Read Sayula Popoluca San Juan 6 Bible Online

San Juan 6 - Sayula Popoluca bible

San Juan 6

¹Mit cʉs̈ Jesús nʉcs̈ tugalaguna-ájw Galilea jeme inʉ'jywayey Tiberias.

²Mit iguinatspoguiu may jayau ni'c i-is̈cau ayé milagrujat iwatcʉs̈away tu'nijatway.

³Cʉs̈ Jesús icu'jt en tu'c copac, nitsʉ̱nda̱jcʉu jem mit ipʉctampajyat.

⁴Mit tomo'c ayé ma̱s̈ʉjw pascua itsowí̱jcapay judíujat.

⁵Iyuc-e'jp Jesús, i-is̈ ni'c mingap mam je' may jayau. Inʉjmau Felipe: —¿Jʉm nas̈juygawa'n ma̱s̈anʉ̱n pa iguicaygawa'n ayʉ̱́j jayajwat?

⁶Po inʉjmau we'n pa iguiproba̱twa'n, ni'c je' ijawiu ti iwatámpay.

⁷Felipe iguipo'n: —Dos mil pesos ma̱s̈anʉ̱n igapa'táj pa cada jayau ma cay s̈ʉ̱n.

⁸Tu'c ipʉctampay inʉ'jy Andrés, Simón Pedro i-ajch, iguinʉjmau:

⁹—Yam itsʉ̱na tu'c ya̱wayna' jeme ijtʉpay cinco ma̱s̈anʉ̱n de cebada mit mechc acs̈wájat, po ¿ti ipa'táj ayé pa may jayajwat?

¹⁰Cʉs̈ Jesús inʉm: —Nʉmgaja jayajwat ma nitsʉ̱nda̱jcʉjʉ. Mit en ayé lugar ito'c mʉjy. Cʉs̈ nitsʉ̱nda̱jcʉjʉu como cinco mil jayajwat.

¹¹Mit Jesús ipʉc ayé ma̱s̈anʉ̱nwájat, mit iguinʉ́jmaj Dios ni'ctiyu̱s̈, imoygʉs̈ ipʉctampajyat, mit ipʉctampajyat imoygau jeme tsʉ̱ngaway jem, mit imoygawey acs̈, pʉjʉnu iguiwángaj.

¹²Mit icú̱s̈cʉjʉj, inʉmgʉs̈au ipʉctampajyat: —Apiumújca pedazuwájat jeme icaytangaway, pa magatogoy neti.

¹³Cʉs̈ i-apiumujcau mit i-apatscau doce ca'c mit ayé pedazuwájat jeme icaytangaway ayé cinco ma̱s̈anʉ̱n de cebada.

¹⁴Cʉs̈ ayé jayajwat igui-ís̈caj ayé milagru iwatway Jesús, inʉmgau: —Iyacs̈ta'cway ayʉ̱́j ayé profeta jeme nʉmicway pa imi'nwa'n en ayʉ̱́j mundu.

¹⁵Po iguijawij Jesús ni'c mingáj mit igui-actangáj pa iguipʉjcáj pa irejyat, je' pitugatu itu'gumu pa copacni'c.

¹⁶Icutsu'ij, manacta̱jcau ipʉctampajyat pa lagunani'c,

¹⁷mit icu'tcaj ajni'c, chu̱chigau iguinás̈ca ayé laguna pa Capernaum. Mit chitimítanu, mit Jesús canimimp mam je'jat.

¹⁸Mit ca's̈ʉ'c may nʉ̱ola lagunani'c ni'c s̈uj tu'c s̈e'm mʉgʉcway.

¹⁹Igui-acyo'ygaj ayé aj como siete kilómetro, i-is̈cau ni'c Jesús yo'yp laguna-yucuinm mit icutomip aye aj, mit je'jat ni-apʉ̱́tigʉjʉu.

²⁰Po je' inʉmgʉs̈au: —Campʉ̱tcawit ni'c ʉ̱ tʉmimp.

²¹Mit cʉs̈ je'jat ipʉctsougau oymanac ajugum. Mit coy jaran ayé aj en ayéna̱s̈ mam inʉs̈ca.

²²Icus̈ʉwij jatu'c s̈ʉjw, ayé jayajwat jeme tangaway tugalaguna-ájw i-is̈cau ni'c ca-itu jem más que tu'gu aj, mit i-is̈cau ni'c Jesús cacu'tu en ayé aj mit ipʉctampajyat, po ayé pʉctampajyat nʉs̈cau je'jatu.

²³Po japu̱t ajna'jat mingau Tiberias tom ayé lugar mam iguicáygaj ma̱s̈anʉ̱n cuandu el Señor iguibendiciona̱jt ayé ma̱s̈anʉ̱n.

²⁴Igui-ís̈caj ayé jayajwat ni'c Jesús capʉn jem, ne ipʉctampajyat, cu'tcau en ayé ajna'jat mit nʉs̈cau Capernaum iguiche'nga Jesús.

²⁵Mit iguipá̱tcaj Jesús tugalaguna-ájw, inʉmgajau: —Amayipay, ¿mu̱tij incojy yam?

²⁶Jesús ipo'ngʉs̈: —Iyacs̈ta'cway tʉnʉmgʉs̈ap ni'c is̈che'ngap caje' ni'c in-is̈cau milagrujat po ni'c incaygau ayé ma̱s̈anʉ̱n mit micu̱s̈cʉjʉu.

²⁷Camyos̈watca pa ayé cayan jeme togoyámpay, po yos̈wátca pa ayé cayan tanámpay, ni'c ayé is̈moygáj vida cacʉs̈ámpay. Mit ayé tʉmoygʉs̈áj ʉ̱ jeme tʉjatway jayau, ni'c tʉnte̱t Dios inʉmp ni'c oy lo que tʉnwatpay.

²⁸Cʉs̈ iguinʉmgajau: —¿Ti tʉnwatcáj pa tʉs̈watcawa'n lo que Dios iwampay?

²⁹Jesús ipo'ngʉs̈: —Ayʉ̱́j ayé lo que iwampay Dios pi watca, pi cupʉjca ayé i-ajyu'tway Dios.

³⁰Cʉs̈ iguinʉmgajau: —¿Ti milagru inwatp pa tʉ-e'pca mit pa tʉcupʉ́jca mi̱? ¿Ti inwatáj?

³¹Nate̱jtat ámbanuway icaygau tu'c cayan inʉ'jyway maná mam igatsʉ̱na nepʉn, as̈am itsʉ̱na ja'yic Dios ilibruni'c: “Imoygʉs̈ ma cayga cayan tsajpni'cway.”

³²Mit Jesús inʉmgʉs̈au: —Iyacs̈ta'cway tʉnʉmgʉs̈ap ni'c Moisés is̈camoygawu cayan iyacs̈ta'cway tsajpni'cway, po tʉnte̱t Dios is̈moygap tu'c cayan iyacs̈ta'cway jeme tsajpni'cway.

³³Ni'c ayé cayan iyacs̈ta'cway iyacpay Dios, ayé jeme manacway tsajpni'c, mit ayé imoygʉs̈p vida jayajwat ayʉ̱́j mundujway.

³⁴Iguinʉmgajau: —Señor, moyí̱jcac ayʉ̱́j cayan.

³⁵Jesús inʉmgʉs̈au: —Ʉ̱j ayé cayan iyacpay vida. Jeme mimpay mit ʉ̱, nunca cacayo'jcʉ̱́j, mit jeme tʉs̈cupʉcpay, nunca canʉ-u̱go'jcʉ̱́j.

³⁶Po tʉnʉmgʉs̈away ni'c maja is̈-e'pcapaj, is̈cacupʉjcap.

³⁷Nu'pʉjʉn jayau tʉs̈moypay tʉnte̱t Dios, mimp mit ʉ̱. Mit jeme mimpay mit ʉ̱, tʉmpʉctsowáj.

³⁸Ni'c tʉmanac tsajpni'c caje' pa tʉs̈watwa'n lo que ʉ̱jyu tʉnwampay, po pa tʉs̈watwa'n lo que iwampay Dios jeme tʉs̈ajyu'tway.

³⁹Mit ayʉ̱́j ayé iwampay tʉnte̱t Dios jeme tʉs̈ajyu'tway: Ni'c nu'pʉjʉn jayau tʉs̈mo'ámpay tʉga-actogoy nepʉn, po tʉ-acjutucta'c icojawa'n últimu s̈ʉjw.

⁴⁰Mit ayʉ̱́j ayé iwampay Dios jeme tʉs̈ajyu'tway, ni'c nu'pʉjʉn tʉs̈marawí̱cpay ʉ̱ Dios tʉs̈wáy mit tʉs̈cupʉcp, ma ijtʉ vida jeme cacʉs̈ámpay, mit ʉ̱ tʉnacjutucta'gáj icojawa'n últimu s̈ʉjw.

⁴¹Cʉs̈ judíujat awa'no'c inicótscʉjʉj ni'c Jesús inʉm: “Ʉ̱j ayé tʉcayan jeme tʉmanacway tsajpni'c.”

⁴²Mit inʉmgau: —¿Caje' ayʉ̱́j ayé Jesús, José iway, mit na-is̈capcajap ima̱m mit ite̱t? ¿Tini'cpaj iguinʉm ni'c manac tsajpni'c?

⁴³Jesús inʉmgʉs̈au: —Camtucotscac.

⁴⁴Nepʉn ca-oyap imi'n mit ʉ̱ te iga-acmimp tʉnte̱t Dios jeme tʉs̈ajyu'tway, mit ʉ̱ tʉnacjutucta'gáj icojawa'n últimu s̈ʉjw.

⁴⁵Ja'yic itsʉ̱na profetajat ilibruni'jcat: “Dios i-ajque's̈cʉs̈áj nu'pʉjʉn.” Jemni'c nu'pʉjʉn imaraway tʉnte̱t Dios mit igui-ajque's̈away je', mimp mit ʉ̱.

⁴⁶’Caje' ni'c tambʉn i-is̈way tʉnte̱t Dios, po ʉ̱ tʉn-is̈way ni'c tʉmín mam je'. Ʉ̱ tʉn-is̈way tʉnte̱t Dios.

⁴⁷Iyacs̈ta'cway tʉnʉmgʉs̈ap ni'c jeme tʉs̈cupʉgámpay ijtʉp vida jeme cacʉs̈ámpay.

⁴⁸Ʉ̱j ayé cayan iyacpay vida.

⁴⁹Inte̱jtat ámbanuway icaygau ayé maná mam igatsʉ̱na nepʉn, po ni-o'jcawu.

⁵⁰Ʉ̱ as̈am cayan jeme manacway tsajpni'c, pa jeme icayámpay ayé maga-o'c.

⁵¹Ʉ̱j ayé cayan iyacpay vida mit tʉmanac tsajpni'c. Mit te tu'c jayau icayp ayʉ̱́j cayan, tsʉ̱náj pa nu'pʉjʉn tiempu. Mit ayé cayan tʉnyagámpay, ayé as̈am tʉncuerpu ni'c ayé tʉnyagáj pa nu'pʉjʉn jayajwat ma itcʉjʉ vida.

⁵²Cʉs̈ judíujat ni-ucyo'tcʉjʉu, inʉmgau: —¿Nat ayʉ̱́j jayau nas̈moygáj icuerpu as̈am cayan pa nas̈caygawa'n?

⁵³Jesús inʉmgʉs̈au: —Iyacs̈ta'cway tʉnʉmgʉs̈ap: Te ingapʉctsougap tʉncuerpu as̈am cayan ʉ̱ jeme tʉjatway jayau, mit te ingapʉctsougap tʉnyipin as̈am nʉ', inga-aguepcáj vida jeme cacʉs̈ámpay.

⁵⁴Jeme ipʉctso̱pay tʉncuerpu as̈am cayan, mit tʉnyipin as̈am nʉ', ijtʉp vida jeme cacʉs̈ámpay, mit ʉ̱ tʉnacjutucta'gáj icojawa'n últimu s̈ʉjw.

⁵⁵Ni'c tʉncuerpu mit tʉnyipin is̈moygáj tu'c vida iyacs̈ta'cway.

⁵⁶Jeme ipʉctso̱pay tʉncuerpu as̈am cayan mit tʉnyipin as̈am nʉ', je' tsʉ̱nap mit ʉ̱, mit ʉ̱ tʉtsʉ̱nap mit je'.

⁵⁷Ʉ̱ tʉs̈ajyu't tʉnte̱t Dios jeme ca-o'cpay, mit ʉ̱ tʉnaguepey vida as̈am je'. We'ney jeme tʉs̈pʉctso̱pay as̈am cayan, tʉnmo'ámpey vida.

⁵⁸Ayʉ̱́j cayan as̈am ʉ̱ jeme tʉmanacway tsajpni'c. Caje' as̈am ayé maná inte̱jtat ámbanuway icaygaway, ni'c je'jat o'jcau. Jeme icaypay ayʉ̱́j cayan ʉ̱ tʉnyacpay tsʉ̱náj pa nu'pʉjʉn tiempu.

⁵⁹Jesús inʉm ayʉ̱́j cosajat mam i-adora̱tca judíujat cuandu i-ajque's̈ Capernaum.

⁶⁰Iguimáraugaj we'n, mayo'c ipʉctampajyat inʉmgau: —Mʉgʉgo'c ayʉ̱́j inʉmpay, ¿pʉn oyáj iguimarau ayʉ̱́j?

⁶¹Ijawiu Jesús ni'c ipʉctampajyat ni-ucyo'tcʉjʉu wename, mit inʉmgʉs̈au: —¿Incutu'mpʉjcap lo que tʉnyʉmpay?

⁶²Te is̈-e'pcap ni'c ʉ̱ jeme tʉjatway jayau tʉcu'tp pa mam tʉtsʉ̱najʉ'jc, ¿ti inwatcáj?

⁶³Espíritu Santu ayé iyacpay vida. Nacuerpujat nas̈camoygap vida. Ayé palabrajat tʉnʉmgʉs̈away, ayé iyacp Espíritu Santu, mit ayé is̈moygap vida.

⁶⁴Po itp cʉjtu'c mam mijchat jeme cacupʉjcapay. Ni'c Jesús ijawiu desde primeru pʉjnat ayé cacupʉjcapay, mit pʉn ayé iguito'ctʉgʉyámpay.

⁶⁵Mit inʉm: —Jemni'c tʉnʉmgʉ́s̈aj ni'c nepʉn ca-oyap imi'n mit ʉ̱ te iga-acmimp tʉnte̱t Dios.

⁶⁶Mit wejpu'n mayo'c ipʉctampajyat icuyaguigau je', mit igajamuyo'ygawu je'.

⁶⁷Cʉs̈ Jesús inʉmgʉs̈au ayé doce pʉctampajyat: —¿Inwangapey impichinganuwa'n?

⁶⁸Iguipo'n Simón Pedro: —Señor, ¿mit pʉn tʉnʉs̈cawa'n? Mi̱ is̈mucotscap mit palabrajat jeme iyacpay vida cacʉs̈ámpay.

⁶⁹Mit ʉjtsat tʉncupʉjcaway mit tʉ-is̈capcanup ni'c mi̱ miCristu, is̈wáy ayé Dios ca-o'cpay.

⁷⁰Jesús ipo'ngʉs̈: —Tʉcupiugʉs̈ midocejat, mit tu'c jayau de mijchat ayé Awayagatsna' ijayau.

⁷¹Mit je' cots de Judas, Simón Iscariote iway, ni'c ayʉ̱́j ayé iguito'ctʉgʉyámpay, mit je' tu'c de ayé doce pʉctampajyat.