Read Sayula Popoluca San Juan 8 Bible Online

San Juan 8 - Sayula Popoluca bible

San Juan 8

¹Mit Jesús nʉcs̈ en ayé copac inʉ'jy los Olivos.

²Mit jopoyít pituc pa templuni'c mit nu'pʉjʉn jayajwat mingau mam je'. Mit initsʉ̱ndá̱jcʉj, i-ajque's̈cʉau.

³Mit cʉs̈ fariseujat mit jeme i-ajque's̈capay ley iguimumingajau tu'c to's̈ay icupa̱tigaway mam ichajyo'jy. Mit je' iyajcau es̈pu̱tum,

⁴mit inʉmgajau: —Amayipay, ayʉ̱́j to's̈ay icupa̱tigau meru mam ichajyo'jy.

⁵Mit Moisés ileyni'c nas̈manda̱tcap napójcaja mit tsa' to's̈ajyat as̈am ayʉ̱́jway. ¿Mi̱j te, ti inyʉmp?

⁶Po inʉmgau wename ni'c iche'ngajap ilaj pa igui-acusa̱tcawa'n. Po Jesús inico'udá̱jcʉj, ituja'y icʉ'jʉjp na̱s̈ni'c.

⁷Mit siguia̱t igui-ucyo'tca, mit je' ca's̈ʉ'c mit inʉmgʉs̈au: —Te itp tu'c jayau mam mijchat iganiwatpay mal, ma ca'jtsʉ'jca tu'c tsa' ayé to's̈ay.

⁸Mit inico'uda̱jcʉjatu, siguia̱t ja'ypay na̱s̈ni'c.

⁹Po je'jat iguimáraugaj we'n, nigujawigʉjʉu ni'c iwatcap mal, mit cʉjtu'c cʉjtu'c ipíchingaj desde na'waywájat hasta ya̱wayna'jat, mit Jesús je'yu tan mit ayé to's̈ay jeme iyajcaway es̈pu̱tum.

¹⁰Mit ica's̈ʉ'jc Jesús, igaja-is̈u nepʉn, aye'yu to's̈ay tan. Inʉjmau: —To's̈ay, ¿jʉm itsʉ̱nga jeme is̈-acusa̱tcaway? ¿Is̈cacondena̱tu nepʉn?

¹¹Je' iguinʉjmau: —Nepʉn, Señor. Cʉs̈ Jesús inʉjmau: —Ne ʉ̱ tʉgacondena̱tpey. Nʉs̈ mit camjawat mal.

¹²Jesús imucotscʉs̈atu, inʉm: —Ʉ̱ as̈am tʉluz tʉnta'cs̈cʉs̈pay nu'pʉjʉn jayajwat. Jeme tʉs̈natspoguipay cayo'yáj mam i-it ma̱jlat, ni'c ayé mal as̈am tu'c chitimic, po ijtʉ̱́j ayé luz igui-actu-e'pcámpay mam i-it vida cacʉs̈ámpay.

¹³Cʉs̈ fariseujat iguinʉmgajau: —Mi̱jyu is̈actujawigap lo que inwatpay. Jemni'c caje' iyacs̈ta'cway lo que inyʉmpay.

¹⁴Jesús inʉmgʉs̈au: —Te ʉ̱jyu tʉ-actujawigʉs̈p lo que tʉnwatpay, po majawe'naj iyacs̈ta'cway lo que tʉnyʉmpay, ni'c tʉnjawip jʉm tʉmijn mit jʉm tʉnʉcs̈wa'natu, po mijchat ingajawigap jʉm tʉmijn ne jʉm tʉnʉcs̈wa'n.

¹⁵Mijchat injuzga̱tcap tu'c jayau as̈am ique's̈. Mit ʉ̱ tʉngajuzga̱tp nepʉn.

¹⁶Mit te ʉ̱ tʉjuzga̱tp, tʉjuzga̱tp yacs̈ic ni'c caje' ʉ̱jyu po tʉjuzga̱tcap ʉ̱ mit tʉnte̱t Dios jeme tʉs̈ajyu'tway.

¹⁷Mit ja'yic itsʉ̱na inleyni'jcat ni'c iyacs̈ta'cway lo que inʉmgapay mechc jayajwat.

¹⁸Ʉ̱ tʉ-actujawigʉs̈p lo que tʉnwatpay, mit tʉnte̱t Dios jeme tʉs̈ajyu'tway is̈actujawigapey lo que tʉnwatpay.

¹⁹Je'jat iguinʉmgajau: —¿Jʉm itsʉ̱na inte̱t Dios? Jesús ipo'ngʉs̈: —Ʉ̱ is̈ca-is̈capcap ne inga-is̈capcapey tʉnte̱t Dios. Pi is̈-is̈capcagate ʉ̱, inis̈capcájate tʉnte̱t Dios.

²⁰Jesús cots wename cuandu itsʉ̱naj mam iguiyájca ofrenda mam i-ajque's̈ templuni'c. Mit nepʉn iguiga-actanu ni'c canicoyp hora.

²¹Jesús inʉmgʉs̈awatu: —Ʉ̱ tʉnʉs̈áj mit is̈che'ngáj po mi-o'jcáj mit ayé mal inwatcapay. Mam ʉ̱ tʉnʉs̈wa'n, mijchat ca-oyáj incóyga.

²²Cʉs̈ judíujat inʉmgau: —¿Is̈jawiga ni-ago'jcʉ̱́j ni'c inʉmp: Mam ʉ̱ tʉnʉs̈wa'n, mijchat ca-oyáj incóyga?

²³Mit inʉmgʉs̈au: —Mijchat mina̱s̈ni'jcatway, mit ʉ̱ tʉtsajpni'cway. Mijchat impensa̱tcap solo itpay en ayʉ̱́j mundu mit ʉ̱ tʉngawamp itpay en ayʉ̱́j mundu.

²⁴Jemni'c tʉnʉmgʉ́s̈aj ni'c mi-o'jcáj mit ayé mal inwatcapay, ni'c te is̈cacupʉjcap ni'c ʉ̱j ayé tʉs̈ajyu'tway Dios, mi-o'jcáj mit ayé mal inwatcapay.

²⁵Cʉs̈ iguinʉmgajau: —¿Mipʉn mi̱? Cʉs̈ Jesús inʉmgʉs̈au: Lo que tʉnʉmgʉs̈away desde primeru.

²⁶Tʉnaguep mayo'c cosajat pa tʉnʉmgʉs̈awa'n mit pa tʉjuzga̱tcʉs̈wa'n. Po jeme tʉs̈ajyu'tway, ayé iyacs̈ta'cway. Mit lo que tʉnmaraway iguinʉjm je', ayʉ̱́j tʉnyʉmgʉs̈ap jayajwat ayʉ̱́j mundujway.

²⁷Po igajawigawu ni'c je' cots de ite̱t Dios.

²⁸Cʉs̈ Jesús inʉmgʉs̈au: —Cuandu is̈ajcu'tcáj cunu̱s̈ni'c ʉ̱ jeme tʉjatway jayau, wejpu'n injawigáj ni'c ʉ̱j ayé tʉs̈ajyu'tway Dios, mit ʉ̱jyu tʉngawatp neti, po as̈am tʉs̈ajque's̈ap tʉnte̱t Dios, wename-ey tʉs̈nʉm.

²⁹Ni'c Dios jeme tʉs̈ajyu'tway tsʉ̱nap mit ʉ̱, mit tʉnte̱t Dios tʉs̈canicuyaguip tʉntu'gumu ni'c tʉnwatí̱jcap iwampay je'.

³⁰Iguinʉjm we'n, mayo'c jayajwat iguicupʉjcau je'.

³¹Cʉs̈ Jesús inʉmgʉs̈au ayé judíujat iguicupʉjcaway je': —Te mijchat inmutangap lo que tʉnyʉmpay, iyacs̈ta'cway mijatcáj tʉ̱pʉctampajyat,

³²mit inis̈capcáj lo que iyacs̈ta'cway, mit lo que iyacs̈ta'cway is̈acnilibra̱tcʉjʉ̱j.

³³Cʉs̈ iguipo'ngau: —Ʉjtsat tʉpichingau Abraham ifamiliani'c mit nunca tʉganitsʉ̱ngap to'ctʉgʉyic mit nepʉn. ¿Tini'cpaj is̈nʉm ni'c tʉjatcáj libre?

³⁴Jesús ipo'ngʉs̈: —Iyacs̈ta'cway tʉnʉmgʉs̈ap ni'c nu'pʉjʉn iwatpay mal, to'ctʉgʉyic itsʉ̱na mit ayé ma̱jlat.

³⁵Mit tu'c to'ctʉgʉyicway ca-oyap iguimutájna ijayc itʉjc, po je' iway imutanáj pa siempre.

³⁶Jemni'c te Dios iway is̈libra̱tcáj, mijatcáj libre iyacs̈ta'cway.

³⁷Tʉnjawip ni'c mijchat mipichingau Abraham ifamiliani'c, po inwangap is̈ago'jcáj ni'c ingamutangap lo que tʉnyʉmpay.

³⁸Ʉ̱ tʉnyʉmp jeme tʉn-is̈way iguiwat tʉnte̱t Dios, mit mijchat inwatcap lo que inmaraugaway iguiwat inte̱jtat.

³⁹Mit iguinʉmgajau: —Ʉjtsat tʉnte̱jtat Abraham. Jesús inʉmgʉs̈au: —Te mijchat is̈wajyatate Abraham, inwatcájate as̈am Abraham iguiwajt.

⁴⁰Po jinap inwangap is̈ago'jcáj mit ʉ̱ tʉnʉmgʉs̈au lo que iyacs̈ta'cway as̈am tʉs̈nʉjmau Dios. Abraham igawatu as̈am mijchat.

⁴¹Mijchat inwatcap as̈am inte̱jtat iguiwat. Cʉs̈ iguinʉmgajau: —Ʉjtsat tʉgaje'jat pejpejnat. Tʉnaguepcap tu'gu tʉnte̱jtat, mit ayé Dios.

⁴²Cʉs̈ Jesús inʉmgʉs̈au: —Pi téjtatajate Dios, iyacs̈ta'cway is̈wangájate ʉ̱ ni'c tʉpichin mam Dios mit tʉmín yam. Mit tʉgaminu ʉ̱jyu, po je' tʉs̈ajyu't.

⁴³¿Tini'c is̈ca-entendiá̱tca lo que tʉnyʉmpay? Ni'c ca-oyap is̈márauga lo que tʉnyʉmpay.

⁴⁴Mijchat inte̱jtat Awayagats ayé, mit inwato'jcʉjʉp lo que iwampay inte̱jtat. Je' tu'c ago'cpay desde ámbanu, mit igamutanu lo que iyacs̈ta'cway ni'c igawatp iyacs̈ta'cway. Iguinʉmwa'n tu'c we̱t, aye ni'c yujic iguiwat, ni'c je' tu'c we̱tpay mit je' i-acchu̱chip nu'pʉjʉn we̱t.

⁴⁵Po ʉ̱ is̈cacupʉjcap ni'c tʉnyʉmp iyacs̈ta'cway.

⁴⁶¿Pʉn mam mijchat icomproba̱tp ni'c tʉnwatp mal? Mit te tʉnyʉmp iyacs̈ta'cway, ¿tini'c is̈cacupʉjcap?

⁴⁷Jeme iguiwayjátway Dios, imarap lo que inʉmpay Dios. Jemni'c is̈camárauga lo que inʉmpay ni'c mijchat caje'jat is̈wajyat Dios.

⁴⁸Cʉs̈ judíujat iguinʉmgajau: —Iyacs̈ta'cway lo que tʉnyʉmgapay ni'c mi̱ miSamariajway mit inaguep demo̱nyu.

⁴⁹Ipo'ngʉs̈ Jesús: —Ʉ̱ tʉnga-aguep demo̱nyu po tʉn-oyninʉmp tʉnte̱t Dios, mit mijchat is̈malninʉmgap.

⁵⁰Po ʉ̱ tʉngache'mp pa jayajwat tʉs̈-oyninʉmgáj. Itp pʉn iche'mpay pa tʉs̈-oyninʉmáj, mit je' inʉmáj lo que iyacs̈ta'cway.

⁵¹Iyacs̈ta'cway tʉnʉmgʉs̈ap ni'c jeme ijayaumaypay lo que tʉnyʉmpay, nunca ca-o'gáj.

⁵²Cʉs̈ judíujat iguinʉmgajau: —Jinap que tʉnjawigap ni'c inaguep demo̱nyu. Abraham o'cway mit we'ney profetajat, mit mi̱ inyʉmp ni'c jeme ijayaumaypay lo que mi̱ inyʉmpay, nunca ca-o'gáj.

⁵³¿Is̈jawi mi̱ más mi-oyninʉmic que Abraham nate̱jtat ámbanuway mit profetajat jeme o'jcaway? ¿As̈am pʉn inyiwajtʉ mi̱?

⁵⁴Ipo'ngʉs̈ Jesús: —Te ʉ̱jyu tʉni-oyninʉjmʉp, caservia̱tp lo que tʉnyʉmpay. Tʉnte̱t Dios ayé tʉs̈-oyninʉmpay, mit mijchat inyʉmgap ni'c je' inDiosat.

⁵⁵Po mijchat inga-is̈capcap je', po ʉ̱ tʉnis̈cap. Mit te tʉnyʉmp ni'c tʉnga-is̈cap je', tʉjatáj tu'c we̱tpay as̈am mijchat. Po tʉnis̈cap je' mit tʉnjayaumayp lo que inʉmpay.

⁵⁶Abraham inte̱jtat ámbanuway ji'c ijo̱jt ni'c ijawiu ni'c i-e'páj ayé s̈ʉjw tʉntumi'námpay, mit i-is̈ mit ji'c ijo̱jt.

⁵⁷Cʉs̈ iguinʉmgajau judíujat: —Ingani-aguep cincuenta añu, ¿mit in-is̈way Abraham?

⁵⁸Jesús inʉmgʉs̈au: —Iyacs̈ta'cway tʉnʉmgʉs̈ap ni'c antes i-ijt Abraham, ʉ̱ tʉ-itnup.

⁵⁹Cʉs̈ ipʉjcau tsa' pa iguipojcajawa'n, po Jesús niguyu'jtsʉu, mit pichin templuni'c. Mit je' nas̈tuc mam je'jat itsʉ̱nga, mit nʉcs̈.