Read Sayula Popoluca San Juan 21 Bible Online

San Juan 21 - Sayula Popoluca bible

San Juan 21

¹Mit cʉs̈ Jesús ique's̈ta̱jcʉs̈awatu ipʉctampajyat laguna-auni'c Tiberias. Mit yename iguique's̈ta̱jcʉ́s̈aj.

²Apʉcmuguic itsʉ̱nga Simón Pedro, Tomás inʉ'jywayey Gemelo, Natanael jeme tsʉ̱naway nʉ'jcopac Caná Galileajway na̱s̈, Zebedeo iwajyat, mit jamechc ipʉctampajyat.

³Simón Pedro inʉmgʉs̈au: —Tʉnʉs̈p ma̱cpay. Mit je'jat iguinʉmgajau: —Tʉnʉs̈cámpey ʉjtsat mit mi̱. Nʉs̈cau mit tʉgʉygau en tu'c aj. Mit ayé tsu' neti iga-actangawu.

⁴Mit tom icus̈ʉwiwa'n, coy Jesús laguna-auni'c. Po ipʉctampajyat igajawigawu te Jesús.

⁵Mit inʉmgʉs̈au: —Mijchat tʉ-e'pcʉs̈pay as̈am tʉ̱wajyat, ¿inaguepcap tanti nacayámpay? Mit iguipo'ngau: —Tʉnga-aguepcap.

⁶Mit inʉmgʉs̈au: —Ca'tsca intsamajcat i-oyimay laj ayé aj, mit impa̱tcáj. Mit ica'tstʉgʉygau, cʉs̈ hasta ca-oyapate igui-acpíchinga ni'c mayo'c acs̈ i-íjtʉj.

⁷Cʉs̈ ayé pʉctampay jeme Jesús iwano'cpay inʉjmau Pedro: —¡E'p, el Señor ayé! Iguimarajw Simón Pedro ni'c el Señor ayé, icom ijamuc (ni'c chi'tigate iguimuyo'jy), mit nica'tstʉ́gʉjyʉu lagunani'c.

⁸Mit ayé pʉctampajyat jeme tangaway mingau ajni'c, mit iquebeptacmingau ayé tsamac ijtʉway acs̈, ni'c cayagatsu itsʉ̱ngaj laguna-auni'c, como cien metru.

⁹Ipíchingaj na̱s̈ni'c, i-is̈cau ni'c itnup jʉntʉ̱jts, mit tu'c acs̈ jʉntʉ̱tsyucuinm, mit itey ma̱s̈anʉ̱n.

¹⁰Jesús inʉmgʉs̈au: —Muminga una̱c acs̈ jeme je'naj inactangaway.

¹¹Cu't ajni'c Simón Pedro, mit i-acpichin ayé tsamac pa na̱s̈ni'c. Mit patsic itsʉ̱naj. Ijtʉu ciento cincuenta y tres puru majatway acs̈, po majawe'naj catetu ayé tsamac.

¹²Jesús inʉmgʉs̈au: —Mi'n cayga. Mit ayé pʉctampajyat como ijawigau ni'c je' el Señor, iga-ucyo'tcawu pʉn je'.

¹³Cʉs̈ Jesús icutomigʉs̈ mit ipʉc ayé ma̱s̈anʉ̱n mit imoygʉs̈, mit we'ney ayé acs̈.

¹⁴Ayʉ̱́j ayé imutu̱gupay viaje iguique's̈ta̱jcʉ́s̈aj Jesús ipʉctampajyat después ijutucta̱jc mam itsʉ̱nga á̱nimajat.

¹⁵Icʉ́s̈caj caypay, Jesús inʉjmau Simón Pedro: —Simón, Jonás iway, ¿is̈wamp ʉ̱ más que incumpajlat? Cʉs̈ iguipo'n: —Jo̱, Señor, mi̱ injawip ni'c ʉ̱ tʉwamp. Mit je' inʉjmau: —Ajque's̈cʉs̈a tʉnjayajwat, ni'c je'jat as̈am borregujat jeme cunʉs̈igapay.

¹⁶Cʉs̈ inʉjmawatu: —Simón, Jonás iway, ¿is̈wamp ʉ̱? Pedro iguipo'n: —Jo̱, Señor, mi̱ injawip ni'c ʉ̱ tʉwamp. Mit inʉjmau: —Cuida̱tcʉs̈ tʉnjayajwat as̈am nas̈cuida̱t borregujat.

¹⁷Mit cʉs̈ inʉjmau imutu̱gupay viaje: —Simón, Jonás iway, ¿is̈wamp ʉ̱? Cʉs̈ tu'no'c ijo̱jt Pedro ni'c iguinʉjmau tu̱gup viaje: —¿Is̈wamp ʉ̱? Mit iguipo'n: —Señor, mi̱ injawip nu'pʉjʉn, mi̱ injawip ni'c tʉwamp. Jesús inʉjmau: —Ajque's̈cʉs̈a tʉnjayajwat, ni'c je'jat as̈am borregujat jeme cunʉs̈igapay.

¹⁸Iyacs̈ta'cway tʉnʉjmap: Cuandu más miyaunaj, incom injamuc mit minʉcs̈ mamu is̈wa'n. Po cuandu inya'wayiwa'n, jatu'c jayau is̈cutsumda'gáj mit is̈munʉs̈áj mam is̈cawa'n inyʉs̈wa'n.

¹⁹Inʉjmau we'n pa igui-actujawiwa'n nat i-o'cwa'n, mit we'n i-oyninʉmáj Dios. Iguinʉjm we'n, inʉjmawatu: —Natspoguiyac.

²⁰I-e'jpitujc Pedro, i-is̈ ni'c iguinatspoguigap ayé pʉctampay Jesús iwano'cpay. Ayé nije'yu jeme tsʉ̱naway tom mit Jesús cuandu i-u̱cmá̱gaj, mit jeme inʉjmaway: “Señor, ¿pʉn ayé is̈to'ctʉgʉyámpay?”

²¹Igui-is̈ Pedro ayé pʉctampay, inʉjmau Jesús: —Señor, ¿ti iwatáj ayʉ̱́j jayau?

²²Jesús iguinʉjmau: —Te ʉ̱ tʉnwamp je' ma tan hasta tʉmi'nwa'n, mi̱ camwat cuenta. Natspoguiyac mi̱.

²³Mit ayé inʉmway siguia̱t iguinʉmga nu'pʉjʉn hermanujat ni'c ayé pʉctampay ca-o'gáj. Po Jesús iganʉmu ni'c ca-o'gáj, po inʉm: “Te ʉ̱ tʉnwamp je' ma tan hasta tʉmi'nwa'n, mi̱ camwat cuenta.”

²⁴Ʉ̱j ayé tʉpʉctampay tʉ-actujawigʉs̈pay ayʉ̱́j cosajat, mit ʉ̱ tʉnja'y ayʉ̱́j cosajat, mit tʉnjawip ni'c iyacs̈ta'cway lo que tʉnyʉmpay.

²⁵Mit Jesús iwat japu̱t cosajat, mit ma ja'yga-ate nu'pʉjʉn, tʉs̈jawi ni'c catʉgʉybʉ'nájate en ayʉ̱́j mundu ayé librujat ija'ygámpay. Yam icʉs̈.