Read Sayula Popoluca San Lucas 5 Bible Online

San Lucas 5 - Sayula Popoluca bible

San Lucas 5

¹Cuandu Jesús itsʉ̱naj laguna-auni'c Genesaret, ayé jayaujuc ni-apila̱tcʉjʉu pa iguimaraugajawa'n Dios ipalabra.

²Mit Jesús i-is̈ mechc ajna'jat laguna-auni'c, mit ma̱cpajyat pichingaway mit icupujcanup itsamajcat.

³Mit Jesús tʉgʉy Simón i-ajni'c, mit inajau ma actʉgʉy s̈ʉ̱n ayé aj pa nʉ'jugum. Mit nitsʉ̱nda̱jcʉu ajni'c mit i-ajque's̈cʉs̈au jayaujuc tsʉ̱napay laguna-auni'c.

⁴Cuandu icʉs̈ cotspay, inajau Simón: —Acyo'y ajna' pa mam más ijuqui mit ca'tstʉ́gʉyga intsamajcat pa inma̱jcawa'n.

⁵Mit Simón iguipo'n: —Amayipay, najtsu' tʉyos̈wátcaj mit neti tʉnga-actangawu, po como mi̱ inyʉmp, tʉnca'tstʉgʉyáj ayʉ̱́j tsamac.

⁶Mit cuandu iguiwátcaj we'n, i-actangau tu'c acs̈juc mayway hasta ayé tsamac na̱tnupate.

⁷Mit iwatcajau seña icumpajlat tsʉ̱ngapay jatu'cway aj ma minga pa iguimajyigáj. Mit imíngaj, i-apatscau inimechquij ajna'jat mit acs̈ hasta nʉ'nʉcs̈o'jcʉjʉp ajna'jat.

⁸Igui-is̈ we'n Simón Pedro, nicos̈atenda̱jcʉu mam Jesús, mit inʉm: —Señor, ʉ̱ tʉs̈camerecia̱tp is̈cutomiyáj ni'c ʉ̱ tʉma̱lo'c.

⁹Inʉm we'n ni'c je' ni-apʉ̱tijyʉu may mit we'ney nu'pʉjʉn jeme tsʉ̱ngaway mit je', ni'c mayo'c acs̈ igui-actángaj.

¹⁰Mit we'ney ni-apʉ̱tigʉjʉu Jacobo mit Juan, Zebedeo iwajyat, ni'c je'jat Simón icumpajlat. Po Jesús inajau Simón: —Campʉ̱twit. As̈am is̈ma'c acs̈, wename-ey tʉ-actuche'ngʉs̈wa'n jayajwat pa ma tʉs̈cupʉjcac.

¹¹Mit cuandu igui-acpíchingaj ajna'jat pa laguna-auni'c, iyajcau nu'pʉjʉn, mit inatspoguigau Jesús.

¹²Cuandu Jesús itsʉ̱naj en tu'c nʉ'jcopac, min tu'c jayau ijtʉpay may lla̱gas, mit igui-is̈ Jesús, nicos̈atenda̱jcʉu mam je', mit iyo'jtau, inʉm: —Señor, te inwamp, oyap is̈ac-oytamp.

¹³Mit Jesús iyajcau icʉ', inʉjmau: —Tʉnwamp. Mi-oytanáj. Mit cʉs̈ iguitajyau jaran ayé lla̱gas.

¹⁴Mit Jesús inajau maganʉjma nepʉn. Mit inʉjmau: —Nʉs̈ actu-e'p judíujat ipa̱nijat ni'c mi-oytanway, mit yac ayé ofrenda lo que imanda̱tway Moisés, pa jayajwat ma jawiga ni'c mi-oytanway.

¹⁵Mit jayajwat más imaraugau jʉmgapa'tu lo que iwatway Jesús, mit may jayajwat nigutomigʉjʉu pa iguimaraugawa'n je' mit pa i-oytangawa'n.

¹⁶Po Jesús nʉcs̈ pa mam igatsʉ̱na nepʉn, mit jem i-ora̱jt.

¹⁷Mit tu'c s̈ʉjw cuandu Jesús i-ajque's̈, jemey itsʉ̱ngaj fariseujat mit jeme i-ajque's̈capay ley. Mit je'jat mingau nu'pʉjʉn nʉ'jcopajcat Galilea mit Judeajway na̱s̈, mit Jerusalén. Mit el Señor imoy poder Jesús ma oya i-ac-oytan.

¹⁸Mit una̱c jayajwat itsʉmdacmingau tu'c paralíticu ito'cni'c, mit iwangau iguimutʉgʉygawa'n tujugum pa iguiyajcawa'n mam itsʉ̱na Jesús.

¹⁹Po ca-oyawu iguicomga ni'c jem itsʉ̱naj mayo'c jayajwat. Mit cʉs̈ cu'tcau tʉcyucuinm mit idesteja̱tcau tu'c parte tʉjcopacni'c mit itʉydʉgʉygau mit nu'pʉjʉn ito'c, mit iyajcau es̈pu̱tum mam itsʉ̱na Jesús.

²⁰Mit igui-is̈ Jesús ni'c cupʉjcap, inajau ayé paralíticu: —Hombre, perdona̱tic itsʉ̱na nu'pʉjʉn mal inwatway.

²¹Mit jeme i-ajque's̈capay ley mit fariseujat ipensa̱tcau mal, mit inʉmgau: “¿Pʉna jayau ayʉ̱́j? Je' itucotsp Dios. ¿Pʉn oyap iguiperdona̱t ayé mal iwatcaway jayajwat? Solo Dios oyap.”

²²Po Jesús ijawiu ni'c we'n ipensa̱tca, mit inʉmgʉs̈au: —¿Tini'c is̈pensa̱tca mal injo̱tni'jcat?

²³¿Jʉmay más fácil tʉs̈nʉjmawa'n ayʉ̱́j jayau: “Perdona̱tic itsʉ̱na nu'pʉjʉn mal inwatway”, o tʉs̈nʉjmawa'n: “Ca's̈ʉ'c mit yo'y”?

²⁴Po tʉ-actujawigʉs̈áj ni'c ʉ̱ jeme tʉjatway jayau tʉnaguep derechu en ayʉ̱́j mundu pa tʉs̈perdona̱twa'n ayé mal iwatcaway jayajwat. Mit cʉs̈ inʉjmau ayé paralíticu: —Mi̱ tʉnʉjmap: Ca's̈ʉ'c, pʉc into'c mit nʉs̈ intʉcm.

²⁵Mit je' ca's̈ʉ'c jaran mam igui-e'pca nu'pʉjʉn jayajwat, mit ipʉc ayé to'c itucʉmnapay mit nʉcs̈ itʉcm, mit i-oyninʉm Dios.

²⁶Mit nigu-épigʉjʉu nu'pʉjʉn jayajwat, mit i-oyninʉmgau Dios, mit ni-apʉ̱tigʉjʉu, inʉmgau: —Jinap nas̈acnigu-épigʉjʉp ayʉ̱́j cosajat.

²⁷Mit ipichijn jem, i-is̈ tu'c que'chumpay inʉ'jyway Leví. Je' tsʉ̱nau pa̱nguni'c mam iguique'chúmga tumi̱n impuestu. Mit Jesús inajau: —Natspoguiyac.

²⁸Mit je' iyac nu'pʉjʉn, ca's̈ʉ'c mit inatspoguiu.

²⁹Mit Leví iwajtau tu'c mʉjway cayna̱s̈ itʉcm, mit may que'chumpajyat mit japu̱t jayajwat tsʉ̱ngau me̱s̈ani'c mit je'jat.

³⁰Mit jeme i-ajque's̈capay ley mit fariseujat niqueja̱tcʉjʉu mit Jesús ipʉctampajyat, inʉmgajau: —¿Tini'c is̈mucáyga mit is̈mu-ú̱jca jeme ique'chumgapay demás, mit maljayajwat?

³¹Mit Jesús ipo'ngʉs̈: —Jeme tsʉ̱ngapay oy iganesita̱tcap doctor, po jeme tu'nijatway inesita̱tcap doctor.

³²Tʉgaminu tʉs̈che'ngʉs̈ jayajwat ni-oyninʉmgʉjʉpay, tʉmín pa tʉs̈che'ngʉs̈wa'n maljayajwat ma cuyaguiga ima̱lway to̱jwat.

³³Mit je'jat inʉmgajau: —¿Tini'c Juan ipʉctampajyat ayuna̱tí̱jcap mit ora̱tcap, mit we'ney fariseujat ipʉctampajyat, po impʉctampajyat u̱jcap mit caygap?

³⁴Mit Jesús ipo'ngʉs̈: —¿Is̈jawiga oyáj is̈ac-ayuna̱tcʉs̈ jeme coygapay cʉ'pa'tni'c mientras ayé novio tsʉ̱nap mit je'jat?

³⁵Po itáj s̈ʉjw cuandu novio igajatsʉ̱nawa'n mit je'jat, mit wejpu'n ayuna̱tcájama.

³⁶Jesús inʉmgʉs̈au mechc ejemplujat pa ma jawiga ni'c magamotca ampay creencia mit ayé nam ama̱s̈an i-ajque's̈way Jesús, inʉm: —Nepʉn igatsucp tu'c pedazu nam jamuc pa iguitunapwa'n tu'c ampay jamuc. Te iwatp we'n, ayé nam jamuc i-acna̱tpichináj ayé ampay jamuc, mit caservia̱táj.

³⁷Mit nepʉn igacomp nam vinu ampay pa̱gas̈-acbolsani'c. Te iwatp we'n, timamp ayé vinu mit i-acpʉjtugáj ayé ampay bolsa mit cumuchigada'gáj ayé vinu mit togoyáj ayé bolsa.

³⁸Po nam vinu nacomp nam pa̱gas̈-acbolsani'c mit oyap nas̈guarda̱t inimechquij.

³⁹Mit nepʉn jeme i-u̱cpay ampay vinu igawa'náj nam vinu, ni'c inʉmáj ni'c más oy ampay vinu.