Read Sayula Popoluca San Juan 20 Bible Online

San Juan 20 - Sayula Popoluca bible

San Juan 20

¹Mit primer s̈ʉjw ayé s̈ama̱na, María Magdalajway nʉcs̈ jopoytsu'mnaj pa mam i-it ayé á̱nimacʉt. Mit i-is̈ ni'c chi'tiganu ayé tsa' itu-atujcaway ayé á̱nimacʉt.

²Cʉs̈ nʉcs̈ pujʉ'c mam Simón Pedro mit mam jatu'cway pʉctampay jeme Jesús iwano'cpay, mit inʉmgʉs̈au: —Ichi'tcaway el Señor á̱nimacʉtni'c, mit tʉngajawigap jʉm iguiyájcaj.

³Mit pichingau Pedro mit jatu'cway pʉctampay mit nʉs̈cau mam i-it ayé á̱nimacʉt.

⁴Pujʉ'jcau inimechcatij, po jatu'cway pʉctampay pujʉ'c más mʉgʉc que Pedro, mit je' cojyʉ'c mam i-it ayé á̱nimacʉt.

⁵Mit nico'uda̱jcʉu pa i-e'ptʉgʉywa'n, mit i-is̈ ni'c jem i-it ayé sábanajat, po je' catʉgʉyu.

⁶Cʉs̈ coy Simón Pedro ni'c más mugus̈á̱m imijn, mit tʉgʉy á̱nimacʉtni'c, mit i-is̈ ayé sábanajat mam i-it,

⁷mit i-is̈wey ayé jamuc itugutucmo'ngaway Jesús icopac catumuyaguic ayé sábanajat, po aparte itsʉ̱na a-ʉ'pmuguic.

⁸Cʉs̈ tʉgʉyey jatu'c pʉctampay jeme cojyʉ'cway mam i-it ayé á̱nimacʉt, i-is̈ mit icupʉc.

⁹Ni'c igani-entendia̱tcap ayé tsʉ̱napay ja'yic Dios ilibruni'c, ni'c Jesús it ti ijutucta'cwa'n mam itsʉ̱nga á̱nimajat.

¹⁰Mit ayé pʉctampajyat pitujcanuw itʉcmat.

¹¹Po María pe'ta̱m itsʉ̱naj mit jʉy á̱nimacʉt-á̱m. Po merute ijʉ', nico'uda̱jcʉu pa i-e'ptʉgʉywa'n á̱nimacʉtni'c,

¹²mit i-is̈ mechc ángejlat cutígatsijcat mit po'pjamuc, mit jem itsʉ̱na tu'c ángel mam i-íjtʉj icopac Jesús, mit jatu'c ángel mam i-íjtʉj ita'jnat, mam iguiyájcajaj Jesús icuerpu.

¹³Mit inʉmgajau ayé to's̈ay: —¿Tini'c injʉ'? Inʉmgʉs̈au: —Tʉjʉyp ni'c ichi'tcau el Señor Jesús, mit tʉngajawip jʉm iguiyájcaj.

¹⁴Iguinʉjm we'n, e'jpituc mit i-is̈ Jesús ni'c jem itsʉ̱na, po igajawiwu te Jesús.

¹⁵Mit Jesús inʉjmawey ayé to's̈ay: —¿Tini'c injʉ'? ¿Pʉn inche'mp? Po María inʉmpayta ni'c je' ayé icuida̱tpay olivucujyat, mit inʉjmau: —Señor, te mi̱ inmunʉcs̈, nʉjmac jʉm is̈yajc, mit ʉ̱ tʉnmunʉcs̈áj.

¹⁶Jesús iguinʉjmau: —¡María! I-e'jpitujc je', inʉjmau: —¡Raboni! (Ayʉ̱́j inʉmo'jcʉp, Amayipay.)

¹⁷Jesús iguinʉjmau: —Camtsʉgac, ni'c tʉganicu'tp mam tʉnte̱t Dios. Po nʉs̈ mam tʉmpʉctampajyat jeme tʉnwangʉs̈pay, mit nʉmgʉs̈a ni'c tʉcu'táj mam itsʉ̱na tʉnte̱t Dios, mit mijchat in-e'pcapey as̈am inte̱jtat, mit je' ayé tʉnDios mit in-e'pcapey as̈am inDiosat.

¹⁸Cʉs̈ nʉcs̈ María Magdalajway pa iguinʉmgʉs̈awa'n oyway noticia ayé pʉctampajyat ni'c i-is̈way el Señor, mit je' inʉmgʉs̈au lo que je' iguinʉjmaway.

¹⁹Icutsu'ij nije'yu primer s̈ʉjw s̈ama̱na, mit wejpu'n atuguic tʉc-ajwat en ayé lugar mam ini-apʉcmujcʉjʉ ayé pʉctampajyat ni'c ipʉ̱tcau judíujat. Cʉs̈ min Jesús mit ique's̈ta̱jcʉs̈au i-es̈pu̱tujmat, mit inʉmgʉs̈au: —Pi aguepca paz injo̱tni'jcat.

²⁰Mit iguinʉmgʉ́s̈aj we'n, i-actu-is̈cʉs̈ icʉ'jat mit icabap. Mit ipʉctampajyat ji'cta̱jcau ijo̱jtat igui-ís̈caj el Señor.

²¹Cʉs̈ Jesús inʉmgʉs̈awatu: —Pi aguepca paz injo̱tni'jcat. As̈am tʉs̈ajyu't tʉnte̱t Dios, we'ney tʉ-ajyu'tcʉs̈wa'n mijchat.

²²Iguinʉjm we'n, s̈uj, mit inʉmgʉs̈au: —Pʉctsóuga Espíritu Santu.

²³Pʉn inactunʉmgámpay ima̱jlat, Dios iguiperdona̱táj. Mit pʉn inga-actunʉmgámpay ima̱jlat, ayé imutanáj nu'pʉjʉn mal iwatway.

²⁴Po Tomás tu'c de ayé doce pʉctampajyat, inʉ'jywayey Gemelo, catsʉ̱nawu jem mit je'jat i-ojyʉ'jc Jesús.

²⁵Cʉs̈ iguinʉmgajau japu̱t pʉctampajyat: —Tʉn-is̈caway el Señor. Po je' inʉmgʉs̈au: —Te tʉnga-e'jpap icʉ'jat mam iguipás̈cajaj clavusat, mit te tʉngacojmap tʉncʉ'jʉjp mam itʉgʉygaj clavusat, mit te tʉngacojmap tʉncʉ' icabapni'c, tʉngacupʉgáj.

²⁶Inas̈ ocho s̈ʉjwat, tsʉ̱ngawatu tujugum ipʉctampajyat, mit jemey itsʉ̱naj Tomás. Mit atuguic tʉc-ajwat itsʉ̱ngaj mit Jesús coyatu mit nitenda̱jcʉu es̈pu̱tum, mit inʉmgʉs̈au: —Pi aguepca paz injo̱tni'jcat.

²⁷Cʉs̈ inʉjmau Tomás: —Yac yam incʉ'jʉjp mit e'p tʉncʉ'jat, mit ajcutomi-ey incʉ' tʉncabapni'c mit com. Mit camjaduda̱twit, más oy pi cupʉc.

²⁸Cʉs̈ Tomás ipo'n: —¡Mi̱j ayé tʉ̱Dios, mit mi̱ is̈manda̱tp!

²⁹Jesús iguinʉjmau: Tomás, ni'c ʉ̱ is̈-is̈, is̈cupʉc. Tsʉ̱ngáj oy jeme iga-e'pcapay Dios mit cupʉjcap.

³⁰Mit Jesús iwat japu̱t milagrujat mam igui-ís̈caj ipʉctampajyat, po aye'jat catsʉ̱nap ja'yic en ayʉ̱́j libru.

³¹Po ayʉ̱́j cosajat tsʉ̱nap ja'yic pa pi cupʉjca ni'c Jesús ayé Cristu, Dios iway, ni'c we'n te incupʉjcap je', inaguepcáj vida cacʉs̈ámpay.