Read Sayula Popoluca San Juan 4 Bible Online

San Juan 4 - Sayula Popoluca bible

San Juan 4

¹El Señor Jesús ijawiu ni'c fariseujat imaraugau ni'c je' i-acmucp mit inʉ'gutemp más pʉctampajyat que Juan.

²Mit Jesús iganʉ'gutemu nepʉn, po ipʉctampajyat jo̱.

³Cʉs̈ je' pichin Judeajway na̱s̈ mit nʉcs̈atu pa Galilea.

⁵Cʉs̈ icojy en tu'c nʉ'jcopac Samariajway inʉ'jy Sicar. Ayé tomo'c ayé na̱s̈ itumuyacway Jacob iway José.

⁶Mit jem i-ijt ayé nʉ'cʉt iyacway Jacob. Mit cʉs̈ Jesús igui-ajcʉs̈au ijo̱jt ayé to̱u, mit nitsʉ̱nda̱jcʉu jemujyu nʉ'cʉt-á̱m ni'c pu̱ts̈ʉjwanu.

⁷Cʉs̈ min nʉ'pʉcpay tu'c to's̈ay Samariajway, mit Jesús inʉjmau: —Mo'c s̈ʉ̱n nʉ' pa tʉs̈-u'cwa'n.

⁸Ni'c ipʉctampajyat nʉs̈cau nʉ'jcopacni'c iguijuyga ti icaygámpay.

⁹Iguinʉjmau ayé to's̈ay Samariajway: —¿Tini'c ʉ̱ is̈yo'jtap nʉ' pa is̈-u'cwa'n? ni'c mi̱ mijudíu mit ʉ̱ tʉSamariajway. (Inʉm we'n ni'c judíujat mit Samariajatway canipʉjcʉjʉp.)

¹⁰Jesús ipo'n: —Pi is̈cápate favor iyacpay Dios mit pʉn ayé is̈nʉmapay: Mo'c s̈ʉ̱n nʉ' pa tʉs̈-u'cwa'n, mi̱ inyo'jtáj, mit je' is̈mo'ájate ayé nʉ' iyacpay vida.

¹¹Ayé to's̈ay iguinʉjmau: —Señor, inga-aguep ti intu-acpichinámpay nʉ', mit jugo'c ayʉ̱́j nʉ'cʉt. ¿Jʉmpaj is̈-aguep ayé nʉ' iyacpay vida?

¹²¿Is̈jawi mi̱ más mi-oyijyʉp que Jacob nate̱jtat jeme nas̈yajcajaway ayʉ̱́j nʉ'cʉt? mit je'jat i-u̱jcau mit iwajyat mit i-aníma̱jtat.

¹³Jesús ipo'n: —Pʉn i-u̱cpay ayʉ̱́j nʉ', nʉ-u̱go'jcʉ̱́jatu,

¹⁴po pʉn i-u̱cpay ayé nʉ' tʉnmo'ámpay, cajanʉ-u̱go'jcʉ̱́j nunca. Po ayé nʉ' tʉnmo'ámpay je', jatáj ijo̱jtugum as̈am tu'c nʉ' mu'tí̱cpay, mit iguimo'áj vida jeme cacʉs̈ámpay.

¹⁵Ayé to's̈ay iguinʉjmau: —Señor mo'ac ayé nʉ' pa tʉgajanʉ-u̱go'jcʉ, mit pa tʉgajami'nwa'n yam tʉs̈pʉc.

¹⁶Jesús inʉjmau: —Nʉs̈ ya's̈ inya'u, mit mínga yam.

¹⁷Iguipo'n ayé to's̈ay: —Tʉnga-aguep tʉnya'u. Jesús inʉjmau: —Oyo'gu is̈nʉjm ni'c inga-aguep inya'u,

¹⁸ni'c inaguepway mogos̈p inya'u, mit jinap inaguepay caje' inya'u. Ayʉ̱́j inyʉmpay iyacs̈ta'cway.

¹⁹Iguinʉjmau ayé to's̈ay: —Señor, tʉs̈jawi ni'c mi̱ miprofeta i-ajyu'tway Dios.

²⁰Tʉnte̱jtat ámbanuway i-adora̱tcau Dios en ayʉ̱́j copac, mit mijchat inyʉmgap ni'c Jerusalén ayé lugar mam itp ti nas̈-adora̱twa'n Dios.

²¹Jesús inʉjmau ayé to's̈ay: —Cupʉgac ni'c cojáj ayé hora inga-adora̱tcáj Dios Nate̱jat ne en ayʉ̱́j copac ne Jerusalén.

²²Mijchat ingajawigap pʉn inadora̱tcapay. Ʉjtsat tʉnjawigap pʉn tʉnadora̱tcap ni'c Dios iwajnʉ'c iguisalva̱tcʉs̈wa'n judíujat.

²³Mit cojáj hora mit jinap coyway hora cuandu ayé i-adora̱tcapay iyacs̈ta'cway i-adora̱tcáj Dios Nate̱jat ijo̱tni'jcat mit i-adora̱tcáj iyacs̈ta'cway, ni'c we'ney Dios Nate̱jat iche'ngʉs̈p jeme je' igui-adora̱tcapay wename.

²⁴Dios espíritu ayé, mit jeme i-adora̱tcapay je', itp ti igui-adora̱tcawa'n ijo̱tni'jcat, mit ma adora̱tca iyacs̈ta'cway.

²⁵Ayé to's̈ay iguinʉjmau: —Tʉnjawip ni'c mi'náj ayé Mesías, ayé Cristu jeme Dios i-ajyu'támpay. Imi'nwa'n, je' nas̈actujawigáj nu'pʉjʉn.

²⁶Jesús inʉjmau: —Ʉ̱j ayé tʉmucotspay.

²⁷Mit wejpu'n imíngaj ipʉctampajyat, nigu-épigʉjʉu ni'c imu-ampi̱p tu'c to's̈ay, po majawe'naj nepʉn iganʉmu ti i-ucyo'tp o ti itumu-ampi̱p.

²⁸Mitcʉs̈ ayé to's̈ay iyac imajc, mit nʉcs̈ nʉ'jcopacni'c, mit inʉmgʉs̈au jayajwat:

²⁹—Mi'n e'pca tu'c jayau tʉs̈nʉjmaway nu'pʉjʉn tʉnwatway en tʉmvida. ¿Caje'ap ayʉ̱́j ayé Cristu i-ajyu'tway Dios?

³⁰Mit cʉs̈ pichingau nʉ'jcopacni'c, mit mingau mam je' itsʉ̱na.

³¹En ayé ratu ayé pʉctampajyat iguinʉmgajau: —Amayipay, cáyama.

³²Je' inʉmgʉs̈au: —Ʉ̱ tʉnaguep tu'c cayan tʉncayámpay mit mijchat ingajawigap ti ayé.

³³Mit cʉs̈ ayé pʉctampajyat inʉmgau je'jatu: —¿Is̈jawi tambʉn iguimumijnau ti icayámpay?

³⁴Jesús inʉmgʉs̈au: —Ayʉ̱́j ayé tʉncayan: tʉs̈watwa'n ti iwampay ayé tʉs̈ajyu'tway, mit pa tʉs̈cʉs̈wa'n aye yos̈ tʉs̈moyway.

³⁵Mijchat inyʉmgap ni'c togoypnaj mactas̈p po' hasta i-itwa'n cosecha. Po tʉnʉmgʉs̈ap: E'pca ayé jayajwat ni'c je'jat as̈am tu'c cam llega̱tigo'cway pa nas̈cosecha̱twa'n ni'c je'jat listu pa icupʉjcawa'n.

³⁶Mit jeme i-actugupʉjcámpay ayé jayajwat, ayé as̈am jeme cosecha̱tcapay, mit actsʉ̱ngáj. Mit jeme cupʉjcámpay, ipʉctsougáj vida cacʉs̈ámpay, pa ma ji'jca ijo̱jtat inimechcatij, jeme ni̱pay mit jeme cosecha̱tpay.

³⁷Ni'c ayʉ̱́j iyacs̈ta'cway inʉmgapay: “Itp tu'c jeme ni̱pay mit jatu'c jeme cosecha̱tpay.”

³⁸Tʉ-ajyu'tcʉs̈way pa is̈cosecha̱tcawa'n lo que ingani̱pcaway. Japu̱jtat yos̈watcau pa ini̱pcawa'n, mit mijchat mitʉgʉygau últimu iyos̈ni'jcat.

³⁹Mit mayo'c Samariajatway tsʉ̱ngaway en ayé nʉ'jcopac icupʉjcau Jesús ni'c imaraugau lo que inʉmway ayé to's̈ay, ni'c je' i-actujawigʉs̈, inʉm: “Je' tʉs̈najau nu'pʉjʉn tʉnwatway.”

⁴⁰Mit cʉs̈ mingau mam Jesús ayé Samariajatway, mit inʉmgajau ni'c ma tan jem mit je'jat. Mit jem itajn mechc s̈ʉjw.

⁴¹Mit icupʉjcau más jayajwat iguimáraugaj lo que je' inʉmway,

⁴²mit inʉmgajau ayé to's̈ay: —Jinap tʉncupʉjcap je', caje'yu ni'c is̈actujawigau, po ʉjtsat tʉnmaraugaway je', mit tʉnjawigap ni'c iyacs̈ta'cway ayʉ̱́j ayé Cristu jeme isalva̱támpay jayajwat ayʉ̱́j mundujway.

⁴³Icʉs̈ mechc s̈ʉjw, pichin jem mit nʉcs̈ pa Galileajway na̱s̈.

⁴⁴Ni'c Jesús inʉm ni'c tu'c profeta i-ajyu'tway Dios iga-oyninʉmgap itʉcmayna̱s̈.

⁴⁵Po icojy Galilea, iguipʉctsougau Galileajatway ni'c i-is̈cau nu'pʉjʉn iwatway Jerusalén ma̱s̈ʉuni'c, ni'c je'jat oygawey ma̱s̈ʉutso̱pay.

⁴⁶Cʉs̈ Jesús coywatu nʉ'jcopac Caná Galileajway na̱s̈ mam igui-acjajt nʉ' vinu. Mit it Capernaum tu'c rey mit je' ijtʉu tu'c jayau itumuyacway tu'c mʉjway cargu, mit ayé jayau tu'nij iway.

⁴⁷Iguimarajw ayʉ̱́j jayau ni'c Jesús minway Judeajway na̱s̈ mit coy Galilea, je' min mam Jesús itsʉ̱na mit iyo'jtau favor ma nʉcs̈ Capernaum pa igui-ac-oytajnáj iway, ni'c o'go'jcʉnup.

⁴⁸Cʉs̈ Jesús inʉjmau: —Te inga-e'pcap milagrujat mit is̈acnigu-épigʉjʉpay, migacupʉjcap.

⁴⁹Mit ayé mʉjayau iguinʉjmau: —Señor, jaga jaran antes i-o'cwa'n tʉnwáy.

⁵⁰Jesús inʉjmau: —Oyap inyʉs̈ intʉcm, ni'c inway ca-o'gáj. Mit ayé jayau icupʉc Jesús iguinʉjmaway, mit nʉcs̈.

⁵¹Icojy tom itʉcm, imozojat pichingau iguipa̱jtsougap mit inʉmgajau: —Ca-o'gu inway.

⁵²Mit i-ucyo'tcʉs̈ ti hora ichu̱chij oytampay. Mit iguinʉmgajau: —Tʉ'jy a las siete iguiyacnuw jʉjn.

⁵³Wejpu'n tu'nijwayna' ite̱t ijawiu ni'c ayé hora cuandu Jesús iguinʉjmau: “Ca-o'gáj inway.” Mit je' icupʉc mit nu'pʉjʉn itʉcm tsʉ̱ngapay.

⁵⁴Mit ayʉ̱́j ayé imumechpacway milagru iwatway Jesús ipichijn Judeajway na̱s̈ pa inʉcs̈wa'n Galilea.