Read Sayula Popoluca San Juan 18 Bible Online

San Juan 18 - Sayula Popoluca bible

San Juan 18

¹Cʉs̈ iguinʉjm we'n Jesús, pichin mit ipʉctampajyat mit nʉs̈cau pa tuganʉ-ájw Cedrón en tu'c lugar mam i-it may olivu cujyat, mit jem itʉgʉjy mit ipʉctampajyat.

²Mit Judas jeme iguito'ctʉgʉyway i-is̈capey ayé lugar ni'c mayo'c viaje Jesús ini-apʉcmújcʉjʉj jem mit ipʉctampajyat.

³Cʉs̈ Judas i-apʉcmuc soldajuc mit comandantejat jeme igui-ajyu'tcaway judíujat imʉjpa̱nijat mit fariseujat, mit nʉs̈cau jem mit linternajat mit jʉmbola mit i-armajat.

⁴Po Jesús ijawiu nu'pʉjʉn jeme iguijatámpay, icutomigʉs̈ mit inʉmgʉs̈au: —¿Pʉn inche'ngap?

⁵Iguipo'ngau: —Tʉnche'ngap Jesús Nazaretway. Jesús inʉmgʉs̈au: —Ʉ̱j ayé. Mit jemey iyo'jy Judas jeme iguito'ctʉgʉyway.

⁶Cuandu iguinʉmgʉ́s̈aj Jesús: “Ʉ̱j ayé”, nʉs̈cau pa mugus̈á̱m mit ca'ubʉ'ngau na̱s̈ni'c.

⁷Mit Jesús i-ucyo'tcʉs̈atu: —¿Pʉn inche'ngap? Mit je'jat iguipo'ngau: —Tʉnche'ngap Jesús Nazaretway.

⁸Jesús ipo'ngʉs̈: —Tʉnʉmgʉs̈away ni'c ʉ̱j ayé. Te ʉ̱ is̈che'ngap, moyga laj ma nʉs̈ca tʉnmuyo'ygʉs̈pay.

⁹Inʉm we'n pa ma cumplia̱t lo que inʉmway: “Jeme is̈moygʉs̈way netu'c tʉnga-actogoyu.”

¹⁰Cʉs̈ Simón Pedro jeme imuyo'yway i-espada, ichi't mit itumoy mʉjpa̱nijna' imozo, mit ipus̈tujcau ita̱tsʉc oyimay. Mit ayé mozo inʉ'jy Malco.

¹¹Cʉs̈ Jesús inʉjmau Pedro: —Com in-espada i-acni'c, ni'c Dios Nate̱jat inʉm ni'c itp ti tʉs̈tunas̈wa'n.

¹²Cʉs̈ ayé soldajuc mit icapitán mit judíujat icomandantejat i-actangau Jesús mit icutsumda̱jcau.

¹³Mit imunʉs̈ʉ'jcau mam Anás ni'c ayé Caifás imʉ'tna', mit Caifás mʉjpa̱nij ayé s̈iwit.

¹⁴Mit Caifás ayé jeme i-acochigʉs̈way judíujat ni'c más oy solo tu'c jayau ma o'c mit caje' itogoygawa'n nu'pʉjʉn jayajwat.

¹⁵Mit Simón Pedro mit jatu'c pʉctampay inatspoguigau Jesús. Mit ayé pʉctampay igui-is̈cap mʉjpa̱nij, mit tʉgʉy mit Jesús mʉjpa̱nijna' ipe'tni'c,

¹⁶po Pedro tan pe'ta̱m tʉc-auni'c. Cʉs̈ pichin ayé pʉctampay igui-is̈capay mʉjpa̱nijna', mit inajau ayé puertacuida̱tpayma̱m ma mo' laj ma tʉgʉy Pedro.

¹⁷Cʉs̈ ayé puertacuida̱tpayma̱m inajau Pedro: —¿Caje' mi̱ is̈pʉctampay Jesús? Pedro inʉm: —Tʉgaje'.

¹⁸Mit jem iténagaj ayé mozojat mit comandantejat, mit i-acotmujcau jʉjn pa is̈amgawa'n ni'c payiguito'c, mit jemey iténaj Pedro mit je'jat, mit s̈amwey.

¹⁹Mit ayé mʉjpa̱nij i-ucyo't Jesús pʉjnat ipʉctampajyat mit ti i-ajque's̈cʉs̈ap.

²⁰Jesús ipo'n: —Ʉ̱ tʉcots mam nu'pʉjʉn iguimárauga. Siempre tʉ-ajque's̈way mam judíujat i-adora̱tca mit templuni'c mam ini-apʉcmújcʉjʉ nu'pʉjʉn judíujat, mit tʉganicotsp anu'mu.

²¹¿Tini'c is̈-ucyo'tp ʉ̱? Ucyo'tcʉs̈ jeme imaraugaway tʉcots, ni'c je'jat ijawigap lo que tʉnyʉmway.

²²Iguinʉjm we'n Jesús, tu'c comandante tsʉ̱naway jem iguimoy tu'c apatsmuc, inʉm: —¿We'n is̈po'n mʉjpa̱nij?

²³Jesús ipo'n: —Te tʉcots mal, actujawiyac ti mal tʉnwat, mit te tʉnwat oy, ¿tini'c is̈moy?

²⁴Cʉs̈ Anás i-acnʉcs̈ Jesús cutsumda'guic mam Caifás mʉjpa̱nijna'.

²⁵Cʉs̈ Pedro siguia̱t is̈am. Mit inʉmgajau: —¿Caje' mi̱ is̈pʉctampay Jesús? Mit Pedro inʉm: —Ca̱j, tʉgaje'.

²⁶Tu'c imozo mʉjpa̱nijna', ije̱way ayé jayau jeme Pedro ipus̈tujcaway ita̱tsʉc, i-ucyo't: —Tʉs̈jawi tʉ-is̈ mi̱ en ayé lugar mit Jesús.

²⁷Pedro inʉmatu ni'c ca̱j, mit ʉ̱u jaran ca̱yuna'.

²⁸Cʉs̈ i-acpichingau Jesús tʉc Caifás mit imunʉs̈cau pa gobernadorna' ipalaciuni'c, mit ayé hora jopoyito'cnaj, mit je'jat catʉgʉygawu palaciuni'c pa maganijingʉjʉ, ni'c te tʉgʉygap, ca-oyájate iguitsouga ayé ma̱s̈ʉjw pascua.

²⁹Cʉs̈ pichin Pilato mam je'jat mit inʉmgʉs̈au: —¿Ti iwat ayʉ̱́j jayau pa is̈-acusá̱tca?

³⁰Je'jat iguipo'ngau: —Magawátate mal ayʉ̱́j jayau, camimpate tʉ-entregá̱tcaja.

³¹Cʉs̈ Pilato inʉmgʉs̈au: —Munʉ́s̈ca mijchat mit juzgá̱tca as̈am iguinʉm inlejyat. Mit ayé judíujat iguinʉmgajau: —Ʉjtsat tʉnlejyat tʉs̈camoygap laj tʉs̈ago'jcawa'n nepʉn.

³²Inʉmgau we'n pa ma cumplia̱t jeme inʉmway Jesús, ni'c je' i-actujawigʉs̈ nat i-o'cwa'n.

³³Cʉs̈ Pilato tʉgʉyatu palaciuni'c, mit iya̱s̈ Jesús, inʉjmau: —¿Mi̱j ayé judíujat is̈rejyat?

³⁴Jesús ipo'n: —¿Mi̱jyu inyʉmp ayʉ̱́j, o tambʉn is̈nʉmgajau tʉpʉn ʉ̱?

³⁵Pilato iguipo'n: —¿Is̈jawi ni'c ʉ̱ tʉjudíu? Intʉcmayna̱s̈atway mit judíujat imʉjpa̱nijat is̈-entrega̱tcau tʉncʉ'jugum. ¿Ti inwat?

³⁶Ipo'n Jesús: —Tʉgaminu pa tʉs̈manda̱tcʉs̈wa'n jayajwat ayʉ̱́j mundujway. Tʉmandá̱tate ayʉ̱́j mundu, jeme tʉs̈majyigapay tsuguinwatcájate pa ʉ̱ tʉgatan judíujat icʉ'jugujmat, po ʉ̱ tʉgamanda̱tp yam.

³⁷Cʉs̈ iguinʉjmau Pilato: —¿Ah po mireypaj? Jesús ipo'n: —Mi̱ inyʉmp ni'c ʉ̱ tʉrey. Jemni'c tʉ-ijt mit jemni'c tʉmijn en ayʉ̱́j mundu pa tʉs̈actujawigʉs̈wa'n lo que iyacs̈ta'cway. Mit nu'pʉjʉn iwatcapay iyacs̈ta'cway, imaraugap lo que tʉnyʉmpay.

³⁸Pilato iguinʉjmau: —¿Ti ayé lo que iyacs̈ta'cway? Mit iguinʉjm we'n, pichinatu mam itsʉ̱nga judíujat, mit inʉmgʉs̈au: —Tʉngapa̱jtap nejʉmay mal iwatway ayʉ̱́j jayau.

³⁹Po mijchat miyújijcat tʉ-acjo'ngʉs̈a tu'c presu pascuani'c. ¿Inwangap tʉ-acjo'ngʉs̈awa'n judíujat irejyat?

⁴⁰Cʉs̈ ya̱s̈cawatu, inʉmgau: —Tʉnwangap pi ago'c Jesús, mit acjo'n Barrabás. Mit Barrabás tu'c nu'mpay.