Read Sayula Popoluca San Juan 16 Bible Online

San Juan 16 - Sayula Popoluca bible

San Juan 16

¹’Tʉnʉmgʉs̈au we'n pigacutu'mpʉjca mit inca'ugawa'n mit ma̱jlat.

²Ni'c is̈acpichingáj mam judíujat i-adora̱tca, mit mi'náj tu'c tiempu cuandu tambʉn is̈ago'jcáj, je' ipensa̱táj ni'c iwatp oy pa Dios.

³Mit iwatcáj we'n ni'c iga-is̈capcap tʉnte̱t Dios ne tʉs̈ca-is̈capcap ʉ̱.

⁴Ayʉ̱́j cosajat tʉnʉmgʉs̈ap pa cuandu ijatwa'n wename, inyijawigáj ni'c we'n tʉnʉmgʉ́s̈aj. ’Ayʉ̱́j tʉganʉmgʉs̈awu primeru ni'c tʉtsʉ̱nau mit mijchat.

⁵Po jinap tʉnʉs̈áj mam itsʉ̱na Dios jeme tʉs̈ajyu'tway, mit mijchat is̈ca-ucyo'tcap jʉm tʉnʉs̈.

⁶Mit tu'no'cp injo̱jtat ni'c we'n tʉnʉmgʉ́s̈aj.

⁷Jinap tʉnʉmgʉs̈ap iyacs̈ta'cway, ni'c más oy pa mijchat tʉ̱nʉs̈. Ni'c te tʉganʉs̈p, cami'náj mam mijchat Espíritu Santu is̈majyigámpay. Po te tʉnʉs̈p, tʉ-ajyu'tcʉs̈á̱j.

⁸Mit imi'nwa'n Espíritu Santu, i-actujawigʉs̈áj jayajwat ayʉ̱́j mundujway ni'c iwatcap mal, mit ni'c igawatcawu oy, mit i-actujawigʉs̈áj jayajwat ni'c tsʉ̱ngáj juzga̱tic.

⁹Je'jat iwatcap mal ni'c tʉs̈cacupʉjcap.

¹⁰Mit Espíritu Santu i-actujawigʉs̈áj ni'c tʉnwatp oy ni'c tʉnʉs̈p mam tʉnte̱t Dios, mit is̈caja-e'pcáj.

¹¹Mit Espíritu Santu i-actujawigʉs̈áj jayajwat ni'c tsʉ̱ngáj juzga̱tic, ni'c ma̱lwayna' imanda̱tpay ayʉ̱́j mundu condena̱tiganu itsʉ̱na.

¹²’Tʉnaguepnaj mayo'c cosajat tʉnʉmgʉs̈ámpay, po jinap ca-oyáj is̈majmóyga.

¹³Po imi'nwa'n ayé Espíritu Santu jeme iyacs̈ta'cway, is̈actujawigáj nu'pʉjʉn lo que iyacs̈ta'cway. Ni'c cacotsáj je'yu, po inʉmáj nu'pʉjʉn imarapay, mit is̈actujawigáj nu'pʉjʉn cosajat jatámpay.

¹⁴Espíritu Santu tʉs̈-oyninʉmáj ni'c ipʉctsowáj lo que tʉnaguepay mit ayé is̈actujawigáj.

¹⁵Nu'pʉjʉn tʉnte̱t Dios ijtʉpay, ayé tʉnje'. Jemni'c tʉs̈nʉjm ni'c Espíritu Santu ipʉctsowámpey lo que tʉnaguepay mit ayé is̈actujawigáj.

¹⁶’Tʉtsʉ̱náj jas̈ʉ̱n yam mit is̈ca-e'pcáj, mit cʉs̈wa'n tu'c tiempu is̈-e'pcájatu, mit tʉnʉs̈áj mam itsʉ̱na tʉnte̱t Dios.

¹⁷Cʉs̈ cʉjtu'c ipʉctampajyat ni-ucyo'tcʉjʉu: —¿Ti inʉmo'jcʉp ayé nas̈nʉmgajapay: Tʉtsʉ̱náj jas̈ʉ̱n yam mit is̈ca-e'pcáj, mit cʉs̈wa'n tu'c tiempu is̈-e'pcájatu, mit tʉnʉs̈áj mam itsʉ̱na tʉnte̱t Dios?

¹⁸Cʉs̈ inʉmgau: ¿Ti inʉmo'jcʉp ni'c tsʉ̱náj jas̈ʉ̱n yam? Nagajawigap ti inʉmpay.

¹⁹Jesús ijawiu ni'c iwangau igui-ucyo'tcáj, mit inʉmgʉs̈au: —¿Mini-ucyo'tcʉjʉp ti inʉmo'jcʉp ayʉ̱́j tʉnyʉmway: Tʉtsʉ̱náj jas̈ʉ̱n yam mit is̈ca-e'pcáj, mit cʉs̈wa'n tu'c tiempu is̈-e'pcájatu?

²⁰Iyacs̈ta'cway tʉnʉmgʉs̈ap ni'c mijʉygáj mit tu'náj injo̱jtat, mit jayajwat ayʉ̱́j mundujway ji'gáj ijo̱jtat. Po maja itu'nwa'naj injo̱jtat, cʉs̈wa'n ji'gájatu injo̱jtat.

²¹Ita'cwa'n tu'c to's̈ay, pʉcp icuerpu ni'c iguicojyaway hora. Po iguita'cwa'n iway, igajanijawip ni'c pʉjcʉs̈ʉu ni'c ji'go'cp ijo̱jt ni'c itnup tu'c qui'chwáy.

²²We'ney mijchat tu'mp injo̱jtat jinap, po ʉ̱ tʉ-e'pcʉs̈ájatu mit ji'gáj injo̱jtat, mit nepʉn ca-oyáj is̈nʉmgajap magaji'c injo̱jtat.

²³’En ayé s̈ʉjw is̈caja-ucyo'tcáj neti. Iyacs̈ta'cway tʉnʉmgʉs̈ap ni'c nu'pʉjʉn inyo'tcajámpay tʉnte̱t Dios, is̈acmingajáj ni'c ʉ̱ is̈cupʉjcap.

²⁴Hasta jinap inganiyo'tcajap Dios neti. Yo'tca mit impʉctsougáj ni'c ʉ̱ is̈cupʉjcap, pa we'n ji'gáj injo̱jtat iyacs̈ta'cway.

²⁵’Ayé tʉnʉmgʉs̈away, tʉntumuquips̈ cuentujat. Po cojáj hora tʉngajatumuquips̈áj cuentujat po tʉ-actujawigʉs̈áj pajcu nat ayé tʉnte̱t Dios.

²⁶En ayé s̈ʉjw tʉnʉcs̈wa'n, inyo'tcajáj Dios ni'c ʉ̱ is̈cupʉjcap, mit tʉnʉmgʉs̈ap ni'c canesita̱tp tʉs̈yo'jtawa'n tʉnte̱t Dios pa mijchat, ni'c je'yu is̈moygáj nu'pʉjʉn.

²⁷Ni'c tʉnte̱t Dios is̈wangap ni'c mijchat is̈wangapey ʉ̱, mit incupʉjcap ni'c tʉpichin mam Dios.

²⁸Tʉpichin mam tʉnte̱t Dios mit tʉmín en ayʉ̱́j mundu. Mit tʉpichinájatu en ayʉ̱́j mundu mit tʉnʉs̈áj mam tʉnte̱t Dios.

²⁹Ipʉctampajyat iguinʉmgajau: Jinap que micotsp pajcu, mit ingatumuquips̈p nejʉmay cuentu.

³⁰Jinap tʉnjawigap ni'c injawip nu'pʉjʉn cosa mit canesita̱tp nepʉn is̈-ucyo'táj. Jemni'c tʉs̈cupʉ́jca ni'c mipichin mam Dios.

³¹Jesús ipo'ngʉs̈: —¿Jinap incupʉjcap ayé?

³²Cojáj hora mit jinap coyway pa inyʉs̈cawa'n s̈is̈cada'guic cada jayau mamu iguiwa'n, mit is̈cuyaguigáj tʉntu'gumu. Po tʉgatsʉ̱nap tʉntu'gumu ni'c tʉnte̱t Dios tsʉ̱nap mit ʉ̱.

³³Tʉnʉmgʉs̈au we'n pa pi aguepca paz ni'c ʉ̱ is̈cupʉjcap. En ayʉ̱́j mundu intunas̈cáj po ma ji'c injo̱jtat ni'c tʉmvencia̱tway ayʉ̱́j mundu.