Read Sayula Popoluca San Juan 13 Bible Online

San Juan 13 - Sayula Popoluca bible

San Juan 13

¹Antes icojy ayé ma̱s̈ʉjw pascua, ijawiu Jesús ni'c iguicojyanup ihora pa ipichinwa'n en ayʉ̱́j mundu pa inʉs̈wa'n tsajpni'c mam itsʉ̱na ite̱t Dios, po como iwano'jcʉs̈ ijayau imuyo'ygʉs̈way en ayʉ̱́j mundu, iwangʉs̈ pa nu'pʉjʉn tiempu.

²Cuandu i-u̱cma̱ga, Awayagatsna' i-acochiu Judas, Simón Iscariote iway, ma to'ctʉgʉy Jesús.

³Ijawiu Jesús ni'c ite̱t Dios iguiyajcau nu'pʉjʉn cosajat icʉ'jugum, mit ijawiwey ni'c pichin mam Dios mit pitucnú̱jatu mam Dios.

⁴Cʉs̈ ca's̈ʉ'c mam i-u̱cma̱ga, ichi't iyagatsjamuc icompay iyucuinm, mit ipʉguey tu'c toalla, itutsum ipi̱nic.

⁵Cʉs̈ icom nʉ' tuguchimni'c, mit chu̱chiu iguicupujcʉ́s̈a ita'jnat ipʉctampajyat, mit i-actʉ̱tscʉs̈au mit ayé toalla itunitsujmʉway ipi̱nicni'c.

⁶Cʉs̈ min mam Simón Pedro, mit Pedro iguinʉjmau: —Señor, ¿mi̱ is̈cupujá̱j tʉnta'n?

⁷Jesús ipo'n: —Jeme ʉ̱ tʉnwatpay, mi̱ ingajawip jinap, po injawiyáj más pa jʉpm.

⁸Pedro iguinʉjmau: —Tʉgamo'áj laj is̈cupujá̱j tʉnta'n. Jesús ipo'n: —Te tʉgacupujap, inga-aguepáj parte mit ʉ̱j.

⁹Iguinʉjmau Simón Pedro: —Señor, caje'yu tʉnta'n is̈cupujá̱j, po we'ney tʉncʉ'jat mit tʉncopac.

¹⁰Jesús inʉjmau: —Jeme yo'ypay chi'wic, ma cupuj ita'jnatu pa itsʉ̱nawa'n bien limpiu. Mit mijchat mitsʉ̱nganupey limpiu injo̱tni'jcat, po caje' minu'pʉjʉjnat.

¹¹Ni'c ijawiu pʉn iguito'ctʉgʉyámpay, jemni'c iguinʉjm: “Migatsʉ̱ngap limpiu minu'pʉjʉjnat.”

¹²Mit cʉs̈ iguicupujcʉ́s̈aj ita'jnat, icomnuwatu iyagatsjamuc, mit nitsʉ̱nda̱jcʉwatu me̱s̈ani'c, mit inʉmgʉs̈au: —¿Injawigap ti tʉwatcʉs̈away?

¹³Mijchat inyʉmgap ni'c ʉ̱ tʉ-ajque's̈cʉs̈ap mit tʉmanda̱tcʉs̈pey. Oyo'gu is̈nʉmga ni'c ayé iyacs̈ta'cway.

¹⁴Po te ʉ̱ tʉmanda̱tpay mit tʉ-ajque's̈pay, e'pca ni'c tʉcupujcʉs̈au inta'jnat. Jinap we'ney mijchat wátca pa inyiservia̱tcʉjʉwa'n.

¹⁵Ni'c tʉyajcʉs̈away ejemplu, pa pi watca as̈am ʉ̱ tʉwatcʉ́s̈a.

¹⁶Iyacs̈ta'cway tʉnʉmgʉs̈ap ni'c tu'c jeme majyipay ca-oyap iguicʉ'nas̈ ijayc, ne tu'c ajyu'ticway ca-oyapey iguicʉ'nas̈ jeme igui-ajyu'tway.

¹⁷Te injawigap ayʉ̱́j cosajat, mitsʉ̱ngáj oy te inwatcap.

¹⁸’Tʉnganʉmp ayʉ̱́j pa minu'pʉjʉjnat ni'c tʉnjawip pʉn tʉncupiugʉs̈way, po tʉnyʉmp pa ma cumplia̱t tsʉ̱napay ja'yic Dios ilibruni'c: “Jeme icayway ma̱s̈anʉ̱n mit ʉ̱, tʉs̈traiciona̱táj.”

¹⁹Jinap tʉnʉmgʉs̈ap antes ijatwa'n, pa cuandu ijatwa'n, incupʉjcáj ni'c Dios tʉs̈ajyu't.

²⁰Iyacs̈ta'cway tʉnʉmgʉs̈ap: Jeme ipʉctsowámpay pʉn tʉnajyu'támpay, casi ʉ̱ tʉs̈pʉctso̱p. Mit jeme tʉs̈pʉctso̱pay ʉ̱, ipʉctso̱pey jeme tʉs̈ajyu'tway.

²¹Iguinʉjm we'n Jesús, tu'no'c ijo̱jt, i-actujawigʉs̈, inʉm: —Iyacs̈ta'cway tʉnʉmgʉs̈ap ni'c tu'c jayau tsʉ̱napay mit mijchat tʉs̈to'ctʉgʉyáj.

²²Cʉs̈ ipʉctampajyat ni-e'padá̱jcʉjʉu ni'c igajawigawu pʉn inʉjmap.

²³Mit tu'c ipʉctampay jeme Jesús iwano'cpay tsʉ̱nau tomo'c mit Jesús.

²⁴Mit ayʉ̱́jway iguiwajtau seña Simón Pedro pa ma ucyo't Jesús pʉn ayé inʉjmapay.

²⁵Cʉs̈ ayé jeme tsʉ̱naway tom mit Jesús, inʉjmau: —Señor, ¿pʉn ayé inyʉjmapay?

²⁶Jesús ipo'n: —Pʉn tʉnacs̈o'jcámpay ima̱s̈anʉ̱n, jemé ayé. Mit igui-acs̈o'jc ayé ma̱s̈anʉ̱n, imoy Judas Simón Iscariote iway.

²⁷Mit cʉs̈ iguipʉctsojw ayé ma̱s̈anʉ̱n, Awayagatsna' iguitutʉgʉy jaran. Cʉs̈ Jesús iguinʉjmau: —Jeme inwato'jcʉpay, wat jaran.

²⁸Po nepʉn jeme tsʉ̱ngaway me̱s̈ani'c, igajawigawu tini'c iguinʉ́jmaj we'n.

²⁹Ni'c cʉjtu'c inʉmgapayta ni'c Jesús inʉjmap we'n ni'c Judas encarga̱tic pa iguiguarda̱twa'n tumi̱n mit ma juy jeme inesita̱tcámpay pa ayé ma̱s̈ʉjw, o ma moygʉs̈ tanti pro̱wijwájat.

³⁰Cʉs̈ iguipʉctsojw ayé ma̱s̈anʉ̱n, pichin jaran mit wejpu'n tsu'manu.

³¹Cʉs̈ ipichijn Judas, Jesús inʉm: —Jinap ʉ̱ jeme tʉjatway jayau tʉtsʉ̱nap mʉjninʉmic, mit Dios tsʉ̱námpey mʉjninʉmic ni'c tʉnjayaumay.

³²Te Dios mʉjninʉmic ni'c tʉnjayaumay, we'ney Dios je'yu tʉs̈mʉjninʉmámpey, mit tʉs̈mʉjninʉmámpey jaran.

³³Mijchat tʉ-e'pcʉs̈p as̈am tʉ̱wajyat. Tʉtsʉ̱námnaj jas̈ʉ̱n mit mijchat. Mit is̈che'ngáj, po tʉnʉmgʉs̈ap as̈am tʉs̈nʉmgʉ́s̈aj judíujat, ni'c mam ʉ̱ tʉnʉs̈wa'n, mijchat ca-oyáj inyʉs̈ca.

³⁴Jinap tʉyajcʉs̈ap tu'c namay mandamientu pa pi niwangʉjʉ minu'pʉjʉjnat, as̈am ʉ̱ tʉwangʉs̈, wename-ey niwángʉjʉ.

³⁵Wename i-is̈capcáj nu'pʉjʉn jayajwat ni'c mijchat tʉ̱pʉctampajyat te miniwangʉjʉp minu'pʉjʉjnat.

³⁶Iguinʉjmau Simón Pedro: —Señor, ¿jʉm inyʉs̈? Jesús ipo'n: —Mam ʉ̱ tʉnʉs̈wa'n, ca-oyáj is̈natspoguip jinap. Is̈natspoguiyáj, po más we'n.

³⁷Iguinʉjmau Pedro: —Señor, ¿tini'c ca-oyap tʉnatspogui jinap? Tʉnyagáj tʉmvida por mi̱.

³⁸Jesús ipo'n: —¿Is̈jawi inyagáj imvida por ʉ̱? Iyacs̈ta'cway tʉnʉjmap: Antes i-ʉwa'n ca̱yuna', inyʉmáj tu̱gup viaje ni'c ʉ̱ is̈ca-is̈cap.