Read Sayula Popoluca San Juan 11 Bible Online

San Juan 11 - Sayula Popoluca bible

San Juan 11

¹Mit wenajpu'n tsʉ̱nau tu'nij tu'c jayau inʉ'jy Lázaro Betaniajway inʉ'jcopacni'jcat María mit ije̱way Marta.

²Mit María jemé ijajtsaway perfume el Señor mit i-actʉ̱jtsaway ita'jnat mit icuajy. Je' ijtʉu ije̱way inʉ'jy Lázaro mit tu'nij itsʉ̱naj.

³Mit Lázaro ije̱wajyat i-ajyu'tcajau razón Jesús ma nʉmgaja: —Señor, tu'nij itsʉ̱na ayé jeme inwano'cpay.

⁴Iguimarajw Jesús, inʉm: —Ayʉ̱́j enfermedaj caje' pa igui-ago'gáj po iguijat we'n pa Dios ma tsʉ̱na mʉjninʉmic, mit we'ney iway ma tsʉ̱na mʉjninʉmic. Jemni'c itu'jnʉj.

⁵Mit Jesús imuniwangʉs̈ʉu Lázaro, Marta mit María.

⁶Po iguimarajw ni'c tu'nij itsʉ̱na, je' tan jamechc s̈ʉjw en ayé lugar mam itsʉ̱na.

⁷Mit cʉs̈ inʉmgʉs̈au ipʉctampajyat: —Jaga-atu Judeajway na̱s̈.

⁸Iguinʉmgajau ipʉctampajyat: —Amayipay, jinapo'cnaj is̈che'ngau judíujat pa is̈pojcajáj mit tsa', ¿mit minʉs̈ájatu jem?

⁹Jesús ipo'ngʉs̈: —Ca-oyap tʉs̈watcajap neti. ¿Caje' doce hora ijec tu'c s̈ʉjw? Mit jeme yo'ypay s̈ʉ̱m cacunepip ni'c oyap i-e'p ni'c s̈ʉjw ita'cs̈cʉs̈p jayajwat ayʉ̱́j mundujway.

¹⁰Po jeme yo'ypay tsu'm, cunepip ni'c yo'yp chitimicni'c.

¹¹Iguinʉjm we'n, cʉs̈ inʉmgʉs̈awatu: Lázaro na-amigujat ma̱p, po nʉs̈áj tʉs̈acjutuc.

¹²Cʉs̈ iguinʉmgajau ipʉctampajyat: —Señor, te ma̱p, oytanáj.

¹³Po Jesús inʉm we'n ni'c o'guic itsʉ̱na Lázaro, mit je'jat inʉmgapayta ni'c inʉm ni'c ma̱p pa ipo'cs̈wa'n.

¹⁴Cʉs̈ Jesús inʉmgʉs̈au pa ma jawiga, inʉm: —Lázaro o'cway,

¹⁵mit ji'cp tʉnjo̱jt ni'c tʉgatsʉ̱nawu jem, ni'c más is̈cupʉjcáj. Jinap jaga mam je'.

¹⁶Cʉs̈ inʉm Tomás inʉ'jywayey Gemelo, inʉmgʉs̈au imupʉctampayje̱wajyat: —Jaga-ey ʉjtsat pa na-o'jca mit je'.

¹⁷Cʉs̈ icojy Jesús, ipa̱t ni'c cuatro s̈ʉjwanu Lázaro itsʉ̱na á̱nimacʉtʉm.

¹⁸Mit Betania tomo'c Jerusalén, como tres kilómetro i-ijtʉ.

¹⁹Mit mayo'c judíujat imíngaj mam itsʉ̱nga Marta mit María pa iguiconsola̱tcawa'n ni'c o'guic ije̱way.

²⁰Cʉs̈ Marta iguimarajw ni'c mimp Jesús, pichin pa iguipa̱jtsowa'n, po María tan itʉcmat.

²¹Mit Marta inajau Jesús: —Señor, ingatsʉ̱́naj yam, ca-o'cpate tʉnje̱way.

²²Po jinap tʉnjawip ni'c nu'pʉjʉn inyo'jtámpay Dios, Dios is̈mo'áj.

²³Jesús inʉjmau: —Inje̱way jutucta'gáj.

²⁴Po Marta iguinʉjmau: —Tʉnjawip ni'c jutucta'gáj po hasta últimu s̈ʉjw ijutucta̱jcawa'n á̱nimajat.

²⁵Po Jesús inʉjmau: —Ʉ̱j ayé tʉnacjutucta̱jcʉs̈pay á̱nimajat mit tʉnmoygʉs̈p vida. Jeme tʉs̈cupʉgámpay ʉ̱j, maja i-o'cwa'naj jutucta'gáj.

²⁶Mit nu'pʉjʉn jeme tsʉ̱napnajway mit tʉs̈cupʉcp, ca-o'gáj nunca. ¿Incupʉcp ayʉ̱́j?

²⁷Iguinʉjmau: —Jo̱, Señor, tʉncupʉcp ni'c mi̱j ayé miCristu Dios iway, mit minʉmic pa inmi'nwa'n en ayʉ̱́j mundu.

²⁸Cʉs̈ iguinʉjm we'n, nʉcs̈ mit iya̱s̈ ije̱way María, inajau anu'mu: —Yam itsʉ̱na Amayipay mit is̈ya̱s̈p.

²⁹Iguimarajw we'n María, ca's̈ʉ'c jaran mit min iguipa't.

³⁰Mit Jesús canicoyp nʉ'jcopacni'c, po tsʉ̱naunaj en ayé lugar mam iguipa̱t Marta.

³¹Cʉs̈ judíujat tsʉ̱ngaway itʉcm pa iguiconsola̱tcáj, igui-ís̈caj ni'c María ca's̈ʉ'c jaran mit pichin, inatspoguigau ni'c inʉmgapayta ni'c nʉs̈p mam ini'pigui ije̱way pa Iguinijʉ'wa'n.

³²Icojy María mam itsʉ̱na Jesús, igui-is̈, nicos̈atenda̱jcʉu ita'n-á̱m, inʉjmau: —Señor, ingatsʉ̱́naj yam, ca-o'cpate tʉnje̱way.

³³Cʉs̈ Jesús igui-is̈ ni'c jʉyp, mit jʉygapey judíujat jeme iguicumpaljátcapay, je' s̈ajtogojyʉu mʉgʉc ijo̱jtugum mit tu'n ijo̱jt.

³⁴Mit inʉmgʉs̈au: —¿Jʉm is̈comga je'? Mit iguinʉmgajau: Señor, mi'n e'p.

³⁵Mit Jesús jʉy.

³⁶Cʉs̈ inʉmgau judíujat: —¡E'pca ni'c iwano'cp Lázaro!

³⁷Mit una̱c je'jat inʉmgau: —Ayʉ̱́j ayé i-ac-e'pta̱cway ayé winch. ¿Is̈jawiga ca-oyapate-ey iguimajyi Lázaro maga-o'c?

³⁸Mit Jesús tu'no'gatu ijo̱jt, min mam i-it ayé á̱nimacʉt. Ayé tu'c cʉt pactajicway, mit tu'c mʉjway tsa' itu-atujcau.

³⁹Inʉm Jesús: —Chi'tca ayé tsa'. Po Marta jeme o'cway ije̱way, iguinʉjmau: —Señor, s̈u'cnup ni'c ijtʉnup cuatro s̈ʉjw i-o'jc.

⁴⁰Jesús inʉjmau: —¿Tʉganajap ni'c te incupʉcp, in-e'páj nat Dios itsʉ̱na mʉjninʉmic?

⁴¹Cʉs̈ ichi'tcau ayé tsa' itu-atujcaway mam itsʉ̱naj á̱nima. Mit Jesús iyuc-e'jp pa yucm, inʉm: —Padre, tʉnʉjmap ni'ctiyu̱s̈ ni'c is̈maraway.

⁴²Ʉ̱ tʉnjawip ni'c is̈marawí̱cp, po tʉnyʉm we'n pa ma marauga ayʉ̱́j jayajwat tsʉ̱ngapay yam, pa ma cupʉjca ni'c mi̱ is̈ajyu't.

⁴³Mit iguinʉjm we'n, cots mʉgʉc mit inʉm: —¡Lázaro, pichin pe'ta̱m!

⁴⁴Cʉs̈ jeme o'guicwayate pichin, mit tsumic icʉ' mit ita'n mit venda, mit iwindugʉt cutucmo'nic mit jamuc. Jesús inʉmgʉs̈au: —Quéjca mit tsac ma nʉcs̈.

⁴⁵Cʉs̈ mayo'c judíujat jeme mingaway pa iguicumpaljatcawa'n María, igui-ís̈caj lo que iwatway Jesús, icupʉjcau je'.

⁴⁶Po ja-una̱c je'jat nʉs̈cau mam itsʉ̱nga fariseujat mit inʉmgajau lo que iwatway Jesús.

⁴⁷Mit judíujat imʉjpa̱nijat mit fariseujat ni-apʉcmujcʉjʉu mit judíujat ijefejat, inʉmgau: —¿Ti nawatcáj? ni'c ayé Jesús mayo'ganu milagru iguiwat.

⁴⁸Te namoygap laj ma siguia̱t, nu'pʉjʉn jayau icupʉjcáj je', mit mingáj Romajatway, mit i-actogoyda̱jcáj natemplujat mam na-adora̱tca mit nanʉs̈cáj s̈is̈cada'guic.

⁴⁹Cʉs̈ Caifás tsʉ̱nau mit je'jat, mit je' mʉjpa̱nij ayé s̈iwit, inʉmgʉs̈au: —Mijchat ingajawigap ayʉ̱́j asuntu.

⁵⁰Ne ingajawigap ni'c más oy pa ʉjtsat tu'c jayau ma o'c mit caje' nu'pʉjʉn itogoygawa'n. We'n iguinʉjm Caifás.

⁵¹Mit ayé inʉmway, ayé caje' je'yu ipensa̱t, po como je' mʉjpa̱nij ayé s̈iwit, jemni'c Dios igui-actunʉm jeme jatámpay, ni'c Jesús o'gáj pa nu'pʉjʉn Israelway jayajwat,

⁵²mit je' o'c caje'yu pa Israelway jayajwat, po we'ney je' o'c pa nu'pʉjʉn jayajwat iguicupʉjcámpay, mit jatcáj as̈am tu'gu jeme Dios iwayjatcʉs̈ámpay, jeme tsʉ̱ngapay s̈is̈cada'guic.

⁵³Mit cʉs̈ judíujat ijefejat desde ayé s̈ʉjw ni-acochigʉjʉu pa igui-ago'jcawa'n Jesús.

⁵⁴Jemni'c Jesús cajayo'yu mam igui-e'pcáj judíujat, po pichin jem mit nʉcs̈ en tu'c nʉ'jcopac inʉ'jyway Efraín, mit jem itajn mit ipʉctampajyat, mit yajyʉ'n de ayé nʉ'jcopac ca-itu tʉjcat.

⁵⁵Mit tomo'c ayé ma̱s̈ʉjw pascua itsowí̱jcapay judíujat, mit mayo'c jayau ayé lajatway nʉs̈cau pa Jerusalén antes de ayé ma̱s̈ʉjw pa inilimpia̱tcʉjʉwa'n as̈am igui-acostumbrá̱tcaj.

⁵⁶Mit iche'ngau Jesús, mit jeme tsʉ̱ngaway templuni'c ni-ucyo'tcʉjʉu je'jatu: —¿Nat is̈jawiga? ¿Cami'námpa'p ma̱s̈ʉuni'c?

⁵⁷Mit judíujat imʉjpa̱nijat mit fariseujat iyajcau orden ni'c te tambʉn ijai am itsʉ̱na Jesús, ma ajquigui-actangawa'n.