Read Sayula Popoluca San Juan 1 Bible Online

San Juan 1 - Sayula Popoluca bible

San Juan 1

¹Antes ichu̱chij ayʉ̱́j mundu tsʉ̱nau ayé Palabra nas̈actu-is̈capcapay Dios, mit ayé Palabra tsʉ̱nau mit Dios, mit ayé Palabra nije'yu Dios.

²Je' tsʉ̱nau mit Dios antes ichu̱chij ayʉ̱́j mundu.

³Je' iwat nu'pʉjʉn cosajat, mit ca-itpate neti te je' igawatp nu'pʉjʉn itpay.

⁴Je' ayé iyacpay vida, mit je' nas̈moygap vida, mit iyacpey luz pa jayajwat ma e'pca.

⁵Ayé luz ta'cs̈p chitimicni'c, mit ayé chitimic iga-acpi'chu ayé luz.

⁶It tu'c jayau i-ajyu'tway Dios, mit ayé jayau inʉ'jy Juan.

⁷Ayé jayau min as̈am testigu pa nas̈actu-is̈capcáj jeme nas̈moygapay luz, pa nu'pʉjʉn jayajwat ma cupʉjca ayé luz, ni'c we'n iguinʉm Juan.

⁸Mit Juan caje' je' iyacp luz, po je' min pa nas̈actu-is̈capcáj jeme nas̈moygapay luz.

⁹Ayé jeme nas̈moygapay luz iyacs̈ta'cway min en ayʉ̱́j mundu, mit ayé iyacp luz pa nu'pʉjʉn jayajwat.

¹⁰Je' tsʉ̱nau en ayʉ̱́j mundu, mit je' iwat ayʉ̱́j mundu, po jayajwat ayʉ̱́j mundujway iga-is̈capcawu je'.

¹¹Je' min en ayʉ̱́j mundu jeme je' iwatway, mit jayajwat ayʉ̱́j mundujway igapʉctsougawu je'.

¹²Po nu'pʉjʉn iguipʉctsougaway je', mit nu'pʉjʉn iguicupʉjcapay, imoygʉs̈ derechu pa ijatcawa'n Dios iwajyat.

¹³Ni'c Dios igawayjatcʉs̈u as̈am ite̱jtat iguiwatcap, ne caje' as̈am jayajwat iguiwánga, ne caje' as̈am iguipensa̱tca, po solo Dios iwayjatcʉs̈p.

¹⁴Mit ayé Palabra jat jayau, mit tsʉ̱nau mit ʉjtsat. Mit tʉn-is̈cau ni'c je' mʉjninʉmic, ni'c je' Dios iway tu'gujyuway, mit igui-ajyu't ite̱t Dios. Mit je' iyacp may favor, mit je' ayé iyacs̈ta'cway.

¹⁵Juan iyac testimonio pa na-is̈cápca je', mit je' cots mʉgʉc, inʉm: —Ayʉ̱́j ayé jeme tʉnʉmgʉs̈away: Jeme mimpay tʉnmugus̈á̱m je' más ijtʉp poder que ʉ̱, ni'c je' ijtʉ'c que ʉ̱.

¹⁶Je' ijtʉp nu'pʉjʉn, mit nas̈yajcajau pa nanu'pʉjʉjnat, mit nas̈moyí̱jcap may favor.

¹⁷Ni'c Moisés iyac ley, po Jesucristu iyac favor mit iyac lo que iyacs̈ta'cway.

¹⁸Nepʉn igani-e'p Dios, po iway tu'gujyuway jeme más iwampay Dios Nate̱jat, je' nas̈actu-is̈capcau.

¹⁹Judíujat i-ajyu'tcau imʉjpa̱nijat mit levitajat, ayé jeme majyigapay templuni'c. Je'jat mingau desde Jerusalén, mit i-ucyo'tcau Juan: ¿Mipʉn mi̱?

²⁰Juan inʉm iyacs̈ta'cway, mit iganega̱tu, po inʉm: —Ʉ̱ tʉgaje' ayé Cristu i-ajyu'tway Dios.

²¹Mit i-ucyo'tcau: —¿Mipʉmpaj mi̱? ¿Mi̱j ayé profeta Elías? Je' ipo'n: —Tʉgaje'. I-ucyo'tcawatu: —¿Mi̱j ayé profeta mi'námpay? Mit Juan po'n ni'c ca̱j.

²²Mit inʉmgajau: —¿Mipʉmpaj mi̱? pa tʉs̈nʉmgajawa'n ayé tʉs̈ajyu'tcaway. ¿Ti inyʉmp pa tʉjáwiga mipʉn mi̱?

²³Je' inʉm: —Ʉ̱ tʉnyʉmdacyo'yp mam igatsʉ̱na nepʉn: “Acyács̈ca tu'c to̱u pa el Señor”, as̈am iguinʉjm ayé profeta Isaías.

²⁴Mit jeme oygaway igui-ucyo'tcaj, igui-ajyu'tcau fariseujat.

²⁵Mit i-ucyo'tcau: —¿Tini'cpaj inyʉ'gutem te migaje' Cristu i-ajyu'tway Dios, ne profeta Elías, ne ayé profeta mi'námpay?

²⁶Juan ipo'ngʉs̈: —Ʉ̱ tʉnʉ'gutemp mit nʉ', po tsʉ̱nap mam mijchat tu'c jayau jeme inga-is̈capcapay.

²⁷Ayʉ̱́j ayé jeme mimpay tʉnmugus̈á̱m, mit je' más ijtʉp poder que ʉ̱, mit tʉs̈camerecia̱tp tʉs̈quejawa'n icʉ'acbulin.

²⁸Ayʉ̱́j cosajat jat Betábara tuganʉ-ájw Jordán mam Juan inʉ'gutejm.

²⁹Icus̈ʉwij jatu'c s̈ʉjw Juan i-is̈ ni'c Jesús mimp mam je', mit Juan inʉm: —E'pca ayʉ̱́j borreguwáy i-ajyu'tway Dios, ni'c je' ichi'tcʉs̈ap ima̱jlat jayajwat ayʉ̱́j mundujway.

³⁰Ayʉ̱́j ayé jeme tʉnʉmgʉs̈away: “Mi'náj tʉnmugus̈á̱m tu'c jayau, mit je' más ijtʉp poder que ʉ̱, ni'c je' ijtʉ'c que ʉ̱.”

³¹Mit ne ʉ̱ tʉnga-is̈capate, po jemni'c tʉmijn nʉ'gutempay mit nʉ' pa Israejlatway ma is̈capca je'.

³²Mit Juan i-actujawigʉs̈, inʉm: —Tʉn-is̈ Espíritu Santu imanajc tsajpni'c as̈am paloma, mit ayé tan iyucuinm.

³³Mit tʉnga-is̈capate, po Dios jeme tʉs̈ajyu'tway tʉnʉ'gutem mit nʉ', je' tʉs̈najau: “Pʉn in-e'pámpay iguimanajcap Espíritu Santu mit iguitajnap iyucuinm, jemé ayé imoygʉs̈ámpay Espíritu Santu.”

³⁴Mit ʉ̱ tʉn-is̈, mit tʉ-actujawigʉs̈p ni'c ayʉ̱́j ayé Dios iway.

³⁵Icus̈ʉwij jatu'c s̈ʉjw Juan tsʉ̱nawatu mit mechc ipʉctampajyat.

³⁶Mit igui-is̈ ni'c jem iyo'y Jesús, inʉm: —E'pca ayé borreguwáy i-ajyu'tway Dios.

³⁷Ayé mechc pʉctampajyat iguimáraugaj we'n, inatspoguigau Jesús.

³⁸I-e'jpitujc Jesús, mit igui-is̈ ni'c iguinatspoguigap, inʉmgʉs̈au: —¿Ti inwangap? Je'jat iguinʉmgajau: —Amayipay, ¿jʉm intsʉ̱na?

³⁹Inʉmgʉs̈au: —Mínga mit e'pca. Je'jat nʉs̈cau, mit i-is̈cau mam itsʉ̱na, mit imutangau je' ayé s̈ʉjw ni'c ayé hora como las cuatro de la tarde.

⁴⁰Mechc jayajwat imaraugau Juan mit inatspoguigau Jesús. Tu'c de je'jat inʉ'jy Andrés, Simón Pedro i-ajch.

⁴¹Mit Andrés iguipa̱jt imajtsʉc Simón, inajau: —Tʉmpa̱tcaway ayé Mesías, ayé inʉmo'jcʉp Cristu i-ajyu'tway Dios.

⁴²Mit cʉs̈ Andrés imunʉcs̈ Simón mam itsʉ̱na Jesús. Igui-is̈ Jesús, inʉjmau: —Mi̱j ayé Simón, Jonás iway, mit tʉyajcáj inyʉ'jy Cefas, ayʉ̱́j inʉmo'jcʉp Pedro.

⁴³Icus̈ʉwij jatu'c s̈ʉjw Jesús iwan inʉs̈wa'n Galilea, mit ipa̱t Felipe, mit inʉjmau: —Natspoguiyac.

⁴⁴Mit Felipe Betsaidajway inʉ'jcopac Andrés mit Pedro.

⁴⁵Felipe ipa̱t Natanael, mit inajau: —Tʉmpa̱tcaway ayé jayau jeme ija'yway Moisés Dios ilibruni'c, mit profetajat ija'ygawey de je'. Ayé Jesús, José iway, mit je' Nazaretway.

⁴⁶Natanael iguinʉjmau: —¿Is̈jawi oyap ipichin Nazaret tu'c cosa oyway? Felipe inʉjmau: —Mi'n e'p.

⁴⁷Igui-is̈ Jesús ni'c iguicutomip Natanael, inʉjmau nat itsʉ̱na je', inʉm: —E'pca tu'c Israelway jeme i-adora̱tpay Dios iyacs̈ta'cway, mit je' cawe̱tp.

⁴⁸Iguinʉjmau Natanael: —¿Nat is̈-is̈cap ʉ̱? Jesús ipo'n: —Antes is̈ya̱s̈ Felipe, cuandu intsʉ̱naj higuera-pa'tcʉm, tʉ-is̈.

⁴⁹Natanael ipo'n: —Amayipay, mi̱j ayé Dios is̈wáy, mi̱ inmanda̱táj Israelway jayajwat.

⁵⁰Jesús ipo'n: ¿Ni'c tʉnajau tʉ-is̈ higuera-pa'tcʉm, is̈cupʉcp? In-e'páj cosa más oymanajcatway.

⁵¹Mit inʉm: —Iyacs̈ta'cway tʉnʉmgʉs̈ap ni'c jinap pa jʉpm in-e'pcáj tsajp awa'tsic, mit in-e'pcáj Dios i-ángejlat mam icu'tca mit imanajca tʉnyucuinm ʉ̱ jeme tʉjatway jayau.