Read Sayula Popoluca San Juan 5 Bible Online

San Juan 5 - Sayula Popoluca bible

San Juan 5

¹Mit cʉs̈ it tu'c ma̱s̈ʉjw iwatcaway judíujat, mit Jesús nʉcs̈ pa Jerusalén.

²Mit Jerusalén itp tu'c nʉ'to'y tom ayé puerta mam inas̈ca borregujat. Ayé nʉ'to'y inʉ'jy hebreo-auni'c Betesda, mit ayé ijtʉu cinco corredorwájat.

³Mit jem icʉ́mnagaj may jayajwat tu'nijatway, winchat, cu̱s̈ujat mit paralíticujat, mit je'jat i-atsʉ̱ngap hasta itsugutwa'n ayé nʉ'.

⁴Ni'c inʉmgap ni'c it tiempu imanac tu'c ángel pa mam i-it ayé nʉ'to'y, mit i-actsugutp ayé nʉ'. Mit itsugutwa'n ayé nʉ', jeme tʉgʉjyʉ'cpay nʉ'jugum oytamp jaran de jʉmaygapa'tu enfermedáj ijtʉpay.

⁵Mit tsʉ̱nau jem tu'c jayau jeme tsʉ̱naway tu'nij treinta y ocho s̈iwitanu.

⁶Igui-is̈ Jesús mam icʉmna, mit iguijawij ni'c jego'cway itsʉ̱na wename, inʉjmau: —¿Inwamp in-oytanwa'n?

⁷Iguipo'n ayé jayau tu'nijway: —Señor, tʉnga-aguep pʉn tʉs̈comámpay nʉ'to'yni'c itsugutwa'n ayé nʉ', mit mientras tʉnʉs̈p, jatu'c jayau tʉgʉjyʉ'cp.

⁸Jesús inʉjmau: —Ca's̈ʉ'c, pʉc into'c, mit yo'y.

⁹Mit oytan jaran ayé jayau, mit ipʉc ito'c mit yo'y. Mit wejpu'n tu'c po'cs̈ans̈ʉjw.

¹⁰Mit cʉs̈ ayé judíujat iguinʉmgajau ayé jayau jeme oytanway: —Jinap po'cs̈ans̈ʉ́jw. Ca-oy is̈tsʉm into'c.

¹¹Je' ipo'ngʉs̈: —Jeme tʉs̈ac-oytanway je'yu tʉs̈najau: “Pʉc into'c mit yo'y.”

¹²Mit cʉs̈ i-ucyo'tcau: —¿Pʉn ayé is̈nʉjmaway: “Pʉc into'c mit yo'y”?

¹³Mit ayé jeme oytanway igajawiwu pʉn ayé, ni'c Jesús pichin mam i-it ayé jayaujuc tsʉ̱ngaway jem.

¹⁴Cʉs̈ Jesús ipa̱t ayé jayau templuni'c, mit inʉjmau: —E'p ni'c mi-oytanway. Camjawat mal pi is̈camijnac tanti más mʉgʉcway.

¹⁵Ayé jayau nʉcs̈, mit i-ajque's̈cʉs̈au judíujat ni'c Jesús ayé igui-ac-oytanway.

¹⁶Mit jemni'c judíujat ipo'ctangau Jesús, mit iche'ngajau ilaj pa igui-ago'jcawa'n, ni'c Jesús iwat ayʉ̱́j cosajat po'cs̈ans̈ʉuni'c.

¹⁷Mit Jesús ipo'ngʉs̈: —Tʉnte̱t Dios yos̈watp hasta jinap, mit ʉ̱ tʉyos̈watpey.

¹⁸Jemni'c judíujat más iwangau igui-ago'jcawa'n, caje'yu ni'c igawatu cuenta ayé po'cs̈ans̈ʉjw, po ni'c je' inʉm ni'c Dios ayé ite̱t, mit niwajtʉu as̈am Dios.

¹⁹Mit Jesús ipo'ngʉs̈: —Iyacs̈ta'cway tʉnʉmgʉs̈ap ni'c ʉ̱ Dios tʉs̈wáy mit ca-oyap tʉs̈wat neti ʉ̱jyu, po tʉnwatp lo que tʉn-e'pay iguiwat tʉnte̱t Dios, ni'c nu'pʉjʉn iwatpay tʉnte̱t Dios, we'ney ʉ̱ tʉs̈watwa'n.

²⁰Ni'c tʉnte̱t Dios tʉs̈wamp, mit tʉs̈actu-e'p nu'pʉjʉn je' iwatpay, mit tʉs̈actu-e'páj cosajat más oymanajcatway pa mijchat pi nigu-épigʉjʉ.

²¹Ni'c as̈am tʉnte̱t Dios igui-acjutucta̱jcʉs̈ á̱nimajat mit imoygʉs̈p vida, we'ney ʉ̱ tʉnmoygʉs̈p vida pʉn tʉnwa'námpay.

²²Ni'c tʉnte̱t Dios nepʉn igajuzga̱tp, po ʉ̱ tʉs̈moy poder pa tʉs̈-arregla̱twa'n nu'pʉjʉn,

²³pa nu'pʉjʉn jayajwat ma tʉs̈-oyninʉmgac ʉ̱ as̈am igui-oyninʉ́mga tʉnte̱t Dios. Jeme tʉs̈ca-oyninʉmpay ʉ̱, iga-oyninʉmpey tʉnte̱t Dios jeme tʉs̈ajyu'tway.

²⁴’Iyacs̈ta'cway tʉnʉmgʉs̈ap: Jeme imarapay lo que tʉnyʉmpay, mit icupʉcp Dios jeme tʉs̈-ajyu'tway, ijtʉp vida jeme cacʉs̈ámpay. Mit catsʉ̱náj condena̱tic mit cajatsʉ̱nap as̈am o'guic, po ijtʉnup vida.

²⁵Iyacs̈ta'cway tʉnʉmgʉs̈ap: Cojáj hora, mit coyway hora, cuandu o'guijcatway imaraugáj icotswa'n Dios iway, mit jeme imaraugámpay, itcʉjʉ́j vida.

²⁶Ni'c as̈am tʉnte̱t Dios je'yu iyacp vida, we'ney tʉs̈moy pa tʉs̈yacwa'n vida ʉ̱.

²⁷Mit we'ney ʉ̱ tʉs̈moy poder pa tʉ-arregla̱twa'n, ni'c ʉ̱j ayé tʉjatway jayau.

²⁸Camnigu-épigʉjʉ ni'c tʉnʉmgʉs̈au cojáj hora cuandu nu'pʉjʉn tsʉ̱ngapay á̱nimacʉtʉm tʉs̈maraugáj tʉs̈mucotscʉs̈wa'n.

²⁹Mit pichingáj á̱nimajat. Jeme iwatcaway oy jutucta̱jcáj pa i-itcʉjʉwa'n vida, po jeme iwatcaway mal jutucta̱jcáj pa iguicondena̱tcawa'n.

³⁰’Ʉ̱jyu ca-oyap tʉs̈wat neti. As̈am tʉs̈marau, wename tʉ-arregla̱t. Mit tʉ-arregla̱tp yacs̈ic ni'c tʉngache'mp pa tʉs̈watwa'ñ-jyu tʉnwampay, po pa tʉs̈watwa'n lo que iwampay tʉnte̱t Dios jeme tʉs̈ajyu'tway.

³¹Ni'c te ʉ̱jyu tʉ-actujawigʉs̈p lo que tʉnwatpay, inʉmgáj ni'c caje' iyacs̈ta'cway lo que tʉnyʉmpay.

³²Itp jatu'c jeme is̈actujawigapay lo que tʉnwatpay, mit tʉnjawip ni'c iyacs̈ta'cway lo que inʉmpay de ʉ̱.

³³Mijchat inajyu'tcau mandajwatpajyat pa mam itsʉ̱na Juan, mit je' is̈actujawigawey lo que iyacs̈ta'cway.

³⁴Po ʉ̱ tʉnganesita̱tp nejʉmay jayau inʉmámpay nat ʉ̱ tʉtsʉ̱na, po tʉ-actujawigʉs̈p ayʉ̱́j pa pi nisalva̱tcʉjʉ.

³⁵Juan as̈am tu'c jʉmbola jeme tininway mit jeme ta'cs̈way, mit mijchat pa tu'c tiempujyu inwangau is̈nijatcawa'n ayé luz inʉmdacyo'yway.

³⁶Po ʉ̱ tʉnaguep tu'c jeme más ijawipay nat ʉ̱ tʉtsʉ̱na, mit ayé más mʉjninʉmic que Juan. Ni'c tʉnte̱t Dios tʉs̈moy tu'c yos̈ pa tʉs̈cʉs̈wa'n, mit ayé yos̈ nije'yu tʉnwatpay, is̈actujawigap ni'c tʉnte̱t Dios tʉs̈ajyu't.

³⁷We'ney tʉnte̱t Dios jeme tʉs̈ajyu'tway, ayé is̈actujawigap nat ʉ̱ tʉtsʉ̱na, mit mijchat nunca inganimaraugap icots, ne ingani-e'pcap nat ique's̈,

³⁸ne inganimutangap injo̱tni'jcat lo que inʉmpay, ni'c ingacupʉjcap ayé i-ajyu'tway je'.

³⁹Inche'ngap mam itsʉ̱na ja'yic Dios ilibruni'c, ni'c mijchat is̈jawiga jem is̈aguepca vida jeme cacʉs̈ámpay, po ayé tsʉ̱napay ja'yic is̈actujawigap pa is̈cupʉjcáj ʉ̱.

⁴⁰Po ingawangap inmingawa'n mit ʉ̱ pa is̈aguepcawa'n vida jeme cacʉs̈ámpay.

⁴¹’Tʉngache'mp pa jayajwat tʉs̈-oyninʉmgáj.

⁴²Po tʉ-is̈capcʉs̈p ni'c ingawangap Dios mit nu'pʉjʉn injo̱jtat.

⁴³Tʉmín ni'c tʉnte̱t Dios tʉs̈ajyu't, mit ʉ̱ is̈capʉctsougap. Po te jatu'c jayau je'yu nimanda̱jtʉp pa imi'nwa'n, ayé impʉctsougáj.

⁴⁴¿Nat incupʉjcawa'n? ni'c mini-oyninʉmgʉjʉp mijchatu mit ingache'ngap pa is̈-oyninʉmgáj ayé Dios tu'gujyuway.

⁴⁵Camnʉmgawit ni'c ʉ̱ tʉ-acusa̱tcʉs̈áj mit tʉnte̱t Dios. Ayé ley ija'yway Moisés is̈-acusa̱tcap, mit mijchat ayé incupʉjcap.

⁴⁶Ni'c te incupʉjcau ayé ley ija'yway Moisés, is̈cupʉjcájate ʉ̱, ni'c je' ja'y pa is̈-is̈capcáj ʉ̱.

⁴⁷Po te ingacupʉjcap ija'yway, ¿natpaj is̈cupʉjcawa'n lo que tʉnyʉmpay?