguiga je'jat.

⁹Is̈maraugawa'n ni'c itp tsuguin mit pʉ̱tna̱s̈, campʉ̱tcawit. Ni'c itp ti ijajtʉ'cwa'n ayé po canije' tiempu pa icʉs̈pʉ'nwa'n nu'pʉjʉn.

¹⁰Mit inʉmgʉs̈au: —Jayajwat en tu'c na̱s̈ imutsuguinwatcáj jayajwat jatu'c na̱s̈atway, mit tsuguinwatcáj rejyat.

¹¹Mit itáj us̈ mʉgʉcway, mit mayo'c lugajrat i-itwa'n yu' mit mayo'c jayajwat tu'ngʉjʉ̱́j, mit itáj pʉ̱tna̱s̈, mit i-e'pcáj milagrujat tsajpni'c.

¹²’Po antes ijatwa'n ayʉ̱́j cosajat, is̈actangáj mit is̈po'ctangáj, is̈-entrega̱tcáj mam i-adorá̱tca judíujat mit is̈comgámpey cuytujugum, mit is̈munʉs̈cáj mam rejyat mit mam gobernadojrat ni'c ʉ̱ is̈cupʉjcap.

¹³Mit jem inyʉmgáj ni'c ʉ̱ is̈cupʉjcap.

¹⁴Nʉmga ni'c ingapensa̱jtʉ'jcáj nat inyicowangʉjʉwa'n.

¹⁵Ni'c ʉ̱ tʉmoygʉs̈áj ti inyʉmgámpay mit tʉ-actujawigʉs̈áj, mit inmutsuguijnat ca-oyáj is̈majmoygap mit ca-oyáj is̈awatujcap.

¹⁶En ayé s̈ʉjwat is̈traiciona̱tcáj inte̱jtat mit in-ajchat mit inje̱wajyat mit in-amigujat, mit is̈ago'jcáj una̱c mijchat.

¹⁷Mit nu'pʉjʉn jayajwat is̈-angáj ni'c ʉ̱ is̈cupʉjcap.

¹⁸Po catogoyáj ne tu'c incuaypʉjcat.

¹⁹Te inmajmoygap is̈tunas̈ca, insalva̱tcáj imvidajat.

²⁰’Po is̈-e'pcawa'n ni'c Jerusalén tsʉ̱nap apitucje̱guic mit soldájat, jawiga ni'c coyway hora pa itogoywa'n.

²¹Wejpu'n jeme tsʉ̱ngapay Judeajway na̱s̈ ma po'jca pa copac-awa'tsam mit jeme tsʉ̱ngapay nʉ'jcopacni'jcat ma pichinga, mit jeme tsʉ̱ngapay icamni'jcat magatʉgʉyga nʉ'jcopacni'c.

²²En ayé s̈ʉjwat Dios venga̱táj pa ma cumplia̱t nu'pʉjʉn tsʉ̱napay ja'yic ilibruni'c.

²³¡Pro̱wij de ayé to's̈ajyat jeme wáyajatway mit jeme way-acye'jcapay en ayé s̈ʉjwat! ni'c itáj mʉjway pʉ̱tna̱s̈ mit Dios icastiga̱tcʉs̈áj mʉgʉc ayʉ̱́j jayajwat.

²⁴Mit itu-ago'jcáj espada, mit imunʉs̈cáj may jayajwat cutsumda'guic pa nu'pʉjʉn na̱s̈at, mit jayajwat jeme caje'jatway judíujat itutʉgʉygáj Jerusalén, mit je'jat manda̱tcáj en ayé tiempu hasta icojawa'n ayé s̈ʉjw itutsʉ̱ngámpay jem.

²⁵’Wejpu'n que's̈áj milagrujat s̈ʉuni'c, po'ni'c mit ma̱tsni'jcat, mit jayajwat na̱s̈ni'jcatway itunas̈cáj mit ni-apʉ̱tigʉjʉ̱́j ni'c cu'táj ola majatway lama̱tni'c.

²⁶Jayajwat desmaya̱tcáj ni'c pʉ̱to'jcap, mit igajawigáj ti jatáj na̱s̈ni'c, ni'c nu'pʉjʉn cosa ijtʉpay poder tsajpni'c s̈is̈cada'gáj.

²⁷Mit wejpu'n tʉs̈-e'pcáj ʉ̱ jeme tʉjatway jayau ni'c tʉmi'náj tsajpni'c mit poder mit oymanac.

²⁸Ijatcawa'n ayʉ̱́j cosajat, ma ji'jca injo̱jtat mit ca's̈ʉ'jca ni'c tomo'ganu pa inyilibra̱tcʉjʉwa'n.

²⁹Mit Jesús itumuquips̈ tu'c cuentu, inʉmgʉs̈au: —E'pca ayé higuera-cujy mit we'ney nu'pʉjʉn cujyat pa is̈jawigawa'n.

³⁰Is̈-e'pcawa'n ni'c ayawinup i-awec, injawigáj ni'c tominup s̈ʉutim.

³¹We'ney mijchat, is̈-e'pcawa'n ni'c jatnup lo que tʉnyʉmpay, pi jawiga ni'c tomo'ganu pa imanda̱twa'n Dios.

³²’Iyacs̈ta'cway tʉnʉmgʉs̈ap ni'c cani-o'jcáj jinapay jayajwat hasta ijatwa'n nu'pʉjʉn lo que tʉnyʉmway.

³³Cʉs̈áj tsajp mit na̱s̈, po tanáj pa siempre lo que tʉnyʉmpay.

³⁴’Mijchatey nicuidá̱tcʉjʉ pigawatcada̱jca lo que iyo'tpay injo̱jtat, piga-u̱ctacyo'yga, pigapensa̱tí̱jca ti inwatcámpay, pi is̈camingajac de repente ayé s̈ʉjwat.

³⁵Ni'c as̈am tu'c trampa ica'u de repente, we'ney mi'náj ayé s̈ʉjw de repente pa nu'pʉjʉn jeme tsʉ̱ngapay nu'pʉjʉn laj en ayʉ̱́j mundu.

³⁶Tsʉ̱́nga prepara̱tic mit ora̱tí̱jca pa ma oya is̈cupo'jca nu'pʉjʉn jeme jatámpay, mit ora̱tí̱jca pa i-oyawa'n intsʉ̱nga mam tʉtsʉ̱nawa'n ʉ̱ jeme tʉjatway jayau.

³⁷Mit cada s̈ʉjw Jesús i-ajque's̈ templuni'c, mit pichin tsu'm pa itsʉ̱nawa'n en ayé copac inʉ'jyway los Olivos.

³⁸Mit nu'pʉjʉn nʉ'jcopac jayajwat mingau mam je' cada jopoy pa iguimaraugawa'n templuni'c.