Read Sayula Popoluca San Lucas 22 Bible Online

San Lucas 22 - Sayula Popoluca bible

San Lucas 22

¹Mit cuandu itomij ayé ma̱s̈ʉjw pascua cuandu iguicayga ma̱s̈anʉ̱n sin levadura,

²judíujat imʉjpa̱nijat mit jeme i-ajque's̈capay ley iche'ngajau ilaj nat igui-ago'jcawa'n Jesús, ni'c ipʉ̱tcau nʉ'jcopac jayajwat.

³Mit Awayagatsna' itutʉgʉy Judas Iscariote, mit Judas tu'c ayé doce pʉctampajyat.

⁴Mit je' nʉs̈ iguimucotscʉs̈ judíujat imʉjpa̱nijat mit jeme manda̱tcapay templuni'c. Inʉmgʉs̈au nat igui-entrega̱twa'n Jesús.

⁵Mit je'jat ji'cta̱jcau ijo̱jtat mit iwatcau tu'c acuerdu ni'c imoygáj tumi̱n.

⁶Mit Judas inipo'n, mit iche'jnau ilaj nat igui-entrega̱twa'n Jesús cuandu iga-itwa'n jayau.

⁷Mit coy ayé s̈ʉjw cuandu iguicayga ma̱s̈anʉ̱n sin levadura, mit cada ma̱s̈ʉjw pascua i-ago'jcap tu'c borreguwáy.

⁸Mit Jesús i-ajyu'tcʉs̈ Pedro mit Juan, inʉmgʉs̈au: —Nʉs̈ oyájca pa nacaygawa'n en ayé ma̱s̈ʉjw pascua.

⁹Mit i-ucyo'tcau: —¿Jʉm is̈wa'n tʉs̈-oyajcawa'n?

¹⁰Jesús inʉmgʉs̈au: —Márauga, intʉgʉygawa'n nʉ'jcopacni'c, inmunipa̱tcʉjʉ̱́j tu'c jayau imunʉs̈pay tu'c majc nʉ'. Natspóguiga hasta ayé tʉjc mam itʉgʉywa'n,

¹¹mit nʉmgaja tʉ́jcajway: “Inʉmp Amayipay: ¿Jʉm i-it ayé cuartu mam tʉs̈tsowa'n ma̱s̈ʉjw pascua mit tʉmpʉctampajyat?”

¹²Cʉs̈wa'n je' is̈actu-e'pcáj tu'c mʉjway cuartu yucmay pisuni'c mit oyaguiganu. Prepará̱tca jem pa na-u̱cma̱gawa'n.

¹³Mit inʉ́s̈caj, ipa̱tcau as̈am iguinʉmgajau, mit iprepara̱tcau pa i-u̱cma̱gawa'n en ayé ma̱s̈ʉjw pascua.

¹⁴Icojy ayé hora, Jesús nitsʉ̱nda̱jcʉu me̱s̈ani'c mit ipʉctampajyat.

¹⁵Mit inʉmgʉs̈au: —¡Tʉnwano'cp tʉmucaygʉs̈wa'n en ayʉ̱́j ma̱s̈ʉjw pascua antes tʉs̈tunas̈wa'n!

¹⁶Ʉ̱ tʉnʉmgʉs̈ap ni'c tʉngajatsowáj ayʉ̱́j ma̱s̈ʉjw pascua hasta icumplia̱twa'n ayé tiempu pa imanda̱twa'n Dios.

¹⁷Mit ipʉc tu'c vasu, inʉjmau Dios ni'ctiyu̱s̈, mit inʉm: —Pʉctsóuga ayʉ̱́j vasu mit maya-ú̱jca minu'pʉjʉjnat.

¹⁸Ʉ̱ tʉnʉmgʉs̈ap ni'c tʉngaja-u'gáj vinu mit mijchat hasta icojawa'n ayé s̈ʉjw imanda̱twa'n Dios.

¹⁹Mit ipʉc ma̱s̈anʉ̱n, inʉjmau Dios ni'ctiyu̱s̈, i-emgada̱c mit imoygʉs̈, inʉm: —Ayʉ̱́j as̈am tʉncuerpu jeme tʉnyagámpay pa mijchat. Inwatcáj we'n pa is̈nijawigáj.

²⁰Icʉ́s̈caj u̱cma̱pay, ipʉc tu'c vasu vinu mit inʉm: —Ayʉ̱́j as̈am tʉnyipin pa ma it tu'c nam acuerdu, mit tʉnyipin pujʉ'gáj pa jayajwat ma tsʉ̱nga perdona̱tic nu'pʉjʉn mal iwatcaway.

²¹’Po jeme tʉs̈to'ctʉgʉyámpay tsʉ̱nap yam mit ʉ̱ me̱s̈ani'c.

²²Iyacs̈ta'cway ʉ̱ jeme tʉjatway jayau tʉs̈jatáj as̈am itsʉ̱na ja'yic Dios ilibruni'c, po ¡pro̱wij de ayé jayau jeme tʉs̈to'ctʉgʉyámpay!

²³Mit chu̱chigau ni-ucyo'jtʉpay je'jatu pʉn de je'jat iwatáj we'n.

²⁴Mit chu̱chiu iguinʉ́mga je'jatu pʉn tanáj más mʉjninʉmic.

²⁵Po Jesús inʉmgʉs̈au: —Cada nación irejyat manda̱tcap mʉgʉc, mit inʉmgap ni'c ijefejat iwatcap oy.

²⁶Po cajatáj we'n mit mijchat, ni'c jeme tsʉ̱napay más mʉjninʉmic mam mijchat, ma tan as̈am más menusway, mit jeme tanámpay jefe, itp ti je' iservia̱twa'n.

²⁷¿Is̈jawiga pʉn más oy, jeme tsʉ̱napay me̱s̈ani'c o jeme iyacpay cayan? Más oy jeme tsʉ̱napay me̱s̈ani'c. Po ʉ̱ tʉtsʉ̱nap mit mijchat as̈am tu'c mozo pa tʉservia̱tcʉs̈awa'n.

²⁸’Po mijchat is̈muyo'ygau cuandu tʉs̈tunas̈.

²⁹Mit ʉ̱ tʉyajcʉs̈áj pi manda̱tca as̈am tʉnte̱t Dios tʉs̈yac tʉmanda̱t.

³⁰Micaygáj mit mi-u̱jcáj tʉnme̱s̈ani'c mam tʉmanda̱twa'n, mit mitsʉ̱ngáj trononi'jcat mit injuzga̱tcáj ayé doce familia Israejlatway.

³¹Inʉmwey el Señor: —Marau, Simón. Awayagatsna' iyo'tway pa mijchat is̈proba̱tcáj. Je' iwamp is̈actogoygáj mijchat minu'pʉjʉjnat.

³²Po tʉnyo'jtaway Dios pa mi̱ pigadesmaya̱t incupʉc, mit intsʉ̱nawa'n más mʉgʉc mit Dios, inmajyigʉs̈áj inhermanujat.

³³Mit Pedro iguinʉjmau: —Señor, tʉtsʉ̱nap dispuestu tʉnʉs̈wa'n cuytujugum mit mi̱, mit we'ney pa tʉ-o'cwa'n.

³⁴Mit Jesús inʉjmau: —Pedro, tʉnʉjmap ni'c jinap antes i-ʉwa'n ca̱yuna', tu̱gup viaje is̈nʉmwa'n ni'c ʉ̱ is̈ca-is̈cap.

³⁵Mit Jesús inʉmgʉs̈au: —Cuandu tʉ-ajyu'tcʉs̈ sin tumi̱ncoman, sin jamucpit, mit tu'c par cʉ'ac, ¿is̈togoygau tanti? Je'jat iguinʉmgajau: Neti tʉs̈catogoygawu.

³⁶Mit inʉmgʉs̈au: Po jinap jeme ijtʉpay tumi̱ncoman, ma munʉs̈ ayé, mit ma munʉs̈ey ijamucpit. Mit jeme ca-ijtʉpay espada ma to'ctʉgʉy ima'n mit ma juy i-espada.

³⁷Ʉ̱ tʉnʉmgʉs̈ap ni'c itp ti tʉs̈jatáj jeme tsʉ̱napay ja'yic Dios ilibruni'c, inʉm: “Je' tsʉ̱nau mit maljayajwat.” Ni'c jeme tsʉ̱napay ja'yic ti tʉs̈jatámpay, itp ti icumplia̱twa'n.

³⁸Mit je'jat inʉmgau: —Señor, yam itp mechc espada. Mit inʉmgʉs̈au: —Oyu con ayé.

³⁹Ipichijn Jesús, nʉcs̈ pa ayé copac los Olivos as̈am iguiwati̱c mit iguinatspoguigawey ipʉctampajyat.

⁴⁰Icojy en ayé lugar, inʉmgʉs̈au: —Orá̱tca pi is̈catenta̱tcac.

⁴¹Mit Jesús nʉcs̈ itu'gumu tu'c distancia caje' yagatsway, mit nicos̈atenda̱jcʉu mit ora̱t.

⁴²Inʉm: —Padre, te inwamp, majyiyac pa tʉgatunas̈ ayʉ̱́j prueba tʉs̈mijnapay, po caje' as̈am ʉ̱ tʉs̈wa'n, wat as̈am mi̱ is̈wa'n.

⁴³Mit iguique's̈ta̱jcau tu'c ángel tsajpni'cway pa iguimo'áj maj.

⁴⁴Mit iguitunas̈, je' ora̱t más mʉgʉc mit i-os̈os̈ as̈am nipin tsun may na̱s̈ni'c.

⁴⁵Ica's̈ʉ'jc mam i-ora̱t, je' min mam itsʉ̱nga ipʉctampajyat mit icupa̱tigʉs̈ ma̱gap ni'c tu'ngap ijo̱jtat.

⁴⁶Mit inʉmgʉs̈au: —¿Tini'c inma̱ga? Ca's̈ʉ'jca mit orá̱tca pi is̈catenta̱tcac.

⁴⁷Mit cotspnajate Jesús, min tu'c jayaujuc mit iwejnu'pcʉs̈ap ayé jayau inʉ'jyway Judas, je' tu'c de ayé doce pʉctampajyat. Mit Judas icutomiu Jesús pa iguis̈u'cwa'n.

⁴⁸Mit Jesús inʉjmau: —Judas, ¿is̈jawi mit tu'c s̈u'c is̈to'ctʉgʉyp ʉ̱ jeme tʉjatway jayau?

⁴⁹Mit jeme tsʉ̱ngaway mit Jesús, igui-ís̈caj we'n, inʉmgajau: —Señor, ¿tʉmpʉctʉgʉygáj mit tʉn-espadajat?

⁵⁰Mit tu'c pʉctampay ipus̈au mʉjpa̱nijna' imozo, mit ipus̈tujcau i-oyimayta̱tsʉc.

⁵¹Cʉs̈ inʉm Jesús: —Oyu, camjawatca neti. Mit itsʉjcau ita̱tsʉc, mit i-ac-oytan.

⁵²Mit judíujat imʉjpa̱nijat mit jeme manda̱tcapay templuni'c mit na'waywájat mingawey pa igui-actangawa'n Jesús. Mit Jesús inʉmgʉs̈au: —¿Mimp is̈actangap mit espada mit cujy as̈am is̈actánga tu'c nu'mpay?

⁵³Cada s̈ʉjw tʉtsʉ̱́naj mit mijchat, tʉ-ajque's̈cʉs̈au templuni'c, mit ʉ̱ is̈ca-actangawu. Dios is̈moygau laj ayʉ̱́j hora pa is̈actangáj, ni'c ayʉ̱́j hora manda̱tp ma̱lwayna'.

⁵⁴Mit igui-actángaj Jesús, imunʉs̈cau tʉc mʉjpa̱nijna', mit Pedro iguinatspoguiu yagatsu.

⁵⁵Mit je'jat ino'ctsougau jʉjn es̈pu̱t pe't mit nitsʉ̱nda̱jcʉjʉu jem pa is̈amgawa'n, mit Pedro nitsʉ̱nda̱jcʉwey mit je'jat.

⁵⁶Po tu'c cocinera igui-is̈ ni'c je' tsʉ̱nap jʉn-á̱m, iga-e'pyagu, mit inʉm: —Ayʉ̱́j jayau tsʉ̱nawey mit Jesús.

⁵⁷Po Pedro inʉm ni'c ca̱j, mit inʉjmau: —Señora, tʉnga-is̈cap ayé jayau.

⁵⁸I-íjtʉj ratu, jatu'c jayau i-is̈ Pedro mit inʉjmau: —Mi̱ mitsʉ̱nawey mit Jesús ijayajwat. Mit Pedro inʉm: —Hombre, tʉgatsʉ̱nawu mit je'jat.

⁵⁹Inas̈ tu'c hora, jatu'c jayau inʉm más mʉgʉc: —Iyacs̈ta'cway ayʉ̱́j jayau tsʉ̱nawey mit je'jat, ni'c je' Galileajway.

⁶⁰Inʉm Pedro: —Hombre, tʉngajawip ti inyʉmpay. Mit po'mpnajate, ʉ̱u jaran ca̱yuna'.

⁶¹Mit i-e'jpitujc el Señor, i-is̈ Pedro, mit Pedro inijawiu ti iguinʉjmaway el Señor: “Antes i-ʉwa'n ca̱yuna', tu̱gup viaje is̈nʉmwa'n ni'c is̈ca-is̈cap.”

⁶²Mit Pedro ipichijn pe'ta̱m, jʉy mʉgʉc.

⁶³Mit ayé jayajwat i-actangaway Jesús iburla̱tcau mit imoyta̱jcau.

⁶⁴Mit iwinatujcau mit imoyta̱jcau iwindugʉtni'c mit i-ucyo'tcau, inʉm: —Acotstujcajac ¿pʉn is̈moyta̱c?

⁶⁵Mit inʉmgau japu̱t cosajat pa iguitucotscawa'n más.

⁶⁶Icus̈ʉ́wij jatu'c s̈ʉjw, ni-apʉcmujcʉjʉu na'waywájat nʉ'jcopacni'cway, mit judíujat imʉjpa̱nijat mit jeme i-ajque's̈capay ley, mit imunʉs̈cau Jesús pa yos̈tujugum mam itsʉ̱nga judíujat ijefejat, mit i-ucyo'tcau:

⁶⁷—Nʉmgajac te mi̱j ayé miCristu i-ajyu'támpay Dios. Mit je' inʉmgʉs̈au: —Te tʉnʉmgʉs̈ap, ingacupʉjcáj.

⁶⁸Mit te tʉ-ucyo'tcʉs̈p mijchat, is̈capo'ngáj ne is̈ca-acjo'ngáj.

⁶⁹Po jinap pa jʉpm ʉ̱ jeme tʉjatway jayau tʉtsʉ̱náj i-oyimaycʉ'ni'c Dios jeme ijtʉpay nu'pʉjʉn poder.

⁷⁰Inʉmgajau nu'pʉjʉn: —¿Mi̱paj is̈wáy Dios? Mit Jesús inʉmgʉs̈au: —Ʉ̱j ayé. Iyacs̈ta'cway lo que inyʉmgapay.

⁷¹Mit cʉs̈ inʉmgau: —¿Pa ti nas̈wánga más testigujat? ni'c ʉjtsatu namarauganup ti inʉmpay.