Read Sayula Popoluca San Juan 7 Bible Online

San Juan 7 - Sayula Popoluca bible

San Juan 7

¹Mit cʉs̈ Jesús yo'y Galileajway na̱s̈. Igawanu iyo'ywa'n Judeajway na̱s̈ ni'c judíujat iguiche'ngap pa igui-ago'jcáj.

²Wejpu'n tomo'c ayé ma̱s̈ʉjw itsowí̱jcapay judíujat pa iguinijawigawa'n ayé titictʉcwájat mam itsʉ̱ngaj ampay jayajwat.

³Mit iguinʉmgajau ije̱wajyat: —Pichin yam mit nʉs̈ Judeajway na̱s̈ pa impʉctampajyat ma e'pca-ey lo que inwatpay.

⁴Ni'c nepʉn igawatp neti anu'mu te iwamp nu'pʉjʉn igui-is̈capcáj. Te inwatp ayʉ̱́j, acniguque's̈ʉ pa nu'pʉjʉn jayajwat ma e'pca.

⁵Ni'c ne ije̱wajyat igacupʉjcawu je'.

⁶Cʉs̈ Jesús inʉmgʉs̈au: —Canicoyp tu'c tiempu oyway pa ʉ̱, po mijchat inaguepí̱jcap tiempu.

⁷Jayajwat ayʉ̱́j mundujway ca-oyap is̈-angap mijchat, po ʉ̱ tʉs̈-angap ni'c tʉnactujawigʉs̈p ni'c iwatcap mal.

⁸Nʉs̈iga mijchat ma̱s̈ʉuni'c. Ʉ̱ tʉganinʉs̈áj ayé ma̱s̈ʉjw ni'c tʉs̈canicojyap tu'c tiempu oyway.

⁹Iguinʉmgʉ́s̈aj wename, je' tan Galileajway na̱s̈.

¹⁰Po cʉs̈ inʉ́s̈caj ije̱wajyat, je' nʉcs̈ey ma̱s̈ʉuni'c, po iga-actujawiwu nepʉn, ni'c nʉcs̈ anu'mu.

¹¹Mit judíujat iguiche'ngau je' ma̱s̈ʉuni'c, mit inʉmgau: —¿Jʉm itsʉ̱na aye?

¹²Mit ayé jayaujuc ni-ucyo'tcʉjʉu ti iwatpay Jesús. Una̱c inʉmgau ni'c iwatp oy, po ja-una̱c inʉmgau ni'c ca̱j, ni'c je' iwe̱jta̱jcʉs̈puc jayajwat.

¹³Po nu'pʉjʉjnat anu'mu i-ampiuga de je', nic ipʉ̱tcau judíujat.

¹⁴Po icojy es̈pu̱t ma̱s̈ʉjw, Jesús tʉgʉy templuni'c mit i-ajque's̈cʉs̈au.

¹⁵Mit nigu-épigʉjʉu judíujat, inʉmgau: —¿Nat iguijato'c ayʉ̱́j jayau? ni'c cani-estudia̱tp as̈am ʉjtsat.

¹⁶Jesús ipo'ngʉs̈: —Ayʉ̱́j ama̱s̈an tʉnajque's̈pay caje' tʉnje', po ije' ayé Dios jeme tʉs̈ajyu'tway.

¹⁷Jeme iwampay iguiwatwa'n Dios iwampay, je' ijawiyáj te Dios iyac ayé ama̱s̈an o te ʉ̱jyu tʉcotsp.

¹⁸Jeme cotspay je'yu, iche'mp pa jayajwat igui-oyninʉmgáj, po jeme iche'mpay ma igui-oyninʉmac ayé igui-ajyu'tway, ayé jayau iwatp iyacs̈ta'cway, mit igawe̱tp nepʉn.

¹⁹’¿Is̈camoygawu ley Moisés? Mit netu'c jayau mam mijchat igajayaumayp ayé ley. ¿Tini'c is̈che'ngap pa is̈ago'jcáj?

²⁰Iguipo'ngau ayé jayaujuc mit inʉmgau: —Inaguep demo̱nyu, ¿pʉn is̈che'mp pa is̈ago'gáj?

²¹Jesús ipo'ngʉs̈: —Tʉnwat tu'c cosa mit minigu-épigʉjʉp minu'pʉjʉjnat.

²²Iyacs̈ta'cway Moisés iyac orden pa is̈marca̱tcawa'n tu'c jayau. Po ayé caje' Moisés iyac, iyac inte̱jtat ámbanuway. Mit inmarca̱tcap tu'c jayau po'cs̈ans̈ʉuni'c.

²³Te inmarca̱tcap tu'c jayau po'cs̈ans̈ʉuni'c pa is̈cumplia̱tcajawa'n Moisés iley, ¿is̈mu-awa'nigap ni'c tʉnac-oytamp jaran tu'c jayau po'cs̈ans̈ʉuni'c?

²⁴Camtʉ'tsjuzga̱tca as̈am ique's̈ tu'c jayau, po juzgá̱tca iyacs̈ta'cway.

²⁵Mit cʉs̈ una̱c jayajwat Jerusalénway inʉmgau: —¿Caje' ayʉ̱́j ayé iche'ngapay pa igui-ago'jcawa'n?

²⁶E'pca ni'c je' cotsp mam igui-e'pca nu'pʉjʉjnat mit iganʉmgajap neti. ¿Is̈jawiga autoridajat ijawigap ni'c iyacs̈ta'cway ayʉ̱́j ayé Cristu i-ajyu'támpay Dios.

²⁷Po ayʉ̱́j jayau najawigap jʉm imijn, po imi'nwa'n Cristu, nepʉn igajawiyáj jʉm imijn.

²⁸Cʉs̈ Jesús i-ajque's̈ templuni'c, je' cots mʉgʉc mit inʉmgʉs̈au: —Ʉ̱ is̈-is̈capcap mit injawigap jʉm tʉmijn, po tʉgaminu ʉ̱jyu, po Dios jeme tʉs̈ajyu'tway, ayé iwatp iyacs̈ta'cway mit ayé inga-is̈capcap.

²⁹Po ʉ̱ tʉnis̈cap je', ni'c tʉmín mam je', mit je' tʉs̈ajyu't.

³⁰Mit cʉs̈ iche'ngajau ilaj pa igui-actangawa'n, po nepʉn iga-actanu ni'c canicoyp hora.

³¹Mit mayo'c ayé jayaujuc icupʉjcaway je', mit inʉmgau: —Minway Cristu, mit iwatway may milagru ni'c itpate ti iguiwatwa'n.

³²Fariseujat imaraugau ayé jayaujuc ni'c we'n ini-ucyo'tcʉjʉ de Jesús, mit judíujat imʉjpa̱nijat mit fariseujat i-ajyu'tcau comandantejat pa igui-actangawa'n.

³³Mit cʉs̈ Jesús inʉmgʉs̈au: —Tʉtsʉ̱námnaj mit mijchat jatu'c tiempuwáyu, mit cʉs̈wa'n tʉnʉs̈áj mam itsʉ̱na Dios jeme tʉs̈ajyu'tway.

³⁴Ʉ̱ is̈che'ngáj, mit is̈capa̱tcáj. Mit mam tʉtsʉ̱nawa'n, mijchat ca-oyáj incóyga.

³⁵Cʉs̈ judíujat inʉmgau je'jatu: —¿Pa jʉm inʉs̈wa'n ayʉ̱́j ni'c nagapa̱tcáj? ¿Nʉs̈ámpa'p mam itsʉ̱nga judíujat s̈is̈cada'guicway mam itsʉ̱nga pe'ta̱majyat, mit i-ajque's̈cʉs̈áj pe'ta̱majyat?

³⁶¿Ti inʉmo'jcʉp ayʉ̱́j inʉmway: “Ʉ̱ is̈che'ngáj mit is̈capa̱tcáj, mit mam tʉtsʉ̱nawa'n, mijchat ca-oyáj incóyga”?

³⁷Icojy últimu s̈ʉjw cuandu iguitsóugaj más oymanac ayé ma̱s̈ʉjw, Jesús nitenda̱jcʉu mit cots mʉgʉc, inʉm: —Te tu'c jayau nʉ-u̱go'jcʉp, ma mi'n mit ʉ̱, mit ma u'c.

³⁸Ni'c jeme nʉ-u̱cpay, ayé as̈am jeme tʉs̈cupʉcpay. As̈am itsʉ̱na ja'yic: tanáj ijo̱tni'c as̈am tu'c mʉjnʉ' pujʉ'cpay pa iguimo'áj vida pa siempre.

³⁹Ayʉ̱́j inʉmo'jcʉu pa jeme ipʉctsougámpay ayé Espíritu Santu jeme iguicupʉjcapay je', ni'c canimimp Espíritu Santu ni'c Jesús canicu'tp oymanac tsajpni'c.

⁴⁰Mit cʉs̈ una̱c de ayé jayaujuc iguimáraugaj inʉmway Jesús, inʉmgau: —Iyacs̈ta'cway ayʉ̱́j ayé profeta i-ajyu'tway Dios.

⁴¹Ja-una̱c inʉmgau: —Ayʉ̱́j ayé Cristu jeme nʉmicway pa imi'nwa'n. Po ja-una̱c inʉmgau: —¿Is̈jawiga Galilea imi'nwa'n ayé Cristu jeme i-ajyu'támpay Dios.

⁴²Ja'yic itsʉ̱na Dios ilibru ni'c Cristu pichináj rey David ifamiliani'c, mit mi'náj nʉ'jcopacni'c Belén mam itsʉ̱naj David.

⁴³Mit cʉs̈ ayé jayajwat catsʉ̱ngawu en acuerdu nat imijn Jesús.

⁴⁴Mit una̱c iwangau igui-actangawa'n je', po nepʉn ca-oyawu igui-actamp.

⁴⁵Mit comandantejat pitujcawatu mam itsʉ̱nga judíujat imʉjpa̱nijat mit fariseujat, mit je'jat iguinʉmgajau: —¿Tini'c is̈camumínga ayé jayau?

⁴⁶Comandantejat ipo'ngau: —¡Nunca cani-itp tu'c jayau cotspay as̈am ayʉ̱́j jayau icots!

⁴⁷Cʉs̈ fariseujat iguipo'ngau: —¿Mijchat is̈we̱jta̱jcawayey?

⁴⁸¿Is̈jawiga itáj tu'c jefe o tu'c fariseu icupʉcpay ayé?

⁴⁹Po ayʉ̱́j jayajwat iga-is̈capcapay ley, maldicioná̱tijcat ayé.

⁵⁰Mit Nicodemo jeme oyway tsu'm mam Jesús, imunipʉjcʉs̈ʉwey je'jat, mit inʉmgʉs̈au:

⁵¹—¿Is̈jawiga nalejyat natujuzga̱tcap tu'c jayau te nagamarajwʉ'cp, mit te nagajawip ti iwatway?

⁵²Je'jat iguipo'ngau: —¿Is̈jawi mi̱ migalileajwayey? Che'n mam itsʉ̱na ja'yic Dios ilibruni'c, mit in-e'páj ni'c nunca canimimp tu'c profeta Galileajway na̱s̈ i-ajyu'tway Dios.

⁵³Mit cada jayau nʉs̈cau itʉcmat.