Read Sayula Popoluca San Juan 19 Bible Online

San Juan 19 - Sayula Popoluca bible

San Juan 19

¹Mit cʉs̈ Pilato i-acnʉcs̈ Jesús mit i-acmojyʉu.

²Mit soldajat ique'cs̈cajau tu'c corona de puru apit, mit icomgajau icopacni'c, mit icutigatscau mit tu'c jamuc moraduway,

³mit iburla̱tcau, inʉmgajau: —¡Pi tsʉ̱na mʉjninʉmic mi̱, judíujat is̈rejyat! Mit imoyta̱jcau.

⁴Cʉs̈ Pilato pichinatu mit inʉmgʉs̈au: —E'pca ni'c tʉmumingʉs̈ap mam mijchat pa pi jawiga ni'c tʉngapa̱jtap nejʉmay mal iwatway ayʉ̱́j jayau.

⁵Mit imupichin Jesús icopacni'c ayé corona de puru apit, mit cutigatsic mit ayé jamuc moraduway. Mit Pilato inʉmgʉs̈au: —¡E'pca ayʉ̱́j jayau!

⁶Igui-ís̈caj judíujat imʉjpa̱nijat mit comandantejat, ya̱s̈cau mit inʉmgau: —¡Yajca cunu̱s̈ni'c! ¡Yajca cunu̱s̈ni'c! Pilato inʉmgʉs̈au: —Munʉs̈ca mijchat mit yajca cunu̱s̈ni'c, ni'c ʉ̱ tʉngapa̱jtap te iwat mal ayʉ̱́j jayau.

⁷Judíujat iguipo'ngau: —Ʉjtsat tʉnaguepcap tu'c ley, mit tʉnlejyat inʉmp ni'c itp ti i-o'cwa'n ni'c je'yu niwajtʉu Dios iway.

⁸Pilato iguimarajw ni'c we'n iguinʉmga, más ipʉ̱jt.

⁹Mit tʉgʉyatu palaciuni'c, inʉjmau Jesús: —¿Mijʉmay mi̱? Po Jesús capo'nu.

¹⁰Cʉs̈ Pilato inʉjmau: —¿Is̈capo'mp ʉ̱? ¿Ingajawip ni'c oyap tʉyac cunu̱s̈ni'c, mit oyapey tʉ-acjo'n?

¹¹Jesús iguipo'n: —Inga-aguep nejʉmay derechu mit ʉ̱ te is̈camoyp Dios tsʉ̱napay yucm. Jemni'c jeme tʉs̈-entrega̱tway incʉ'jugum más may mal i-ijtʉ.

¹²Cʉs̈ iguimarajw we'n Pilato iche'jnau ilaj pa igui-acjo'nwa'n. Po judíujat ya̱s̈cau mit inʉmgau: —Te inacjo'mp ayʉ̱́j jayau, caje' in-amigu rey César, ni'c pʉn iwa'námpay ijatwa'n rey, imutsuguinwatáj César.

¹³Cʉs̈ iguimarajw we'n Pilato, imupichin Jesús pa pe'ta̱m, mit nitsʉ̱nda̱jcʉu mam ijuzga̱t, mit ayé lugar watic ipisu mit oyway tsa', mit hebreu-auni'c inʉ'jy Gabata.

¹⁴Mit wejpu'n ivíspera ayé ma̱s̈ʉjw pascua, mit pu̱ts̈ʉjwanu. Cʉs̈ inʉmgʉs̈au judíujat: —¡E'pca inrejyat!

¹⁵Po je'jat ya̱s̈cau: —¡Munʉs̈ca, munʉs̈ca, yajca cunu̱s̈ni'c! Pilato inʉmgʉs̈au: —¿Is̈jawiga inrejyat tʉnyagáj cunu̱s̈ni'c? Iguipo'ngau mʉjpa̱nijat: —Tʉnga-aguepcap jatu'c rey. César ayé tʉnrejyat.

¹⁶Cʉs̈ i-entrega̱tcʉs̈au icʉ'jugujmat Jesús pa ma yajca cunu̱s̈ni'c. Cʉs̈ i-actangau mit imunʉs̈cau.

¹⁷Mit Jesús itsʉmdacnʉs̈ icunu̱s̈ pa tu'c lugar inʉ'jyway Animacopac, mit hebreu-auni'c inʉ'jy Gólgota,

¹⁸mit jem iguiyájcaj cunu̱s̈ni'c. Mit iyajcawey mechc jayajwat mit je', tu'c oyim mit tu'c anajyim, mit Jesús es̈pu̱tum.

¹⁹Mit Pilato ija'yey tu'c letreru mit iyajcau icunu̱s̈ni'c, mit ayé letreru inʉm: “JESUS NAZARETWAY, JUDIUJAT IREJYAT.”

²⁰Mit mayo'c judíujat icotscau ayé letreru, ni'c ayé lugar mam iguiyájcaj Jesús cunu̱s̈ni'c tomo'c ayé nʉ'jcopac, mit ayé letreru tsʉ̱nau ja'yic hebreu-auni'c, griegu-auni'c mit latín-auni'c.

²¹Mit judíujat imʉjpa̱nijat inʉmgajau Pilato: —Camja'ywit judíujat irejyat, po ja'y ni'c je' inʉm: “Ʉ̱ judíujat tʉs̈rejyat.”

²²Pilato ipo'ngʉs̈: —Lo que tʉnja'yway, ja'yiganu itsʉ̱na.

²³Cʉs̈ soldajat iguiyájcaj Jesús cunu̱s̈ni'c, ipʉjcajau ijamuc mit itsujcada̱jcau mactas̈p parte, tu'c pa cada soldaj. Mit ipʉjcajawey jatu'c ijamuc jeme canu'icway po watic yacs̈nas̈igu desde yucm hasta pa'tm.

²⁴Cʉs̈ inʉmgau je'jatu: —Ayʉ̱́j nagapartiá̱tca po na-í̱jcaja, na-e'pcáj pʉn ipʉgáj. Iwatcau we'n pa ma cumplia̱t tsʉ̱napay ja'yic Dios ilibruni'c, inʉm: I-acpas̈angau tʉnjamuc pa je'jat, mit i-i̱jcajau pa iguipʉjcawa'n tʉnyagatsjamuc. Mit we'n iguiwátcaj soldajat.

²⁵Mit tsʉ̱ngau Jesús icunu̱s̈-á̱m Jesús ima̱m, mit ima̱m ije̱way, mit María Cleofas ito's̈ay, mit María Magdalajway.

²⁶Mit Jesús i-is̈ ima̱m mit i-is̈ ni'c jemey itsʉ̱na ayé pʉctampay iwano'cpay. Mit Jesús inʉjmau ima̱m: —Mamá, jemé itsʉ̱na inwayjatámpay.

²⁷Cʉs̈ inʉjmau ipʉctampay: —Jemé itsʉ̱na inma̱mjatámpay. Mit wejpu'n ayé pʉctampay ipʉctsojwau itʉcm Jesús ima̱m pa iguicuida̱twa'n.

²⁸Cʉs̈ Jesús iguijawij ni'c cumplia̱tway nu'pʉjʉn, inʉm: Tʉnʉ-u̱go'jcʉp. Inʉm we'n pa ma cumplia̱t tsʉ̱napay ja'yic Dios ilibruni'c.

²⁹Mit it jem tu'c taza patsic mit vinagre. Cʉs̈ ayé jayajwat i-acs̈o'jcau tu'c jamucbola mit vinagre, mit itsumgau en tu'c pʉ̱yan mit i-ajcutomigajau i-auni'c.

³⁰Cʉs̈ iguipʉctsojw ayé vinagre, inʉm: —Cumplia̱tiganu nu'pʉjʉn. Cʉs̈ iguino'umanajc icopac, o'c.

³¹Mit wejpu'n ivíspera pascua, mit judíujat igawangawu ma tanga ayé cuerpujat cunu̱s̈ni'c en ayé po'cs̈ans̈ʉjw, ni'c ayé po'cs̈ans̈ʉjw tu'c s̈ʉjw mʉjway pa je'jat. Cʉs̈ iyo'tcajau Pilato ma manda̱t ma actotscaja ita'mpajcat pa ma o'jca mit ma chi'tca jem.

³²Cʉs̈ mingau soldajat mit i-actotscajau ita'mpajcat primeruway, mit we'ney jatu'cway jeme iyajcaway cunu̱s̈ni'c mit Jesús.

³³Po icóygaj mam itsʉ̱na Jesús, iga-actotscajawu ita'mpajcat ni'c i-is̈cau ni'c o'guiganu.

³⁴Po tu'c soldaj icot icabapni'c mit tu'c cotan, mit pichin jaran nipin mit nʉ'.

³⁵Ʉ̱ jeme tʉnja'ypay ayʉ̱́j libru tʉn-is̈ ni'c we'n ijajt, mit iyacs̈ta'cway lo que tʉ-actujawigʉs̈pay, pa mijchat pi cupʉjca-ey.

³⁶Jat we'n pa ma cumplia̱t tsʉ̱napay ja'yic Dios ilibruni'c: “Netu'c ipajc iga-actotscajáj je'.”

³⁷Mit tsʉ̱napey ja'yic Dios ilibruni'c: “Igui-e'pcáj jeme iguicotcaway.”

³⁸Mit cʉs̈ José Arimateajway ayé tu'c Jesús ipʉctampay po je' cupʉc anu'mu ni'c ipʉ̱tcʉs̈p judíujat. Iyo'jtau Pilato ma iguimo'ac laj igui-acmanajcawa'n Jesús icuerpu pa iguini'pwa'n, mit Pilato iguimoy laj. Cʉs̈ min mit i-acmanajcau Jesús icuerpu.

³⁹Mit we'ney Nicodemo jeme oyway tsu'm mam Jesús, imumin como treinta kilo tu'c po't pa'cs̈u'cpay motic mirra mit aloes.

⁴⁰Cʉs̈ i-acmanajcajau Jesús icuerpu mit itugusádatscau sábana mit iyajcajau perfume pa'cs̈u'cpay as̈am iguiwatí̱jca judíujat iguiní̱pca tu'c á̱nima.

⁴¹Mit mam iguiyájcaj cunu̱s̈ni'c it tu'c lugar mam i-it may olivu cujyat, mit en ayé lugar it tu'c cʉt pactajicway tsa'ni'c watic pa á̱nima, mit jem nepʉn iganicomgap.

⁴²Cʉs̈ icomgau jem Jesús ni'c tomo'c i-ijt ayé á̱nimacʉt, ni'c wejpu'n ivíspera ayé po'cs̈ans̈ʉjw itsowí̱jcapay judíujat.