Read Sayula Popoluca San Juan 15 Bible Online

San Juan 15 - Sayula Popoluca bible

San Juan 15

¹’Ʉ̱ as̈am tu'c uvapoj iyacs̈ta'cway, mit tʉnte̱t Dios ayé jeme iyos̈wajtapay.

²Mit nu'pʉjʉn tʉn-awec igawatámpay itʉjm, itsuctujcáj. Mit nu'pʉjʉn tʉn-awec iwatámpay itʉjm, iculimpia̱táj pa ma wat más itʉjm.

³Mit we'ney mijchat is̈limpia̱tcaway Dios ni'c inmutangau lo que tʉnʉmgʉs̈away.

⁴Tánga mit ʉ̱, mit tʉtanáj mit mijchat. As̈am tu'c awec ca-oyap iguiwat itʉjm itu'gumu te catamp uvapojni'c, we'ney mijchat ca-oyap is̈watca neti te migatangap mit ʉ̱.

⁵’Ʉ̱ as̈am tʉ-uvapoj mit mijchat as̈am mi-awecwájat. Jeme tampay mit ʉ̱, mit ʉ̱ mit je', ayé iwatáj may itʉjm. Ni'c te miniju'pcʉjʉp de ʉ̱, ca-oyáj is̈watca neti.

⁶Jeme catampay mit ʉ̱, i-acpichingáj pe'ta̱m as̈am iguicucáchiga tu'c awec, mit tʉ'tsáj, mit i-apiumujcáj, mit icomgáj jʉngʉtʉm pa ma tinin.

⁷’Te mitangap mit ʉ̱, mit inmutangap lo que tʉnyʉmpay, yo'tca nu'pʉjʉn inwangámpay, mit is̈mingajáj.

⁸Wename tsʉ̱náj mʉjninʉmic tʉnte̱t Dios te inwatcap puru oyway yos̈ as̈am ayé uvapoj iguiwat itʉjm, mit wename mijatcáj tʉ̱pʉctampajyat.

⁹As̈am tʉnte̱t Dios tʉs̈wamp, we'ney tʉwangʉs̈ mijchat. Jinap tánga mit ʉ̱ ni'c tʉwangʉs̈p.

¹⁰Tʉwangʉs̈áj te injayaumaygap lo que tʉnyʉmpay, as̈am ʉ̱ tʉs̈jayaumayey lo que inʉmpay tʉnte̱t Dios, mit je' siempre tʉs̈wampey.

¹¹’Tʉnʉmgʉs̈au we'n pa ma ji'c injo̱jtat as̈am ʉ̱ iji'c tʉnjo̱jt, pa we'n ji'gáj injo̱jtat iyacs̈ta'cway.

¹²Ayʉ̱́j tʉmanda̱tcʉs̈p pi watca: Pi niwangʉjʉ minu'pʉjʉjnat as̈am ʉ̱ tʉwangʉs̈.

¹³Te tu'c jayau iyacp ivida pa i-amigujat, ayé más jayawano'cp.

¹⁴Mijchat tʉ-e'pcʉs̈áj as̈am tʉ̱-amigujat te inwatcap lo que tʉnʉmgʉs̈apay.

¹⁵Tʉgaja-e'pcʉs̈áj as̈am mozojat ni'c tu'c mozo igajawip ti iwatpay ijayc. Po tʉ-e'pcʉs̈p as̈am tʉ̱-amigujat, ni'c nu'pʉjʉn cosajat tʉnmarapay iguinʉm tʉnte̱t Dios, tʉ-actujawigʉs̈pey.

¹⁶Mijchat is̈cacupiugawu ʉ̱, po ʉ̱ tʉcupiugʉs̈ mijchat, mit tʉyajcʉs̈ pa inyʉs̈cawa'n is̈watca puru oyway yos̈, mit ma tan lo que inwatcapay. Pa we'n nu'pʉjʉn inyo'tcajámpay tʉnte̱t Dios, je' is̈acmingajáj ni'c ʉ̱ is̈cupʉjcap.

¹⁷Ayʉ̱́j tʉnʉmgʉs̈ap pi watca: Pi niwangʉjʉ minu'pʉjʉjnat.

¹⁸’Te jayajwat ayʉ̱́j mundujway is̈-ángap, pi jawiga ni'c ʉ̱ tʉs̈-ajnʉ'jcau que mijchat.

¹⁹Pi watca-ate as̈am iwatcapay jayajwat ayʉ̱́j mundujway, is̈wangájate je'jat. Po ingajamunipʉjcʉjʉp jayajwat ayʉ̱́j mundujway ni'c tʉcupiugʉs̈way de je'jat, jemni'c is̈-angap je'jat.

²⁰Nijáwiga ayé tʉnʉmgʉs̈away ni'c tu'c mozo ca-oyap itsʉ̱na más oyninʉmic que ijayc. Te ʉ̱ tʉs̈po'ctangau, we'ney mijchat is̈po'ctangáj. Te ijayaumaygau lo que tʉnyʉmway, we'ney ijayaumaygáj lo que mijchat inyʉmgapay.

²¹Mit nu'pʉjʉn ayʉ̱́j is̈watcajáj ni'c ʉ̱ is̈wangap, ni'c je'jat iga-is̈capcap Dios jeme tʉs̈ajyu'tway.

²²’Tʉgami'n mit tʉgamucotscʉs̈, catsʉ̱ngájate culpa̱tic, po jinap ca-oyap iguinʉmga ni'c ca-itcʉjʉp culpa.

²³Jeme tʉs̈-ampay ʉ̱, i-ampey tʉnte̱t Dios.

²⁴Tʉgawat mam je'jat nejʉmay milagru jeme nepʉn ca-oyapay iguiwat, catsʉ̱ngájate culpa̱tic. Po jinap tʉs̈-is̈cau mit tʉs̈-angap mit i-angapey tʉnte̱t Dios.

²⁵Po iwatcap wename pa ma cumplia̱t jeme tsʉ̱napay ja'yic ileyni'jcat, inʉm: “Tʉs̈-angau mit tʉngawatu neti.”

²⁶’Tʉ-ajyu'tcʉs̈á-j ayé Espíritu Santu pa is̈majyigáj, mit is̈actujawigáj lo que iyacs̈ta'cway, mit je' pichináj mam tʉnte̱t Dios. Imi'nwa'n je', is̈actujawigáj lo que tʉnwatpay.

²⁷Mit mijchat inactujawigámpey lo que tʉnwatpay, ni'c mitsʉ̱ngau mit ʉ̱ desde tʉya̱s̈cʉs̈.