Read Sayula Popoluca San Juan 3 Bible Online

San Juan 3 - Sayula Popoluca bible

San Juan 3

¹It tu'c jayau fariseu inʉ'jy Nicodemo, mit je' tu'c jefe mam itsʉ̱nga judíujat.

²Ayʉ̱́j jayau min tsu'm mam Jesús, mit inʉjmau: —Amayipay, tʉnjawigap ni'c Dios is̈ajyu't pa amayipay, ni'c nepʉn ca-oyap iguiwat ayʉ̱́j milagrujat inwatpay, te Dios catsʉ̱nap mit je'.

³Mit Jesús inʉjmau: —Iyacs̈ta'cway tʉnʉjmap ni'c te tu'c jayau canamjatpatu, ca-oyáj igui-e'p mam Dios imanda̱t.

⁴Iguinʉjmau Nicodemo: —¿Nat tu'c jayau inamjatwa'natu te na'wayanu? ¿Oyapatu itʉgʉy ima̱m itinchayjo̱jtugum pa iguita'gájatu?

⁵Jesús ipo'n: —Iyacs̈ta'cway tʉnʉjmap ni'c jeme canamjatpay mit nʉ' mit Espíritu Santu, ca-oyáj itʉgʉy mam Dios imanda̱t.

⁶Lo que tu'c jayau iwatpay, ayé iwatp tu'c jayau. Mit lo que iwatpay Espíritu Santu, ayé inamwatcʉs̈p jayajwat.

⁷Camnigu-épijyʉ lo que tʉnajapay ni'c jayajwat itp ti inamjatcawa'natu.

⁸Ayé s̈e'm s̈ujp mamu iguiwa'n, mit inmarap is̈uj, po ingajawip jʉm imi'n ne jʉm inʉs̈. Wename-ey nu'pʉjʉn jayajwat inamwatcʉs̈pay Espíritu Santu.

⁹Nicodemo inʉmatu: —¿Nat oyap ijat we'n?

¹⁰Jesús ipo'n: —¿Mi̱ mi-amayipay Israelway mit ingajawip ayʉ̱́jway?

¹¹Iyacs̈ta'cway tʉnʉjmap ni'c tʉncotscap lo que tʉnjawigapay, mit tʉnyʉmgap lo que tʉn-is̈caway, mit ingapʉctsougap lo que tʉnyʉmgapay.

¹²Te tʉnʉmgʉs̈away cosajat jeme jatcapay na̱s̈ni'c, mit ingacupʉjcap ayé, ¿natpaj is̈cupʉjcawa'n te tʉnʉmgʉs̈ap cosajat tsajpni'cway?

¹³’Nepʉn cacu'tu tsajpni'c. Ʉ̱jyu jeme tʉjatway jayau tʉmanac tsajpni'c, mit tʉtsʉ̱napey tsajpni'c.

¹⁴Mit as̈am Moisés igui-ajca's̈ʉ'jc ayé tsanay cuyni'c mam igatsʉ̱na nepʉn, wename-ey ʉ̱ jeme tʉjatway jayau tʉs̈ajca's̈ʉ'jcáj cunu̱s̈ni'c,

¹⁵pa nu'pʉjʉn tʉs̈cupʉjcapay ʉ̱ magatogoyga, po ma aguepca vida jeme cacʉs̈ámpay.

¹⁶’Ni'c Dios iwano'jcʉs̈ jayajwat ayʉ̱́j mundujway hasta iyac iway tu'gujyuway, pa nu'pʉjʉn icupʉjcámpay je' magatogoyga, po ma aguepca vida jeme cacʉs̈ámpay.

¹⁷Ni'c Dios iga-ajyu'tu iway en ayʉ̱́j mundu pa iguicondena̱tcʉs̈wa'n jayajwat ayʉ̱́j mundujway, po i-ajyu't pa iguisalva̱tcʉs̈wa'n.

¹⁸’Jeme icupʉcpay je', cajacondena̱tic, po jeme igacupʉcpay je', condena̱tiganu ayé ni'c iganicupʉjcap Dios iway tu'gujyuway.

¹⁹Ayʉ̱́j ayé itucondena̱tpay ayʉ̱́j mundu, ni'c minway en ayʉ̱́j mundu jeme nas̈moygapay luz, mit jayajwat más iwangau chitimic que luz, ni'c iwatcap mal.

²⁰Ni'c nu'pʉjʉn jayau iwatpay mal, igawamp ayé luz, mit camimp mam i-it ayé luz, magaque's̈ ni'c iwatp mal.

²¹Po jeme iwatpay lo que iyacs̈ta'cway mimp mam i-it luz, pa nu'pʉjʉn ma e'pca ni'c iwatp lo que Dios iwampay.

²²Mit cʉs̈ min Jesús mit ipʉctampajyat pa Judeajway na̱s̈, mit tsʉ̱nau jem mit je'jat, mit nʉ'gutem.

²³Juan nʉ'gutemey en tu'c lugar inʉ'jy Enón mam i-ito'c nʉ', tom Salim, mit mingau jayajwat mit inʉ'gutemgʉs̈.

²⁴Ni'c Juan iganicomgap cuytujugum wejpu'n.

²⁵Wejpu'n ni-ucyo'tcʉjʉu Juan ipʉctampajyat mit judíujat nat inilimpia̱tcʉjʉwa'n as̈am judíujat iguiwátcaj.

²⁶Mit mingau mam itsʉ̱na Juan mit inʉmgajau: —Amayipay, ayé jayau inmuyo'yway tuganʉ-ájw Jordán, jeme inyʉmway tʉ-is̈cápca ʉjtsat, jinap je' nʉ'gutemp, mit nu'pʉjʉn jayajwat mingap mam je'.

²⁷Juan inʉmgʉs̈au: —Tu'c jayau ca-oyap iguiwat neti pa Dios, te Dios igamajyip.

²⁸Mijchat injawigap ni'c tʉnyʉm: Tʉgaje' Cristu, po Dios tʉs̈ajyu'jtʉ'c, mit Cristu min tʉnmugus̈á̱m.

²⁹Jeme ijtʉpay inovia, inovio ayé. Po inovio i-amigu tsʉ̱napey ilajni'c mit ji'go'cp ijo̱jt ni'c noviona' imunicʉ'pa̱jtʉp inovia. We'ney ʉ̱ ji'go'cpey tʉnjo̱jt iyacs̈ta'cway cuandu jayajwat iguipʉctsóuga Jesús.

³⁰Más oy jayajwat ma oyninʉmga je' que tʉs̈-oyninʉmgáj ʉ̱.

³¹’Jeme mimpay yucm, je' imanda̱tp nu'pʉjʉn. Jeme tsʉ̱napay en ayʉ̱́j mundu, je' cotsp as̈am jayajwat ayʉ̱́j mundujway, ni'c je' ipensa̱tp solo itpay en ayʉ̱́j mundu. Jeme mimpay tsajpni'c, jemé ayé imanda̱tpay nu'pʉjʉn.

³²Mit inʉmp lo que i-is̈way mit imaraway, po nepʉn igapʉctso̱p lo que inʉmpay.

³³Jeme ipʉctso̱pay lo que inʉmpay, ayé tamp as̈am testigu ni'c Dios inʉmp iyacs̈ta'cway.

³⁴Ni'c jeme Dios i-ajyu'tway, je' inʉmp lo que Dios inʉmpay, ni'c Dios imoyp nu'pʉjʉn ipoder pa je'.

³⁵Dios Nate̱jat iwamp iway, mit iyacway nu'pʉjʉn icʉ'jugum.

³⁶Jeme icupʉjcapay Dios iway ijtʉp vida cacʉs̈ámpay, po jeme igajayaumajyapay iway, ca-ijtʉ̱́j vida, mit Dios icastiga̱táj mʉgʉc ayé jayau pa siempre.