Read Sayula Popoluca San Juan 14 Bible Online

San Juan 14 - Sayula Popoluca bible

San Juan 14

¹’Magatu'nga injo̱jtat. Te incupʉjcap Dios, cupʉ́jcaguey ʉ̱.

²Mam itsʉ̱na tʉnte̱t Dios, mayo'c laj i-it pa intsʉ̱ngawa'n. Maga-ítate we'n, tʉganʉmgʉs̈apate. Po tʉnʉs̈áj tʉs̈-oyac tu'c lugar pa mijchat.

³Mit cʉs̈wa'n tʉs̈-oyac lugar, tʉmi'nájatu mit tʉmunʉs̈cʉs̈áj, pa we'n mam ʉ̱ tʉtsʉ̱nawa'n, mijchat mitsʉ̱ngámpey jem.

⁴Mit injawigap jʉm tʉnʉs̈, mit injawigapey ayé to̱u tʉntunʉs̈pay.

⁵Iguinʉjmau Tomás: —Señor, tʉngajawigap jʉm inyʉs̈, ¿natpaj tʉs̈jawigawa'n ayé to̱u intunʉs̈pay?

⁶Jesús inʉjmau: —Ʉ̱j ayé tʉnyacpay to̱u iyacs̈ta'cway mit tʉnmoygʉs̈pay vida, ni'c nepʉn ca-oyap icoja mam tʉnte̱t Dios te tʉs̈canatspoguip ʉ̱.

⁷Pi is̈-is̈capcac ʉ̱, inis̈capcájate-ey tʉnte̱t Dios, mit jinap inis̈capcanup, mit in-is̈caway.

⁸Felipe iguinʉjmau: —Señor, actu-e'pcac inte̱t Dios, mit tʉtsʉ̱ngáj contentu.

⁹Jesús inʉjmau: —¿Mayo'gap tiempu tʉtsʉ̱na mit mijchat, mit is̈cani-is̈cap, Felipe? Jeme tʉs̈-is̈way ʉ̱, i-is̈wayey tʉnte̱t Dios. ¿Natpaj is̈nʉm mi̱: Actu-e'pcac inte̱t Dios?

¹⁰¿Ingacupʉcp ni'c tʉtsʉ̱nap mit tʉnte̱t Dios, mit tʉnte̱t Dios tsʉ̱nap mit ʉ̱? Nu'pʉjʉn tʉnʉmgʉs̈apay, tʉnganʉmp ʉ̱jyu, po tʉnte̱t Dios jeme tsʉ̱napay mit ʉ̱, je' tʉs̈actuwatp nu'pʉjʉn.

¹¹Cupʉjcac ni'c tʉtsʉ̱nap mit tʉnte̱t Dios, mit tʉnte̱t Dios tsʉ̱nap mit ʉ̱. Te is̈cacupʉjcap ʉ̱, po cupʉjca lo que tʉnwatpay pa tʉnte̱t Dios.

¹²Iyacs̈ta'cway tʉnʉmgʉs̈ap: Jeme tʉs̈cupʉcpay ʉ̱, iwatámpey lo que ʉ̱ tʉnwatpay, mit iwatáj cosa más majatway ni'c ʉ̱ tʉnʉs̈p mam tʉnte̱t Dios.

¹³Mit nu'pʉjʉn inyo'tcajámpay tʉnte̱t Dios ni'c ʉ̱ is̈cupʉjcap, tʉnacmi'náj pa nu'pʉjʉn jayajwat ma mʉjninʉmga tʉnte̱t Dios ni'c tʉnacmimp nu'pʉjʉn inyo'tcámpay.

¹⁴Te inyo'tcap tanti ni'c ʉ̱ is̈cupʉjcap, tʉnacmi'náj.

¹⁵’Te ʉ̱ is̈wangap, jayaumáyga lo que tʉnʉmgʉs̈apay.

¹⁶Mit tʉnyo'jtáj tʉnte̱t Dios, mit je' is̈acmingajáj jatu'c is̈majyigámpay pa itsʉ̱nawa'n mit mijchat pa siempre.

¹⁷Mit je' ayé Espíritu Santu jeme is̈actujawigámpay lo que iyacs̈ta'cway, mit jayajwat ayʉ̱́j mundujway ca-oyap iguipʉctsóuga, ni'c iga-e'pcap ne iga-is̈capcap je'. Po mijchat inis̈capcap je', ni'c tsʉ̱náj injo̱tni'jcat mit is̈mutangáj mijchat.

¹⁸Tʉgayajcʉs̈áj as̈am cuya̱majcat. Tʉmi'nájatu mam mijchat.

¹⁹Jas̈ʉ̱nu tʉtsʉ̱nawa'n, mit jayajwat ayʉ̱́j mundujway tʉs̈caja-e'pcáj, po mijchat is̈-e'pcáj tʉjutucta'cwa'n. Ni'c as̈am ʉ̱ tʉtsʉ̱nawa'n pa siempre, mijchat mitsʉ̱ngámpey mit ʉ̱.

²⁰En ayé s̈ʉjw injawigáj ni'c tʉtsʉ̱nap mit tʉnte̱t Dios, mit mijchat mitsʉ̱nap mit ʉ̱, mit ʉ̱ tʉtsʉ̱nap mit mijchat.

²¹Jeme ijawipay lo que tʉnyʉmpay mit ijayaumayp, ayé jayau tʉs̈wamp. Mit jeme tʉs̈wampay, iguiwa'námpey tʉnte̱t Dios, mit ʉ̱ tʉnwa'náj, mit tʉnactujawiyáj ni'c tʉtsʉ̱nap mit je'.

²²Iguinʉjmau Judas (po caje' Iscariote): —Señor, ¿natpaj is̈actujawigáj ni'c mitsʉ̱nap mit ʉjtsat, mit ingamoygʉs̈áj laj ma is̈-is̈capcac jayajwat ayʉ̱́j mundujway?

²³Mit Jesús ipo'n: —Jeme tʉs̈wampay, ijayaumayáj lo que tʉnyʉmpay, mit tʉnte̱t Dios iguiwa'náj mit tʉmingáj mam je', mit tʉtsʉ̱ngáj mit je'.

²⁴Jeme tʉs̈cawampay, igajayaumayp lo que tʉnyʉmpay. Mit lo que inmaraugaway, ayé caje' ʉ̱jyu tʉnyʉmp, po ayé tʉs̈actunʉmp tʉnte̱t Dios jeme tʉs̈ajyu'tway.

²⁵’Tʉnʉmgʉs̈ap ayʉ̱́j cosajat mientras tʉtsʉ̱napnaj mit mijchat.

²⁶Po ayé Espíritu Santu jeme is̈majyigámpay, tʉnte̱t Dios i-ajyu'táj ni'c ʉ̱ tʉnyo'jtáj, mit je' is̈ajque's̈cajáj nu'pʉjʉn cosajat, mit is̈actunijawigáj nu'pʉjʉn tʉnʉmgʉs̈away.

²⁷’Ʉ̱ tʉyajcʉs̈ap paz, mit tʉmoygʉs̈p paz injo̱tni'jcat. Mit ayé paz tʉnyacpay, caje' as̈am iyajcapay jayajwat ayʉ̱́j mundujway. Jemni'c magatu'nga injo̱jtat, mit campʉ̱tcawit.

²⁸Inmaraugaway ni'c tʉnʉmgʉs̈au: Tʉnʉs̈p mit tʉmimpatu mam mijchat. Pi is̈wángagate, ji'gájate injo̱jtat, ni'c tʉnʉmgʉs̈au tʉnʉs̈p mam tʉnte̱t Dios, ni'c je' más mʉjninʉmic que ʉ̱.

²⁹Mit jinap tʉnʉmgʉs̈ap antes tʉnʉcs̈nuwa'n, pa cuandu ijatwa'n incupʉjcáj.

³⁰’Caja-oyap tʉmucotscʉs̈ jec mijchat, ni'c mimp ma̱lwayna' jeme imanda̱tpay ayʉ̱́j mundu, mit tʉngamunipʉjcʉp je'.

³¹Po tʉnwatp lo que tʉnte̱t Dios iwampay, pa jayajwat ayʉ̱́j mundujway ma jawiga ni'c tʉnwamp je'. Ca's̈ʉ'jca mit napíchinga yam.