Read Sayula Popoluca San Lucas 8 Bible Online

San Lucas 8 - Sayula Popoluca bible

San Lucas 8

¹Mit Jesús nas̈ pa nu'pʉjʉn ciudajat mit nʉ'jcopajcat, mit i-ajque's̈tacyo'y ayé oyway noticia ni'c Dios manda̱táj. Mit imuyo'ygʉs̈ ayé doce apóstojlat jeme icupiugʉs̈way.

²Mit igui-acompaña̱tcau una̱c to's̈ajyat jeme oytangaway itcʉjʉway demo̱nyujat mit tu'nijatway. Mit yename inʉ'jyat: María jeme inʉ'jywayey Magdalena, mit je' ayé ijtʉpayate siete demo̱nyujat,

³Juana, Chuza ito's̈ay, mit je' iservia̱jtau Herodes. Mit jemey itsʉ̱naj Susana mit japu̱t to's̈ajyat jeme iservia̱tcajaway Jesús.

⁴Mit ni-apʉcmujcʉjʉu tu'c jayaujuc mayway, mit jeme tsʉ̱ngaway en cada nʉ'jcopac mingau mam Jesús itsʉ̱na, mit itumuquips̈cʉs̈au tu'c cuentu, inʉmgʉs̈au:

⁵—Tu'c ni̱payna' nʉcs̈ iguini'p trigu-semilla, mit mam iguis̈ics̈ ayé semilla, una̱c ca'ugau to̱u-auni'c, mit jayajwat itute'ní̱jcau, mit jonwájat icaygau ayé semilla.

⁶Mit ja-una̱c semilla ca'ugau tsa-awa'tsam, mit is̈ú̱mgaj, tʉ̱tscau jaran ni'c cas̈o'guic na̱s̈.

⁷Mit ja-una̱c semilla ca'ugau apit-awa'tsam, mit apitna'jat imus̈u̱mgaway igamoygawu laj pa iye'jcawa'n ayé trigu-matajat.

⁸Mit ja-una̱c semilla ca'ugau mam i-oyi na̱s̈, mit s̈u̱mgau, mit tʉmwatcau, mit tu'c semilla iyac hasta cien trigu-pu̱jwájat. Iguinʉjm we'n Jesús, imucotscʉs̈ mʉgʉc: —Jeme ijtʉpay ita̱tsʉc pa iguitumarawa'n, ma marau lo que tʉnyʉmpay.

⁹Mit ipʉctampajyat igui-ucyo'tcau: ¿Ti inʉmo'jcʉp ayʉ̱́j cuentu intumuquips̈way?

¹⁰Mit inʉm: —Dios is̈actujawigap jeme tsʉ̱naway cuyu'tsic nat imanda̱twa'n, po japu̱t jayajwat tʉnmucotscʉs̈p mit cuentujat pa ma e'pca po magajawiga ti i-e'pcapay, mit pa ma marauga po maga-entendia̱tca ti imaraugapay.

¹¹’Ayʉ̱́j ayé inʉmo'jcʉpay ayé cuentu: Ayé semilla as̈am Dios ipalabra.

¹²Ayé semilla ca'ugaway to̱u-auni'c ayé as̈am jeme imaraugapay, mit mimp jaran Awayagatsna' mit iguichi'tcajap ayé palabra ijo̱tni'jcat pa magacupʉjca mit maganisalva̱tcʉjʉ.

¹³Mit ayé semilla ca'ugaway tsa-awa'tsam ayé as̈am jeme imaraugapay mit ipʉctsougap lo que inʉmway Dios hasta ji'jcap ijo̱jtat. Po aye'jat as̈am matawájat ca-itcʉjʉpay ticchic mit icupʉjcap pa tu'c tiempujyu, mit i-itwa'n pruebajat, icuyaguigap jaran lo que inʉmway Dios.

¹⁴Mit ayé semilla ca'ugaway apit-awa'tsam ayé as̈am imaraugapay, po inʉs̈cawa'n, ipensatí̱jcap ti iwatcámpay, mit iwangap más tumi̱n, mit iwangap itsʉ̱ngawa'n feliz, mit we'n capichingap oy.

¹⁵Mit ayé semilla ca'ugaway oyna̱s̈ni'c, ayé as̈am oyjayajwat imaraugapay lo que inʉmway Dios, mit imutangap oymanac ijo̱tni'jcat. Mit imajmoygap mit calma pa iguiwatcawa'n más oy pa Dios.

¹⁶’Nepʉn igano'ctso̱p ta'cs̈an pa iguicutucwa'n mit tu'c traste, ne igayacp che's̈pa'tm, po iyacp ta'cs̈anyagani'c pa jeme tʉgʉygapay ma e'pca ayé luz.

¹⁷Ca-oyap i-it neti cuyu'tsic ni'c nu'pʉjʉn cuque's̈áj, ne ca-itámpey tu'c cosa cutuguicway ni'c itp ti nas̈-e'pwa'n nu'pʉjʉn, mit iyajcáj luzni'c pa na-e'pca.

¹⁸’Jemni'c pi marauga oy lo que tʉnyʉmpay, ni'c jeme ijawigapay may, ijawigáj más. Po te tu'c jayau niwe̱jtʉpu ni'c ijawip may, je' inijawiyo'táj nu'pʉjʉn ijawipay.

¹⁹Mit Jesús ima̱m mit imajtsʉcwájat mingau mam je' itsʉ̱na, po ca-oyawu itʉgʉyga mam je' ni'c mayo'c jayajwat itsʉ̱nga.

²⁰Mit i-ajque's̈cajau: —Inma̱m mit inmajtsʉcwájat pe'ta̱m itsʉ̱nga mit iwangap is̈-e'pcáj.

²¹Mit Jesús inʉmgʉs̈au: Jeme imaraugapay lo que inʉmpay Dios mit iwatcap we'n, ayé tʉn-e'p as̈am tʉnma̱m mit tʉnmajtsʉcwájat.

²²Mit tu'c s̈ʉjw Jesús tʉgʉy ajni'c mit ipʉctampajyat, mit inʉmgʉs̈au: —Janga pa tugalaguna-ajw. Mit nʉs̈cau.

²³Po mientras i-acyo'ygap ayé aj, Jesús ma̱p. Mit min tu'c s̈e'mtu̱ mʉgʉcway lagunani'c, mit patsnupate mit nʉ' ajna' mit tsʉ̱ngau en peligru.

²⁴Mit icutomigau Jesús mit i-acjutujcau, inʉmgajau: —¡Amayipay, natogoygap! Mit ijutujc, imanda̱t ma tentan ayé s̈e'm mit nʉ-olajat, mit tentan mit nicalma̱jtʉu.

²⁵Mit inʉmgʉs̈au: —¿Tini'c is̈cacupʉjcap? Mit je'jat ni-apʉ̱tigʉjʉu mit nigu-épigʉjʉu, mit inʉmgau je'jatu: —¿Pʉna jayau ayʉ̱́j? ni'c imanda̱tp nʉ' mit s̈e'm, mit iguijayaumaygap.

²⁶Mit coygau itʉcmayna̱s̈at Gadarajwayna'jat jeme tsʉ̱ngapay tuganʉ-ajw Galilea.

²⁷Ipichijn Jesús lagunani'c, iguimunipa̱jtʉu tu'c jayau nʉ'jcopacni'cway, mit jego'cway i-ijtʉ demo̱nyujat, mit igacomu jamuc ne ca-oyawu itsʉ̱na itʉcm, po je' yo'y campu santuni'c.

²⁸Mit ayé jayau igui-is̈ Jesús, ya̱s̈ mʉgʉc mit nicos̈atenda̱jcʉu mam Jesús mit imucots mʉgʉc: —¿Ti inwamp mit ʉ̱? Mi̱ miJesús is̈wáy Dios yucmay. Tʉyo'jtap pi is̈ca-actunas̈ac.

²⁹Inʉm we'n ni'c Jesús imanda̱t ayé demo̱nyu ma pichin mam ayé jayau. Ni'c jego'cway ayé demo̱nyu igui-actan ayé jayau, mit icutsumda̱jcau mit cadenajat icʉ'ni'jcat, mit ita'ni'jcat itutsumgau tʉps̈, po ayé jayau i-actujcʉs̈ ayé cadenajat mit ayé demo̱nyu igui-acnʉcs̈ pa mam igatsʉna nepʉn.

³⁰Mit Jesús i-ucyo't ayé jayau: —¿Nat inyʉ'jy? Mit je' inʉm: —Tʉnʉ'jy Legión. Ayé inʉmo'jcʉp ni'c tʉmayo'jcat. Inʉm we'n ni'c mayo'c demo̱nyujat iguitutʉgʉygau je'.

³¹Mit demo̱nyujat iyo'tcajau Jesús ma iguigacomgac jʉngʉtʉm.

³²Mit jem iyo'jy tu'c i̱chimjuc mayway jeme cayche'ngapay copac-auni'c, mit iyo'tcajau ma iguimoygac laj pa iguitutʉgʉygawa'n ayé í̱chijmat. Mit Jesús imoygʉs̈ laj.

³³Mit ayé demo̱nyujat pichingau de ayé jayau mit itutʉgʉygau ijo̱jtugujmat ayé í̱chijmat, mit ayé i̱chimjuc pujʉ'cmánajcau copac-auni'c mit tʉgʉygau lagunajugum, mit jem inʉ-o'jcaj.

³⁴Mit i̱chimcuida̱tpajyat igui-ís̈caj jeme jatway, po'jcau mit inʉmdacyo'ygau ciudajni'jcat mit nʉ'jcopacni'jcat.

³⁵Mit jayajwat pichingau igui-e'pca jeme jatway mit mingau mam Jesús, mit ipa̱tcau ayé jayau jeme ijtʉway demo̱nyujat, mit je' tsʉ̱nap ita'ná̱m Jesús, mit icom ijamuc, mit cajaloco. Mit je'jat ni-apʉ̱tigʉjʉu.

³⁶Mit jeme i-is̈caway, i-ampiugau nat i-oytajn ayé jayau ijtʉway demo̱nyujat.

³⁷Mit nu'pʉjʉn ayé jayajwat tsʉ̱ngaway Gadarajway na̱s̈, iyo'tcajau Jesús ma pichin mam je'jat, ni'c pʉ̱to'jcau. Mit Jesús tʉgʉy en tu'c aj mit pitucnuw.

³⁸Mit ayé jayau jeme ijtʉway demo̱nyujat, iyo'jtau Jesús ma iguimo'ac laj pa itanwa'n mit je'. Po Jesús igamoyu laj ma tan mit je', inajau:

³⁹—Nʉs̈ intʉcm mit ampiu ni'c may cosa ojyatway is̈wajtau Dios. Mit nʉcs̈ ayé jayau mit inʉmdacyo'y nu'pʉjʉn nʉ'jcopacni'jcat ni'c Jesús iguiwajtau may cosa ojyatway.

⁴⁰Cuandu ipítucnuj Jesús, iguipʉctsougau oymanac ayé jayajwat, ni'c nu'pʉjʉn i-atsʉ̱ngapate je'.

⁴¹Mit coy tu'c jayau inʉ'jyway Jairo, mit je' tsʉ̱nap encarga̱tic mam i-adora̱tca judíujat, mit nicos̈atenda̱jcʉu ita'ná̱m Jesús, mit i-imvita̱t ma nʉs̈ itʉcm,

⁴²ni'c je' ijtʉu tu'gujyu ito'chwáy mit ijtʉu como doce s̈iwit mit o'go'jcʉnup. Mit mam inʉs̈ Jesús, ayé jayajwat iguinatspoguigau mit nitsʉmada̱jcʉjʉu.

⁴³Mit iguinatspoguiwey tu'c to's̈ay tu'nijway. Je' itunas̈ doce s̈iwitanu mit nipinméj, mit igasta̱tway nu'pʉjʉn ijtʉway mit doctojrat, mit nepʉn ca-oyawu igui-ac-oytamp.

⁴⁴Mit min imugus̈á̱m Jesús mit itsʉjcau ijamuc-au-á̱m, mit oytan jaran inipinméj.

⁴⁵Mit inʉm Jesús: —¿Pʉn tʉs̈tsʉc? Mit nu'pʉjʉn inʉmgau ni'c igajawigap, mit inʉm Pedro mit jeme tsʉ̱ngaway mit je': —Amayipay, ayʉ̱́j jayajwat ni-apila̱tcʉjʉp yam mit is̈atsʉ'cs̈ta̱jcap, mit tini'c is̈nʉm: “¿Pʉn tʉs̈tsʉc?”

⁴⁶Po Jesús inʉm: —Tambʉnda tʉs̈tsʉc mit tʉnjawiu ni'c oytan jaran mit tʉmpoder.

⁴⁷Ayé to's̈ay i-is̈ ni'c nimojyʉu cuenta Jesús mit lo que iwatway, mit yarato'c imijn mit nicos̈atenda̱jcʉu ita'ná̱m Jesús, mit mam igui-e'pca nu'pʉjʉn jayajwat i-actujawiu tini'c iguitsʉ́jca mit nat i-oytajn jaran.

⁴⁸Mit Jesús inʉjmau: —Hija, mi-oytanway ni'c ʉ̱ is̈cupʉcp. Dios pi is̈munʉs̈ac.

⁴⁹Mit cotspnajate Jesús, min jaran tu'c jayau tsʉ̱napay tʉc Jairo jeme encarga̱ticway mam i-adora̱tca judíujat, mit inʉjmau Jairo: —O'cnuway into'chwáy, camjamolesta̱t Amayipay.

⁵⁰Iguimarajw Jesús, inʉm: —Campʉ̱twit, cupʉgagu mit oytanáj into'chwáy.

⁵¹Mit itʉgʉjy tujugum, igamoyu laj ma tʉgʉy nepʉn, solo tʉgʉygau Pedro, Jacobo, Juan, ite̱t mit ima̱m ayé to'chwáy.

⁵²Mit nu'pʉjʉn ayé jayajwat inijʉygau ayé to'chwáy. Po Jesús inʉmgʉs̈au: —Camjajʉyga ni'c ca-o'guic ayʉ̱́j to'chwáy, ma̱pujyu.

⁵³Mit ayé jayajwat iguitus̈i̱jcau je', ni'c ijawigap ni'c o'guiganu itsʉ̱na.

⁵⁴Po Jesús igui-actájna icʉ' to'chwáy, imucots mʉgʉc: —To'ch, ca's̈ʉ'c.

⁵⁵Mit je' jutucta̱c mit ca's̈ʉ'c jaran. Mit Jesús manda̱t ma moyga ma cay.

⁵⁶Mit ima̱m mit ite̱t nigu-épigʉjʉu, po Jesús imanda̱tcʉs̈ maganʉmgaja nepʉn jeme jatway.