Read Sayula Popoluca San Juan 2 Bible Online

San Juan 2 - Sayula Popoluca bible

San Juan 2

¹Imutu̱gupay s̈ʉjw it tu'c cʉ'pa't nʉ'jcopac Caná Galileajway na̱s̈, mit jem its-naj Jesús ima̱m.

²Mit i-imvita̱tcawey Jesús mit ipʉctampajyat en ayé cʉ'pa't.

³Mit iguicʉs̈cajau vinu, Jesús ima̱m iguinʉjmau: —Ca-itcʉjʉp vinu.

⁴Jesús inʉjmau: —Mamá, tʉnjawinup ayʉ̱́j. Canicoyp hora tʉs̈ajque's̈wa'n tʉmpoder.

⁵Ima̱m inʉmgʉs̈au jeme majyigapay: —Watca nu'pʉjʉn is̈nʉmgajámpay je'.

⁶Mit jem i-ijt seis tinaja de tsa' itucomgapay nʉ', itunicupujcʉjʉpay judíujat, ni'c we'n igui-acostumbrá̱tcaj. Mit cada tinaja i-i'cp mechc o tu̱gup majc nʉ'.

⁷Jesús inʉmgʉs̈au: —Apátsca ayʉ̱́j tinajajat mit nʉ'. Mit i-apatscau bien patsic.

⁸Cʉs̈ inʉmgʉs̈au: —Je'pca mit munʉ́s̈caja ma̱s̈ʉuwatpayna'. Mit imunʉs̈cajau.

⁹Mit ma̱s̈ʉuwatpayna' iproba̱t ayé nʉ' jatway vinu, mit igajawiwu jʉm imijn ayé, po ijawigau ayé majyipajyat ije'pcaway ayé nʉ'. Cʉs̈ iya̱s̈ noviona',

¹⁰mit inajau: —Nu'pʉjʉn jayau iyajcʉ'cp oyway vinu, mit cʉs̈wa'n igui-u̱jca may, iyacpama vinu corrienteway, po mi̱ inguarda̱tway oyway vinu hasta jinap.

¹¹Ayʉ̱́j milagru iwajtʉ'c Jesús itsʉ̱naj en ayé nʉ'jcopac Caná Galileajway na̱s̈, mit i-actujawigʉs̈ nu'pʉjʉn ni'c ijtʉp poder, mit ipʉctampajyat iguicupʉjcau.

¹²Mit cʉs̈ nʉs̈cau pa Capernaum, je' mit ima̱m, ije̱wajyat mit ipʉctampajyat, mit jem itángaj una̱c s̈ʉjwat.

¹³Itomij ayé ma̱s̈ʉjw pascua itsowí̱jcapay judíujat, Jesús nʉcs̈ pa Jerusalén,

¹⁴mit ipa̱tcʉs̈ templuni'c jeme ito'jcapay buejyat, borregujat mit palomajat, mit jemey itsʉ̱ngaj tumi̱ntigatspayna'jat.

¹⁵Mit iguiwajt tu'c tʉps̈ pa mo'an, i-acpichingʉs̈ nu'pʉjʉn templuni'c, mit we'ney ayé borregujat mit buejyat, mit i-acs̈is̈cada̱c tumi̱ntigatspayna'jat itumi̱jnat, mit i-acchi'tpitujcʉs̈au ime̱s̈ajat,

¹⁶mit inʉmgʉs̈au jeme ito'jcapay palomajat: —Acpíchinga yam ayʉ̱́jat, ingapʉjcajáj pa mercadu tʉnte̱t itʉjc.

¹⁷Wejpu'n ipʉctampajyat inijawigau jeme tsʉ̱napay ja'yic Dios ilibruni'c: “Tʉnwamp tʉs̈cuida̱twa'n intʉjc.”

¹⁸Mit judíujat iguinʉmgajau: —¿Ti milagru is̈actu-e'pcáj pa tʉjáwiga ni'c inaguep derechu pa is̈wat we'n?

¹⁹Ipo'ngʉs̈ Jesús: —Actogoydá̱jca ayʉ̱́j templu, mit en tu̱gup s̈ʉjw tʉs̈ajca's̈ʉ'cwa'natu.

²⁰Cʉs̈ judíujat iguinʉmgajau: —Cuarenta y seis s̈iwit itu-ajca's̈ʉ'jcaway ayʉ̱́j templu, ¿mit is̈jawi en tu̱gup s̈ʉjw is̈ajca's̈ʉ'cwa'n?

²¹Po je' inʉmo'jcʉp ni'c ayé templu icuerpu ayé.

²²Jemni'c cuandu ijutucta̱jc mam itsʉ̱nga á̱nimajat, inijawigau ipʉctampajyat ni'c we'n iguinʉjm, mit icupʉjcau tsʉ̱napay ja'yic Dios ilibruni'c, mit lo que inʉmway Jesús.

²³Itsʉ̱naj Jesús Jerusalén en ayé ma̱s̈ʉjw pascua, may jayajwat icupʉjcau je' ni'c i-is̈cau ayé milagrujat iwatpay.

²⁴Po Jesús iga-aguepcʉs̈awu confianza ni'c je' i-is̈capcʉs̈p nu'pʉjʉn jayajwat,

²⁵mit je' iganesita̱tu nepʉn iguinʉjmáj nat itsʉ̱na tu'c jayau, ni'c je' i-is̈cajpap cada jayau ijo̱jt.