Read Sayula Popoluca San Lucas 23 Bible Online

San Lucas 23 - Sayula Popoluca bible

San Lucas 23

¹Ica's̈ʉ'jcaj nu'pʉjʉn ayé jayajwat, imunʉs̈cau Jesús pa mam itsʉ̱na Pilato.

²Mit chu̱chiu igui-acusá̱tca, inʉmgau: —Tʉmpa̱tcau ni'c ayʉ̱́j jayau iwamp igui-acchu̱chiwa'n tsuguin tʉntʉcmayna̱s̈at. Inʉmp ni'c ca-oy nas̈mo'wa'n tumi̱n impuestu rey César, mit inʉmp ni'c je' ayé Cristu, mit je' tu'c rey.

³Mit Pilato i-ucyo't Jesús: —¿Mi̱j ayé judíujat is̈rejyat? Mit iguipo'n: —Iyacs̈ta'cway lo que inyʉmpay.

⁴Mit Pilato inʉmgʉs̈au judíujat imʉjpa̱nijat mit jayajwat: —Tʉngapa̱jtap ti mal iwatway ayʉ̱́j jayau.

⁵Po je'jat inʉmgau más mʉgʉc: —Ayʉ̱́j jayau ijomigʉs̈p jayajwat ma cupʉjca i-ama̱s̈an, mit i-ajque's̈tacyo'yp nu'pʉjʉn Judeajway na̱s̈ desde Galilea hasta yam.

⁶Iguimarajw Pilato ni'c inʉ'jutcau Galilea, i-ucyo't te je' Galileajway.

⁷Mit como je' ijawiu ni'c Herodes imanda̱tp Galileajway na̱s̈, i-ajyu't Jesús pa mam itsʉ̱na Herodes ni'c je' tsʉ̱nawey Jerusalén en ayé s̈ʉjwat.

⁸Mit Herodes igui-is̈ Jesús, ji'c ijo̱jt ni'c jego'cway iwan igui-e'pwa'n, ni'c imarau ti iwatway Jesús, mit iwan igui-e'pwa'n te iwatáj tu'c milagru.

⁹Mit iwajtau may preguntajat, po Jesús igapo'nu nes̈ʉ̱n.

¹⁰Mit jemey itsʉ̱ngaj judíujat imʉjpa̱nijat mit jeme i-ajque's̈capay ley, mit i-acusa̱tcau mʉgʉc.

¹¹Herodes mit isoldájat i-apes̈cau Jesús mit iburla̱tcau, mit icutigatscau mit tu'c jamuc oymanacway, mit i-acnʉcs̈atu pa mam itsʉ̱na Pilato.

¹²Pilato mit Herodes ni-amigujátcʉjʉu en ayé s̈ʉjw, ni'c antes je'jat canipʉjcʉjʉpate.

¹³Mit Pilato i-apʉcmujcʉs̈ judíujat imʉjpa̱nijat mit autoridajat mit nʉ'jcopac jayajwat.

¹⁴Mit inʉmgʉs̈au: —Is̈mumingajau ayʉ̱́j jayau ni'c je' tsuguin-acchu̱chipay, mit je' tʉn-ucyo't mam is̈-e'pca mit tʉngapa̱jtawu te iwat ayé mal intu-acusa̱tcapay.

¹⁵Ne Herodes igapa̱jtawu-ey mal ni'c i-acpitugatu ayʉ̱́j jayau mam ʉ̱. Márauga, ayʉ̱́j jayau ca-ijtʉp causa pa i-o'cwa'n.

¹⁶Tʉncastiga̱táj, po cʉs̈wa'n tʉnacjo'náj.

¹⁷Mit en ayé ma̱s̈ʉjw Pilato yujic igui-acjo'ngʉs̈a ayé jayajwat tu'c presu jʉmay je'jat iwangámpay.

¹⁸Po nu'pʉjʉn ayé jayajwat ya̱s̈pʉ'ngau: —¡Acpíchinga ayʉ̱́j jayau ma o'c, mit acjo'ngajac Barrabás!

¹⁹Ni'c Barrabás icuytʉjcomgau ni'c i-acchu̱chiu tsuguin nʉ'jcopacni'c, mit je' tu'c ago'cpayna'.

²⁰Mit Pilato imucotscʉs̈atu ayé jayajwat, ni'c iwan igui-acjo'nwa'n Jesús.

²¹Po je'jat ya̱s̈cawatu, inʉmgau: —¡Yajca cunu̱s̈ni'c!

²²Inʉmgʉs̈au imutu̱gupay viaje: —¿Ti mal iwatway? Tʉngapa̱jtawu ti mal iwatway pa i-o'cwa'n. Tʉncastiga̱táj po cʉs̈wa'n tʉnacjo'náj.

²³Po je'jat ya̱s̈cau más mʉgʉc, mit inʉmgajau mʉgʉc ma yajca cunu̱s̈ni'c. Mit como ya̱s̈cau mʉgʉc je'jat mit judíujat imʉjpa̱nijat, i-actsʉ̱ngau lo que iwangaway.

²⁴Mit cʉs̈ Pilato inʉm ni'c ma watca as̈am iguinʉ́mga.

²⁵Mit i-acjo'n Barrabás jeme icuytʉjcomgaway ni'c i-acchu̱chip tsuguin mit ago'cpay, ni'c ayé jayajwat iyo'tcajau ma acjo'nga je'. Mit Pilato i-entrega̱t Jesús ma watcaja lo que je'jat iwangapay.

²⁶Mit imunʉs̈cau Jesús mam iguiyajcawa'n cunu̱s̈ni'c, mit i-actangau tu'c jayau inʉ'jyway Simón Cirenejway jeme minway to̱uni'c, mit i-actutsʉmájyigau Jesús mit ayé cunu̱s̈.

²⁷Mit iguinatspoguiu may jayajwat mit to's̈ajyat jeme jʉygaway, mit tu'n ijo̱jtat ni'c Jesús itunas̈.

²⁸Po Jesús i-e'jpitujc, inʉmgʉs̈au: —To's̈ajyat Jerusaléjnatway, camnijʉygac, mejor jʉ́yga cuandu is̈jatcáj tanti mijchat o inwajyat.

²⁹Ni'c mi'náj s̈ʉjwat cuandu iguinʉmgawa'n: “Tsʉ̱ngap oy jeme cani-itcʉjʉpay nunca iwajyat ne caway-acye'jcapay.”

³⁰Mit cʉs̈wa'n inʉmgajáj copacna'jat ma iguituca'ugac, mit inʉmgajáj copacwájat ma iguicutujcac.

³¹Te i-ago'jcap jeme iganiwatpay mal, itáj s̈ʉjwat más peor je'jat iguitunas̈cawa'n.

³²Mit imunʉs̈cawey mit Jesús mechc malwatpayna'jat pa igui-ago'jcawa'n.

³³Mit icóygaj en tu'c lugar inʉ'jyway Calavera, jem iguiyájcaj cunu̱s̈ni'c, mit iyajcawey icunu̱s̈ni'jcat malwatpayna'jat, tu'c i-oyim mit jatu'c i-anajyim.

³⁴Mit inʉm Jesús: —Padre, perdona̱tcʉs̈ ni'c igajawigap ti iwatcapay. Mit i-i̱jcajau apuesta ijamuc, pʉn i-actsʉ̱námpay, je' ipʉgáj.

³⁵Mit nʉ'jcopac jayajwat i-e'pcap, po judíujat ijefejat iburla̱tcau je', inʉmgau: —Isalva̱tcʉs̈ japu̱jtat, jinap ma nisalva̱jtʉ je'yu, te je' inʉmp ni'c je' ayé Cristu jeme Dios icupi̱way.

³⁶Mit soldájat iburla̱tcawey, icutomigau mit icotscajau vinagre.

³⁷Mit inʉmgau: —Te mi̱ judíujat is̈rejyat, nisalvá̱jtʉ.

³⁸Mit itwey tu'c letreru icopagá̱m, inʉm: “AYɄ̱J AYE JUDIUJAT IREJYAT.” Mit ja'yic griegu-auni'c, latín-auni'c mit hebreu-auni'c.

³⁹Mit tu'c malwatpayna' jeme tsʉ̱naway cunu̱s̈ni'c i-a̱m Jesús, chu̱chiu iguitucots, inʉm: —Te mi̱ miCristu, nisalvá̱jtʉ mi̱ mit ʉjtsat salvá̱tcaguey.

⁴⁰Mit jatu'cway malwatpayna' iguiche'cta̱c mit inʉm: —¿Ne mi̱ ingapʉ̱tp Dios, mit micondena̱tiguey?

⁴¹Iyacs̈ta'cway ʉjtsat nas̈merecia̱tcap nas̈tunas̈cawa'n. Napʉctsougap ayʉ̱́j castigu ni'c nawatcau mal, po ayʉ̱́j jayau igawatu nejʉmay mal.

⁴²Mit je' inajau Jesús: —Nijawiyac cuandu inmanda̱twa'n.

⁴³Mit iguinajau: —Iyacs̈ta'cway tʉnʉjmap ni'c jinap mismu mitsʉ̱náj mit ʉ̱ en tu'c lugar oymanacway.

⁴⁴Mit meru pu̱ts̈ʉjw cuchítimiu nu'pʉjʉn na̱s̈ hasta las tres de la tarde.

⁴⁵Mit cuchítimiu s̈ʉjw, mit cortinana' templutujugumay na̱tmo't es̈pu̱t desde yucm hasta pa'tm.

⁴⁶Mit Jesús ya̱s̈ mʉgʉc, inʉm: —Padre, tʉni-entrega̱jtʉp incʉ'jugum. Iguinʉjm we'n, o'c.

⁴⁷Cuandu ayé capitán igui-is̈ jeme jatway, i-oyninʉm Dios, inʉm: —Iyacs̈ta'cway ayʉ̱́j tu'c jayau yacs̈icway.

⁴⁸Mit nu'pʉjʉn ayé jayaujuc jeme tsʉ̱ngaway jem igui-ís̈caj jeme jatway, pitujcanuw pa nʉ'jcopacni'c mit ipas̈cau ipechujat ni'c tu'n ijo̱jtat.

⁴⁹Mit nu'pʉjʉn jeme i-is̈capcaway Jesús, mit to's̈ajyat jeme iguinatspóguigaway desde Galilea tenagau yagatsu mit i-is̈cau jeme jatway.

⁵⁰It tu'c jayau inʉ'jyway José, mit je' Arimateajway tu'c nʉ'jcopac Judeajway na̱s̈. Mit je' tu'c jefe mam judíujat, mit je' jayau oyway mit yo'y yacs̈ic.

⁵¹Mit José i-atsʉ̱napey imanda̱twa'n Dios, mit je' catsʉ̱nawu en acuerdu mit judíujat ijefejat ne igatunitʉgʉjyʉwu ayé mal iwatcaway.

⁵²Mit José nʉcs̈ mam Pilato, mit iyo'jtau Jesús icuerpu pa iguini'pwa'n.

⁵³Mit igui-acmanajc, itugupitmo'n tu'c sábana, mit icom en tu'c á̱nimacʉt jeme pactajicway tsa'ni'c, mit iganini̱pcapate nepʉn jem.

⁵⁴Mit ayé s̈ʉjw meru ituni-oyajcʉjʉpay pa iguiguarda̱tcawa'n po'cs̈ans̈ʉjw, mit cajati pa ichu̱chiwa'n ayé po'cs̈ans̈ʉjw.

⁵⁵Mit ayé to's̈ajyat jeme mingaway mit Jesús desde Galilea, inatspoguigau José mit i-is̈cau ayé á̱nimacʉt mit nat iguiyájcajaj icuerpu.

⁵⁶Mit pitujcau mit i-oyajcau perfume pa'cs̈u'cpay mit unguëntujat. Mit po'cs̈cau en ayé po'cs̈ans̈ʉjw ni'c icumplia̱tcau ayé mandamientu.